စစ်အာဏာသိမ်းဆန့်ကျင်ရေးဆန္ဒပြပွဲတွေမှာ သေဆုံးရသူ ၅၂၁ ဦး ရှိလာ

တိုက်ရိုက် ထုတ်လွှင့်ချက်

1. ၃၀ မတ် ၂၀၂၁ဒလမြို့နယ်မှာ မတ်၂၇ မနက်ပစ်ခတ်မှုအတွင်း ဒဏ်ရာရသူ ၁ ဦး ထပ်မံသေဆုံး, သေဆုံးသူ ၈ ဦးအထိရှိလာ

   ဒလမြို့နယ်မှာ မတ်၂၇ ရက် မနက်အစောပိုင်း ပစ်ခတ်မှုတွေကြောင့် ကျည်ထိမှန်ခဲ့သူတွေထဲက ၂၄နှစ်အရွယ်ရှိ မောင်အာကာဇော်မှာ မတ်၂၉ရက်ညပိုင်းက သေဆုံးသွားခဲ့တယ်လို့ မြို့ခံတွေထံကသိရပါတယ်။

   သေဆုံးသူဟာ ဒလမြို့နယ် ကမာကဆစ်ရပ်ကွက်မှာနေထိုင်သူဖြစ်ပါတယ်။

   "အဲဒီနေ့က ဒဏ်ရာရသူတွေထဲ မနက်အထိ ကုသမှုမခံရတဲ့သူတွေမနည်းဘူး။ ဘယ်သွားကုရမယ်မှန်းမသိကြဘူး။အဲဒီညက အံ့ကြီးရပ်ကွက်က ကုပေးတဲ့ဆရာဝန်ကိုလည်း နောက်နေ့ကျ စစ်တပ်က ဝင်ဆွဲတယ်။ ဆရာကတော့ရှောင်နေလို့ပါမသွားဘူး။ ဆေးရုံကလည်း ရဲစခနိးနဲ့ကပ်ရက်ဆိုတော့ ဘာမှလုပ်မရဘူး။ အခု​သေတဲ့သူတွေထဲ ညတွင်းချင်းဆုံးတာ ၃ယောက်ပဲ အချိန်မီကုသမခံရလို့ ဆုံးတဲ့သူတွေလည်းရှိတယ်"လို့ ဒလမြို့ခံတစ်ဦးကပြောပြပါတယ်။

   ဒလမြို့နယ်မှာ ပြီးခဲ့တဲ့မတ်၂၆ရက်နေ့က သမ္မတကမ်းခြေရပ်ကွက်က အမျိုးသမီး၂ ဦးကို ဆန္ဒပြရာမှာပါဝင်လို့ဆိုပြီး နေအိမ်တွေမှာဖမ်းဆီးခေါ်ဆောင်သွားရာကနေ ပြန်လွှတိပေးဖို့တောင်းဆိုရာက လူစုလူဝေးဖြစ်ပေါ်မှုကြောင့် တပ်နဲ့ရဲပူးပေါင်းအဖွဲ့က ပစ်ခတ်ခဲ့တာဖြစ်ပြီး မတ်၂၇ရက်မှာ ၇ ဦးသေဆုံးခဲ့ပြီး စုစုပေါင်း ၈ဦးသေဆုံးခဲ့ရပါတယ်။

   

   ဓာတ်ပုံ ရင်းမြစ်, CJ

2. ၃၀ မတ် ၂၀၂၁အမေရိကန်စင်တာ အပစ်ခံရမှုကို ရှုတ်ချကြောင်း သံအမတ်ကြီးထုတ်ပြော

   မတ်လ ၂၇ ရက်တုန်းက ရန်ကုန်မြို့ တက္ကသိုလ်ရိပ်သာလမ်းနဲ့ အင်းယားလမ်းထောင့်မှာရှိတဲ့ အမေရိကန်စင်တာ သေနတ်နဲ့ ပစ်ခတ်ခံရမှုကို ရှုတ်ချတဲ့အကြောင်း မြန်မာနိုင်ငံဆိုင်ရာအမေရိကန်သံအမတ်ကြီး သောမတ်စ် ဗိုက်ဒါက ထုတ်ပြောလာပါတယ်။

   ဒါ့ပြင် အာဏာသိမ်းပြီးကတည်းက အာဏာသိမ်းအဖွဲ့ရဲ့တပ်ဖွဲ့တွေကျူးလွန်နေတဲ့ ဘယ်လိုအကြမ်းဖက်မှုမျိုးကို မဆိုရှုတ်ချတယ်ဆိုပြီးတော့ လည်း သံအမတ်ကြီးရဲ့မှတ်ချက်စကားကို စင်တာရဲ့လူမှုကွန်ယက်မှာ ဒီနေ့ မတ်လ ၃၀ ရက်နေ့မှာ တင်ထားတာတွေ့ရပါတယ်။

   အမေရိကန်စင်တာဟာ ပိုမိုကောင်းမွန်တဲ့အနာဂတ်ပေါ်ထွန်းဖို့ အားထုတ်ခဲ့သူအားလုံးကို ကြိုဆိုခဲ့တာ ဆယ်စုနှစ်နဲ့ချီကြာမြင့်နေပြီဖြစ်ပြီး အမေရိကန်ပြည်ထောင်စုဟာ မြန်မာပြည်သူတွေကို ဆက်လက်ထောက်ခံသွားမယ်ဆိုတဲ့အချက်လည်းပါရှိပါတယ်။ မတ်လ ၂၇ ရက်နေ့က အမေရိကန်စင်တာ ပစ်ခတ်ခံရမှုကို သံရုံးရော စင်တာဘက်ကပါ အတည်ပြုခဲ့သလို တစ်ချက်မက အပစ်ခံရတဲ့ဒီဖြစ်စဉ်မှာ ထိခိုက်ဒဏ်ရာရသူမရှိခဲ့ဘူးလို့ သတင်းထုတ်ပြန်ခဲ့ပါတယ်။

3. ၃၀ မတ် ၂၀၂၁အကြမ်းဖက်မှုတွေရပ်ဖို့ ညီနောင်မဟာမိတ် ၃ ဖွဲ့က စစ်ကောင်စီကို သတိပေး

   မြန်မာနိုင်ငံမှာ ဖေဖော်ဝါရီ ၁ရက်ကစလို့ စစ်တပ်က အာဏာသိမ်းထားပြီးကတည်း ဆန္ဒဖော်ထုတ်နေတဲ့ ပြည်သူတွေကို အကြမ်းဖက် ပစ်ခတ် သတ်ဖြတ်နေတာတွေ ရပ်တန့်ဖို့၊ ပြည်သူတွေ တောင်းဆိုနေတဲ့ နိုင်ငံရေးပြဿနာကို အမြန်ဆုံးဆောင်ရွက်ဖို့ ညီနောင်မဟာမိတ် ၃ ဖွဲ့ဖြစ်တဲ့ ကိုးကန့် (MNDAA)၊ တအာင်း(TNLA)နဲ့ ရခိုင်(AA) တပ်တွေကကြေညာလိုက်ပါတယ်။

   ဒီကြေညာချက်ကို AA က သူ့ရဲ့ အင်တာနက်စာမျက်နှာမှာ မတ်လ ၃၀ ရက် ဒီနေ့ ရက်စွဲနဲ့ ထုတ်ပြန်ထားတာပါ။

   ဒီအချက်တွေကို မရပ်တန့်ဘဲ ဆက်လုပ်နေမယ်ဆိုရင် တိုင်းရင်းသားလူမျိုးပေါင်းစုံ၊ ဘဝတူ ညီနောင်တွေနဲ့အတူ မိမိကိုယ်မိမိ ခုခံကာကွယ်ရေးအတွက် ပူးပေါင်းဆောင်ရွက်သွားမယ်လို့ ဆိုပါတယ်။

   မြန်မာ့နွေဦးတော်လှန်ရေးမှာ ဆန္ဒဖော်ထုတ်နေကြတဲ့တိုင်းရင်းသားပြည်သူလူထုကို တပ်နဲ့ရဲက လက်ဖြောင့်သေနတ်သမားတွေ၊ ကျည်ဆန်အစစ်တွေ၊ လက်ဗစ်ဗုံးတွေသုံးပြီး အကြမ်းဖက် ဖြိုခွင်းနေလို့ ကလေးသူငယ် အပါအဝင် လူပေါင်း ၄၀၀ ကျော် သေဆုံး ခဲ့ပြီးဖြစ်တယ်ဆိုတာကို သိရှိတဲ့အကြောင်း ကြေညာချက်ထဲမှာပါဝင်ပါတယ်။

   ဒါ့အပြင် မတ်လ ၂၇ ရက် တစ်နေ့တည်းမှာတင် ပြည်သူလူထု အယောက် ၁၀၀ ကျော် သေဆုံးခဲ့ရတာကို စိတ်မကောင်း ဝမ်းနည်းရတဲ့အပြင် တပ်ရဲ့လုပ်ရပ်တွေကို ပြင်းထန်စွာ ရှုတ်ချတယ်လို့ အလေးထား ပြောထားပါတယ်။

   နိုင်ငံရေးပြဿနာကို နိုင်ငံရေးအရ လက်တွေ့ကျကျ ဖြေရှင်းနိုင်ဖို့ တစ်ဖက်သတ် အပစ်ရပ်တာကို ၂၀၁၉ ခုနှစ် စက်တင်ဘာလ ၉ ရက်ကနေ ၂၀၂၁ ခုနှစ် မတ်လ ၃၁ ရက်အထိ အဖြတ်လိုက်ခွဲပြီး အကြိမ်ကြိမ်ကြေညာခဲ့ပေမဲ့ တပ်က အာဏာသိမ်းပြီး အခုလို လုပ်ဆောင်နေတာတွေကြောင့် တဖက်သတ် အပစ်ရပ်တဲ့ကိစ္စကို ပြန်သုံးသပ်နေပြီလို့လည်း ဆိုပါတယ်။

   တဖက်မှာလည်း နယ်စပ်တည်ငြိမ်ရေး၊ ကိုဗစ်ရောဂါ ထိန်းချုပ်ကာကွယ်တားဆီးရေး၊ ပြည်သူ့လုံခြုံရေး၊ နိုင်ငံတကာ အကြမ်းဖက်တိုက်ဖျက်ရေးလုပ်ငန်း ကိစ္စတွေအတွက် ပူးပေါင်းဆောင်ရွက်ရတဲ့ အဖွဲ့အစည်းတွေနဲ့တော့ အရင်အတိုင်း ဆက်ပြီးဆောင်ရွက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။

   

   ဓာတ်ပုံ ရင်းမြစ်, AA

4. ၂၉ မတ် ၂၀၂၁စစ်ကောင်စီတပ်ဖွဲ့ဝင်တွေ ပစ်ခတ်မှုကြောင့် မြင်းခြံ မှာ ၃ ဦးသေဆုံး

   

   ဓာတ်ပုံ ရင်းမြစ်, CJ

   မတ်လ ၂၉ ရက်နေ့ မြင်းခြံမြို့မှာ စစ်ကောင်စီတပ်တွေပစ်ခတ်မှုကြောင့် အမျိုးသား ၃ ဦးသေဆုံးခဲ့တယ်လို့ မြင်းခြံမြို့ခံတွေက ဘီဘီစီကို ပြောပါတယ်။

   မြင်းခြံမြို့ ကသေဆုံးသူ‌တွေထဲက‌ တစ်ဦးကတော့ ကိုကျော်မင်းဇင်ဆိုသူနဲ့ နောက် တစ်ဦး သေဆုံးခဲ့တာဖြစ်ပြီး ဒဏ်ရာရသူ အဖမ်းခံရသူ တွေလည်း ရှိတယ်လို့ ကူညီကယ်ဆယ်ရေး လုပ်နေတဲ့ မြင်းခြံမြို့ခံက ပြောပါတယ်။

   ကျန်သေဆုံးသူတစ်ဦးကိုတော့ အတည်ပြုနေဆဲ ဖြစ်တယ်လို့လည်း သူကပြောပါတယ်။

   ဒါ့အပြင် ဦးခေါင်းကို ထိမှန်ထားသူအပါအဝင် နောက်ထပ် သုံးယောက်ထက်မနည်း ဒဏ်ရာရခဲ့တယ်လို့ ပြောပါတယ်။

   မတ်လ ၂၈ ရက်နေ့ကလည်း မြင်းခြံမြို့မှာ အမျိုးသမီးတစ်ဦး စစ်ကောင်စီတပ်တွေပစ်ခတ်မှုကြောင့် ကျည်ထိမှန်သေဆုံးခဲ့သလို ညပိုင်းမှာလည်း ကားပေါ်ခရီးသွားလိုက်ပါလာသူတစ်ဦး သေနတ်ကျည်ထိမှန်သေဆုံးခဲ့ပါတယ်။

   စစ်ကောင်စီက အာဏာသိမ်းယူခဲ့တာကို မြန်မာနိုင်ငံ တစ်ဝန်း ကန့်ကွက် ဆန္ဒပြပွဲမှုတွေအပေါ် စစ်တပ်နဲ့ ရဲတွေက လက်နက်တွေနဲ့ ပစ်ခတ် အကြမ်းဖက် နှိမ်နင်းမှုတွေရှိခဲ့တဲ့ အတွက် ခုခံ ကာကွယ်တဲ့ အနေနဲ့ တချို့မြို့တွေမှာ ပြန်လည်တိုက်ခိုက်တာတွေ ရှိနေပါတယ်။

5. ၂၉ မတ် ၂၀၂၁မြစ်ကြီးနား ရဲစခန်းနဲ့ မြဝတီ ဘဏ်အနီးမှာ ပေါက်ကွဲမှုဖြစ်

   မြစ်ကြီးနားမြို့ ရှိ အရင်က အမှတ် (၁) ရဲစခန်းလို့ ခေါ်တဲ့ မြို့မရဲစခန်းမှာ မတ်လ ၂၉ ရက် နေ့၁၁ နာရီ ၄၅ မိနစ် ဝန်းကျင်ကပေါက်ကွဲမှုတစ်ခုဖြစ်ခဲ့တယ်လို့ ဒေသခံတွေက ပြောပါတယ်။ပေါက်ကွဲမှု ဖြစ်ရတဲ့ အကြောင်းရင်းကိုတော့ မသိရဘူးလို့ ဆိုပါတယ်။

   ပေါက်ကွဲမှု ဖြစ်ပြီးနောက်ပိုင်းမှာတော့ ရဲစခန်း အနီးအနားက လမ်းတချိုကို ပိတ်ပြီးပိတ်ဆို့မှုတွေလည်း ပြုလုပ်ထားတယ်လို့ အနီးဝန်းကျင်ရှိ လူတွေက ပြောပါတယ်။

   ဒါ့အပြင် မြစ်ကြီးနားမြို့ မြေမြင့် ရပ်ကွက်ကနေ ဂျန်မိုင်ကောင်ကိုသွားတဲ့လမ်းမြဝတီဘဏ်နားမှာလည်း ဒီနေ့ မွန်းတည့် ၁၂ နာရီ ဝန်းကျင်မှာ နောက်ထပ် ပေါက်ကွဲမှုတစ်ခုဖြစ်ခဲ့တယ်လို့ ပတ်ဝန်းကျင်က လူတွေက အတည်ပြုပြောပါတယ်။မတ်လ ၂၈ ရက်နေ့က လဲ အရင်က အမှတ် (၂) ရဲစခန်းလို့ခေါ်တဲ့ နယ်မြေရဲစခန်းမှာလည်း မီးကွင်းပစ်မှု တစ်ခု ဖြစ်ခဲ့တယ်လို့ သိရပါတယ်။အဲဒီ ရဲစခန်းမှာလည်း မတ်လ ၂၉ ရက် ဒီနေ့မှာ လုံခြုံရေး တင်းကျပ်ပြီး လမ်းပိတ်ဆို့ထားတာတွေ ရှိတယ်လို့ မျက်မြင်တွေက ပြောပါတယ်။

   မတ်လ ၂၈ ရက်နေ့ ကလည်း မြစ်ကြီးနားခရိုင်ပညာရေးမှူးရုံးမှာ ပေါက်ကွဲမှုဖြစ်ခဲ့ပြီး ထိခိုက်ဒဏ်ရာသူ မရှိခဲ့ပါဘူး။

   

6. ၂၉ မတ် ၂၀၂၁ဆိုင်ကယ်သပိတ် လိုက်ဖမ်းတဲ့ကား ဓာတ်တိုင် ဝင်တိုက်

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

   တောင်ငူမြို့မှာ မတ်လ ၂၉ ရက်နေ့က ဆိုင်ကယ်သပိတ် လူငယ်တွေက ဆင်နွှဲနေကြပြီးတော့ စစ်ကောင်စီ တပ်ဖွဲ့ဝင်တွေက ကားတွေနဲ့ လိုက်လံဖမ်းဆီးခဲ့ ကြပါတယ်။

   စစ်ကောင်စီ တပ်ဖွဲ့ဝင်တွေက ကား၇ စီးနဲ့လိုက်ဖမ်းနေစဥ်မှာ တောင်ငူမြို့ မင်းကြီးညိုလမ်းထိပ်မှာ လိုက်ဖမ်းတဲ့ ကားတစ်စီးဟာ အရှိန်လွန်က ဓာတ်တိုင်ကို ဝင်တိုက်ခဲ့ပြီး ဓာတ်တိုင်က ကျိုးပြီးကားပေါ်လဲကျခဲ့ပါတယ်။

   စစ်ကောင်စီ ဆန့်ကျင်ရေးဆန္ဒပြသူ လူငယ်တွေကတော့ ဆိုင်ကယ်တွေနဲ့ လွတ်မြောက်သွားခဲ့ကြပါတယ်။

7. ၂၉ မတ် ၂၀၂၁မတ်လ ၂၉ ရက်နေ့ ပစ်ခတ်မှုကြောင့် ရန်ကုန်မှာ ၅ ဦးထက်မနည်းသေဆုံး

   မတ်လ ၂၉ ရက်နေ့က အာဏာသိမ်းစစ်ကောင်စီတပ်တွေ ပစ်ခတ်မှုကြောင့် ရန်ကုန်မှာ အနည်းဆုံး ၅ဦးထက်မနည်း အသက်ဆုံးရှုံး တယ်လို့ဒေသခံတွေက တစ်ဆင့် သိရပါတယ်။ ‌

   သာကေတ၊ဒဂုံတောင်အပါအဝင်မြို့နယ်အချို့မှာ ပြည်သူတွေကာရံထားတဲ့ လုံခြုံရေးအတားအဆီး တွေကို ဖယ်ရှားပြီး သပိတ်တွေကို ဖြိုခွင်းချိန်မှာ ပစ်ခတ်မှုတွေကြောင့် အသက်ဆုံးရှုံးမှုတွေရှိခဲ့ပြီး ထိခိုက်ဒဏ်ရာရသူတွေလည်း အများအပြားရှိခဲ့ပါတယ်။

   ဒဂုံတောင်၊ ပုဂံလမ်းနဲ့ လှော်ကားလမ်းမကြီးက ၅၆ရပ်ကွက်သပိတ်ကို ဖြိုခွင်းချိန်မှာဆိုရင် အင်အားပြင်းတဲ့ လက်နက်တွေကိုသုံးခဲ့တယ်လို့ မျက်မြင်တွေ့သူတွေက ဘီဘီစီကိုပြောပါတယ််။

   အသံဗုံးထက် အဆများစွာပြင်းထန်တဲ့ လက်နက်မျိုးတွေနဲ့ ပစ်ခတ်ခဲ့တယ်လို့ တောင်ဒဂုံဒေသခံတစ်ဦးကပြောပါတယ်။

   အတားအဆီးတွေကို အရင်ဖြိုဖျက်အပြီး ပစ်ခတ်မှုတွေကြောင့်၅၆ရပ်ကွက်သပိတ်မှာ သေဆုံးသူ ၃ဦး ရှိခဲ့တယ်လိုလည်း သူတို့ကပြောပါတယ်။

   သပိတ်ကိုဖြိုခွဲရာမှာ တပ်နဲ့ရဲတို့က နေအိမ်အဆောက်အအုံတွေကိုပစ်ခတ်တာအပြင် လမ်းပေါ်က အများပြည်သူပိုင် ပစ္စည်းတွေကို ဖျက်ဆီးတာမျိုး၊ ကားတွေကို ရိုက်ခွဲကြတာတွေလည်း လုပ်ခဲ့တယ်လို့ မျက်မြင်တွေထံက သိရပါတယ်။

   ဒဂုံတောင်မြို့နယ် ၇၁ရပ်ကွက်က သပိတ်ကို ဖြိုခွဲရာမှာလည်း အနည်းဆုံး၄ဦးသေဆုံးခဲ့တယ်လို့ မြို့နယ်တွင်းက ကူညီရေး အသင်းကနေ သိရပါတယ်။

   သာကေတမှာလည်း သေနတ်ကျည်ထိလို့ သေဆုံးမှုတွေရှိတယ်လို့ သိရပြီး ဘီဘီစီက သီးခြား အတည်မပြုနိုင်သေးပါဘူး။

   

   ဓာတ်ပုံ ရင်းမြစ်, CJ

8. ၂၉ မတ် ၂၀၂၁မြစ်ကြီးနား ရမ်ပူရပ်ကွက်ပစ်ခတ်မှု ကလေးတစ်ဦး အပါအဝင် ထိခိုက်သူတွေရှိ

   

   ဓာတ်ပုံ ရင်းမြစ်, CJ

   မြစ်ကြီးနားမြို့ ရမ်ပူရပ်ကွက် နယ်မြေ(၁၄) (က) မှာ မတ်လ ၂၉ ရက် မနက်ပိုင်းက ပစ်ခတ်မှုတွေဖြစ်ခဲ့တယ်လို့ ရပ်ကွက်နေသူတွေက ပြောပါတယ်။အရပ်ကား ကားအဖြူ တစ်စီး အပါအဝင် စစ်ကားတွေက ဝင်လာပြီး အကြောင်းတစ်စုံတစ်ရာမရှိဘဲ ပစ်ခတ်ခဲ့တာလို့ မျက်မြင်တွေက ပြောပါတယ်။

   ရဲဝတ်စုံ၊ စစ်ဝတ်စုံ အပြည့်နဲ့ တပ်သားတချို့ ကားပေါ် ပါလာတယ်လို့ ဆိုပါတယ်။ ပစ်ခတ်မှုမှာ ရာဘာကျည်တွေပါသလို ကျည်အစစ်တွေလည်းပါတယ်လို့ အခင်းဖြစ်ပွားရာမှာ ရှိနေသူတွေက ပြောပါတယ်။

   ပစ်ခတ်မှုကြောင့် ပွန်းပဲ့ထိခိုက်ဒဏ်ရာရှိသူ အနည်းဆုံး ၅ယောက်ရှိပြီး အသက် ၁၅ နှစ်အရွယ်ကလေးတစ်ယောက်ကတော့ ပါးကိုကျည်ထိတာကြောင့် ဆေးကုသမှုခံယူနေတယ်လို့ သိရပါတယ်။ ဖြစ်စဉ်နဲ့ပတ်သက်ပြီး ပါးမှာဒဏ်ရာရရှိခဲ့တဲ့ ကလေးရဲ့အဘိုးဖြစ်သူက ပြောပြသလို မျက်မြင်တစ်ယောက်ကလည်း ဘီဘီစီကို အတည်ပြုပါတယ်။

   ကလေးကအိမ်မှာထိုင်နေရင်း ညာဘက်ပါးကို ကျည်ထိခဲ့တာလို့ အဘိုးဖြစ်သူက ပြောပါတယ်။

9. ၂၉ မတ် ၂၀၂၁မြစ်ကြီးနားက သတင်းထောက်နှစ်ဦး အဖမ်းခံရ

   

   ကချင်ပြည်နယ် မြစ်ကြီးနားမြို့အေးစေတီ ကြက်ခြေနီခြံအနီးမှာ The 74 Media သတင်းဌာနနဲ့ Kachinwaves သတင်းဌာနကသတင်းထောက် နှစ်ဦးဖမ်းခံရတယ်လို့ မျက်မြင်တွေ့သူတွေက ပြောပါတယ်။

   မတ်လ ၂၉ ရက်နေ့ မနက်ပိုင်းက မြစ်ကြီးနားမြို့ ရမ်ပူရပ်ကွက်နဲ့ အေးစေတီရပ်ကွက်တွေမှာ အာဏာသိမ်းစစ်ကောင်စီတပ်တွေက ပစ်ခတ်ဖြိုခွင်းခဲ့ပြီး ဒီပစ်ခတ်မှုမှာ ဒဏ်ရာရသူတချို့နဲ့သတင်းထောက်တွေဖမ်းခံခဲ့ရရှိခဲ့ပါတယ်။

   သူတို့ဖမ်းခံရပြီးတဲ့နောက် အမျိုးသမီးသတင်းထောက်ဟာ အရိုက်ခံရသလို အမျိုးသားသတင်း‌ထောက်ကို ရိုက်နှက်တာကိုလည်းမြင်တွေ့ရတယ်လို့ မျက်မြင်သက်သေတစ်ဦးကပြောပါတယ်။

   သတင်းထောက်တွေ ဖမ်းခံရတဲ့ အချိန်ဟာ မတ်လ၂၉ ရက် ‌နေ့လယ် ၁၁ခွဲ ခန့်လောက်က ဖြစ်နိုင်တယ်လို့သူကပြောပါတယ်။

10. ၂၉ မတ် ၂၀၂၁မြန်မာ့အသံ ရန်ကုန်ရုံးက CDM ဝန်ထမ်း ၁၂၀ နီးပါး ရာထူးထုတ်ပယ်ခံရ

    ပြန်ကြားရေးဝန်ကြီးဌာနအောက်မှာရှိတဲ့ မြန်မာ့အသံရန်ကုန်ရုံးက CDM မှာပါဝင်နေတဲ့ ဝန်ထမ်း ၁၂၀ နီးပါး ကို ရာထူးကနေ ထုတ်ပယ်လိုက်တယ်ဆိုတဲ့ စာကို မနေ့ကမတ်လ ၂၈ မှာ လက်ခံရရှိခဲ့ပြီး အထုတ်ခံလိုက်ရတယ်လို့ အဲဒီထဲက CDM ဝန်ထမ်းတစ်ဦးက ဘီဘီစီကို အတည်ပြုပါတယ်။

    ရုပ်မြင်၊ အသံလွှင့်၊ ဂီတ စတဲ့ဌာနခွဲတွေက ဦးစီးအရာရှိရာထူးကစလို့ ရုပ်သံကျွမ်းကျင်၊ အသံလွှင့်ကျွမ်းကျင်၊ အငယ်တန်း အင်ဂျင်နီယာ၊ စက်မှုကျွမ်းကျင် စတဲ့ရာထူးတွေအပြင် နေ့စားဝန်ထမ်းတွေကို ရပ်နားထုတ်ပယ်စာနဲ့ ထုတ်ခဲ့တာဖြစ်ပါတယ်။

    ''ပထမကတော့ ရုံးပြန်တက်ဖို့ အကြောင်းကြားစာရောက်တယ်၊ နောက်တော့ ဝန်ထမ်းဥပဒေပုဒ်မတွေနဲ့ စွဲချက်တွေနဲ့ လာရောက်ဖြေရှင်းအယူခံဝင်စာရောက်တယ်၊ ဒါနဲ့ မနေ့ကတော့ ထုတ်ပယ်စာထွက်လာတာပေါ့။ ရန်ကုန်က CDM ဝန်ထမ်းတွေကတော့ အဆုံးအထိသွားဖို့ ဆုံးဖြတ်ထားပြီးပြီ''လို့ စာထုတ်ခံရတဲ့ဝန်ထမ်းတစ်ဦးက ဘီဘီစီကို ပြောပါတယ်။

    လက်ရှိမှာ ရန်ကုန်အပြင် နေပြည်တော် မန္တလေးနဲ့ မြန်မာတနိုင်ငံလုံးက မြန်မာ့အသံဝန်ထမ်း ၆၀၀ နီးပါး CDM မှာပါဝင်နေတယ်လို့ သိရပါတယ်။

    

11. ၂၉ မတ် ၂၀၂၁CRPHရဲ့လူကယ်ပြန်ဝန်ကြီးဌာနက မန္တလေးက မီးဘေးသင့်သူတွေကို ကူညီ

    မန္တလေးက မီးဘေးသင့်ပြည်သူတွေကို ငွေကျပ်သိန်း ၇၀ ကူညီထောက်ပံ့ပေးခဲ့တယ်လို့ ပြည်ထောင်စုလွှတ်တော်ကိုယ်စားပြုကော်မတီ CRPH ရဲ့ လူကယ်ပြန်ဝန်ကြီးဌာနက ဒီနေ့မတ်လ ၂၉ ရက်မှာ ကြေညာပါတယ်။

    အခုအလှူကို ပြည်သူတွေကနေတစ်ဆင့် လှူဒါန်းခဲ့တာလို့ ဆိုပါတယ်။

    မန္တလေး ပြည်ကြီးတံခွန်မြို့နယ်ထဲက (၅၇x ၅၆)၊ (၁၁၇x၁၁၆)လမ်းကြားမှာ မတ်လ ၂၇ ရက်ညက မီးလောင်ခဲ့လို့ အိမ်ခြေ ၇၀ ခန့် မီးလောင်ဆုံးရှုံးခဲ့ပြီး လူဦးရေ ၂၆၀ နီးပါးမီးဘေးသင့်ခဲ့ပါတယ်။

    လက်ရှိ အာဏာသိမ်းတဲ့ကာလအတွင်းမှာ CRPH အောက်မှာ လူကယ်ပြန်ဝန်ကြီးဌာနအနေနဲ့ ပင်မလုပ်ငန်းတွေ ဆက်လုပ်ဖို့ အခက်အခဲအတားအဆီးတွေ၊ ခြိမ်းခြောက်မှုတွေနဲ့ကြုံနေရပေမဲ့ အကူအညီတွေကို အတတ်နိုင်ဆုံး ဆက်ပေးသွားမယ်လို့ဆိုပါတယ်။

    လက်ရှိမှာ စစ်တပ်ကအာဏာသိမ်းထားပေမဲ့ ဒေါက်တာဝင်းမြတ်အေးက သမ္မတဦးဝင်းမြင့်အစိုးရလက်ထက်က အတိုင်းပဲ လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေးပြည်ထောင်စုဝန်ကြီးတာဝန်ဆက်ထမ်းဆောင်မယ်လို့ CRPH က မတ်လ ၂၃ ရက်က ကြေညာခဲ့ပါတယ်။

    

    ဓာတ်ပုံ ရင်းမြစ်, CJ

12. ၂၉ မတ် ၂၀၂၁မုံရွာနဲ့ကလေးမှာ သပိတ်စစ်ကြောင်းတွေ ဆက်ထွက်

    

    ဓာတ်ပုံ ရင်းမြစ်, CJ

    မတ်လ ၂၈ ရက်နေ့က အာဏာသိမ်းစစ်ကောင်စီတပ်တွေဖြိုခွဲမှုကြောင့် လူသေဆုံးမှုတွေ များခဲ့တဲ့ စစ်ကိုင်းတိုင်းမုံရွာ နဲ့ ကလေးမြို့တို့မှာ စစ်ကောင်စီ ဆန့်ကျင်ရေးဆန္ဒပြ ပွဲတွေ မတ်လ ၂၉ ရက်ဒီနေ့မှာ ဆက်ပြီးပြုလုပ်ခဲ့ကြပါတယ်။

    ကလေးမြို့ တာဟန်းမှာမတ်လ ၂၈ ရက်နေ့ ညနေပိုင်း သပိတ်စခန်းဖြိုခွဲခံရပြီးတော့ ၄ ဦးသေဆုံးခဲ့သလို ညပိုင်း မှာလည်း တစ်ဦးသေဆုံးခဲ့ပြီး ၅ ဦးအထိသေဆုံးခဲ့ပါတယ်၊

    စစ်ကောင်စီ မြန်မာရုပ်သံကတော့ မတ် ၂၈ နေ့ မုံရွာ အကြမ်းဖက်မှုလို့သုံးပြီး မုံရွာ အကသ က ဝေမိုးနိုင်ဦးဆောင်ပြီး ဆန္ဒပြနေတယ်လို့ ထုတ်ပြန်ခဲ့ပါတယ်၊ သူ့ကို လုံခြုံရေး နှစ်ယောက်သတ်ဖြတ်မှုနဲ့ ဖမ်းဝရမ်းထုတ်ထားတယ်လို့ ပြောပါတယ်။

    မုံရွာမှာ မနေ့က မတ်လ၂၈ ရက်နေ့ တစ်ရက်တည်း စစ်ကောင်စီတပ်တွေပစ်ခတ်မှုကြောင့် သူနာပြုဆရာမတစ်ဦး အပါအဝင် ၅ ဦးသေဆုံးခဲ့ပါတယ်။

    မုံရွာမြို့လယ်မှာ တော့ မတ်လ၂၉ ရက်နေ့ ဘုရားနီလမ်းမှာ ပစ်ခတ်မှုတွေရှိခဲ့ပြီးတော့ လူငယ် ၃ ဦးဒဏ်ရာရခဲ့ပါတယ်။

13. ၂၉ မတ် ၂၀၂၁ဧပြီ ၁ ရက်မှာ တရား၀င်အစိုးရသစ်ကို CRPH ကကြေညာဖို့ရှိ, အမျိုးသားညီညွတ်ရေးအစိုးရလို့ခေါ်ဆိုမယ်

    သမ္မတဦးဝင်းမြင့်ဦးဆောင်တဲ့ အစိုးရသက်တမ်း ကာလပြီးဆုံးမယ့် မတ်လ အကုန် လာမယ့် ဧပြီလ ၁ ရက်မှာ အမျိုးသားညီညွတ်ရေးအစိုးရ National Unity Government ကို ဖွဲ့စည်းမယ့်အကြောင်း ကြေညာဖို့ ရှိတယ်လို့ CRPH အဖွဲ့ဝင်တစ်ဦးက ဘီဘီစီကို ပြောပါတယ်။

    အဲဒီလိုဖွဲ့စည်းနိုင်ဖို့ ပါဝင်သင့် ပါဝင်ထိုက်သူတွေနဲ့လည်း ဆွေးနွေးညှိနှိုင်းတယ်လို့ CRPH အဖွဲ့ဝင် နွားထိုးကြီးလွှတ်တော်အမတ် ဦးနိုင်ထူးအောင်က ပြောလိုက်တာပါ။

    CRPH ဟာ ၂၀၂၀ ရွေးကောက်ပွဲကနေ ပြည်သူတွေ ရွေးကောက်တင်မြှောက်ထားတဲ့ ပြည်ထောင်စုလွှတ်တော်ကိုယ်စားလှယ်တွေကို ကိုယ်စားပြုတဲ့အဖွဲ့ဖြစ်လို့ အစိုးရသစ်တပ်ရပ်ဖွဲ့ရမယ့် တာဝန်နဲ့လုပ်ပိုင်ခွင့် ရှိထားပြီးသားဖြစ်တယ်လို့ သူကပြောပါတယ်။

    လက်ရှိမှာ နိုင်ငံတော်အတိုင်ပင်ခံပုဂ္ဂိုလ်နဲ့ သမ္မတဦးဝင်းမြင့်တို့ ဖမ်းဆီးထိန်းသိမ်းခံထားရတာကြောင့် အစိုးရတာဝန်တွေ ဆက်လုပ်နိုင်ဖို့ မန်းဝင်းခိုင်သန်းကို ခေတ္တဒုတိယသမ္မတအဖြစ် CRPH က မတ်လ ၉ ရက်မှာ ခန့်ထားခဲ့ပါတယ်။

    

    ဓာတ်ပုံ ရင်းမြစ်, CRPH

14. ၂၉ မတ် ၂၀၂၁တောင်ဒဂုံ ၅၄ ရပ်ကွက်ကို စစ်ကောင်စီတပ်တွေက ဝင်ရောက် စီးနင်းနေ

    တောင်ဒဂုံ ၅၄ ရပ်ကွက်ကို စစ်ကောင်စီတပ်တွေက ဒီနေ မတ်လ ၂၉ ရက် နေ့လည်မှာ ဝင်ရောက်စီးနင်းနေတယ်လို့ အဲဒီက နယ်ခံတွေက ဘီဘီစီကို ပြောပါတယ်။

    လက်ရှိမှာ အသံဗုံးတွေလည်းပစ်တယ်လို့ ဆိုပါတယ်။

    ဒီနေ့မနက်အစောပိုင်း ၉ နာရီဝန်းကျင်လောက်ကတော့ ၁၈ ကွေ့နဲ့ ဘုန်းကြီးကျောင်းကွေ့ကြား မောင်းမကန်လမ်းမပေါ်က အတားအဆီးတွေကို စစ်ကားတွေ၊ ရေသယ်ယာဉ်တွေသုံးပြီး အလုံးအရင်းနဲ့ဖယ်ရှားနေတယ်လို့ နယ်ခံတွေက ပြောထားပါတယ်။

    ဒါ့ပြင် တောင်ဒဂုံမှာ မနေ့ညကလည်း စစ်ကောင်စီတပ်တွေက ပစ်ခတ်လို့ အမျိုးသား ၂ ဦးသေဆုံးခဲ့ပါတယ်။

    

15. ၂၉ မတ် ၂၀၂၁တောင်ဒဂုံ ၁၈ ကွေ့က မနေ့ညပစ်ခတ်မှု လူထုက အလောင်း ၂ လောင်းကို မနက်ပိုင်းမှ ကောက်ယူနိုင်

    ရန်ကုန် တောင်ဒဂုံမြို့နယ်ထဲက ၁၈ ကွေ့မှာ မနေ့ မတ်လ ၂၈ ရက်ညတုန်းက စစ်ကောင်စီတပ်တွေရဲ့ပစ်ခတ်မှုကြောင့် သေနတ်ဒဏ်ရာတွေနဲ့သေဆုံးခဲ့သူ ၂ ဦးရဲ့ရုပ်အလောင်းကို ဒီနေ့မနက်မှ လူထုက ပြန်ကောက်ယူနိုင်ခဲ့တယ်လို့ မြို့နယ်ခံတွေက ပြောပါတယ်။

    မနေ့ည ၁၁ နာရီလောက်က ၁၈ ကွေ့မှာ စစ်ကောင်စီတပ်တွေက အသံဗုံးတွေ ပစ်ဖောက်ချိန် ထွက်လာတဲ့လူတွေကို ပစ်ခတ်ခတ်ခဲ့တာလို့ ဆိုပါတယ်။

    'ထိတာ ၃ ဦးပေမဲ့ ပေါင်ထိတဲ့ ၁ ဦးကို လူထုက ကယ်နိုင်ခဲ့တယ်။ ဆုံးသွားတဲ့ ၂ ဦးကိုကျတော့ သူတို့ ပစ်ခတ်အပြီး ဒဏ်ရာရနေတဲ့ သူတွေကို လာကောက်မယ့်သူတွေကို ဆက်စောင့်နေတဲ့သဘောမျိုးရှိခဲ့တယ်။ ထွက်လာရင်ပစ်မယ်သဘောမျိုးပေါ့။ ပြီးသွားတော့ သေဆုံးသွားတဲ့အလောင်းတွေကို ပြန်သယ်သွားပြီးတော့ မနက်ပိုင်း ၅ နာရီလောက်ကျမှ သေနတ်ဒဏ်ရာအမြောက်အများနဲ့ အလောင်းတွေကို ပြန်လာထားတဲ့ပုံစံမျိုးရှိတယ်' လို့ မျက်မြင်တစ်ဦးက ပြောပါတယ်။

    ဒီနေ့မနက်ပိုင်းမှာ အလောင်းတွေ သက်ဆိုင်ရာနေအိမ်ရောက်ပြီဖြစ်ပေမဲ့ သင်္ဂြိုဟ်ဖို့ ပြင်ဆင်ချိန် သေနတ်ဒဏ်ရာကြောင့် သေဆုံးတာဖြစ်လို့ စံပြဆေးရုံကနေတဆင့် သေစာရင်းထုတ်နိုင်ဖို့ လက်ရှိမှာ အဲဒီကို အလောင်းတွေကို စံပြဆေးရုံကို သယ်သွားပြီလို့ သိရပါတယ်။

    ဒီနေ့မနက် ၉ နာရီဝန်းကျင်လောက်မှာလည်း ၁၈ ကွေ့နဲ့ ဘုန်းကြီးကျောင်းကွေ့ကြား မောင်းမကန်လမ်းမပေါ်က အတားအဆီးတွေကို စစ်ကားတွေ၊ ရေသယ်ယာဉ်တွေသုံးပြီး အလုံးအရင်းနဲ့ဖယ်ရှားနေတယ်လို့ နယ်ခံတွေက ပြောပါတယ်။

    

    ဓာတ်ပုံ ရင်းမြစ်, CJ

16. ၂၉ မတ် ၂၀၂၁တောင်ကြီးမှာ ပျောက်ဆုံးသူ လူငယ် ၅၀ ခန့်ရှိနေ

    တောင်ကြီးမြို့မှာ ဆန္ဒပြပွဲတွေ သပိတ်တွေမှာမပါဘဲ ပျောက်ဆုံးနေတဲ့ လူငယ် အယောက် ၅၀ ခန့်ရှိနေတယ်လို့ လူငယ်တွေအရေး ဆောင်ရွက်ပေးနေသူတွေက ဘီဘီစီကိုပြောပါတယ်။ပျောက်နေတယ်လို့ မိဘဆွေမျိုးတွေက လာအကူအညီတောင်းထားတာကြောင့် သက်ဆိုင်ရာအဖွဲ့အစည်းတွေနဲ့ချိတ်ဆက်မေးကြည့်တဲ့အခါ မတ်လ ၂၅ ရက်ဝန်းကျင်ကနေ ၂၈ ရက်အထိ အခုလို လူငယ်တွေ ပျောက်ဆုံးနေတာ သိရတာလို့ ဆိုပါတယ်။

    'ကလေးတွေတော်တော်များများက သပိတ်ကြောင်းထဲမှာမပါဘူး။ ပုံမှန် သူတို့ စီးပွားရေးအတိုင်း၊ လူမှုရေးအတိုင်း ပုံမှန်လေးသွားနေတဲ့ ကလေးတော်တော်များများ ပျောက်ဆုံးနေတယ်လို့ ဆက်သွယ်လာတာတွေရှိတယ်။ တူလေးတစ်ယောက်လို့ ပြောရမှာပေါ့နော်။ သူဆို ဆန္ဒပြပွဲမှာပါတာလည်းမရှိဘူး။ သမရိုးကျ သွားရိုးအတိုင်းသွားနေတာ။ အဲဒီကလေးတစ်ယောက်ဆိုရင် ဆိုင်ကယ်ရော လူရော လုံး၀ အချိတ်အဆက်မမိဘူး။ နောက်တစ်ယောက်ကျတော့ ၂၄ ရက်နေ့မှာ သူ့ကို ဖမ်းသွားတယ်လို့ပဲ သတင်းရလိုက်တယ်' လို့ လူငယ်တွေအရေးကူညီပေးနေသူမြို့ခံတစ်ဦးက ပြောပါတယ်။

    တောင်ကြီးမှာ မနေ့ မတ်လ ၂၈ ရက်ညနေပိုင်းက သပိတ်ဖြိုခွင်းခံရလို့ အသက် ၁၇ နှစ်အရွယ ်မောင်ဝေယံမိုးဆိုသူ လူငယ်တစ်ဦး သေဆုံးပြီး ၃ ဦးဒဏ်ရာရခဲ့ပါတယ်။

    ဒ့ါပြင် မနေ့ည ၉ နာရီလောက်အထိ မြို့ထဲက ရပ်ကွက်တချို့မှာ စစ်ကောင်စီတပ်တွေရဲ့ ပစ်ခတ်မှုတွေ ရှိနေသေးတယ်လို့ မြို့ခံတွေက ပြောပါတယ်။

    

    ဓာတ်ပုံ ရင်းမြစ်, CJ

17. ၂၉ မတ် ၂၀၂၁ပုသိမ်မြို့မှာ ညပိုင်းပစ်ခတ်မှု CDM ဝန်ထမ်းတစ်ဦးသေဆုံး

    ပုသိမ်မြို့မှာ မနေ့ ၂၈ ရက်ညတုန်းက ပစ်ခတ်မှုမှာ အသက် ၂၇ နှစ်အရွယ် အမျိုးသားတစ်ဦးသေဆုံးခဲ့ပြီး သူဟာ တိုင်းလွှတ်တော်ရုံးက CDM လုပ်နေတဲ့ ဝန်ထမ်းတစ်ဦးဖြစ်တယ်လို့ မြို့ခံ တွေက ပြောပါတယ်။

    သေဆုံးခဲ့သူဟာ လည်ပင်းကို ကျည်ထိမှန်ခဲ့တာဖြစ်ပြီး ပုသိမ် ရာမညရပ်ကွက်မှာနေထိုင်သူဖြစ်ပါတယ်။

    ''ဘန့်ဘွေကုန်းလမ်းမကြီးဆိုတာရှိတယ်။ သူကနေ ဆင်းလာရင် (မြို့)ပတ်လမ်းရှိတယ်။ လူထုက ပထမဆုံးလုပ်ထားတဲ့ ခုခံရေး အဟန့်အတားက အောင်ချမ်းသာထိပ်မှာရှိပေမဲ့ သူတို့က အဲဒီနားကို ကပ်မလာဘဲနဲ့ ပတ်လမ်းကျော်ကျော်ကနေ လှမ်းပစ်တာ။ အဲဒါ ကံမဆိုင်လို့ခေါ်တဲ့လမ်းဆုံထိပ်မှာ နောက်ဆုံးထားထားတဲ့ အခိုင်မာဆုံးခုခံရေးအဟန့်အတားက လူကို ထိတာ'' မြို့ခံ တစ်ဦးက ပြောပါတယ်။

    စစ်ကောင်စီတပ်တွေရဲ့ မနေ့ညက ပစ်ခတ်မှုကြောင့် ပုသိမ်မှာ နောက်ထပ် အမျိုးသား ၂ ဦးလည်း လက်မောင်းထိတာ၊ ပေါင်ကိုကျည်မှန်တာမျိုး ရှိခဲ့ပေမဲ့ ဒဏ်ရာတွေက မစိုးရိမ်ရဘူးလို့ သိရပါတယ်။

    စစ်ကောင်စီတပ်တွေဟာ မနေ့ည ၁၀ နာရီဝန်းကျင်မှာ ရဲကား ၄ စင်းနဲ့ လာပြီး ၄၅ မိနစ်လောက်အထိ တရစပ်ပစ်ခတ်ခဲ့တာလို့လည်း မြို့ခံတွေကပြောပါတယ်။

    စစ်အာဏာသိမ်းတဲ့ ဖေဖော်ဝါရီလ ၁ ရက်ကတည်းကဆိုရင် ပုသိမ်မြို့မှာ စစ်ကောင်စီတပ်တွေကြောင့်သေဆုံးသူ အမျိုးသား ၅ ဦးအထိ ရှိလာပြီး အဲဒီထဲမှာ အသက်မပြည့်သူ ၂ ဦးလည်းပါဝင်ပါတယ်။

    

    ဓာတ်ပုံ ရင်းမြစ်, CJ

18. ၂၈ မတ် ၂၀၂၁မတ်လ ၂၈ ရက်နေ့ ပစ်ခတ်မှုတွေကြောင့် မုံရွာ ကလေး မြင်းခြံ ရန်ကုန် ပုသိမ် တောင်ကြီးတို့မှာ ၁၅ ဦးထက်မနည်း သေဆုံး

    

    ဓာတ်ပုံ ရင်းမြစ်, CJ

    မတ်လ ၂၈က စစ်ကိုင်းတိုင်းထဲက မုံရွာ နဲ့ ကလေးမြို့၊ မန္တလေးတိုင်း မြင်းခြံနဲ့ ရန်ကုန် ၊ပုသိမ်၊ တောင်ကြီးတို့မှာ အာဏာသိမ်းစစ်ကောင်စီ တပ်တွေ ပစ်ခတ်ဖြိုခွင်းမှုကြောင့် လူ ၁၅ ဦးထက်မနည်းသေဆုံးခဲ့တယ်လို့ ဘီဘီစီက သတင်းရရှိထားပါတယ်။

    မုံရွာမှာ ဒဏ်ရာရသူကို ကူနေတဲ့ သူနာပြုဆရာမတစ်ဦး အပါအဝင် ၅ ဦး၊ စစ်ကိုင်းတိုင်း ကလေးမြို့မှာ အမျိုးသမီးတစ်ဦးနဲ့ အမျိုးသား ၃ ဦးအပါအဝင် ၄ ဦး၊ မြင်းခြံမှာ အမျိုးသမီးတစ်ဦးနဲ့ အမျိုးသားတစ်ဦး ရန်ကုန်က တောင်ဒဂုံမှာ အမျိုးသမီးတစ်ဦး နဲ့လှိုင်မြို့နယ်က အမျိုးသားတစ်ဦး သေဆုံးခဲ့ကြောင်း ဘီဘီစီက သေဆုံးသူတွေကို နာမည်နဲ့တကွ အတည်ပြုနိုင်ခဲ့ ပါတယ်။

    ပုသိမ်မှာလည်း အခုညပိုင်းက ပစ်ခတ်မှုတွေရှိခဲ့ပြီးတော့ အမျိုးသားတစ်ဦးလည်ပင်း သေနတ်မှန် သေဆုံးခဲ့တယ်ကို ပုသိမ်ဒေသခံတွေဆီက သိရပါတယ်။

    တနင်္ဂနွေနေ့ညနေပိုင်းက တောင်ကြီးမှာ သပိတ်စစ်ကြောင်းကို ပစ်ခတ်နှိမ်နင်းမှု ဖြစ်ခဲ့တဲ့အတွက် အသက် ၁၇ နှစ် အရွယ် မောင်ဝေယံမိုး ဆိုတဲ့ လူငယ်တစ်ယောက် သေဆုံးပြီး သုံးယောက် ဒဏ်ရာရခဲ့ပါတယ်။

    မတ်လ ၂၇ ရက်နေ့က နိုင်ငံအဝန်း အာဏာသိမ်းစစ်‌ကောင်စီ တပ်တွေပစ်ခတ်မှုတွေကြောင့် လူ၁၀၀ ကျော်သေဆုံးခဲ့ပြီး မန္တလေးတစ်မြို့တည်းမှာတင် ၁၃ နှစ် အရွယ် မိန်းကလေး အပါအ၀င် လူ အယောက် ၄၀ အနည်းဆုံး သေဆုံးခဲ့ပြီး၊ ရန်ကုန်မှာ ၂၇ ယောက်ထက် မနည်းသေဆုံးတယ်လို့ ဒေသတွင်း သတင်းတွေက ဆိုပါတယ်။

19. ၂၈ မတ် ၂၀၂၁ကလေးမြို့ တာဟန်းရပ်ကွက် သပိတ်စခန်းဖြိုခွင်းမှု လေးဦးသေဆုံး

    

    ဓာတ်ပုံ ရင်းမြစ်, CJ

    ကလေးမြို့အနောက်ပိုင်း တာဟန်းရပ်ကွက်က သပိတ်စခန်းကို အာဏာသိမ်းစစ်ကောင်စီတပ်တွေ ကဒီနေ့ နေ့လယ်ပိုင်းက စတင်ဖြိုခွဲ့ခဲ့ပြီး အမျိုးသမီးတစ်ဦးအပါအဝင် ၄ ဦးခန့် သေဆုံးခဲ့တယ်လို့ ကလေးမြို့ခံတွေက ပြောပါတယ်။

    မတ်လ ၂၈ ရက်နေ့ ညနေပိုင်းက မအားခူ ရင်ဘက်ထိမှန်သေဆုံးခဲ့သလို နောက်ပိုင်းမှာ မောင်ဆန်းသဲ မောင်သားချစ် ဦးထန်လျောင်ဟန်း တို့ထပ်မံ သေဆုံးခဲ့တယ်လို့ ကလေးမြို့ဒေသခံတွေက ပြောပါတယ်။

    ကလေးမြို့ တာဟန်းလူနေရပ်ကွက်အတွင်းမှာ ၃ နာရီ ကျော် အကြာ အပြန်အလှန် ပစ်ခတ်ခဲ့တယ်လို့ တာဟန်း ရပ်ကွက် ဒေသခံတွေက ပြောပါတယ်။

    အာဏာသိမ်းစစ်ကောင်စီတပ်တွေဟာ စက်သေနတ်တွေပါတဲ့ စစ်ကားတွေသုံးခဲ့သလို တစ်မြို့ လုံးကို စစ်မြေပြင်လို ပစ်ခတ်ခဲ့ပြီး သပိတ်စခန်းဘက်ကလည်း တူမီးတွေ လေသေနတ်တွေနဲ့ ပြန်လည်ပစ်ခတ်ခုခံခဲ့တယ်လို့ ဒေသအခြေစိုက် သတင်းမီဒီယာတွေက လူမှုကွန်ရက်မှာ ရေးပါတယ်။

    မတ်လ ၂၈ ရက် ည ၈နာ ရီထိုးဖို့ ၁၅ မိနစ်ခန့် အလိုမှာ သေနတ်သံတွေစဲသွားကြောင်းနဲ့ စစ်ကားတွေ တာဟန်းရပ်ကွက်က ပြန်လည်ထွက်ခွာသွားကြောင်း တာဟန်း ရပ်ကွက် ဒေသခံတွေက ပြောပါတယ်။

    အာဏာသိမ်းစစ်ကောင်စီတပ်ဘက်ကလည်း သေဆုံးသူတွေရှိတယ်လို့ သိရပေမဲ့ ဒီသတင်းကိုတော့ ဘီဘီစီက သီးခြားအတည်ပြုလို့မရသေးပါဘူး။

20. ၂၈ မတ် ၂၀၂၁မရမ်းကုန်းမြို့နယ်မှာ ညနေပိုင်း ပစ်ခတ်မှုတွေ ဖြစ်၊ ထိခိုက်ဒဏ်ရာရသူတွေရှိ, ရပ်ကွက်အတွင်းလမ်းတွေမှာ ပစ်ခတ်၊ ဖမ်းဆီးမှုတွေ ဖြစ်ခဲ့

    

    ဓာတ်ပုံ ရင်းမြစ်, CJ

    မတ်လ ၂၇ ဖက်စစ်တော်လှန်ရေးနေ့ တုန်းက လူ ၃ ဦး အထိ သေဆုံးခဲ့တဲ့ မရမ်းကုန်းမြို့နယ် သမိုင်းမှာ ဒီနေ့ မတ်လ ၂၈ မှာလည်း စစ်ကောင်စီတပ်တွေက မနက် အစာပိုင်းကတည်းက ရပ်ကွက်တွေ ထဲမှာ လှုပ်ရှား သွားလာနေခဲ့ပါတယ်။

    ညနေပိုင်းမှာတော့ ရပ်ကွက်ထဲက လမ်းတစ်ခုမှာ စစ်ကောင်စီတပ်က လမ်းပေါ် ရှိသူတွေကို အကြောင်း တစ်စုံတစ်ရာ မရှိဘဲ ပစ်ခတ်ခဲ့လို့ လူ တချို့ ထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။ ထိခိုက်သူတွေထဲမှာ ဈေးသည် တစ်ဦး ဖြစ်တဲ့ သက်ကြီးပိုင်း လူကြီးတစ်ဦးလည်း ပါဝင်ခဲ့တယ် ဆိုပါတယ်။

    ပစ်ခတ်မှုတွေ အတွင်း ရာဘာကျည်နဲ့ ပစ်ခဲ့တာ ရှိသလို ခေါင်းထိသူ တစ်ဦးနဲ့ ဝမ်းဗိုက် ထိသူ နောက် တစ်ဦး တို့ကတော့ ကျည်အစစ်နဲ့ ပစ်ခံရတာ ဖြစ်နိုင်တယ်လို့ ပစ်ခတ်မှုအနီးမှာ ရှိနေတဲ့ ကိုယ်တွေ့ကြုံသူတွေက ပြောပါတယ်။ လူ ၆ ယောက်ထက် မနည်း ကို လည်း ဖမ်းဆီးခေါ်ဆောင် သွားခဲ့တယ်လို့ မျက်မြင်တွေက ပြောပါတယ်။

    

    ဓာတ်ပုံ ရင်းမြစ်, CJ