Qarabağ müharibəsi: 8 noyabr Azərbaycanda zəfər günüdür

Canlı reportaj

1. 15 Noyabr 2020Rusiya və Ermənistan xarici işlər nazirləri Qarabağı müzakirə ediblər

   Noyabrın 15-də Rusiya xarici işlər naziri Sergey Lavrov və Ermənistan xarici işlər naziri Zohrab Mnatsakanyan telefonla danışıb.

   Rusiyanın Xarici İşlər Nazirliyi bildirib ki, nazirlər Azərbaycan, Ermənistan və Rusiya prezidentlərinin birgə bəyanatının icrasındakı gedişatı, o cümlədən Rusiya sülhməramlılarının Dağlıq Qarabağ münaqişəsi zonasına yerləşdirilməsi və mandatlarının səmərəli yerinə yetirilməsini təmin etməklə bağlı tapşırıqları müzakirə ediblər.

   Lavrov Mnatsakanyana Rusiya Prezidentinin 13 noyabrda imzaladığı fərmana uyğun olaraq yaradılan Humanitar Müdaxilə İdarələriarası Mərkəzinin fəaliyyət planı ilə bağlı məlumat verib, Rusiya XİN açıqlayıb.

   Məlumatda deyilir ki, xarici işlər nazirləri münaqişə bölgəsindəki mülki şəxslərin vəziyyətini yüngülləşdirmək və dini və mədəni yerləri qorumaq üçün Birləşmiş Millətlər Təşkilatının Qaçqınlar üzrə Ali Komissarlığı, UNESCO, Birləşmiş Millətlər Təşkilatının İnkişaf Proqramı, Beynəlxalq Qızıl Xaç Komitəsi və digər çoxtərəfli təşkilatlarla əməkdaşlıq qurmağın vacibliyini vurğulayıblar.

2. 15 Noyabr 2020Azərbaycan MN Xocavəndin Daşbaşı kəndindən görüntülər yayıb

   Azərbaycan Müdafiə Nazirliyi Xocavənd rayonunun işğaldan azad olunan Daşbaşı kəndindən görüntülər yayıb.

   Prezident İlham Əliyev oktyabrın 20-də Daşbaşı kəndinin azad edildiyini bildirmişdi.

3. 15 Noyabr 2020Azərbaycan Kəlbəcərdə ağacların kəsilməsini qətiyyətlə pisləyir

   Kəlbəcərdən köçən ermənilərin ağacları da kəsib aparmasını Azərbaycan təbiətə qarşı ən ağır cinayət adlandırıb və qətiyyətlə pisləyib.

   Ekologiya və təbii sərvətlər nazirinin müavini Vüqar Kərimov jurnalistlərə açıqlamasında bildirib ki, bununla bağlı Azərkosmosdan alınmış foto faktlar müvafiq beynəlxalq konvensiyaların katibliklərinə təqdim edilib və onlar Azərbaycana dəvət olunacaqlar.

4. 15 Noyabr 2020Kəlbəcərdən köçən erməni əhalisi ağacları da kəsirlər - media

   Kəlbəcərdən köçən erməni əhalisi azərbaycanlılara qalmasın deyə, həm də ağacları kəsib aparırlar, bu barədə Sputnik Armenia agentliyi video paylaşıb.

   Bundan əvvəl BBC News jurnalistləri Kəlbəcərdə ermənilərin evlərini son çöpünədək yığıb aparmaları və sonra evlərini yandırmalarına dair görüntülər paylaşıblar.

   Yayılan videoda Kəlbəcər yolu boyunca ağac dolu yük maşınları görünür.

5. 15 Noyabr 2020

   Bu gün Azərbaycanın xarici işlər naziri Ceyhun Bayramov rusiyalı həmkarı Sergey Lavrovla telefonda bölgədə mövcud olan son durumu, 10 noyabr tarixli üçtərəfli bəyanatın icrasını, razılaşmadan irəli gələn bir sıra məsələlərin, o cümlədən humanitar xarakterli tədbirlərin reallaşmasında əlaqələndirmənin həyata keçirilməsi ilə bağlı fikir mübadiləsi aparıblar.

6. 15 Noyabr 2020Rusiya Müdafiə Nazirliyi Xankəndində Humanitar Müdaxilə Mərkəzi yaradır

   İdarələrarası Humanitar Müdaxilə Mərkəzi noyabrın 20-dən etibarən Dağlıq Qarabağda bütün vəzifələrin icrasına başlayacaq.

   Rusiya Müdafiə Nazirliyi Xankəndində İdarələrarası Humanitar Müdaxilə Mərkəzinin yaradılmasına başlayıb. Bu barədə RİA Novosti Rusiyanın Milli Müdafiə İdarəetmə Mərkəzinə istinadən xəbər verib.

   "Rusiya Federasiyası Müdafiə Naziri, Ordu generalı Sergey Şoyqunun tapşırığı ilə Rusiya Federasiyasının Prezidenti Vladimir Putinin "Dağlıq Qarabağda sülhün qorunması üçün əlavə tədbirlər haqqında" fərmanının icrası çərçivəsində Rusiya Müdafiə Nazirliyi Xankəndində Humanitar Müdaxilə İdarələriarası Mərkəzini yaratmağa başlayıb", - məlumatda deyilir.

   Bu məqsədlə noyabrın 14-dən bəri Xankəndindəki Rusiya sülhməramlı kontingentinin tərkibində formalaşdırılan Mərkəzin əməliyyat qrupunun artıq yerləşdirildiyi qeyd olunur.

   Mərkəzin tam formalaşma prosesi noyabrın 20-dək bitəcək.Mərkəz o gündən etibarən bütün humanitar müdaxilə tapşırıqlarını yerinə yetirməyə başlayacaq.

7. 15 Noyabr 2020Ermənistan MTX-nin keçmiş rəhbəri Paşinyana sui-qəsd hazırlamaqda ittiham olunur

   Ermənistan Milli Təhlükəsizlik Xidməti Baş nazir Nikol Paşiyana sui-qəsdin hazırlanması və hakimiyyəti ələ keçirmək cəhdi ilə əlaqədar açılan cinayət işinin təfərrüatlarını açıqlayıb.

   Bu cinayət işi çərçivəsində Milli Təhlükəsizlik Xidmətinin keçmiş rəisi Artur Vanetsyan, parlamentin keçmiş deputatı və Ermənistan Respublika Partiyası fraksiyasının keçmiş rəhbəri Vaqram Baqdasaryan, Sisian könüllü dəstəsinin komandiri Aşot Minasyan hökumət başçısına qarşı sui-qəsd hazırlamaqda və dövlət çevrilişinə cəhddə şübhəli bilinərək saxlanılıblar.

   Məlumata əsasən, bu işlə bağlı digər şəxslərinin müəyyənləşdirilməsi, onların cinayət əməllərinin qarşısının alınması və zərərsizləşdirilməsi məqsədilə tədbirlər görülür.

   Artur Vanetsyanın rəhbərlik etdiyi Vətən partiyası, digər 16 siyasi qüvvə ilə birlikdə bir neçə gündür ki, Nikol Paşinyan hökumətinin istefasını tələb edərək, onu "xəyanətdə" və Qarabağ məsələsində "məğlubiyyətçi mövqe tutmaqda" ittiham edərək mitinqlər və yürüşlər keçirir.

   Ermənistanda Paşinyana qarşı kütləvi etiraz aksiyaları Azərbaycan, Ermənistan və Rusiya arasında Qarabağda atəşkəsə dair üçtərəfli razılaşma imzalandıqdan sonra keçirilməyə başlanıb.

8. 15 Noyabr 2020Hikmət Hacıyev: "Ağdam və Laçından ermənilərin çıxarılmasını nəzərdə tutan vaxt olduğu kimi saxlanılır"

   “Ermənistan tərəfindən Azərbaycanın işğal olunmuş ərazilərindən mülki insanlar, hərbçilər qrafikə uyğun olaraq çıxarılır. Ağdamdan 20 noyabr, Laçından isə dekabrın 1-dək ermənilərin çıxarılmasını nəzərdə tutan vaxt olduğu kimi saxlanılır. Bircə Kəlbəcərlə bağlı vaxt 15 noyabrdan 25 noyabradək uzadılıb”.

   Bunu Azərbaycan Prezidentinin köməkçisi Hikmət Hacıyev deyib.

   Noyabrın 10-da Azərbaycan, Ermənistan və Rusiya arasında imzalanmış bəyanatda Kəlbəcərin noyabrın 15-də boşaldılması nəzərdə tutulurdu.

   Hikmət Hacıyev İlham Əliyevin bu müjdəni "yaxın zamanlarda Azərbaycan xalqına çatdıracağını" deyib.

9. 15 Noyabr 2020General-mayor Hüseyn Mahmudov: "Artıq əhalinin tərk etmə prosesi baş tutur"

   “Tam məsuliyyətlə deyirəm ki, bəyanata əsasən Kəlbəcərdə qeyri-qanuni məskunlaşıdırlan insanların çıxarılmasından sonra oraya yerləşdiriləcək Azərbaycan Ordusunun hissələri tam hazır vəziyyətdədir”, - Müdafiə Nazirliyinin Beynəlxalq Hərbi Əməkdaşlıq İdarəsinin rəisi, general-mayor Hüseyn Mahmudov bazar günü keçirilən brifinqdə deyib.

   Onun sözlərinə görə, Azərbaycan Ordusu bu missiyanı "bu gün yerinə yetirməyə hazırdır".

   “Artıq əhalinin tərk etmə prosesi baş tutur. Azərbaycan Müdafiə Nazirliyi yüksək texnologiyaya malikdir. Heç bir təxribata yol verilmir”.

10. 15 Noyabr 2020Təcili xəbər, Kəlbəcər rayonunun qaytarılması üçün Ermənistana əlavə 10 gün vaxt verildi

    Ermənistan qoşunlarının və Kəlbəcərdə yerləşən erməni əhalisinin çıxarılması üçün Azərbaycan Ermənistana əlavə 10 gün, noyabrın 25-dək vaxt verib, Azərbaycan Prezidentinin köməkçisi Hikmət Hacıyev bildirib.

    Onun sözlərinə görə, bu qərar Rusiya Prezidenti Vladimir Putinin Prezident İlham Əliyevlə telefon danışığından sonra verilib.

    Cənab Hacıyev deyib ki, Ermənistan tərəfi Kəlbəcərdə olan insanların çıxarılmasına görə 25 noyabra qədər vaxt istəyib:

    “Ərazidə coğrafi şərait ağırdır və ərazidə bir yol var. Azərbaycan tərəfi humanizmdən çıxış edərək 25 noyabra qədər Azərbaycanın işğal olunmuş ərazisi olan Kəlbəcərdən ermənilərin çıxarılması ilə bağlı qərar qəbul edilib”.

    Qarabağda döyüşlərin dayandırılması və atəşkəsə dair bəyanata əsasən Kəlbəcər rayonu bu gün Azərbaycana qaytarılmalı idi.

11. 15 Noyabr 2020Azərbaycan MN Xocavənd rayonunun Hadrut qəsəbəsi və Tuğ kəndinin görüntülərini yayıb

    Azərbaycan Müdafiə Nazirliyi Xocavənd rayonunun işğaldan azad olunan Hadrut qəsəbəsi və Tuğ kəndinin görüntülərini yayıb.

    Prezident İlham Əliyev oktyabrın 8-də Hadrut qəsəbəsinin, noyabrın 9-da isə Tuğ kəndinin işğaldan azad edildiyini bildirmişdi.

12. 15 Noyabr 2020Bunu da oxuyun, (arxivdən)

    "Biz hamımız bax bura yığışırıq, heç bir problem yoxdur, - kəndin mərkəzində oturan, özünü Alik kimi təqdim edən, soyadını demək istəməyən 40 yaşlı kişi deyir. - Bax mən erməniyəm, bu isə bizim qonşumuz, həmkəndlimiz və müəllimimizdir. Mən, doğrusu, istəyirəm sülh olsun, insanlar ölməsin. Sadəcə biz müharibə istəmirik. Bu həqiqətdir. Qalanı bizdən asılı deyil."

    BBC əməkdaşı Nina Axmeteli Gürcüstanın həm ermənilər, həm də azərbaycanlılar yaşayan qəsəbə və kəndlərində olub.

    Onlar Qarabağ müharibəsi barədə nə düşünürlər, yazımızda oxuyun:

    "Gəlin bir-birimizə hörmət edək". Gürcüstanda ermənilərlə azərbaycanlılar yanaşı necə yaşayırlar

13. 15 Noyabr 2020Kəlbəcərdən köçən bəzi erməni ailələr evlərini yandırıb gedirlər

14. 15 Noyabr 2020Rusiya MN: "Rusiya sülhməramlılarının olduğu iki təyyarə Yerevana gəlib"

    Rusiya Aerokosmik Qüvvələrinin hərbi nəqliyyat aviasiyasının iki An-124 təyyarəsi Yerevandakı aerodroma gəlib. Təyyarə on BTR-82A zirehli personal daşıyıcısı, logistika avadanlığı və eləcə də sülhməramlı hissələrin 30-a yaxın hərbi personalını çatdırıb.

    Bunu Rusiya Müdafiə Nazirliyi bildirib.

    Qurum qeyd edib ki, avadanlıqların boşaldılmasından, yoxlanılmasından və hazırlanmasından sonra, 15-ci sülhməramlı briqadanın hərbi hissələri konsentrasiya ərazisinə (Goris) 300 kilometr yürüş edəcəklər.

    Atəşkəsə və hərbi əməliyyatlara nəzarət etmək üçün Rusiyanın sülhməramlı kontingentinin Dağlıq Qarabağ münaqişəsi zonasında 1960 hərbçisi, 90 zirehli personal daşıyıcısı, 380 ədəd avtomobil və xüsusi texnikası yerləşdirilir.

    Məlumata görə, rus kontingentinin özəyini Mərkəzi Hərbi Dairənin 15-ci ayrı motoatıcı briqadasının bölmələri təşkil edəcək.

    Sülhməramlı tapşırıqların icrası və Dağlıq Qarabağ münaqişəsi zonasındakı vəziyyətin monitorinqi üzrə hərəkətlərin koordinasiyası Rusiya Federasiyasının müdafiə müdirliklərinin milli mərkəzi tərəfindən gecə-gündüz həyata keçirilir, qurumun məlumatında deyilir.

    Sülhməramlı tapşırıqları yerinə yetirmək, baş verə biləcək hadisələrin qarşısını almaq və Rusiya hərbi personalının təhlükəsizliyini təmin etmək üçün Azərbaycan və Ermənistan silahlı qüvvələrinin baş qərargahları ilə davamlı qarşılıqlı fəaliyyət təşkil edilib, birbaşa rabitə kanalları yaradılmışdır, qurum qeyd edib.

15. 15 Noyabr 2020

    Azərbaycan Müdafiə Nazirliyi Tərtər rayonunun işğaldan azad olunan Talış kəndindən yeni video görüntülər paylaşıb.

16. 15 Noyabr 2020İlham Əliyev: "Azərbaycana qaytarılan ərazilərdəki xristian məbədləri dövlət tərəfindən mühafizə olunacaq"

    Noyabrın 14-də Rusiya Prezidenti Vladimir Putin Azərbaycan Prezidenti İlham Əliyevə zəng edib.

    Axərbaycan Prezidentinin mətbuat xidmətinin məlumatına görə, telefon söhbətində Dağlıq Qarabağa dair üçtərəfli bəyanatda təsbit edilmiş razılaşmaların yerinə yetirilməsinin praktiki aspektləri müzakirə edilib.

    "Tərəflər atəşkəs rejiminə riayət edilməsindən və təmas xəttində vəziyyətin kifayət qədər sakit olmasından məmnun olduqlarını bildiriblər,"- məlumatda deyilir.

    Bildirilir ki, telefon söhbəti zamanı Rusiya Prezidenti üçtərəfli bəyanatla Azərbaycana qaytarılan rayonlarda xristian məbədləri və monastırlarının yerləşdiyini qeyd edib və həmin ibadətgahların qorunub saxlanılmasının və normal fəaliyyətinin təmin edilməsinin vacibliyini vurğulayıb.

    Azərbaycan Prezidenti İlham Əliyev bildirib ki, bu ərazilərdə yerləşən xristian məbədləri dövlət tərəfindən lazımi qaydada mühafizə olunacaq və Azərbaycanda yaşayan xristianlar bu məbədlərdən istifadə edə biləcəklər.

    "Prezident İlham Əliyev qeyd edib ki, Azərbaycan çoxmillətli və çoxkonfessiyalı dövlətdir, burada bütün xalqların və bütün dinlərin nümayəndələrinin hüquq və azadlıqları tam təmin edilib. Azərbaycan ərazisində yerləşən qədim müsəlman və xristian ibadətgahları dövlət tərəfindən mühafizə olunur," - məlumatda deyilir.

17. 15 Noyabr 2020

    Bu gün, yəni noyabrın 15-i Ermənistanın Kəlbəcər rayonunu Azərbaycana qaytarması üçün son tarixdir.

    Bu, noyabrın 10-da Azərbaycan, Ermənistan və Rusiya liderlərinin imzaladığı Qarabağda hərbi əməliyyatların bitməsi və atəşkəs barədə birgə bəyanatda qeyd edilib.

    Bəyanata görə, Ermənistan noyabrın 20-ə qədər Ağdamı, dekabrın 1-dək Laçını Azərbaycana qaytarmalıdır.

    Noyabrın 10-da imzalanmış bu bəyanatla sentyabrın 27-də başlayan Azərbaycan və Ermənistan arasındakı döyüşlər dayandırılıb.

    Dağlıq Qarabağda təmas xətti və Laçın dəhlizi boyu Rusiya sülhməramlı missiyası yerləşdirilir.

18. 15 Noyabr 2020Ötən gün ANAMA-nın minaaxtaranı minaya düşüb

    Ötən gün Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) minaaxtaranı minaya düşüb.

    “1979-cu il təvəllüdlü Xudiyev Asəf Mürsəl oğlu öz xidməti vəzifəsini yerinə yetirərkən düşmən tərəfindən basdırılmış piyada əleyhinə minaya düşüb, nəticədə sol ayağı topuq nahiyəsindən amputasiya olunub və çoxsaylı qəlpə yaraları alıb,”- qurumun məlumatında bildirilir.

    Bundan başqa ANAMA bildirib ki, ötən gün Ağcabədi, Ağdam, Beyləqan, Bərdə, Cəbrayıl, Füzuli, Goranboy və Tərtər rayonları ərazisində mərmilərin aşkar olunması ilə bağlı 250-dən çox müraciət daxil olub.

    ANAMA-nın məlumata görə, daxil olmuş çağırışlar əsasında Daxili İşlər Nazirliyinin əməkdaşları ilə birlikdə 106 operativ və təxirəsalınmaz əməliyyat çıxışı həyata keçirilib.

    “Aparılmış əməliyyat-axtarış tədbirləri zamanı 46 ədəd partlamamış hərbi sursat (PHS), 2 574 ədəd piyada əleyhinə mina, 906 ədəd tank əleyhinə minanın partladıcısı və 295 ədəd partlamış mərmi qalıqları aşkar olunub,”- qurum bildirir.

    “Agentliyin partlayış qrupu tərəfindən 7 ədəd partlamamış hərbi sursat (PHS), mexaniki minatəmizləmə qrupu tərəfindən 7 ədəd PMN minası zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 42 777 nəfər mülki şəxs arasında mina təhlükəsizliyinə dair maarifləndirmə təbliğatı aparılıb,”- qurumun məlumatında deyilir.

19. 14 Noyabr 2020General Rüstəm Muradov: "Təmas xətti ərazisində hər növ döyüş əməliyyatları dayandırılıb"

    Dağlıq Qarabağda Rusiya sülhməramlı qüvvələrin komandiri, general Rüstəm Muradov təmas xəttində vəziyyətin "yavaş-yavaş" sabitləşdiyini deyib.

    O, döyüş əməliyyatlarının tamamilə dayandığını söyləyib, Rusiya agentlikləri xəbər verir

    "Ən əsası odur ki, təmas xətti ərazisində hər növ döyüş əməliyyatları dayandırılıb, biz bu gün heç bir atəş səsi eşitmirik. Vəziyyət yavaş-yavaş sabitləşir," - TASS agentliyində generalın sözləri iqtibas olunur.

20. 14 Noyabr 2020Paşinyan - üçtərəfli razılaşma "siyasi nizamlama sənədi" deyil

    Ermənistanın Baş naziri Dağlıq Qarabağda hərbi qarşıdurmaya son qoyan Rusiya, Azərbaycan və Ermənistanın imzaladığı razılaşmanın "siyasi nizamlama sənədi" olmadığını deyib.

    “Bu, hərbi əməliyyatların dayandırılması haqqında sənəddir. Və bu, siyasi nizamlama sənədi deyil. Elə təkliflər var ki, onlar şərh olunmalı və siyasi məzmun almalıdır,” - Nikol Paşinyan Ermənistanın İctimai Televiziyasına müsahibəsində deyib.

    Onun sözlərinə görə, imzalanan sənəd ətrafında Ermənistanda müzakirələr aparılacaq.

    “Bu, diplomatik müzakirələr olacaq və çox uzun müddət davam edəcək".

    Nikol Paşinyan deyib ki, imzalanmış sənədi “cırıb ata bilərik”, ancaq belə təqdirdə ölkə 10 noyabrdan əvvəlki vəziyyətə, yəni müharibəyə qayıdacaq.

    “Bunun nəticələri olacağını anlamalıyıq".

    Ermənistan lideri Rusiya sülhməramlıları məsələsinə də toxunub.

    "Rusiya sülhməramlılarının Dağlıq Qarabağda olması müharibənin yenidən başlamayacağına zəmanətdir".

    Nikol Paşinyan hesab edir ki, üçtərəfli bəyannamə ilə Qarabağ məsələsi öz həllini tapmayıb və mübarizə davam edir.

    "Qarabağ xalqının haqqı uğrunda mübarizəni davam etdiririkmi? Bəli. Hər şeydən əvvəl nə edilməlidir? Həmvətənlərimiz öz evlərinə qayıtmalıdırlar. İndi orada Rusiya sülhməramlıları var və onlar təhlükəsizliyi təmin edir," - Nikol Paşinyan deyib.