Cəbhə bölgəsində döyüşlər - ilk on gündə nə baş verib?

Canlı reportaj

1. 3 Oktyabr 2020İlham Əliyev: "Əgər milli mövqeyinizdən çıxış etmək istəyirsinizsə, onda siz Minsk qrupunun həmsədrliyindən çıxmalısınız"

   

   Şəklin mənbəyi, Getty Images

   İlham Əliyev Al-Jazeera kanalına müsahibəsində deyib ki, əslində danışıqlar dayanıb.

   "Çünki onun [Nikol Paşinyanın - red.] “Qarabağ Ermənistandır” ifadəsindən sonra mən danışıqlar üçün heç bir imkanın olmadığını dedim. Lakin Minsk qrupunun həmsədrləri Ermənistan hakimiyyətinin yeni olduğunu, ola bilsin emosiyalarına və sözlərinə tam hakim ola bilmədiyi üçün məndən xahiş edərək deyirdilər ki, Azərbaycan daha çox anlayış göstərsin. Mən dedim ki, yaxşı, gəlin cəhd edək".

   Onun sözlərinə görə, bəyanatdan sonra Ermənistan lideri ilə baş tutmuş görüşü "rəsmi xarakter" daşıyıb, amma "görüşlər tamamilə mənasız idi".

   "O, mənə əraziləri geri qaytarmayacaqlarını deyirdi. Əgər onlar bunu etmək istəmirlərsə ... bundan sonra nədən danışmaq olar ki? Danışıqlar birtərəfli qaydada aparıla bilməz. Bizim tərəfdaşımız olmalıdır. Lakin Ermənistanın simasında bizim hələ danışıqlarda tərəfdaşımız yoxdur", - o deyib.

   Prezident Əliyev deyib ki, Azərbaycan həmişə danışıqlara hazırdır və uzun illər boyunca danışıqlar prosesində çox böyük irəliləyişə nail olunmuşdu, amma “Paşinyan hakimiyyətə gəldikdən sonra ondan əvvəl olanları məhv etdi".

   "Lakin indi onlar danışıqların aparılması üçün yalvardıqda, Paşinyan dünya liderlərinə dəfələrlə zəng etdikdə və Azərbaycandan şikayət etdikdə, hesab edirəm, bu liderlər ona deməlidirlər ki, sən danışıqlar prosesini pozdun, sən Azərbaycanı təhrik etdin, sən azərbaycanlıların hisslərini təhqir etdin. Ona görə sən bunun üçün məsuliyyət daşımalısan".

   İlham Əliyev bildirib ki, Azərbaycanda minlərlə erməni yaşayır və Dağlıq Qarabağda yaşayanları da öz vətəndaşlarımız hesab edirik. Biz onları Azərbaycanda bir çox digər millətlərin və etnik azlıqların nümayəndələri kimi bizimlə birlikdə yaşamağa dəvət edirik.

   Münaqişədə Rusiyanın vasitəçiliyi ilə bağlı isə Azərbaycan Prezidenti deyib ki, Rusiya Amerika Birləşmiş Ştatları və Fransa prosesdə illərdir ki, eyni dərəcədə iştirak edib.

   "Ona görə də düşünürük ki, üç ölkə birlikdə işləməyə davam etməlidir, əgər onların hamısı neytrallığı qorusa. Bu, mühümdür. Son günlərdə əks-təsir göstərən, neytrallıq mövqeyində müəyyən dəyişikliyi nümayiş etdirən bəzi bəyanatları görməyimiz bizi narahat edir. Hər bir ölkənin öz mövqeyi ola bilər, bu, normaldır. Lakin əgər siz belə həssas məsələdə vasitəçisinizsə, bu mövqedən çıxış etməlisiniz. Əgər milli mövqeyinizdən çıxış etmək istəyirsinizsə, onda siz Minsk qrupunun həmsədrliyindən çıxmalısınız, istədiyinizi deyin, kimi istəyirsinizsə onu günahlandırın, baş verənlərlə bağlı sübutu olmayan xəbərlər verin və sözsüz ki, heç kim etiraz etməyəcək. Lakin əgər siz vasitəçisinizsə, neytral olmalısınız, vasitəçi olmalısınız. Əks halda, vasitəçilik bizim tərəfimizdən qəbul edilməyəcək".

   Müsahibənin digər hissələrini canlı reportajımızda oxuya bilərsiniz.

2. 3 Oktyabr 2020

   "Azərbaycan Hərbi Hava Qüvvələrinə məxsus heç bir döyüş təyyarəsi vurulmayıb," Müdafiə Nazirliyi bildirir.

   "Əksinə, Azərbaycanın zərbə PUA-ları Ermənistan silahlı qüvvələrinin döyüş texnikalarını məhv etməkdə davam edir. PUA-larımızın döyüş fəaliyyəti ilə bağlı videogörüntülər mütəmadi ictimaiyyətə təqdim olunur", MN deyib.

   Ermənistan Müdafiə Nazirliyi bu səhər Azərbaycana məxsus "iki təyyarənin vurulduğunu" iddia edib.

3. 3 Oktyabr 2020İlham Əliyev “Qarabağ münaqişəsinin niyə belə uzun çəkməsi” ilə bağlı suala cavab verib

   

   Şəklin mənbəyi, President.az

   Prezident İlham Əliyev oktyabrın 2-də Al-Jazeera kanalına müsahibəsində jurnalistin “Qarabağ münaqişəsinin niyə belə uzun çəkməsi” ilə bağlı sualına cavabında deyib ki, bunun əsas səbəbi Ermənistanın “sülh istəməməsidir”.

   İlham Əliyev həmçinin deyib ki, beynəlxalq hüququn normaları və beynəlxalq təşkilatların qərar və qətnamələri baxımından Azərbaycanın “çox geniş dəstəyi olsa” da, Ermənistana “kifayət qədər praktiki təzyiq yoxdur” və qətnamələr “uzun illərdir ki”, kağız üzərində qalıb.

   Jurnalistin "bir çoxları iddia edə bilər ki, Ermənistan öz cari ərazisini və 2018-ci ildəki məxməri inqilabdakı qələbəni nəzərə alaraq münaqişənin başlamasına risk etməzdi" sualı ilə cənab Əliyev razılaşmayıb.

   O, cavabında bu ilin iyulunda baş vermiş Tovuz döyüşlərini və avqust ayında saxlanan Ermənistanın diversiya qrupunun başçısını misal gətirərək deyib ki, Ermənistan Azərbaycanı "həmişə təhrik edib".

   "Bir il bundan əvvəl Ermənistanın Baş naziri "Qarabağ Ermənistandır" bəyan etmişdir və bu bəyanat danışıqları tamamilə mənasız edir, çünki danışıqlar masasında olan əsas məsələlərdən biri işğal edilmiş ərazilərin Azərbaycana qaytarılmasıdır. Əgər o, "Qarabağ Ermənistandır" deyir və onun anlayışına görə Qarabağ təkcə keçmiş Dağlıq Qarabağ muxtar vilayəti deyil, buraya bütün işğal olunmuş ərazilər daxildir. Bu, onların bu əraziləri geri qaytarmaq istəmədikləri, bu danışıqların sonu deməkdir", cənab Əliyev deyib.

   İlham Əliyev deyib ki “onlar bizim ərazilərimizi tərk etməlidir və yalnız ondan sonra müharibə dayanacaq, münaqişəyə son qoyulacaq”.

   “Ola bilsin müəyyən müddət keçdikdən sonra Ermənistan və Azərbaycan xalqları sülh şəraitində birlikdə yaşaya biləcəklər. Bu, bizim mövqeyimizdir və dəyişməzdir".

   Bu müsahibənin bəzi hissələrini canlı reportajımızda oxuya bilərsiniz.

4. 3 Oktyabr 2020Prezident Əliyev Ermənistan barədə: "Onlar özləri Yaxın Şərqdən insanları cəlb edirlər və bizim sübutumuz var"

   

   Şəklin mənbəyi, President.az

   Prezident İlham Əliyev deyib ki, Ankaranın Qarabağ münaqişəsinə hərbi nöqteyi-nəzərdən öz təyyarələri və sair ilə cəlb olunmasına dair Ermənistanın "iddiaları yalandır və bunun sübutu yoxdur".

   İlham Əliyev oktyabrın 2-də Al Jazeera-ya verdiyi müsahibəsində münaqişənin uzanmasının səbəblərindən, regiona təsirindən, regional dövlətlərin münaqişədə iştirakı ilə bağlı iddialar, azad edilmiş ərazilər və danışıqlar prosesi barədə müxtəlif suallara cavab verib.

   O, Ermənistanın Türkiyəyə məxsus F-16 təyyarəsinin Ermənistana məxsus Su-25 təyyarəsini "vurması" ilə bağlı yaydığı xəbəri "feyk" adlandırıb və "Ermənistanın Türkiyəni suriyalı müxalif döyüşçüləri Azərbaycana gətirməkdə ittiham etməsi" ilə bağlı suala cavab olaraq, bu xəbəri də "tamamilə feyk" adlandırıb.

   "...onlar bunu sübut etmək üçün dəlillərinin olduğunu deyirlərsə, qoy göstərsinlər. Haradadır dəlil? ... Azərbaycanda hər hansı xarici ölkənin iştirakına dair bir dəlil belə yoxdur. Biz nə ediriksə özümüz edirik", o deyib.

   İlham Əliyev "Ermənistan əhalisinin 2 milyon nəfər olduğunu" deyərək qarşı tərəfin belə bir "ehtiyacının olduğunu" qeyd edib.

   "...Ona görə də onlar özləri Yaxın Şərqdən insanları cəlb edirlər və bizim sübutumuz var, təkcə erməni əsilliləri deyil. Yeri gəlmişkən, Yaxın Şərqdən gələnlərin erməni əsilli və ya qeyri-erməni əsilli olmasının heç bir fərqi yoxdur. Əgər kimsə xaricdən muzdlu kimi döyüşməyə gəlirsə bununla beynəlxalq səviyyədə məşğul olunmalıdır. Bu ittihamlar tamamilə əsassızdır. Biz onları rədd edirik və dəlillərin ortaya qoyulmasını tələb edirik".

   İlham Əliyev onu da deyib ki, Ermənistanın gətirdiyi əcnəbi muzdlularla bağlı dəlillər var.

   "Bizdə artıq bəzi kəşfiyyat məlumatları var və bundan əlavə dünən mənə göstərdilər ki, internetdə videolar var, Yaxın Şərqdən olan insanlar erməni əsgərləri ilə birlikdə oturub, onların formasını geyiniblər, onlarda Ermənistan milli bayrağı var, onlar birlikdə oturub müzakirə aparırlar. Səsi yoxdur, lakin düşünürəm ki, bu, yetərlidir. Onlar buna görə məsuliyyət daşımalıdırlar".

   Müsahibənin digər hissələrini də canlı reportajımızda oxuya bilərsiniz.

5. 3 Oktyabr 2020Xankəndidə vəziyyət - video

   Ermənistan Vahid İnformasiya Mərkəzi "bu səhər atəşdən sonra" Xankəndidən (Stepanakert) video paylaşıb.

   Bu görüntüləri müstəqil mənbələrdən təsdiqləmək mümkün olmayıb.

6. 3 Oktyabr 2020

   BBC News müxbiri Jonah Fisher-in verdiyi məlumata görə, Xankəndi (Stepanakert) şənbə günü səhər vaxtlarında yenidən artilleriya atəşinə tutulub.

   "Biz yaşlı insanların avtobuslarla partlayış yerindən aralı olan bir yerə aparıldığını gördük.

   İnsanlar qalın divarlar arxasında gizlənməyə çalışırlar".

   RBK müxbirinin verdiyi məlumata görə, şəhərdə hava həyəcanı sirenası işə düşüb.

   Paylaşımını ötürün X

   X məzmununa icazə varmı?

   Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

   Qəbul edin və davam edin

   Xəbərdarlıq : BBC kənar saytların məzmununa görə cavabdeh deyil.

   Paylaşımın sonu X

7. 3 Oktyabr 2020"Xankəndidə yaşayanlar Yerevana təxliyə olunmaq üçün toplaşır"

   Gecə atəşə tutulduqdan sonra tanınmamış “DQR Xarici İşlər Nazirliyinin” yaxınlığında izdiham yığılır. Onlar Yerevana təxliyə olunmaq üçün toplaşırlar. Bunu Rusiya mətbuat orqanı İzvestiya-nın müxbiri bildirib.

   İzvestiya-nın müxbirinin verdiyi məlumata görə, bəzi ailələr yaşayış məntəqələri gecə atəşə tutulmasından sonra şəhəri tərk edirlər. Avtomobillər Yerevana gedir.

8. 3 Oktyabr 2020Azərbaycan MN Tərtər, Ağdam, Ağcabədi və Goranboyda kəndlərin intensiv atəşə tutulduğunu deyir

   Azərbaycan Müdafiə Nazirliyi Tərtər, Ağdam, Ağcabədi və Goranboyda kəndlərin intensiv atəşə tutulduğunu deyir.

   "Oktyabrın 3-ü gecə ərzində Ermənistan silahlı qüvvələri tərəfindən Tərtər şəhəri, rayonun Səhləabad, Qəzyan, Qapanlı, Qaynaq, Əskipara, Hüsənli, Ağdam rayonunun Ayaq Qərvənd, İmamqulubəyli, Qaradağlı, Təzəkənd, Ağcabədi rayonunun Muğanlı, Qiyaməddinli, Rəncbərlər və Goranboy rayonunun Tapqaraqoyunlu kəndi intensiv artilleriya atəşinə tutulub", Azərbaycan MN bildirir.

   Nazirliyin məlumatına görə, hazırda Ağdam rayonunun Quzanlı, Əlibəyli və Ayaq Qərvənd kəndləri artilleriya atəşinə tutulur və Azərbaycan ordusu tərəfindən cavab tədbirləri görülür.

9. 3 Oktyabr 2020Azərbaycan MN: "Cəbhədə vəziyyət gərgindir"

   

   Şəklin mənbəyi, Azərbaycan MN

   Azərbaycan Müdafiə Nazirliyi bildirib ki, cəbhədə vəziyyət gərgin olaraq qalır.

   "Gecə ərzində cəbhənin müxtəlif istiqamətlərində düşmənin döyüş aktivliyinin qarşısı alınıb və ona sarsıdıcı zərbələr endirilib", nazirlik bildirirb.

   Azərbaycan MN deyib ki, "bütün cəbhə boyu gərgin döyüşlər davam edir".

10. 3 Oktyabr 2020Fransa prezidenti İlham Əliyevlə danışıb

    

    Şəklin mənbəyi, President.az

    Cümə günü Fransa prezidenti Emmanuel Macron Azərbaycan prezidenti İlham Əliyevə telefonla zəng edib.

    Emmanuel Macron Ermənistan-Azərbaycan təmas xəttində döyüşlərin davam etməsindən narahatlıq hissi ifadə edib.

    O, atəşkəsin bərpa edilməsi və tezliklə danışıqların aparılmasına çağırıb, Azərbaycan prezidentinin mətbuat xidmətinnin məlumatında deyilir.

    Məlumata görə, İlham Əliyev bildirib ki, Ermənistan silahlı qüvvələri tərəfindən Azərbaycanın yaşayış məntəqələrinin ağır artilleriya atəşinə tutulması nəticəsində 19 mülki şəxs həlak olub, 60-dan çox adam yaralanıb, yüzlərlə ev dağıdılıb.

    "Azərbaycan Ordusu uğurlu əks-hücum əməliyyatları həyata keçirərək işğal olunmuş ərazilərimizin bir hissəsini işğaldan azad edib", cənab Əliyev deyib.

    İlham Əliyev telefon danışığı zamanı onu da deyib ki, Ermənistan danışıqlar prosesinin pozulması istiqamətində addımlar ataraq bu prosesə böyük zərbə vurub.

    "Prezident İlham Əliyev vurğulayıb ki, danışıqların pozulması, eləcə də silahlı qarşıdurmanın yaranmasına görə məsuliyyət tam şəkildə Ermənistan rəhbərliyinin üzərinə düşür", məlumatda qeyd edilir.

11. 3 Oktyabr 2020"Burada durub gözləyirik ki, Ağdam alınsın, ora ayaqyalın gedək", - BBC Bərdədən xəbər verir

12. 3 Oktyabr 2020Tərtər sakini: "Üç gündür gecə-gündüz çöldə yatırıq, balalarımıza görə qorxuruq"

13. 3 Oktyabr 2020Tanınmamış "DQR prezidenti" Arayik Harutyunyan cəbhəyə yollanır

    Tanınmamış "DQR prezidenti" Arayik Harutyunyan xüsusi təyinatlılarla cəbhənin ön xəttinə yollanır.

    “Təmas xətti boyunca müxtəlif intensivliklə döyüşlər gedir. Şəhərlə, o cümlədən paytaxt Stepanakert artilleriya atəşinə tutulur. Millət və vətən təhlükə altındadır – bizim öz torpağımızda azad, müstəqil, ləyaqətlə yaşamaq haqqımız təhlükə altındadır”, - Arayik Harutyunyan Facebook səhifəsində yazıb.

14. 3 Oktyabr 2020Ermənistan Müdafiə Nazirliyi: "Şiddətli döyüşlər davam edib"

    Ermənistan Müdafiə Nazirliyi bu gecə Qarabağ cəbhəsinin şimal və cənub istiqamətlərində şiddətli döyüşlərin davam etdiyini bildirir.

    “Erməni hərbi bölmələri düşmənə böyük itkilər yetirərək, onun hücumlarını dəf edir”, - nazirliyin mətbuat katibi Şuşan Stepanyan Facebook-da yazıb.

15. 3 Oktyabr 2020Azərbaycan Müdafiə Nazirliyi Ermənistanın "məhv edilən döyüş texnikasının" siyahısını yayımlayıb

    

    Şəklin mənbəyi, Azərbaycan MN

    Azərbaycan Müdafiə Nazirliyi oktyabrın 3-ü səhər saatlarında bildirib ki, Azərbaycan ordusu müəyyən olunmuş istiqamətlərdə irəliləyərək yeni dayaq məntəqələrini azad etməklə ərazini "düşmən qüvvələrdən təmizləyib".

    "Döyüşlərdə düşmənin xeyli sayda canlı qüvvəsi, hərbi və digər döyüş texnikası məhv edilib", Azərbaycan Müdafiə Nazirliyi bildirib.

    Qurumun açıqladığı siyahıya görə, sentyabrın 27-dən oktyabrın 2-si saat 20.00-dək Ermənistanın ümumi itkiləri aşağıdakı kimidir:

    - 230-dək tank və digər zirehli texnika;

    - 250 ədəd artilleriya, yaylım atəşli raket sistemləri, minaatan;

    - 38 ədəd hava hücumundan müdafiə vasitələri;

    - 10 komanda-idarəetmə və komanda-müşahidə məntəqəsi;

    - 7 silah-sursat anbarı;

    - 130-dan artıq avtomobil texnikası;

    - 1 ədəd “S-300” zenit-raket kompleksi.

    Ermənistan tərəfinin bu açıqlama ilə bağlı şərhi hələ ki, məlum deyil.

16. 2 Oktyabr 2020Azərbaycan XİN: "Ermənistan primitiv yollarla Azərbaycanın haqlı mübarizəsinə kölgə salmaq məqsədi güdür"

    

    Şəklin mənbəyi, APA

    Ermənistan informasiya məkanında da “ard-arda cəfəng iddialar ortaya atmaqla, primitiv yollarla Azərbaycanın haqlı mübarizəsinə kölgə salmaq məqsədi güdür,” - Azərbaycan Xarici İşlər Nazirliyi bəyan edib.

    Qurum bəyan edib ki, Azərbaycan öz ərazi bütövlüyü və mülki insanların təhlükəsizliyini təmin etmək üçün beynəlxalq hüquqlar çərçivəsində öz ölkəsinin daxilində hərbi əməliyyat aparır.

    Nazirlik qeyd edib ki, Ermənistan özünün hərbi və informasiya müstəvisində “ağır məğlubiyyətlərini kompensasiya etmək məqsədilə Azərbaycana qarşı böhtan xarakterli yeni iddiaları tirajlamağa uğursuz cəhd edir”.

    “Ermənistanın terrorçu və muzdlu şəxslərin Azərbaycan tərəfindən hərbi əməliyyatlara cəlb edildiyinə dair iddialara cavab olaraq, bir daha qeyd edirik ki, Ermənistan propaqanda maşınının bu iddiaları tamamilə əsassızdır. Hərbi əməliyyatlar hələ başlamamışdan öncə Ermənistan tərəfindən tirajlanan, heç bir fakta əsaslanmayan bu iddialar Ermənistanın 27 sentyabr tarixində həyata keçirdiyi təcavüz aktı ilə bağlı zəruri informasiya fonu yaratmaq məqsədi güdür, bu ölkənin Yaxın Şərqin bir sıra ölkələrindən olan erməni mənşəli terrorçuların mənfur “xidmətlərindən” istifadə etməsindən diqqəti yayındırmaq, Azərbaycanın haqlı mübarizəsinə ləkə salmaq niyyəti ilə apardığı böhtan kampaniyasının bir elementidir,” – nazirlik bəyan edib.

    Azərbaycan Xarici İşlər Nazirliyi bildirib ki, işğal edilmiş ərazilərdə Ermənistan qanunsuz “terrorçu qüvvələr yerləşdirib və onlar Azərbaycana və onun mülki əhalisinə qarşı təcavüzkar müharibədə” iştirak edir.

    “Bu terrorçu dəstələrin Azərbaycan Respublikasının beynəlxalq səviyyədə tanınmış ərazilərindən çıxarılmasına dair beynəlxalq ictimaiyyətə olan çağırışlarımız öz nəticəsini vermədiyi şəraitdə, beynəlxalq və regional sülh və təhlükəsizlik üçün ciddi hədə olan bu problemin həlli yalnız Azərbaycan silahlı qüvvələri tərəfindən ərazilərimizin işğalına son qoyulması ilə mümkün olacaqdır,”- Azərbaycan XİN-i bildirib.

17. 2 Oktyabr 2020"10 illərcə hücum təhdidi altında yaşamaq" - BBC News Azərbaycanca müxbiri

    BBC News Azərbaycanca müxbiri Günel Səfərova BBC News saytı üçün yazıb:

    "Biz hazırda bazar günü Azərbaycan və Ermənistan arasında döyüşlərin başladığı yerlərdən biri olan Tərtərin yaxınlığındakı Bərdə şəhərindəyik.

    Tərtər ağır hücum altındadır. Biz 20 km aralıda yerləşən Bərdədə top və mərmi səsələrini eşidə bilirik.

    Azərbaycan hakimiyyəti bildirir ki, oktyabrın 1-i səhər saatlarında ermənilər Tərtər şəhərinin mərkəzinə atəş açıblar və nəticədə bir nəfər ölüb.

    Mərmi atəşi nəticəsində döyüşlərin getdiyi daha bir yer, Ağdamda ata və oğul həyatını itirib.

    Söhbətləşdiyimiz Tərtər sakinlərinin əksəriyyəti deyir ki, onlar 30 ildir ki, davamlı hücum təhdidi altında yaşayırlar.

    Biz Tərtərin bəzi kəndlərinə getmək istəsək də, polis postunda bizə girişin qadağan olduğunu və bunun səbəbinin bu kəndlərin təhlükəsiz olmadığını dedilər.

    Bərdə və Tərtərdə bir çoxları könüllü olaraq orduya qoşulmaq istəyirlər.

    İnsanlar işğal olunmuş ərazilərə geri qayıtmağı və müharibəyə birdəfəlik son qoyulmasını istəyirlər."

18. 2 Oktyabr 2020Azərbaycanın münaqişədən əziyyət çəkmiş mülki əhalisi üçün "500 ədəd ilkin tibbi yardım çantası göndərilib", Türkiyənin Azərbaycandakı səfiri Erkan Özaral deyir.

    

    Şəklin mənbəyi, Türkiyənin Bakıdakı səfirliyi/Facebook

    Türkiyənin Azərbaycandakı səfirliyi Azərbaycanın münaqişədən əziyyət çəkmiş mülki əhalisi üçün "500 ədəd ilkin tibbi yardım çantası göndərib".

    Bu barədə Türkiyənin Azərbaycandakı səfiri Erkan Özaral bildirib.

    İlkin tibbi yardım çantaları Azərbaycanın Qızıl Aypara cəmiyyətinə təhvil verilib.

19. 2 Oktyabr 2020Azərbaycan XİN ATƏT-in Minsk Qrupunun bəyanatına dair açıqlama verib

    Azərbaycan Xarici İşlər Nazirliyi bildirib ki, ATƏT-in Minsk Qrupunun indiyədək verilən bəyanatlarında status quo vəziyyətinin qəbuledilməz olduğunu vurğulansa da, "Ermənistan işğala əsaslanan status quo rejiminin möhkəmləndirilməsi məqsədini güdür".

    "Görünən odur ki, Ermənistan münaqişəni danışıqlar yolu ilə həllində maraqlı deyil və işğal etdiyi ərazilərin ilhaqına çalışır".

    XİN həmçinin deyib ki, "Ermənistan rəhbərliyi tərəfindən həm sözdə, həm də əməldə törədilmiş təxribatlar, o cümlədən Azərbaycanın işğal olunmuş ərazilərindəki qondarma rejimin “inaqurasiyasında” iştirak üçün Şuşa şəhərinə getməsi, işğal olunmuş Xankəndi şəhərində təhrikçi xarakterli “Qarabağ Ermənistandır” bəyanatını səsləndirməsi, işğalçı ölkənin “yeni ərazilər üçün yeni müharibə” konsepsiyasının irəli sürməsi, münaqişənin həlli danışıqlarda 7 qeyd şərt irəli sürməsi, eləcə də danışıqların formatını dəyişdirmək cəhdləri ATƏT-in Minsk Qrupu həmsədrlərinin vasitəçiliyi ilə aparılan münaqişənin həlli prosesinə zərbə vurub".

    Bundan başqa, nazirlik Ermənistanın beynəlxalq qanunvericiliyi "kobud şəkildə" pozaraq, Azərbaycanın mülki əhalisini və infrastrukturunu məqsədyönlü şəkildə atəşə tutduğunu bildirib.

    1 oktyabr 2020-ci il tarixinə olan məlumata əsasən, Azərbaycanın 19 mülki şəxsi qətlə yetirilib, 55 nəfər yaralanıb və 200-dən çox ev və mülki obyektlər dağıdılıb, XİN bildirir.

    "Ermənistan tərəfindən Azərbaycanın Dağlıq Qarabağ bölgəsi və ətraf rayonlarının işğalı zamanı hərbi əməliyyatlarda terror qruplaşmalarından və muzdlu döyüşçülərdən istifadə edildiyinə dair çoxsaylı faktlar mövcuddur. Hazırda da Ermənistan rəhbərliyi bu siyasəti davam etdirərək, həyata keçirdiyi yeni təcavüz aktı çərçivəsində Azərbaycana qarşı ekstremist ünsürlərdən geniş istifadə edir”, açıqlamada deyilir.

    XİN yaranmış vəziyyətin "tam məsuliyyətinin" Ermənistanın siyasi və hərbi rəhbərliyin üzərinə düşdüyünü qeyd edib.

20. 2 Oktyabr 2020Azərbaycan əsgərləri "3300-3500 metr yüksəklikdə" döyüşürlər, Prezidentin köməkçisi bunu Murovdakə vəziyyətdən danışarkən qeyd edib

    

    Şəklin mənbəyi, Azertag

    Hazırda Murovda qış şəraiti, qar olsa da, Azərbaycan əsgərləri "3300-3500 metr yüksəklikdə döyüşürlər".

    Bunu Azərbaycan Prezidentinin köməkçisi Hikmət Hacıyev deyib.

    Hikmət Hacıyev söyləyib ki, Ermənistan 30 il ərzində işğal olunmuş ərazilərdə "dərin istehkam sistemləri" qurub, amma onlar sıradan çıxarılır.

    "Bəzi yerlərdə bu istehkamların uzunluğu 8-10 metrə çatır. Relyef şəraiti də ağırdır. Həmin yerlər əsasən dağlıq ərazilərdir. Lakin bu çətinliklərə baxmayaraq, Azərbaycan Silahlı Qüvvələri addım-addım irəliləyir. Əsgərlərimiz düşmənin atəş nöqtələrini susdura-susdura, bəzən də atəş altında irəli gedir", - o deyib.