You’re viewing a text-only version of this website that uses less data. View the main version of the website including all images and videos.
Azərbaycan Respublikası və Ermənistan Respublikası 18 oktyabr, yerli vaxtla saat 00.00 dan etibarən müvəqqəti humanitar atəşkəsə razılıq veriblər. Azərbaycan Müdafiə Nazirliyi bu gün səhər sübhdən Ermənistan tərəfinin atəşkəsə əməl etməməsilə ilə bağlı məlumat yayıb.
Azərbaycan Müdafiə Nazirliyinin yaydığı məlumata görə, Ermənistan silahlı qüvvələri Goranboy, Tərtər və Ağdam rayonlarının kəndlərini artilleriya atəşinə tutur.
"Ordumuzun bölmələri tərəfindən düşmənə qarşı adekvat tədbirlər görülür", qurum bildirir.
Azərbaycan Prezidentinin köməkçisi Hikmət Hacıyev Tərtər çayında su axınının gurlaşdığını deyib.
"Azərbaycanın Suqovuşan kəndinin işğaldan azad edilməsi ilə 30 illik ekoloji terror sona çatıb. Tərtər çayının suyu gur axır. Ermənistan həmişə məqsədli şəkildə su axınını dayandırırdı. Azərbaycanın Tərtər, Goranboy və Yevlax bölgələrində eko tarazlıq təmin ediləcəkdir," - Hikmət Hacıyev Twitter hesabında yazıb.
“Dağlıq Qarabağ münaqişəsi beynəlxalq hüquq normaları və BMT Təhlükəsizlik Şurasının müvafiq qətnamələri çərçivəsində həll olunmalıdır”, Rusiya Federasiyasının Baş prokuroru İqor Krasnov deyib, TASS xəbər agentliyi yazır.
Agentliyinin məlumatına görə, Rusiya Federasiyasının Baş prokuroru İqor Krasnov bunu Müstəqil Dövlətlər Birliyi ölkələri Prokurorluqlarının nümayəndə heyətlərinin, habelə MDB İcraiyyə Komitəsinin nümayəndələrinin və Beynəlxalq Prokurorlar Assosiasiyasının Prezidenti Çxol-Kyu Hvanın iştirakı ilə keçirilən videokonfransda bildirib.
Rusiya Federasiyası Baş Prokuroru həmkarlarının mövcud vəziyyətdə soyuqqanlı və təmkinli olmağa davam edəcəklərinə inandığını vurğulayıb.
İqor Krasnov "yalnız danışıqlar masasındakı ehtiyatlılıq və dialoqun insan itkisinin qarşısını almağa, qanun pozuntularını boğmağa və münaqişə vəziyyətinin sülh yolu ilə həllini təmin etməyə imkan verəcəyini" bildirib.
O, "birləşərək son dərəcə təhlükəli millətlərarası düşmənçilik təzahürlərinə və qanunsuz hərəkətlərə çağırışlara müqavimət göstərə biləcəyik" deyib.
"İndi prioritet vəzifə muzdlular və terrorçular, qanunsuz silah alveri ilə qazanc əldə edən və terror aktlarını maliyyələşdirən şəxslər tərəfindən münaqişə ərazisinə nüfuz etmək cəhdlərini yatırmaq da daxil olmaqla insanları qorumaq və ləyaqətli, təhlükəsiz, dinc həyat hüquqlarını təmin etməkdir", Krasnov bildirib.
Bura Quliyevanın evidir. Azərbaycanlı qadın öz yatağında, öz evində Dağlıq Qarabağdakı etnik erməni qüvvələrinin bombardımanı nəticəsində öldürülüb. Qonşular bizə onun siyasətdən başının çıxmadığını və heç kimə zərər verməyəcək biri olduğunu dedilər.
Hər iki tərəfdə ölən mülki şəxslərin sayı artmaqdadır.
Qonşular tək yaşayan yaşlı qadın üçün ağlayırdılar. Onlardan biri "Bu müharibə bizə nəyə lazımdır?" dedi. Hər yeni hücum, hər yeni ölüm Azərbaycan və Ermənistan arasında tarixi ədavəti artırır. Həmişə olduğu kimi qarşıdurmada günahsız mülki insanlar əvəz ödəyirlər.
BBC-nin Tərtərdə olan əməkdaşı Orla Guerin Twitter səhifəsində münaqişə ilə bağlı paylaşımlar edir.
O, yeni qəbir şəkli paylaşaraq yazıb:
"Onillərdir davam edən qarşıdurmada təzə qəbir - Dağlıq Qarabağ. Bura bu gün səhər Ermənistan silahlı qüvvələrinin atəşi ilə öldürülən 63 yaşlı azərbaycanlı qadın Qulieva Türyan Tofiq qızının son mənzilidir", o yazıb.
O bildirib ki, hər iki tərəfdəki mülki vətəndaşlar hərbi və ya mülki fərqi qoyulmadan atəş nəticəsində ölür.
O, bu vəzifəni 29 yaşında tutub və cəmi dörd ay işləyib.
Bundan əvvəl bəzi Ermənistan KİV-ləri öz mənbələrinə istinadən, Karamyanın xüsusi xidmət orqanında "Rusiya casuslarının təmizlənməsinə" başladığını yazmışdı. Söhbət Rusiyada təhsil almış bir sıra mütəxəssislərin işdən çıxarılması hallarından gedib.
Ermənistan Milli Təhlükəsizlik Xidməti (MTX) bu məlumatı təkzib etmişdi.
Ermənistan MTX rəhbəri vəzifəsini icra edilməsi Mikael Hambartsumyana tapşırılıb.
Paşinyan Baş nazir vəzifəsini icra etməyə başlayandan bəri, bu, xüsusi xidmət orqanının rəhbəri vəzifəsində edilən üçüncü dəyişiklikdir.
Azərbaycan Ermənistanın tutduğu bölgələri “indi bir-bir geri alır” və Türkiyə də Azərbaycan dövlətinin və xalqının yanındadır, - Türkiyə prezidenti Recep Tayyip Erdoğan deyib.
O, Qətərə səfəri zamanı Ermənistan-Azərbaycan arasında başlamış döyüşlərdən danışıb, Anadolu Agentliyi xəbər verir.
Erdoğan bildirib ki, Qarabağ problem son 30 ildə Qafqazda “ən əhəmiyyətli böhran” olub.
Prezident əlavə edib ki, illərdir “həlledilməyən və Ermənistanın artan hücumları ilə dözülməz hala gələn bu problemi həll etmək üçün Azərbaycanın qərarı həm tarixin, həm hüququn, həm də coğrafi həqiqətlərin reallaşdırılmasıdır”.
Onun fikrincə, Ermənistanın “son işğal səyləri zamanı aldığı ağır zərbədən sonra müxtəlif hiylələrlə Türkiyəni münaqişə daxilində göstərmək cəhdi onun çarəsiz və çıxılmaz vəziyyətdə” olduğunu göstərir.
Türkiyə prezidenti deyib ki, bir daha beynəlxalq ictimaiyyəti illərdir tətbiq etdiyi “ikili standartlardan imtina etməyə və Ermənistanın Azərbaycan ərazisindəki işğalına son qoymaq üçün addımlar atmağa" çağırır.
Ermənistan Türkiyəni öz texnikası və hərbiyyəsi ilə bu döyüşlərdə iştirak etməkdə ittiham edir.
Azərbaycan və Türkiyə bu ittihamı rədd edərək bildirirlər ki, dəstək yalnız mənəvi və diplomatik xarakter daşıyır.
Rusiyalı jurnalistlər bildiriblər ki, Xankəndi (Stepanakert) gecə boyu atəşə tutulub.
Azərbaycan Müdafiə Nazirliyinin mətbuat xidmətinin rəisi Vaqif Dərgahlı məsələni nə təsdiq, nə təkzib edib.
“Onlar bizim tərəflərimizi vururlar, biz də ora atırıq. Onlar bütün gecəni bizim kəndləri atəşə tutublar, biz də onlara atmışıq,” – o, BBC News Azərbaycancaya deyib.
Vaqif Dərgahlı bildirib ki, Ermənistan tərəfi hal-hazırda da Bərdə şəhərini, mülki yaşayış yerlərini atəşə tutur.
Cənab Dərgahlı Ermənistanın Müdafiə Nazirliyinin sözçüsü Şuşan Stepanyanın “Azərbaycana məxsus dörd ədəd D-30 topunu vurduqları” barədə məlumatı da təkzib edib.
“Yalandır, nə ilə vurduqlarını göstərsinlər. Biz vurduqlarımızı video ilə göstəririk, onlar da göstərsin. Biz ələ keçirdiyimiz texnikanı göstəririk, onlar da göstərsinlər. Mən də oturub çox şey yaza bilərəm,”- Vaqif Dərgahlı deyib.
France 24 telekanalının müxbiri Cristophe Bauer Twitter hesabında Qarabağ cəbhəsindən bir neçə kilometr aralıda yaşayan azərbaycanlı mülki vətəndaşların gündəlik həyatı ilə bağlı reportaj paylaşıb.
BBC jurnalisti Orla Guerin erməni silahlı qüvvələrinin aramsız atəşə tutduğu Azərbaycan şəhəri Tərtərdən reportaj hazırlayıb .
Reportajda şəhərin görüntüləri və Tərtər sakinləriylə müsahibələr öz əksini tapıb.
Orla Guerin bildirir ki, burada adi vaxtlarda yüz minlərlə insan yaşasa da, onların çoxu Ermənistanın atəşinə görə ərazini tərk etməli olub.
Ancaq şəhərdə qalanlar da var.
Zirzəmidə daldalanan Aybəniz Cəfərova BBC-yə deyir ki, 28 ildir torpaqların qayıtmağın gözləyir. Onun 2 övladı cəbhədə döyüşür.
Reportajda həm də Bakıda Şəhidlər xiyabanını ziyarət edən gənclər də göstərilir.
“Bu gün səhər saat 10 radələrindən başlayaraq Bərdə rayonu müxtəlif istiqamətlərdən raket və artilleriya mərmilərindən intensiv atəşə tutuluması nəticəsində 7 nəfər müxtəlif dərəcəli bədən xəsarətləri alıb”, Azərbaycanın Baş Prokurorluğunun məlumatında bildirilir.
Qurum bildirib ki, Bərdə şəhərinin mərkəzində yerləşən “Qədim Bərdə” restoranına raketin düşməsi nəticəsində həmin vaxt orada olan 2 nəfər şəxs müxtəlif dərəcəli bədən xəsarətləri alaraq xəstəxanaya yerləşdiriliblər.
"Eyni zamanda Bərdə şəhər 5 nömrəli tam orta məktəbin yaxınlığına düşmüş raketlər daha 5 nəfər şəxsin yaralanmasına səbəb olub”, qurum bildirib.
Baş Prokurorluq həmçinin “məktəbin binasına, çoxsaylı nəqliyyat vasitələrinə külli miqdarda ziyan dəydiyini” açıqlayıb.
Qurum “hazırda prokurorluq əməkdaşları tərəfindən döyüş şəraitində mümkün olan bütün istintaq-əməliyyat tədbirlərinin həyata keçirildiyini” bildirir.
Qarabağdakı müharibənin on ikinci günü ölən erməni hərbçilərinin rəsmi siyahısına daha 30 nəfər əlavə edilib.
Tanınmamış “Dağlıq Qarabağ Respublikasının Müdafiə Nazirliyi" onlardan 6-sının ehtiyatda olan hərbçi olduğunu açıqlayıb.
Bununla, indiyə kimi açıqlanan erməni hərbçilərinin itkisinin sayı 320 olub.
Rəsmi Bakı itkilərini yalnız müharibədən sonra açıqlayacağını söyləyib.
Tanınmamış “Dağlıq Qarabağ Respublikasının Müdafiə Nazirliyi” ötən gün hərbçilərin itkisi ilə bağlı məlumatı gün ərzində iki dəfə yeniləyib.
Onların yaydıqları siyahılarda ölən hərbçilərinin böyük əksəriyyəti 2000-2001-ci il təvəllüdlü gənclərdir. Ehtimal olunur ki, onlar hərbi xidmətə çağırılanlardır.
Ümumilikdə itkilərlə bağlı məlumatların etibarlılığı hələ təsdiqlənmir: döyüş bölgələrində müstəqil mənbələr yoxdur.
Prezident İlham Əliyev çərşənbə günü Rusiyanın “Pervıy” televiziyasına verdiyi müsahibəsində Azərbaycanın itkiləri barədə məlumatları yalnız "döyüş əməliyyatlarının aktiv mərhələsi bitdikdən sonra" dərc edəcəyini söyləyib.
“Azərbaycan Ordusunun döyüşlərdə iştirak edən qoşunlarının təminatı yüksək səviyyədədir”, Müdafiə Nazirliyi cümə axşamı günü açıqlayıb.
Qurum bildirib ki, “Ilham Əliyevin göstərişinə əsasən əks-hücum əməliyyatlarında iştirak edən şəxsi heyətin təminat və təchizat məsələləri dərhal həll olunur”.
“Qoşunlarımızın təminatı müvafiq idarə, xidmət və qurumlar tərəfindən planlı şəkildə həyata keçirilir. Döyüşdə iştirak edən hərbi qulluqçularımız, hərbi texnika və döyüş vasitələrimiz ərzaq, geyim, məişət əşyaları, gündəlik tələbat məhsulları, silah-sursat və yanacaq-sürtgü materialları ilə sutkada 24 saat ərzində fasiləsiz təmin edilir”.
Azərbaycan MN həmçinin “döyüş əməliyyatlarının maddi-texniki təminatı ilə bağlı heç bir problem və çətinliyin olmadığını” açıqlayıb:
“Təminat və təchizatla bağlı qarşıya qoyulan bütün tapşırıqlar vaxtında icra olunur”.
Bundan əvvəl sosial mediada bəzi ictimai fəallar orduya yardım məqsədilə geyim, məişət, gündəlik tələbat məhsullarının və tibbi ləvazimatların toplanması ilə bağlı kampaniya aparmışdı.
Azərbaycan Prezidentinin köməkçisi Hikmət Hacıyev bildirir ki, Ermənistanın Smerch raketləri və ağır artilleriya ilə Azərbaycan şəhərlərinə və mülki şəxslərə qarşı hücumları davam edir.
O, bu hücumları "qəsdən və ayrı-seçkiliksiz" adlandırır.
Hikmət Hacıyev bu barədə Twitter səhifəsində yazıb.
"Gəncə, Bərdə, Tərtər və digər şəhərlər bu cür məsuliyyətsiz hücumların hədəfinə çevrilir. Ermənistanı dayandırmaq üçün sülhə məcburetmə davam etdirilməlidir," - cənab Hacıyev yazıb.
“Səhər saat 6-dan atmağa başlayıblar. Bir 10-15 dəqiqə olar, ikisi düşdü şəhərin içinə. Möhkəm səs gəldi. Hətta yer ayağımızın altında silkələndi,” Bərdə sakini Tuğay Tahirov bildirib.
Azərbaycan Müdafiə Nazirliyinin oktyabrın 8-də yaydığı məlumata görə, Ermənistan silahlı qüvvələri Bərdə şəhərini atəşə tutur.
“Adamlar həyəcan içindədir. Evdə uşaqlar ağlaşır. Bilmirəm, yolun kənarında durum. Bilmirəm, gedim yaxınlaşım, baxım görüm nə oldu?” – Bərdə sakini BBC News Azərbaycancaya deyib.
Tuğay Tahirovla telefon söbəti zamanı atəş səsləri eşidilir.
O, “daldalana biləcək zirzəmiləri olduğunu" deyir, amma düşünmür ki, ora təhlükəsizdir".
Atəş səslərini təsvir edən Bərdə sakini “bu, əvvəlki səslərə bənzəmir, nəsə böyük bir şeydir” deyir.
Cümə axşamı Ağdam rayonunun intensiv atəşə tutulması nəticəsində avtomobillə yol gedən iki yerli sakin xəsarət alıb, Azərbaycanın Baş Prokurorluğu bildirib.
Qurumun açıqlamasına görə, Ermənistanın intensiv atəşə tutduğu rayonun Alıbəyli kəndi ərazisində mərmi düşüb və nəticədə Böyükbəyli kənd sakinləri 1992-ci il təvəllüdlü Sədi Cəbrayıllı və 1977-ci il təvəllüdlü Hürü Quliyeva müxtəlif xəsarət alıb. Onlar xəstəxanaya yerləşdiriliblər.
Baş Prokurorluq “müxtəlif istiqamətlərdən atılan raket və artilleriya mərmilərinin atəşi nəticəsində kənd ərazisində çoxsaylı mülki infrastruktur obyektlərə və yaşayış evlərinə külli miqdarda ziyan dəydiyini” açıqlayıb.
Azərbaycanın Baş Prokurorluğu bildirir ki, bu gün səhər saatlarından başlayaraq, Goranboy rayonunun Aşağı Ağcakənd qəsəbəsi ərazisinə top mərmiləri atılır.
"Top atəşi nəticəsində orada yerləşən Xocalı Rayon Polis Şöbəsinin inzibati binasına, o cümlədən qəsəbə ərazisində çoxsaylı mülki infrastruktur obyektlərə və yaşayış evlərinə, Qaraçinar tam orta kənd məktəbinə külli miqdarda ziyan dəyib,"- Baş Prokurorluğu məlumat yayıb.