Qarabağ müharibəsi: 8 noyabr Azərbaycanda zəfər günüdür

Canlı reportaj

1. 24 Noyabr 2020Əhmədbəyli-Füzuli-Şuşa magistral yolunun tikintisinə başlanıb

   Əhmədbəyli-Füzuli-Şuşa magistral avtomobil yolunun tikintisinə başlanıb, Azərbaycan Avtomobil Yolları Dövlət Agentliyi bildirib.

   Avtomobil yolunun tikinti layihəsinin uzunluğu 101.5 km, yolun ümumi eni isə 37.7 m təşkil edəcək və o, əsas hissəsinin eni 21.5 olmaqla 4 hərəkət zolağından ibarət olacaq.

   Bundan başqa, layihə üzrə hər bir istiqamətdə əlavə geniş hərəkət hissəsinə malik 1 ehtiyyat zolağın inşası da nəzərdə tutulub.

   Yeni Füzuli-Şuşa magistral avtomobil yolu başlanğıcını M6 Hacıqabul- Bəhrəmtəpə-Mincivan-Ermənistan Respublikası ilə dövlət sərhədi magistral yolunun Füzuli rayonunun Əhmədbəyli kəndindən keçən hissəsindən götürməklə işğaldan azad edilmiş Füzuli, Xocavənd və Xocalı rayonlarının ərazisindən keçir, qurum bildirir.

   Avtomobil yolu Füzuli və Şuşa şəhərləri də daxil olmaqla, bu rayonların 20-dən artıq yaşayış məntəqəsini əhatə etməlidir.

2. 24 Noyabr 2020Mevlüt Çavuşoğlu: "Atəşkəsin həyata keçirilməsini Azərbaycanın istəyi ilə izləmək üçün ərazidə olacağıq"

   Türkiyənin xarici işlər naziri Mevlüt Çavuşoğlu bu gün Türkiyə parlamentində büdcə müzakirələri zamanı çıxışında Azərbaycan, Ermənistan və Rusiya liderlərinin imzaladığı 10 noyabr bəyannaməsindən danışıb.

   "Azərbaycan tərəfindən qəbul edilən müqaviləni daimi həll yoluna gətirə biləcək elementləri ehtiva etdiyinə görə dəstəkləyirik", o deyib.

   "Atəşkəsin həyata keçirilməsini və müqavilənin müddəalarını Azərbaycanın istəyi ilə izləmək üçün ərazidə olacağıq. Bunun üçün 11 noyabrda üçtərəfli müqavilənin 5-ci maddəsində qeyd olunan Birgə Mərkəzin yaradılması üçün Rusiya ilə ayrıca bir anlaşma memorandumu imzaladıq. Sazişin bütün bölgəyə və bu çərçivədə Ermənistana orta və uzun müddətə fayda gətirəcəyinə inanırıq. Hər kəsin qazanması üçün sülh və sabitliyin olmasını istəyirik."

   O, Türkiyənin bu münaqişədə "mərkəzi rol oynadığını" vurğulayıb.

3. 24 Noyabr 2020AFP: Ermənistan Kəlbəcəri Azərbaycana təhvil verməyə hazırlaşır

   AFP agentliyinin paylaşdığı videoda Kəlbəcər rayonunun Azərbaycana təhvil verilməzdən əvvəl erməni hərbi konvoyunun oradan keçdiyi görünür.

   Ermənistan Rusiyanın vasitəçiliyi ilə həyata keçirilən sülh müqaviləsi çərçivəsində noyabrın 25-də Kəlbəcər rayonunu təhvil verməyə hazırlaşır.

   Rayon noyabrın 15-də qaytarılmalı idi, lakin Azərbaycan rəsmiləri Ermənistanın daha 10 gün vaxt istədiyini bildirmişdi.

4. 24 Noyabr 2020BQXK Dağlıq Qarabağa 400-500 nəfər göndərməyi planlaşdırır

   "Beynəlxalq Qızıl Xaç Komitəsi Dağlıq Qarabağdakı mövcudluğunu dörd dəfə artıracaq", təşkilatın Prezidenti Peter Maurer bu barədə açıqlama verib, TASS yazır.

   Agentlik yazır ki, cənab Maurer RBC-yə çərşənbə axşamı yayımlanan bir müsahibəsində "bölgəyə əlavə 400-500 nəfərin göndərilməli olduğunu" bildirib.

   "Müharibədən əvvəl bölgədəki missiyamızın büdcəsi on milyon frank idisə, gələn il bu 45 milyon olacaq. Yəni varlığımızı dörd qat artıracağıq. Hazırda bölgədə çox az adam var", qurum rəhbəri deyib.

   BQXK Prezidenti həmçinin "Qızıl Xaçın Yerevan və Bakı şəhərlərində ofislərinin olduğunu və komitə nümayəndələrinin Stepanakertə (Xankəndi-red.) qayıdaraq daha bir-iki ofis açmağı planlaşdırdığını" vurğulayıb.

5. 24 Noyabr 2020Azıx mağarasına aid arxeoloji tapıntıların Bakıya gətirildiyi bildirilib

   "Azıx mağarasına aid arxeoloji tapıntılar Bakıya gətirilib".

   Məlumatı Azərtac AMEA-nın əməkdaşı tarix elmləri doktoru, professor Nəcəf Müseyibliyə istinadən yayıb.

   "Bir neçə gün əvvəl Azərbaycan hərbçiləri Xocavəndin işğaldan azad edilmiş Azıx kəndindəki evlərdən birinə baxış zamanı üzərində “Azıx” yazılmış və içərisində arxeoloji materialların olduğu qutular aşkar edilib. Məlumat mühüm əhəmiyyət kəsb etdiyi üçün təcili olaraq Azərbaycan Respublikası Dövlət Təhlükəsizliyi Xidmətinin nümayəndəsi ilə birgə institutun əməkdaşı, tarix üzrə fəlsəfə doktoru Azad Zeynalov həmin rayona ezam olundu", agentlik AMEA əməkdaşına istinadən yazıb.

   Nəcəf Müseyibli deyib ki, "yerində baxış zamanı qutularda işğal müddətində dünya əhəmiyyətli abidə, Paleolit dövrünə aid ibtidai insan düşərgəsi olan Azıx mağarasında Ermənistan və digər ölkələrin alimlərinin apardıqları qanunsuz arxeoloji qazıntılar nəticəsində aşkar edilmiş tapıntıların qablaşdırıldığı" aşkarlanıb.

   AMEA əməkdaşı "tapıntıların əksəriyyətinin qədim fauna qalıqları olduğunu və 90-a yaxın plastik qutulardakı bu tapıntıların noyabrın 23-də Bakıya gətirilərək institutun Arxeoloji Fondunda yerləşdirildiyini" bildirib.

6. 24 Noyabr 2020İlham Əliyev: “Ağdam əməliyyatı planlaşdırılırdı, biz Ağdamı onsuz da alacaqdıq”

   “Biz Ağdam şəhərini bərpa edəcəyik, bütün kəndləri bərpa edəcəyik. Heç kimdə bu haqda şübhə olmasın". Azərbaycan Prezidenti, Silahlı Qüvvələrin Ali Baş Komandanı İlham Əliyev xanımı Mehriban Əliyeva ilə birgə Ağdama səfəri zamanı Ağdam məscidinin qarşısında çıxışında belə deyib.

   Cənab Əliyev "necə ki, biz 44 gün ərzində birlik göstərmişik, əminəm ki, azad edilmiş torpaqlarımızın bərpası işində də birlik, əzmkarlıq göstərəcəyik" deyib.

   İlham Əliyev "bütün dağıdılmış şəhərlərin və orada qalan tarixi abidələrin bərpa ediləcəyini" bildirib.

   Ağdamın işğaldan azad olunması barədə danışan ölkə başçısı "Ağdamın alınması üçün onsuz da əməliyyat planlaşdırıldığını" vurğulayıb.

   “Müharibənin bütün sirlərini açmaq hələ ki, tezdir. Vaxt gələcək çox maraqlı məsələlər üzə çıxacaq. Ancaq bu gün tam rahat deyə bilərəm ki, Ağdam əməliyyatı planlaşdırılırdı. …Biz Ağdamı onsuz da alacaqdıq, amma itkilər olacaqdı, özü də böyük sayda. Ona görə Şuşanı və noyabrın 9-da 70-dən çox kəndimizi azad edəndən sonra düşmənin beli qırıldı, təslim oldu, ağ bayraq qaldırdı, mənim şərtlərimə əməl etdi və öz məğlubiyyətini etiraf etdi”.

   Ağdamda Azərbaycan bayrağını qaldıran Prezident döyüş meydanında əldə edilən qələbənin “Ağdam rayonunu, eyni zamanda, Kəlbəcər və Laçın rayonlarını bir güllə atmadan, bir şəhid vermədən işğaldan azad edilməsinə imkan yaratdığını” söyləyib.

   Prezident qeyd edib ki, işğaldan azad edilmiş torpaqlara Azərbaycan xalqının, şəhidlərinin canı, qanı bahasına, qəhrəmanlarının şücaəti hesabına qayıdılıb: “Biz güc toplamalı idik və toplayırdıq. Mən son 17 il ərzində xalqa müraciət edərkən dəfələrlə deyirdim ki, biz daha güclü olmalıyıq, daha qüdrətli ordu qurmalıyıq. Bu gün dünyada güc amili həlledici rol oynayır. Haqq-ədalət bizim tərəfimizdədir, beynəlxalq hüquq bizim tərəfimizdədir, güc də bizim tərəfimizdə olmalıdır. Məhz gücümüzün yetərli dərəcədə olmaması nəticəsində Azərbaycan 1990-cı illərin əvvəllərində işğala məruz qalmışdır. Biz güc toplayırdıq, güclənirdik".

   Azərbaycan Prezidenti son 17 il ərzində “münaqişənin həlli üçün hüquqi baza yaradılmasından” da danışıb.

   Dövlət başçısı qeyd edib ki, bütün beynəlxalq təmaslarında Ermənistan-Azərbaycan Dağlıq Qarabağ münaqişəsi ilə bağlı Azərbaycanın mövqeyini, tarixi həqiqətləri və mövcud vəziyyəti bütün həmkarlarına çatdırıb.

   “Mənim demək olar ki, bütün ikitərəfli beynəlxalq təmaslarımda Ermənistan-Azərbaycan Dağlıq Qarabağ münaqişəsi xüsusi yer alır... Son 17 il ərzində demək olar ki, bütün çıxışlarımda bu məsələ ilə bağlı öz fikrimi bildirmişdim, dünya ictimaiyyətini məlumatlandırmışdım. Çünki əfsuslar olsun ki, 1990-cı illərin əvvəllərində münaqişə ilə bağlı dünyada dolğun təsəvvür yox idi... Erməni lobbisi tərəfindən ortalığa atılmış məlumat var idi. Əks təqdirdə, bizim torpaqlarımız işğal altına düşə-düşə ABŞ Konqresi məşhur 907-ci düzəlişi qəbul etməzdi. Azərbaycan torpaqları işğal altına düşürdü, ancaq Amerika Konqresi Azərbaycanı təcavüzkar kimi tanımışdır və bizi humanitar yardımdan məhrum etmişdir. O vaxt erməni lobbisi buna nail oldu. Azərbaycan diplomatiyası, sadəcə olaraq, onların qarşısında adekvat addım ata bilməmişdi”, Prezident deyib.

   Azərbaycan Prezidenti Məkkədən gətirdiyi “Qurani-Kərim”i Ağdam məscidinə bağışlayıb.

7. 24 Noyabr 2020"BMT minalardan təmizlənmə missiyasının Dağlıq Qarabağa göndərilməsi üzərində işləyir" - TASS yazır

   "BMT minalardan təmizlənmə missiyasının Dağlıq Qarabağa göndərilməsi üzərində işləyir", Rusiyanın TASS agentliyi BMT-nin Sülhməramlı Qüvvələrinin rəsmisinə istinadən xəbər verir.

   Agentliyin xəbərində bildirilir ki, "böyük ehtimalla dekabrın əvvəlində ehtiyacları qiymətləndirmə missiyası bölgəyə gələcək".

   "Birləşmiş Millətlər Ərazilərinin Minalardan Təmizlənməsi Xidməti (UNMAS), digər BMT qurumları və yerdəki ölkə komandası ilə koordinasiya edilərək tərəflərin tələb etdiyi BMT köməyi daxilində təcili yerləşdirmə üzərində işləyir", agentlik qurum rəsmisindən sitat gətirir.

   BMT sözçüsü Stephane Dujarric bazar ertəsi günü verdiyi açıqlamada “BMT-nin Dağlıq Qarabağda humanitar ehtiyacları qiymətləndirmək üçün Rusiya Federasiyası ilə birlikdə işləməyə hazır olduğunu" bildirmişdi.

8. 24 Noyabr 2020ANAMA cəbhəboyu ərazilərdə mina və partlamamış hərbi sursat zərərsizləşdirildiyini açıqlayıb

   “Noyabrın 20-23-də Azərbaycan Ərazilərinin Minalardan Təmizlənməsi üzrə Milli Agentliyi (ANAMA) daxil olmuş 91 çağırış əsasında Ağcabədi, Ağdam, Cəbrayıl, Füzuli, Xocavənd, Tərtər rayonları ərazisində 58 operativ və təxirəsalınmaz əməliyyat çıxışı həyata keçirilib”, ANAMA açıqlayıb.

   Agentliyin məlumatına görə əməliyyatlar “agentliyin xüsusi mobil çevik əməliyyat qrupları tərəfindən Daxili İşlər Nazirliyinin əməkdaşları ilə birlikdə həyata keçirilib”.

   “Aparılmış əməliyyat-axtarış tədbirləri zamanı 16 ədəd partlamamış hərbi sursat (PHS), 27 ədəd tank əleyhinə mina, 2 ədəd tank əleyhinə minanın partladıcısı, 1 ədəd piyada əleyhinə mina, 2 ədəd bombacıq, 1 ədəd hərbi məqsədlər üçün istifadə olunan meteoroloji radiopelenqator və 119 ədəd partlamış mərmi qalıqları aşkar olunub. Agentliyin partlayış qrupu tərəfindən 31 ədəd mina və partlamamış hərbi sursat (PHS), 2 ədəd bombacıq zərərsizləşdirilib”, ANAMA bildirib.

   ANAMA həmçinin bildirb ki, indiyədək Mina Təhlükəsinə dair Maarifləndirmə üzrə mütəxəssislər tərəfindən 72 min 355 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

9. 23 Noyabr 2020Ağdamın Gülablı kəndi üzərində Azərbaycan bayrağı qaldırılıb

   Azərbaycan Ordusunun bölmələri Ağdam rayonunun Gülablı kəndində yerləşən keçmiş orta məktəbdə Azərbaycanın dövlət bayrağını ucaldıblar, Azertag dövlət agentliyi video yayıb.

   Hərbçilər məktəbin qarşısında sıra düzülüşündə Azərbaycanın ərazi bütövlüyü uğrunda həlak olan əsgərlərin xatirəsini bir dəqiqəlik sükutla yad ediblər, dövlət himni ifa olunub.

   Mərasim məktəbin ərazisi mina və digər partlayıcılardan təmizləndikdən sonra baş verib.

   Rayon işğal altında oluğu dövrdə məktəbin ərazisində Ermənistan silahlı qüvvələri yerləşirdi.

10. 23 Noyabr 2020Azərbaycan Müdafiə Nazirliyi: "Suqovuşanda mina partlayışı nəticəsində polkovnik Babək Səmidli şəhid olub"

    Suqovuşan kəndi yaxınlığında döyüşlərdə ölənlərin cəsədlərini axtararkən baş vermiş mina partlayışı nəticəsində azərbaycanlı polkovnik həlak olub.

    Azərbaycan Müdafiə Nazirliyi yüksək rütbəli Azərbaycan zabitinin həlak olduğunu təsdiqləyib.

    “Rusiya sülhməramlıları ilə birgə meyitlərin axtarılması şəraitində mina partlaması səbəbindən korpus komandirinin müavini, polkovnik Babək Səmidli şəhid olub”,- Nazirliyin mətbuat xidmətinin rəisi Vaqif Dərgahlı BBC News Azərbaycancaya deyib.

    Polkovnik sabah Göyçayda dəfn olunacaq.

    Yerli mətbuatın yazdığına görə, polkovnik Babək Səmidli Qarabağın erməni işğalından azad olunmasında qəhrəmanlıq göstərən zabitlərdən biri olub.

    Cənab Dərgahlı bildirib ki, Rusiya sülhməramlılarının zabiti də həmin mina partlayışından yaralanıb.

    Rusiya Müdafiə Nazirliyinin bildirdiyinə görə, partlayış nəticəsində yaralanmış bir rusiyalı sülhməramlı zabit Bakıdakı hospital çatdırılıb, onun həyatı üçün heç bir təhlükə yoxdur.

    Məlumata görə, partlayışda Qarabağda separatçıların "Fövqəladə Hallar Nazirliyinin" dörd əməkdaşı da zərər çəkib.

    Axtarış işlərinə Azərbaycan hərbçiləri, Rusiyalı sühməramlıları, Qarabağdakı separatçıların və Beynəlxalq Qızıl Xaç Komitəsinin nümayəndələri də cəlb olunub, xəbərdə bildirilir.

11. 23 Noyabr 2020İlham Əliyev və Mehriban Əliyeva Ağdamdadırlar

    Birinci vitse-prezident Mehriban Əliyeva rəsmi İnstagram səhifəsində Prezident İlham Əliyev ilə Ağdama səfərini göstərən videolar paylaşıb.

    Videoda Prezident İlham Əliyevin sükan arxasında olduğu görünür.

    İlk videoda cənab Əliyev belə deyir: "İndi biz işğaldan azad edilmiş torpaqlara keçirik. İstiqamət Ağdam şəhəri."

    Növbəti videoda Ermənistan əsgərlərinin müdafiə xətlərini göstərərək "Ağdam şəhərinə qədər bir neçə müdafiə xətti olduğunu" deyir.

    Növtəi videolarda isə cənab Əliyev sol və sağ tərəfləri göstərək "Bir dənə də salamaq bina yoxdur. Hamısını dağıdıblar" deyir.

    Son videoda cənab Əliyev Azərbaycan bayrağına işarə edərək deyir ki, "Qaldırdığım bayraq, Eşq olsun!"

12. 23 Noyabr 2020Erməni əsirlərin cəsədlərilə qəddar rəftarı göstərən videolarla bağlı Azərbaycanda cinayət işi açılıb

13. 23 Noyabr 2020

    Ermənistan müdafiə nazirinin müavini Qabriel Balayan vəzifəsindən azad edilib.

    Ermənistan parlamentinin müdafiə məsələləri üzrə komissiyasının rəhbəri Andranik Koçaryan bu barədə məlumat verib, news.am saytı yazır.

    Qarabağda müharibənin dayandırılması barədə bəyanat imzalandıqdan sonra Ermənistanın bir sıra nazirliklərində yüksək rütbəli rəsmilər ya istefa veriblər, ya da vəzifədən azad ediliblər.

14. 23 Noyabr 2020Baş Prokurorluq: "Seyran Ohanyan barəsində cinayət işinin istintaqı aparılır"

    "Seyran Ohanyanın axtarışa verilməsinə dair KIV-də yayılmış məlumatla bağlı bildiririk ki, həmin cinayət işinin istintaqı Hərbi Prokurorluqda aparılır", Azərbaycanın Baş Prokurorluğu bildirib.

    Bu gün səhər saatlarında yerli mediada "Azərbaycanın Seyran Ohanyan barəsində soyqırımı cinayəti üzrə axtarış elan etməsi" xəbəri yayılıb.

    Xəbərdə deyilir ki, onun barəsində "Azərbaycan Cinayət Məcəlləsinin 103-cü (soyqırımı) maddəsi ilə cinayət işi başlanıb".

    Xəbərdə həmçinin "təqdimatın məhkəmə tərəfindən təmin edildiyi və Seyran Ohanyan barəsində qiyabi həbs-qətimkan tədbiri seçilməsi, və saxlanılması üçün barəsində beynəlxalq axtarış elan edilməsi" bildirilir.

    Hərbi prokurorluqdan məsələ ilə bağlı bildirilib ki, Bakı hərbi məhkəməsinin qərarı ilə Seyran Ohanyan barəsində qiyabi olaraq tutulduğu gündən 4 ay müddətinə həbs-qətimkan tədbiri seçilib.

15. 23 Noyabr 2020Ermənilər Laçını tərk edirlər

16. 23 Noyabr 2020Erməni siyasətçi Paşinyanın istefası tələbi ilə aclıq elan edib

    Ermənistanda müxalif Daşnaksütyun partiyasının nümayəndəsi, Yerkir Media kanalının informasiya-analitik xidmətinin direktoru Geğam Manukyan bazar ertəsi günü Ermənistanın Baş naziri Nikol Paşinyanın istefası tələbi ilə müddətsiz aclıq aksiyasına başladığını elan edib.

    "Nikol Paşinyanın istefası tələbilə müddətsiz aclıq elan edirəm”, - Manukyan Facebook-da yazıb.

    Onun sözlərinə görə, "hökumətin və Baş nazirin yararsız və dağıdıcı siyasətinə görə" erməni xalqı "vətəninin bir hissəsini itirib".

    Manukyan hesab edir ki, hazırkı hakimiyyət Qarabağ məsələsində mümkün qədər əlverişli şərtlər əldə etməyə qadir deyil.

    Noyabrın 9-da Rusiya, Azərbaycan və Ermənistan liderləri Vladimir Putin, İlham Əliyev və Nikol Paşinyan Dağlıq Qarabağda hərbi əməliyyatların tamamilə dayandırılması barədə birgə bəyanat imzalayıblar.

    Bəyanata görə, Ermənistan və Azərbaycan tutduqları mövqelərdə dayanır, sonra Ağdam, Kəlbəcər və Laçın rayonları Bakının nəzarətinə keçir, tərəflər arasında əsir mübadiləsi aparılır, Rusiya sülhməramlıları təmas xətti və Qarabağı Ermənistanla əlaqələndirən Laçın dəhlizi boyunca yerləşdirilir.

17. 23 Noyabr 2020Yerevanda Müdafiə Nazirliyinin qarşısında etiraz aksiyası

    Yerevanda, Müdafiə Nazirliyinin qarşısında övladları müharibə zamanı itkin düşmüş hərbçilərin valideynləri etiraz aksiyası edirlər.

    Armenpress xəbər verir ki, onlar barəsində xəbər alınmayan hərbçilər barədə tədbir görməyi tələb edirlər.

    Məlumata görə, Müdafiə və Təhlükəsizlik Məsələləri Daimi Komitəsinin sədri Andranik Koçaryan onları parlamentə dəvət edib.

    “Bu gün hökumət bütün bu kimi məsələlərin həlli yollarını müzakirə edəcək. Sabah müzakirəyə qatılacaq 15 - 20 nəfərin seçilməsini təklif edirəm. Xarici işlər və müdafiə Nazirləri Milli Məclisə gələrək bu problemin həlli yollarını təqdim edəcəklər, gələcəkdə Qırmızı Xaç və Rusiya qoşunlarının nümayəndələri də vasitəçilik [yollarını-red.] təqdim edəcəklər”, o deyib.

    Baş nazir Nikol Paşinyan noyabrın 16-da bildirib ki, Ermənistanın yüzlərcə itkin düşən hərbçisi var.

18. 23 Noyabr 2020“Noyabrın 14-dən bəri Dağlıq Qarabağa təxminən 9 min qaçqın qayıdıb" - TASS yazıb

    "Təxminən 9 min qaçqın Ermənistandan Rusiya sülhməramlılarının müşayiəti ilə Dağlıq Qarabağa qayıdıb", TASS xəbər agentliyi Rusiyanın Krasnaya Zvezda qəzetinə istinadən yazıb.

    Xəbərdə deyilir ki, "ilk günlərdə onların sayı iki yüz nəfəri keçməsə də, indi evlərinə dönmək istəyən minlərlə şəxs Yerevandakı toplanış məntəqəsinə gəlir".

    "Bazar günü Rusiya Müdafiə Nazirliyi 1400 nəfərin Rusiya sülhməramlılarının müşayiəti ilə Xankəndinə qayıtdığını bildirib. Şənbə günü əraziyə 1100 qaçqın geri gəlib", TASS bildirir.

    Agentlik yazır ki, "Rusiya Müdafiə Nazirliyinin məlumatına görə, 15-ci Motorlu Piyada Briqadasının bölmələri sülhməramlı qüvvələrin əsasını təşkil edir":

    "Rusiya Müdafiə Nazirliyi təmas xəttindəki mülki şəxslərin etibarlı şəkildə geri dönməsinə rus hərbçilərinin məsuliyyət daşıdığını bəyan edib", xəbərdə deyilir.

    Azərbaycan və Ermənistan arasında 44 günlük müharibə 27 sentyabrda, Dağlıq Qarabağ bölgəsində gərgin döyüşlərlə başlayıb.

    Noyabrın 9-da Rusiya Prezidenti Vladimir Putin, Azərbaycan Prezidenti İlham Əliyev və Ermənistanın Baş Naziri Nikol Paşinyan 10 noyabrdan başlayaraq Dağlıq Qarabağda atəşkəsə dair birgə bəyanat imzalayıblar.

    Sənəddə Azərbaycan və Ermənistan tərəfləri olduqları mövqelərdə qalması və Rus sülhməramlılarının bölgəyə gətirilməsi də nəzərdə tutulub.

19. 23 Noyabr 2020FHN: "Dövlət Yanğın Nəzarəti Xidmətinin yerli strukturları işğaldan azad olunmuş ərazilərdə fəaliyyətə başlayıb"

    "Fövqəladə Hallar Nazirliyinin Dövlət Yanğın Nəzarəti Xidmətinin Qarabağ Regional Dövlət Yanğın Nəzarəti İdarəsinin müvafiq bölmələri Füzuli, Cəbrayıl, Zəngilan, Qubadlı və Xocavənd rayonlarında fəaliyyətə başlayıb".

    Bu barədə Fövqəladə Hallar Nazirliyi (FHN) məlumat yayıb.

    Qurum bildirib ki, "Azərbaycan FHN işğaldan azad edilmiş ərazilərdə müvafiq strukturların təşkilini davam etdirir".

20. 23 Noyabr 2020

    "Vivaldinin "Dörd Fəsil - Yay"ı dağıdılmış Füzuli şəhərinə ümid və ilham verir, Azərbaycan Prezidentinin köməkçisi Hikmət Hacıyev Twitter hesabında paylaşım edib.

    O sözü gedən əsərin ifa olunduğu video görüntüləri paylaşaraq "dplomatik icma ilə Ermənistanın 30 illik işğal dövründə Füzuli şəhərini İŞİD kimi talan edib dağıtmasını görmək üçün təşkil olunan səfərin simvolik sonu" yazıb.