ရွှေဘိုမြို့ မြို့မဈေးကြီး မနေ့ မေလ ၁၅ ရက်တုန်းက မီးလောင်ခဲ့မှုမှာ ပျက်စီးဆုံးရှုံးမှုတန်ဖိုးဟာ ဆိုင်ခန်းရှင်တွေပြောတဲ့ပမာဏနဲ့ မီးသတ်ရဲ့ တွက်ချက်မှုဟာ သိန်းသောင်းချီ ကွာဟနေပါတယ်။
ရွှေဘိုမြို့မဈေးကြီးမှာ မနေ့ မေလ ၁၅ ရက် မနက် ၂ နာရီဝန်းကျင်မှာ မီးအကြီးအကျယ်လောင်ခဲ့လို့ ဆိုင်ခန်းပေါင်း ၁,၅၀၀ ကျော်ထဲက ၉၀၀ ကျော် မီးထဲ ပါသွားခဲ့တာပါ။
ဈေးဆိုင်ခန်း ပိုင်ရှင်တွေကတော့ သူတို့အကြမ်းဖျင်းတွက်ချက်ထားတာတောင် မီးကြောင့် ဆုံးရှုံးမှု ကျပ်သိန်းပေါင်း တစ်သိန်းသုံးသောင်း(၁၃၀,၀၀၀)ကျာ်ရှိတယ်လို့ ပြောဆိုနေကြပါတယ်။
ရွှေဘိုခရိုင် မီးသတ်ဦးစီးဌာနရဲ့ တွက်ချက်မှုမှာတော့ ဆုံးရှုံးမှု ကျပ်သိန်းပေါင်း တစ်သောင်းခွဲကျော်ရှိတယ်လို့ ဆိုတာကြောင့် ဆုံးရှုံးမှုတန်ဖိုးကွဲလွဲမှုတွေလည်း ရှိနေတာပါ။
''ကျုပ်ရယ်၊ အမေဖြစ်သူရယ်၊ သမီးဖြစ်သူရယ်ရဲ့ ဆိုင် ၃ ဆိုင် ပါသွားတယ်။ ကျုပ်တစ်ဦးတည်းတင် ကုန်က သိန်း ၂၀၀ ကျော်၊ ဆိုင်ခန်းက ၁၂၅ သိန်း၊ သမီးကလည်း သိန်း ၁၀၀ ကျော်ဖိုး ကုန်တွေပါတယ်။ ငပိအိုးတွေ လောင်နေတာတွေ့ခဲ့ရပေမဲ့ ပွဲလန်းခင်းမယ့်သူကို ရောင်းမယ့် ငါးခြောက်လိပ် သိန်း ၄၀ ဖိုးဆိုတာ ပြာပုံတောင် မကျန်တော့ဘူး။ မီးမလောင်ခင်ကားနဲ့ သယ်သွားကြပြီတဲ့ အဲလိုကြားတာပဲ။'' လို့ ဆိုင်ခန်းမီးထဲပါသွားသူ တစ်ဦးက ပြောပါတယ်။
ဈေးကြီးနဲ့ မြို့မမီးသတ်စခန်းဟာ ပေ ၁၀၀ ခန့်သာ ဝေးပေမဲ့ အချိန်မီ မီးငြိမ်းသတ်နိုင်မှု မရှိခဲ့တာကို ဆိုင်ခန်းပိုင်ရှင်တွေက မေးခွန်းထုတ်ကြပါတယ်။
''ဈေးနဲ့ မီးသတ်က ကပ်နေတာ။ တအုန်းအုန်းလောင်နေတာ မီးဥသြလည်းမဆွဲပါလားတော့။ ကျုပ်တို့အဝေးနေသူတောင် နိုးနေပြီ။ တနေရာကနေ စတာမဟုတ်ဘူးတဲ့။ လေးနေရာမှာတပြိုင်တည်းလောင်တာမျိုး။'' ဈေးဆိုင်ခန်းပိုင်သူတစ်ဦးက ပြောပါတယ်။
ဒီမီးလောင်မှုမှာ ဆုံးရှုံးမှုတန်ဖိုး ကျပ်သိန်း ၇၀၀ ခန့်ရှိတယ်လို့ စစ်ကောင်စီ ထိန်းချုပ်ထားတဲ့ မြန်မာ့အသံသတင်းကနေ ကြေညာသွားတယ်လို့ ဆိုင်ရှင်တွေက ပြောပါတယ်။
ရွှေဘိုဈေးကြီး မီးလောင်မှုကြောင့် ဒီဈေးကို အမှီပြု လုပ်ကိုင်စား သောက်နေရတဲ့ အလုပ်သမားထောင်ချီကတော့ အလုပ်လက်မဲ့ဘဝနဲ့ စားဝတ်နေရေးအခက်ကြုံမှာကို စိုးရိမ်နေကြပါတယ်။
ရွှေဘိုမြို့မဈေးကြီးဟာ မသမာသူတွေရဲ့ရှို့မီးကြောင့် လောင်ကျွမ်းခဲ့တာလို့ ရွှေဘိုခရိုင်မီးသတ်ဦးစီးဌာနက ထုတ်ပြန်ပြောဆိုထားပြီး မီးရှို့တဲ့တရားခံတွေကို ပုဒ်မ ၁၈၁/၂၀၂၁ (၆) ၁ အရ အရေးယူဆောင်ရွက်နိုင်ရေးစီစဉ်ဆောင်ရွက်နေတယ်လို့ ဆိုပါတယ်။
ရွှေဘိုမြို့ နယ်ပြည်သူ့ကာကွယ်ရေးတပ်ဖွဲ့ ကတော့ ညမထွက်ရအမိန့်ကြောင့် မြို့စောင့်ညကင်းတွေမရှိ၊ ပြည်သူတွေ အပြင်မထွက်ရချိန် စစ်ကောင်စီတပ်တွေလုံခြုံရေးယူထားတဲ့ရွှေဘိုနန်းတော်အနီးမှာရှိတဲ့ ဒီဈေးကြီး မီးလောင်ခဲ့ရတဲ့တရားခံဟာ စစ်ကောင်စီနဲ့အပေါင်းအပါတွေသာ ဖြစ်တယ်ဆိုပြီး ကြေညာချက်ထုတ်ထားတာတွေ့ရပါတယ်။
ဘီဘီစီ အနေနဲ့ မီးလောင်ရတဲ့ အကြောင်းရင်းကို သီးခြား အတည်ပြုနိုင်ခြင်း မရှိသေးပါဘူး။
ဓာတ်ပုံ ရင်းမြစ်, CJ
