You’re viewing a text-only version of this website that uses less data. View the main version of the website including all images and videos.
Azərbaycan Respublikası və Ermənistan Respublikası 18 oktyabr, yerli vaxtla saat 00.00 dan etibarən müvəqqəti humanitar atəşkəsə razılıq veriblər. Azərbaycan Müdafiə Nazirliyi bu gün səhər sübhdən Ermənistan tərəfinin atəşkəsə əməl etməməsilə ilə bağlı məlumat yayıb.
Azərbaycan və Türkiyə Xarici İşlər nazirləri arasında telefon danışığı olub.
TRT Haberin məlumatına görə, Ceyhun Bayramov və Mevlüt Çavuşoğlu Moskvada əldə olunan atəşkəs razılığını müzakirə ediblər.
Xəbərdə deyilir ki, Mevlüt Çavuşoğlu cənab Bayramova "Türkiyənin ancaq Azərbaycanın qəbul etdiyi qərarları dəstəkləyəcəyini" bildirib.
Ermənistan Müdafiə Nazirliyi oktyabrın 10-da Azərbaycanın Ermənistanın Qafan əyalətinin Yeritsvank və Artsvanik yaşayış məntəqələrini atəşə tutduğunu, itkilərin olmadığını iddia edib.
Azərbaycan Müdafiə Nazirliyi bunu təkzib edib və iddiaları "Ermənistanın məqsədyönlü təxribatı" adlandırıb.
"Azərbaycan Ordusu tərəfindən Ermənistan ərazisində yerləşən heç bir obyektə atəş açılmayıb və açılmır", - Azərbaycan MN bildirib.
Azərbaycan və Ermənistanın atəşkəs razılığının fonunda Xankəndində gecə sakit keçib, RİA Novosti Agentliyi yazır.
Agentlik bildirir ki, son bir neçə gündə ilk dəfə idi ki, hava həyəcan sirenaları çalmırdı və mərmi düşməsinin səsləri eşidilmirdi.
Azərbaycan Müdafiə Nazirliyi bildirib ki, Ermənistan silahlı qüvvələri Goranboy, Tərtər, Ağdam, Ağcabədi və Füzuli rayonlarının yaşayış məntəqələrini "intensiv atəşə" tutur.
Azərbaycan Müdafiə Nazirliyi bildirib ki, Emənistan silahlı qüvvələri Xocalı istiqamətindən Hadrutu yaylım atəşki reaktiv sistemlərdən intensiv atəşə tutur.
Azərbaycan Prezidenti İlham Əliyev oktyabrın 9-da Hadrut qəsəbəsinin azad edildiyini açıqlamışdı.
Azərbaycanın Müdafiə Nazirliyi bildirib ki, oktyabrın 9-da günün ikinci yarısından oktyabrın 10-u səhər saatlarınadək bütün cəbhə boyu hərbi əməliyyatlar müxtəlif intensivliklə davam edib.
Nazirlik açıqlayıb ki, Azərbaycan Ordusunun davam etdirdiyi hücum əməliyyatı nəticəsində bu müddətdə Ermənistan silahlı qüvvələrinin xeyli sayda canlı qüvvəsi, 13 ədəd tankı, 4 ədəd BM-21 “Qrad” yaylım atəşli reaktiv sistemi, 6 ədəd D-20 və D-30 topu, 3 ədəd 2S3 “Akasiya” özüyeriyən artilleriya qurğusu, 2 ədəd M55 “Zastava” zenit qurğusu, 2 radiolokasiya stansiyaları və radioelektron mübarizə vasitələri vurulub və sıradan çıxarılıb.
Oktyabrın 9-da Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Ağdam, Ağcabədi, Bərdə, Beyləqan, Füzuli, Goranboy, Tərtər rayonları və Gəncə şəhəri ərazisinə mərmilərin düşməsi barədə 35 müraciət daxil olub.
ANAMA-nın apardığı əməliyyat-axtarış tədbirləri zamanı 1 ədəd 152 mm-lik top mərmisi (OF-22), 1 ədəd 152 mm-lik top mərmisi partladıcısı, 1 ədəd dron (yerində zərərsizləşdirilib), 1 ədəd dronun partladıcısı, 265 ədəd bombacıq, 1 147 ədəd patron (1 133 ədəd 5.45 mm-lik və 14 ədəd 7.62 mm-lik) və 16 ədəd partlamış mərmi qalıqları aşkar olunub.
Bu gün Ermənistan və Azərbaycan Xarici İşlər nazirləri Moskvada görüş keçiriblər, görüşün nəticəsində tərəflər arasında atəşkəs barədə razılığa gəlinib.
Görüşdən sonra Rusiya XİN sözçüsü Mariya Zaxarova Facebook səhifəsində tərəflərin razılaşdığı addımlara dair sənədin - nazirlərin bəyanatının nüsxəsini paylaşıb.
Rusiya Prezidenti Vladimir Putinin müraciətinə cavab olaraq və Rusiya Prezidenti Vladimir Putin, Azərbaycan Prezidenti İlham Əliyev və Ermənistanın baş naziri Nikol Paşinyan arasında əldə olunmuş razılığa əsasən aşağıdakı addımların atılması razılaşdırılıb, sənəddə bildirilir.
1. 2020-ci il oktyabrın 10-u saat 12.00-dan etibarən Beynəlxalq Qırmızı Xaç Komitəsinin meyarlarına uyğun və vasitəçiliyi ilə əsirlərin və digər saxlanılan şəxslərin və həlak olanların cəsədlərinin dəyişdirilməsi üçün atəşkəs elan olunur.
2. Atəşkəs rejiminin konkret parametrləri əlavə olaraq razılaşdırılacaq.
3. Azərbaycan Respublikası və Ermənistan Respublikası ATƏT-in Minsk qrupunun həmsədrlərinin vasitəçiliyi ilə tənzimlənmənin əsas prinsipləri əsasında münaqişənin tezliklə sülh yolu ilə həlli məqsədilə substantiv danışıqlara başlayırlar;
4. Tərəflər danışıqlar prosesinin formatının dəyişməz olduğunu təsdiq edirlər.
Azərbaycan Xarici İşlər naziri Ceyhun Bayramov və Ermənistan Xarici İşlər naziri Zöhrab Mnatsakanyanın görüşü Rusiya Prezidenti Vladimir Putinin cümə axşamı günü Moskvaya dəvəti nəticəsində baş tutub.
Təxminən 11 saat davam edən görüşdən sonra Rusiyanın Xarici İşlər naziri Sergey Lavrov danışıqların nəticələrinə əsasən, birgə bəyanatı elan edib.
Rossiya 24 kanalının danışıqları izləyən müxbiri təxminən 2 saat əvvəl bildirib ki, nazirlərin görüşü 8 saatdır ki, davam edir.
Rusiya Prezidenti Azərbaycan və Ermənistan XİN başçılarını bir sutka əvvəl Moskvaya dəvət edib.
Müxbir bildirib ki, son 4 ildə belə uzun davam edən görüş olmayıb.
Prezident İlham Əliyev “Sky News” televiziya kanalında müsahibəsində atəşkəsin razılaşdırılması və danışıqların bərpa edilməsi ilə bağlı deyib ki, “bu, Ermənistanın mövqeyindən asılıdır”.
“…Onlar həmişə status-kvonu möhkəmləndirmək, status-kvonu dəyişməz olaraq saxlamaq və BMT Təhlükəsizlik Şurasının qətnamələrinə və danışıqlar masasında olan və ATƏT-in Minsk qrupu tərəfindən işlənib hazırlanmış prinsiplərə əsasən qaytarmalı olduqları torpaqları qaytarmamağı istəyirdilər.”
İlham Əliyev əlavə edib ki, “danışıqlar münaqişənin siyasi həllinə və işğal olunmuş ərazilərin boşaldılmasına gətirib çıxarmalıdır.”
Onun sözlərinə görə, "Ermənistanın dəstəkləməkdən imtina etdiyi əsas prinsiplərdə torpaqların açıq şəkildə necə geri qaytarılacağı göstərilir":
“Birinci mərhələdə Dağlıq Qarabağın cənub-şərq tərəfində yerləşən beş Azərbaycan rayonu, sonra Dağlıq Qarabağ və Ermənistan arasında yerləşən iki Azərbaycan rayonu qaytarılmalıdır. Sonra azərbaycanlılar Dağlıq Qarabağa qayıdırlar. Dağlıq Qarabağda 25 faiz azərbaycanlı əhali olub, onların da hüquqları təmin edilməlidir. Onlar yaşadıqları yerə - qədim Şuşa şəhərinə və digər yerlərə qayıdırlar və biz normal kommunikasiyaları bərpa edirik. Biz xalqlar arasında təmasları bərpa edirik. Mən əminəm ki, insanlar yavaş-yavaş barışacaqlar. Bu, vasitəçilərin planıdır və biz bunu dəstəkləyirik.”
Jurnalistin “25 faiz azərbaycanlı əhalinin Dağlıq Qarabağa qayıtmasına icazə verilsə, siz Dağlıq Qarabağın müstəqilliyini tanıyarsınız?” sualına cavabında Azərbaycan Prezidenti “Xeyr. Heç vaxt. Bu məsələ heç vaxt danışıqlar masasında olmayıb”, deyə cavab verib.
Əraziyə sülhməramlıların gətirilməsi ilə bağlı Prezident Əliyev qeyd edib ki, bu, ATƏT-in Minsk qrupu tərəfindən münaqişənin həlli üçün işlənib hazırlanmış əsas prinsiplərdə təmin edilən ünsürlərdən biridir və sülhməramlılarla bağlı bənd var:
“… biz ilk olaraq əsas məsələni - işğalı, ərazilərin boşaldılmasını həll etməliyik və azərbaycanlılar oraya qayıdandan sonra əlbəttə ki, sülhməramlılar gəlməlidirlər. Bu, razılaşma çərçivəsindədir. Əgər bu, hər iki tərəfdən imzalansa, onda hər iki tərəf bu sülhməramlıların kim olacağını seçəcək. Beləliklə, biz buna qarşı deyilik. Lakin biz faktiki olaraq bu bəndlə bağlı danışıqların aktiv fazasında deyilik."
O, Azərbaycan və Ermənistan XİN başçılarının Moskvada hazırda davam edən görüşü barədə deyib ki, "biz sülh yolu ilə həll istəyirik, amma həll. Biz həll istəyirik, imitasiya yox, daha 30 il ərzində boş sözləri yox, praktiki addımları, vaxt cədvəlini, insanlarımızın evlərinə nə vaxt qayıdacağını, onlar üçün təhlükəsizlik zəmanətinin nədən ibarət olacağını və bizim necə barışacağımızı bilmək istəyirik."
Onun sözlərinə görə, iki millət barışmalıdır:
"Biz qonşuyuq. Biz əbədi olaraq düşmənçilik şəraitində yaşaya bilmərik. Bu, dayandırılmalıdır. Lakin tarixi həqiqət və beynəlxalq hüquq əsasında dayandırılmalıdır."
Müsahibənin mətni Azərbaycan Prezidentinin rəsmi saytında çap olunub.
Azərbaycanın Müdafiə Nazirliyi Ermənistanın dövlət sərhədində "təxribat törətdiyini" bildirir.
”Oktyabrın 9-da saat 20:00 radələrində Ermənistan-Azərbaycan dövlət sərhədinin Daşkəsən sahəsində yerləşən Azərbaycan Ordusunun müdafiə mövqelərindən Ermənistan ərazisində atışma səsləri və partlayış müşahidə olunub. Belə ki, Ermənistanın Vardenis rayonunun Günəşli və Ağyoxuş kəndlərində yerləşən düşmən mövqelərindəki hərbi qulluqçular əvvəlcə müxtəlif atıcı silahlardan bir-birinə doğru atəş açmışlar. Bir az sonra isə Günəşli kəndində partlayış baş verib və yanğın müşahidə olunub."
Nazirlik bildirib ki, bu insidentlə Azərbaycan Ordusu bölmələrinin heç bir aidiyyəti yoxdur.
Qurum bildirib ki, bu hadisə "erməni xalqı və beynəlxalq aləmin diqqətinin Ermənistan rəhbərliyinin hərbi və siyasi meydanda uğradığı iflasdan yayındırmaq məqsədi daşıyır."
Azərbaycan Müdafiə Nazirliyi Ermənistanın "bu təxribatını kəskin qınayır və bildiririk ki, bu əmələ görə bütün məsuliyyət Ermənistan tərəfinin üzərinə düşür", məlumatda bildirilir.
Prezident İlham Əliyev CNN kanalına müsahibəsində münaqişənin daha genişmiqyaslı regional müharibəyə çevriləcəyi ilə bağlı narahatlıqlar olması barədə suala cavab olaraq deyib ki, o, daha da gərginləşməməlidir.
"Mən bütün ölkələri bu vəziyyətdən kənar qalmağa çağırmışam. Bu, bizim Ermənistanla ikitərəfli məsələmizdir."
Cənab Əliyev qeyd edib ki, vasitəçilər və onların mandatı var və onların mandatı yerdə müdaxilə etmək deyil.
"Onların mandatı həll yolunu tapmaq üçün şərait yaratmaqdır. Əminəm ki, onlar mandatları çərçivəsində davam edəcəklər."
Müsahibənin mətni Azərbaycan Prezidentinin rəsmi saytında çap olunub.
Müsahibənin bəzi hissələrini bu canlı səhifəmizdə oxuya bilərsiniz.
"Türk avadanlığı var. Türk qüvvələri yoxdur", Prezident İlham Əliyev CNN International” televiziya kanalının “Connect the World” verilişinə müsahibəsində deyib.
"Türkiyə bizə dəstək göstərir, lakin bu, siyasi dəstəkdir, bu, diplomatik dəstəkdir. Bu dəstək olmasaydı, Türkiyə Prezidenti Rəcəb Tayyib Ərdoğanın “Azərbaycan tək deyil, Türkiyə Azərbaycanın yanındadır” ifadəsi ilə bu çox açıq mövqe olmasaydı, çox güman ki, bu gün Ermənistan öz məqsədinə nail olmuş olardı."
O, Azərbaycanda "hansı türk avadanlığı olması" barədə bildirib ki, "Silahlar, türk silahları. Təkcə türk silahları yox, rus, İsrail, Belarus, Ukrayna silahları və sair. Çünki bu gün bizdə hərbi texnikanın satınalma coğrafiyası daha da genişlənir və biz bunlara görə pul ödəyirik".
Onun sözlərinə görə, qarşı tərəf "öz müttəfiqlərindən silahları pulsuz əldə edir".
Jurnalistin "Biz ən azından sizin bazalarınızın birində türk F-16 qırıcı təyyarəsinin olmasına dair peyk təsvirlərini görmüşük. Siz F-16 qırıcı təyyarələr almamısınız. Beləliklə, Azərbaycan üçün güclü dəstəyi nəzərdə tutan F-16 qırıcı təyyarələrin yerdə olması doğrudurmu?" sualına Prezident Əliyev belə cavab verib:
"Siz yerdə dedikdə mən sizinlə razıyam. F-16 qırıcı təyyarələr Azərbaycanda hərbi təlimlərdə iştirak etmək üçün gəlmişdi."
Onun sözlərinə görə, təlimlərdən biri Ermənistanın Azərbaycana hücum etməsindən əvvəl baş tutub.
"Beləliklə, F-16 qırıcı təyyarələr yerdədir, onlar uçuş etmirlər, onlar heç bir şəkildə hər hansı bir döyüşdə iştirak etmirlər. ..."
"Mən bunu birmənalı şəkildə deyirəm", deyə o, F-16 qırıcı təyyarələrin istifadə olunmamasına dair fikirlərini təsdiqləyib.
O, Ermənistanın Su-25 təyyarəsinin türk F16 qırıcısı ilə vurulması xəbərini feyk xəbər adlandırıb.
"...bizi bunda günahlandıranlar indi bizdən üzr istəməlidirlər, çünki hər kəs bunun feyk xəbər olduğunu bilir. F-16 qırıcı təyyarələr buradadır, lakin onlar sizin də düzgün qeyd etdiyiniz kimi, yerdədir."
Müsahibənin mətni Azərbaycan Prezidentinin rəsmi saytında çap olunub.
Müsahibədən bəzi hissələri canlı səhifəmizdə oxuya bilərsiniz.
Hadrut bu müharibədə Azərbaycan Qarabağda - keçmiş Dağlıq Qarabağ Muxtar Vilayəti - ərazisində azad etdiyi ilk qəsəbədir.
Cəbhə xəttindən şimalda iki kənd istisna olmaqla, indiyədək Azərbaycan ordusunun öz ərazisində yerləşən, lakin erməni silahlılarının 1992-1994 illərdə işğal etdiyi rayonlarda irəliləməsi barədə məlumat verilib.
Bundan başqa, cənubda azad edilmiş yerlərə nisbətdə bura “diri” qəsəbədir. Verilən rəqəmlərə görə, orada təxminən 4000 nəfər yaşayıb. Orada yerləşən digər azad edilmiş yaşayış məntəqələri isə ya 27 il bundan əvvəl dağıdılıb, ya da az qala tamamilə boşalıb.
Azərbaycan Baş prokurorluğu bu gün Goranboy və Tərtərin Ermənistan tərəfindən atəşə tutulması nəticəsində iki nəfərin yaralandığını bəyan edib.
Məlumata görə, cümə günü axşam saat altı radələrində mülki yaşayış məntəqələri atəşə tutulub.
Prokurorluq bildirib ki, atəş nəticəsində Goranboyun Tapqaraqoyunlu kəndinə 22 top mərmisinin atılıb və kənd sakini 40 yaşlı Sənan Mehracov yaralanıb.
Qurum onu da bildirib ki, Tərtər şəhərinin artileriya atəşinə tutulması nəticəsində ora sakini 52 yaşlı Müşfiq Fərəcov xəsarət alıb.
Prokurorluq hər iki yaralının xəstəxanaya yerləşdirildiyini və bu sahədə istintaq aparıldığını bildirib.
Moskvada Rusiya, Azərbaycan və Ermənistan arasında başlayan danışıqların mətbuata açıq hissəsi cəmi bir neçə saniyə davam edəndən sonra görüş qapalı formatda davam edir. Bu barədə Ria Novosti xəbər yayıb.
Məlumata əsasən, Azərbaycan və Ermənistan xarici işlər nazirləri Rusiya vasitəçiliyi ilə qısa "humanitar" barışıq imkanlarını müzakirə etməlidirlər.
Görüşdən vəd edilən canlı yayım hələ ki, başlamayıb.
Rusiya agentlikləri və Ermənistan Xarici İşlər Nazirliyinin mətbuat xidməti danışıqlardan foto və qısa videogörüntülər yayımlayır.
Şəkillərin birində dəyirmi masa arxasında XİN rəhbərlərini görmək olar: ortada, Sergey Lavrov oturur və onun hər iki tərəfində Ceyhun Bayramov və Zohrab Mnatsakanyan əyləşib.
Zalda nümayəndə heyətlərinin üzvlərini də görmək olar.
Azərbaycan Baş Prokurorluğu Ağdamın Quzanlı qəsəbəsinin Ermənistan tərəfindən atəşə tutulması və dörd nəfərin yaralanması haqqında mlumat yayıb.
Prokurorluğun məlumatına görə, cümə günü gunorta saat iki radələrində raket və artilleriya atəşi nəticəsində 41 yaşlı Əlizamin Hüseynov, 42 yaşlı Elçin Zeynalov, 36 yaşlı Lalə Məmmədova və 28 yaşlı Elçin Rzayevin olduqları yerə mərmi düşməsi nəticəsində yaralanıblar.
Qurum xəsarət alanların xəstəxanaya yerləşdirildiyini və istintaq-əməliyyat tədbirlərinin aparıldığını bildirib.