Qarabağ müharibəsi: 8 noyabr Azərbaycanda zəfər günüdür

Canlı reportaj

1. 21 Noyabr 2020Sergey Lavrov Bakı və Yerevan səfərlərinin yekunları barədə

   Yerevan və Bakıya səfər edən Rusiyanın xarici işlər naziri deyib ki, tərəflər Dağlıq Qarabağda atəşkəs razılaşmalarına alternativin olmadığını təsdiqləyib.

   “[Səfərin] əsas nəticəsi budur ki, Rusiya, Azərbaycan və Ermənistan liderlərinin 9 noyabrda əldə etdikləri razılaşmanın aktuallığı və alternativsiz olduğu tamamilə təsdiqlənib”, - TASS agentliyində Sergey Lavrovun sözləri iqtibas olunur.

   Rusiyalı diplomatın sözlərinə görə, sülh və birgə yaşamaq üçün mühitin yaradılmasına dair Rusiya ilə Azərbaycan üst-üstə düşən mövqelərdə durur.

   TASS agentliyinin məlumatına əsasən, Rusiya xarici işlər nazirinin Bakıya səfəri vaxtı bloklanmış bölgənin iqtisadi əlaqalərinin bərpa olunması da müzakirə olunub.

   Sergey Lavrovun sözlərinə görə, bu, Azərbaycan və erməni xalqları arasında sülhün bərqərar olmasına kömək edəcək.

2. 21 Noyabr 2020Baş Prokurorluq Azərbaycan vətəndaşlarını və hərbi qulluqçularını xəbərdar edib

   Azərbaycanın Baş Prokurorluq bildirib ki, bəzi kütləvi informasiya vasitələri və sosial media səhifələrində Azərbaycan hərbi qulluqçularının 44 günlük müharibə zamanı həlak olmuş erməni hərbçilərinin meyitləri üzərində təhqiredici hərəkətlər etmələrini, habelə əsir götürülmüş erməni hərbçiləri ilə qeyri-insani rəftarı əks etdirən videogörüntülər yayılıb.

   "Həmin videogörüntülər Azərbaycan Respublikasının Baş Prokurorluğu və Hərbi Prokurorluq tərəfindən təhlil edilərək öyrənilmiş, bir çox videoçarxların saxta olması müəyyən edilsə də, bəzilərinin doğru olmasına və reallığı əks etdirməsinə ciddi şübhələr yaranmışdır", qurum bildirib.

   Baş Prokurorluq qeyd edilən məlumatlarla bağlı toplanmış materiallar əsasında Hərbi Prokurorluq tərəfindən cinayət işinin açıldığını bildirib.

   Cinayət işi Cinayət Məcəlləsinin işgəncə vermə, onlarla qəddar və ya qeyri-insani rəftar etmə və qəbir və ya meyit üzərində təhqiredici hərəkət maddələri ilə başladılıb.

   "Hazırda həmin videogörüntülərlə bağlı zəruri istintaq-əməliyyat tədbirləri həyata keçirilməklə təqsirli şəxslərin müəyyən edilərək məsuliyyətə cəlb edilməsi istiqamətində tədbirlər davam etdirilir.

   Bu kimi qanunsuz əməllərə yol vermiş şəxslər müəyyən edilib məsuliyyətə cəlb edilməklə, istintaqın gedişatı və nəticəsi barədə ictimaiyyətə ətraflı məlumatın verilməsi təmin ediləcək", Prokurorluqdan bildirilib.

   Baş Prokurorluq Azərbaycan vətəndaşlarını və hərbi qulluqçularını yuxarıda qeyd olunan qanun pozuntularının yolverilməzliyi barədə "bir daha" xəbərdar edib.

3. 21 Noyabr 2020

   Ağdam rayonunun müxtəlif kəndlərinin sakinləri atlarla keçmiş təmas xəttinə kimi yürüş ediblər.

   Onlar BBC News Azərbaycanca müxbirlərinə bu videoda danışıblar.

4. 21 Noyabr 2020

   Bakıda hazırda Rusiya idarələrarası nümayəndə heyəti Prezident İlham Əliyevlə görüşür.

   Bu barədə Rusiya XİN sözçüsü Mariya Zaxarova Facebook-da fotolar paylaşıb.

   Fotolarda Rusiya xarici işlər naziri Sergey Lavrovun İlham Əliyevlə əl sıxdığı və geniş tərkibdə görüşdüyü görünür.

5. 21 Noyabr 2020UNESCO Dağlıq Qarabağa səhra missiyasını təklif edir

   BMT-nin UNESCO agentliyi bölgədəki mədəni irsin siyahısını hazırlamaq üçün Dağlıq Qarabağa səhra missiyasını təklif edir.

   Təşəbbüslə çıxış edən təşkilatın baş direktoru bu həftə hər iki ölkənin nümayəndələri ilə görüşüb.

   Audrey Azoulay "ortaya çıxan qarşıdurmalara” rəğmən mədəni irsi qorumaq öhdəliyinin vacibliyini vurğulayıb.

   UNESCO hazırda münaqişədən təsirlənən bölgəyə baş çəkə bilmədiyini və belə səfər üçün şərait yaratmaq məqsədiylə “bütün maraqlı” tərəflərlə işləyəcəyini bildirir.

6. 21 Noyabr 2020Bakı: Sergey Şoyqu Prezident İlham Əliyevlə görüşüb

   Azərbaycan Prezidenti Bakıda səfərdə olan Rusiya müdafiə naziri ilə görüşdə Rusiya və Türkiyənin sülhməramlı missiyasının rolu, atəşkəslə bağlı cari vəziyyət və Ermənistanla əlaqələrin normallaşmasına dair planlar barədə danışıb.

   İlham Əliyev deyib ki, Rusiyanın sülhməramlı missiyası hər iki tərəflə işgüzar əlaqələr yaradıb.

   “Hesab edirəm ki, bu, vəziyyətin sabitləşməsi üçün mühüm amildir və Bəyanat imzalanan andan atəşkəslə bağlı hər hansı ciddi pozuntular olmayıb və əminəm ki, olmayacaq”, - Azərbaycan Prezidenti bildirib.

   O, həmçinin atəşkəsin müşahidə edilməsi üzrə mərkəzin yaradılmasına dair Rusiya-Türkiyə danışıqlarının fəal gedişini də alqışlayıb.

   İlham Əliyevin sözlərinə görə, bu, regionda sabitliyin möhkəmlənməsi baxımından mühüm amildir.

   “Ümidvaram ki, bugünkü atəşkəs və Ermənistan ilə münasibətlərin normallaşması barədə bizim planlarımız, - əgər onlar Ermənistan tərəfindən müsbət qəbul edilərsə, - regionda yeni vəziyyətin, əməkdaşlığın, sabitliyin və təhlükəsizliyin möhkəmlənməsi üçün şərait yarada bilər. Bu, hamının xeyrinə olar. Bizim regionda məskunlaşan xalqlar da, qonşularımız da, bütövlükdə dünya da daha təhlükəsiz olacaq,” - İlham Əliyev deyib.

   Bakıdan əvvəl Rusiyanın müdafiə naziri Yerevanda olub.

7. 21 Noyabr 2020Yerevanda Baş nazir Nikol Paşinyanı istefaya çağıran nümayiş keçirilir

   Yerevanda, Azadlıq Meydanında Baş nazir Nikol Paşinyanın istefasını tələb edən növbəti nümayiş keçirilir.

   Bundan əvvəl çərşənbə günü belə nümayiş keçirilmişdi. Son iki gündə isə Yerevan küçələrində yolların qapadıldığı aksiyalar keçirilib. Ermənistan mediası polisin bu aksiyalara müdaxilə etdiyini bildirir.

   Nümayişlər Nikol Paşinyanın Qarabağda müharibənin dayandırılması və atəşkəs barədə 10 noyabr razılaşmasını imzalamasından sonra başlayıb. Bundan sonra Ermənistanda 17 partiya onun bu hərəkətini "satqınlıq" və "xəyanət" adlandırıb.

   Onlar Baş nazirin istefa verməsini, ondan sonra Parlamentin yeni baş nazir seçməsini, müvəqqəti milli barışıq hökuməti yaradılmasını istəyirlər.

   Müvəqqəti hökumət atəşkəs müqaviləsinə yenidən baxmalı və Ermənistanın itkilərini minimuma endirməli, müharibənin nəticələrini aradan qaldırmaq üçün fövqəladə addımlar atmalı və vaxtından əvvəl parlament seçkilərini təşkil etməlidir.

8. 21 Noyabr 2020Ağdamın qaytarılmasını atlı yürüşlə qeyd edən sakinlər

   Bu Ağdam sakinləri rayonlarının işğaldan azad edilməsini atlı yürüşlə qeyd edirlər.

   Birazdan saytımızda bu barədə videonu izləyə bilərsiniz.

   Ağdam rayonunun işğal altında olan hissəsi noyabrın 20-də Azərbaycana qaytarılıb.

   Bu, Azərbaycan, Ermənistan və Rusiya liderlərinin birgə 10 noyabr razılaşmasından sonra mümkün olub.

9. 21 Noyabr 2020Rusiya xarici işlər naziri Sergey Lavrov Nikol Paşinyan və Ermənistan rəsmiləri ilə görüşüb

   Rusiyanın xarici işlər naziri Ermənistanın Baş naziri Nikol Paşinyanla təkbətək və nümayəndə heyətləri ilə birgə görüş keçirib.

   Bundan başqa, Sergey Lavrov Yerevanda Ermənistanın yeni təyin olunan xarici işlər nazriri Ara Ayvazyanla da görüşüb.

   Görüşlərin təfərrüatları hələ ki, açıqlanmayıb.

   Rusiya xarici işlər nazirinin Nikol Paşinyanla görüşündən yayılan fotolar artıq sosial şəbəkələrdə müzakirə olunmağa başlayıb. Fotolarda Nikol Paşinyanın Sergey Lavrovla görüşdüyü otaqda yalnız Ermənistan bayrağı qoyulub, Rusiya bayrağı isə yoxdur.

   Sonradan Rusiya XİN bayrağın olmamasını Ermənistanın protokol təcrübəsi ilə əlaqələndirib.

   Rusiyanın xarici işlər naziri bildirib ki, Yerevan Dağlıq Qarabağdakı silahlı qarşıdurmaya son qoyan üçtərəfli razılaşma üzrə öhdəliklərinə sadiq qalır.

   Sergey Lavrov bu bəyanatla Ermənistanda çıxış edib.

   Paytaxt Yerevanda Ermənistan rəhbərliyi ilə görüşlərini şərh edən Rusiya diplomatiyasının başçısı deyib ki, əsas vurğu 9 noyabrda imzalanan bəyanata edilib.

   Bu barədə TASS agentliyi xəbər verir.

   "Biz Ermənistan prezidenti ilə də görüşdük. Həm o, həm də Baş nazir vurğuladı ki, bu bəyanat çox ciddi problemləri həll eyməyə, insanları xilas etməyə kömək etdi. Və onlar razılaşmanın gələcəkdə də yerinə yetirilməsinə tam sadiq olduqlarını bildirdilər".

   Rusiyalı diplomatın sözlərinə görə, tərəflər razılaşmaların alternativsiz olduğunu da etiraf ediblər.

   "Hamı tərəfindən etiraf olundu ki, bu bəyanat bir neçə həftə əvvəl olduqca kəskin xarakter alan vəziyyətin nizamlanmasında alternativi olmayan seçimdir," – İnterfax agentliyində Sergey Lavrovun sözləri iqtibas olunur.

   Rusiya Xarici İşlər nazirinin sözlərinə görə, Ermənistan həmçinin Rusiya ilə müttəfiqlik əlaqələrə sadiq qaldığını da təsdiqləyir.

10. 21 Noyabr 2020Rusiyadan Xankəndinə ilk humanitar yardım karvanı gəlib

    Rusiyanın Fövqəladə Hallar Nazirliyi bəyan edib ki, ilk humanitar yadım karvanı artıq Qarabağa çatıb.

    Rusiyanın Rostov bölgəsindən gələn ikinci humanitar yardım karvanı artıq Krasnodar Bölgəsi ərazisindən keçib.

    Nazirliyin məlumatına görə, ümumilikdə humanitar yardıma 35 texnika və 40-a yaxın işçi qüvvəsi cəlb olunub.

    Rusiya nazirliyinin təşkil etdiyi iki yardım birlikdə Xankəndinə 345 ton humanitar yardım çatdıracaq.

    Məlumata görə, müharibənin təsirinə məruz qalmış əhalinin sosial infrastrukturunu və evlərini bərpa etmək üçün tikinti materialları xüsusi nəqliyyat vasitələri ilə gətirilir.

    Rusiya Fövqəladə Hallar Nazirliyinin bildirib ki, nazirliyin nümayəndələri yerli özünüidarə üzvləri ilə birgə Xankəndi, Ağdərə, Xocavənd və Əsgəranda zədələnmiş binalara baxış zamanı dəymiş ziyanı qiymətləndirməyə davam edirlər.

11. 21 Noyabr 2020Sergey Şoyqu Yerevandan sonra Bakıya gəlib

    Rusiyanın müdafiə naziri bu gün Bakıya gəlib, Ria Novosti agentliyi məlumat yayıb.

    Sergey Şoyqu Azərbaycan paytaxtına gələnədək Yerevanda olub.

    O, Ermənistanda müdafiə naziri və Baş nazir Nikol Paşinyanla görüşüb.

12. 21 Noyabr 2020Azərbaycan Qarabağ müharibəsində necə qalib gəldi? Hərbi ekspertlər cavab verir

13. 21 Noyabr 2020Hulusi Akar:Türkiyə hərbçiləri tezliklə Azərbaycana gedəcəklər

    Türkiyənin müdafiə naziri Hulusi Akar şənbə günü deyib ki, Türkiyə hərbçiləri tezliklə Azərbaycana yola düşəcəklər.

    Məlumatı Rusiyanın RİA Novosti agentliyi yayaıb.

    Azərbaycana gələcək Türkiyə hərbçilərinin Rusiya ilə ortaq atəşkəsə nəzarət mərkəzində xidmət aparacaqları bildirilib.

    Bundan əvvəl noyabrın 17-də Türkiyə Böyük Millət Məclisi ölkə Prezidenti Recep Tayyip Erdoğanın Azərbaycana hərbi heyət göndərməsi ilə bağlı fərmanını təsdiqləyib.

    Sənədə görə, Türkiyə hərbçiləri Azərbaycanda bir il qala biləcəklər.

    Erdoğan ötən həftə Ankara ilə Moskvanın Qarabağdakı atəşkəsə nəzarət mərkəzinə dair bir memorandum imzaladığını və Türk hərbçilərinin də "ortaq sülhməramlı missiya" da iştirak edəcəyini söyləyib.

    Rəsmi Moskva, Rusiya ilə Türkiyənin Azərbaycan ərazisindəki monitorinq mərkəzi vasitəsi ilə Qarabağ üzərində işləyəcəklərini qeyd etdib, lakin Türkiyə ordusunun ortaq sülhməramlı qüvvələrdə iştirakından söhbət getmədiyini bildirib.

14. 21 Noyabr 2020Rusiya müdafiə naziri Sergey Şoyqu Ermənistan Baş naziri ilə görüşüb

    Ermənistanın Baş naziri Nikol Paşinyan Yerevanda Rusiya müdafiə naziri Sergey Şoyqu ilə görüşüb.

    Ermənistan Nazirlər Kabineti görüş barədə Rusiyanın TASS agentliyinə məlumat verib.

    Sergey Şoyqu Yerevana Rusiya idarələrarası nümayəndə heyətinin tərkibində səfər edib.

    TASS-ın məlumatına görə, Ermənistan Nazirlər Kabinetindən deyiblər ki, Rusiyanın xarici işlər naziri Sergey Lavrovun, həmçinin Rusiya Baş nazirinin müavinləri Aleksandr Novak, Aleksey Overçuk və başqalarının da gəlişi gözlənilir".

    Noyabrın 10-da Rusiya Prezidenti Vladimir Putin, Azərbaycan Prezidenti İlham Əliyev və Ermənistanın Baş Naziri Nikol Paşinyan Dağlıq Qarabağda hərbi əməliyyatların tamamilə dayandırılması barədə ortaq bəyanat imzalayıblar.

    Raşılaşmanın şərtlərinə görə, Azərbaycan və Ermənistan tərəfləri 44 günlük müharibədən sonra olduqları mövqelərdə dayanır, rus sülhməramlıları isə bölgədə yerləşdirilir.

15. 21 Noyabr 2020Ermənistan ombudsmanı mitinqlərdə maskalı polislər istifadə edilməməsinə cağrış edib

    Ermənistanın İnsan Hüquqları üzrə Müvəkkili Arman Tatoyan bildirib ki, dinc mitinqləri dayandırmaq üçün maskalı polis işçilərinin iştirakı istisna edilməlidir.

    Ermənistan İctimai Radiosunun məlumatına görə, bu barədə çağrışı ombudsman Arman Tonoyan öz Facebook səhifəsində yazıb.

    O bildirib ki, mitinqlər zamanı polislər dəqiq və fərdi şəkildə müəyyənləşdirlə bilən halda olmalıdırlar.

    Arman Tonoyan yazıb ki, polis məmurları maskasız olduqda bu onların hər hansı bir şəkildə pis rəftara yol verməyəcəklərinin təminatıdır.

    Cənab Tonoyan xatırladıb ki, polis tərəfindən pis rəftar olduqda və onlar maskalı olduqda bu hal sonradan cinayət törətmiş məmuru müəyyənləşdirilməsini çətinləşdirə bilər.

    İnsan Hüquqları üzrə Müvəkkil qeyd edib ki, polis tərəfindən maska və ya digər xüsusi geyimlərdən istifadəyə yalnız ehtiyac olduqda, xüsusi vəziyyət tələb etdikdə, polisin təhlükəsizliyi və digər qanuni məqsədlər üçün zəruri olan xüsusi hallarda icazə verilir.

    On gündən çoxdur ki, Ermənistan paytaxtı Yerevanda müxalifət partiyalarının təmsilçiləri hökümətə qarşı etiraz aksiyaları keçirirlər. Etirazçılar noyabrın onunda Azərbaycanla imzalanmış razılaşmadan sonra hökümətin və Baş nazir Nikol Paşinyanın istefasını tələb edirlər.

    Etirazlar başlayandan bəri içlərində Ermənistanın xarici işlər və müdafiə nazirləri də olmaqla bir neçə hökümət təmsilçisi dəyişdirilib.

16. 21 Noyabr 2020Son gün ərzində Ermənistandan Xankəndinə 1900-dən çox erməni qaçqın qayıdıb

    Rusiya Xarici İşlər Nazirliyi bəyan edib ki, yalnız son 24 saat ərzində 1900-dən çox erməni qaçqın öz evlərinə qayıdıb.

    Nazirliyin məlumatına görə, Rusiya sülhməramlıları Xankəndinə (Stepanakert) gedən erməni qaçqınlarını daşıyan avtobus və şəxsi avtomobil karvanını müşayiət edib və təhlükəsiz keçid təmin edib.

    Ötən gün Rusiya Prezidenti Vladimir Putin deyib ki, "Humanitar səylərimiz və yardımlarımız həm Ermənistan, həm də Azərbaycan xalqlarına fayda gətirməlidir. Dərd içində olan hər kəsə şəfqət veririk".

17. 21 Noyabr 2020Müdafiə Nazirliyi:Ağdama Azərbaycan bayrağı sancılıb

    Azərbaycan Müdafiə Nazirliyi işğaldan azad olunmuş Ağdam şəhərinə dövlət bayrağı sancıldığını bəyan edib.

    Nazirliyin məlumatına görə, ötən gün gecə saatlarında ərazidəki yollar minalardan təmizlənib və istifadə üçün hazır edilib."İşğaldan azad olunan Ağdam rayonu tamamilə Azərbaycan Ordusunun nəzarəti altına keçib", - Müdafiə Nazirliyi bildirib.

    Bundan başqa Ağdamdakı Cümə məscidi və ərazisi hərbçilərimiz tərəfindən təmizlənib, məsciddə Azan oxunub və Cümə namazı qılınıb.

    Ağdam şəhəri Rusiya, Azərbaycan və Ermənistan rəhbərlərinin imzaladığı üçtərəfli atəşkəs razılaşması əsasında sülh yolu ilə Azərbaycan tərəfinə təhvil verilib.

18. 20 Noyabr 2020Rusiya sülhməramlılarının Qarabağda yerləşdirilməsi prosesi başa çatdırılıb

    Rusiya sülhməramlı kontingentinin Qarabağda yerləşdirilməsi prosesi başa çatdırılıb.

    Bu barədə Rusiya müdafiə naziri Sergey Şoyqu Prezident Putinə məlumat verib.

    O deyib ki, ümumilikdə Qarabağa reallaşdırılmış 250 aviareyslə 1960 nəfər və 552 texnika daşınıb, 23 müşahidə məntəqəsi qurulub.

    "Sülhməramlı əməliyyatı idarə etmək üçün vəziyyətdəki dəyişiklərə sürətli cavab verməyə imkan verən idarəetmə sistemi yaradılıb", Tass agentliyi cənab Şoyqudan sitat gətirib.

    Onun sözlərinə görə, Laçın dəhlizi və Dağlıq Qarabağ ərazisi Rusiya sülhməramlılarının tam nəzarəti altındadır. Bundan başqa, dəhlizin ərazisi və Stepanakertə (Xankəndi) gedən yolun 28 km hissəsi partlayıcı obyektlərdən və qırılmış texnikadan tamamilə təmizlənib.

    O bildirib ki, 14 Noyabrdan bəri 4436 qaçqının Xankəndiyə təhlükəsiz qayıtması təmin edilib, 17 noyabrdan isə mülki nəqliyyatın təhlükəsiz hərəkəti işə başlayıb.

    "Atəşkəsə və bütün hərbi əməliyyatlara nəzarət etmək üçün Azərbaycan ərazisində ortaq Rusiya-Türkiyə mərkəzinin yaradılması ilə bağlı memorandumun icrası çərçivəsində mərkəzin yeri və vəzifələri barədə Türkiyə tərəfi ilə razılaşma başa çatmaqdadır", nazir bildirib.

19. 20 Noyabr 2020

    Bu gün müxbirlərimiz Ağdam rayonunun illərdir təmas xətti hesab olunan yerində Birinci Qarabağ müharibəsi iştirakçıları ilə danışıblar.

    Onlar deyiblər ki, gecə saat 4-dən, Azərbaycan ordusunun Ağdama daxil olmasından bəri Ağdam yolu üzərinə toplaşıb işğal altında olmuş doğma yurdlarının havasını almağa çalışırlar.

20. 20 Noyabr 2020Ağdam işğalının son günündə çəkilən fotolar: Erməni hərbçiləri və mülkilər şəhəri necə tərk etdilər?