BBC News, Azərbaycanca
Mətnə keçid

Cəbhə bölgəsində döyüşlər - ilk on gündə nə baş verib?

Azərbaycan və Ermənistan arasında sentyabrın 27-də başlamış döyüşlər bu gün də davam edir. Hər iki tərəf hərbi və mülki itkilərin olduğunu deyir. Azərbaycan Müdafiə Nazirliyi çərşənbə axşamı gününün ilk saatlarında "hazırda bütün cəbhə boyu əməliyyat və hərbi üstünlük ordumuzun tərəfində" olduğunu açıqlayıb.

Canlı reportaj

  1. Ermənistan: "Türkiyənin hərbi əməliyyatlarla birbaşa əlaqəsi var"

    Ermənistanın Xarici İşlər Nazirliyi bildirib ki, Türkiyənin indi Dağlıq Qarabağda baş verən hərbi əməliyyatlarla birbaşa əlaqəsi var.

    Ermənistan XİN-i orada "türk silahlarından, o cümlədən dronlardan istifadə edən türk hərbi mütəxəssislərinin olduğunu" iddia edir.

    Qurum həmçinin iddia edib ki, "Türkiyə xarici terrorçu silahlıları səfərbər edərək onları Azərbaycana göndərir.

    Azərbaycan xarici İşlər naziri Ceyhun Bayramov Türkiyənin əməliyyatlarda iştirakına dair iddiaları təkzib edib.

    Bundan başqa, Ermənistanın Prezidenti Armen Sarkisyan NATO ilə partnyorluq çərçivəsində keçirilən CyberSec forumunun açılışında deyib ki, “NATO üzvü olan Türkiyə Azərbaycana dronlar, kiberhücumlar, məsləhətçilər, muzdlular və hətta F-16 qırıcıları şəklində tam yardım göstərir”.

    Azərbaycan XİN sözçüsü Leyla Abdullayeva buna şərh verməyib.

  2. Erdoğan: "İndi gəlib "burada Türk əsgər varmı?" sualı verirlər"

    Türkiyə Prezidenti Recep Tayyip Erdoğan deyib ki, Ermənistanın işğal etdiyi Azərbaycan torpaqlarını dərhal tərk etməsi ilə bölgə yenidən sülhə və sakitliyə qovuşacaq”.

    Bu gün Beynəlxalq Dəniz Qanunu Şərqi Aralıq dənizi Simpoziumundan çıxış edən cənab Erdoğan “Dağlıq Qarabağın işğalı ilə başlayan böhrana son qoyulmasının vaxtıdır” deyib.

    “Xüsusilə Minsk üçlüyü - Amerika, Rusiya və Fransa bu günə qədər təxminən 30 ildir ki, bu problemi həll etməyiblər. Həll etməmək üçün də əllərindən gələni ediblər. İndi isə ağıl verir, ara-sıra da təhdid edirlər... Bunu deyənlər xüsusilə Suriyanın şimalında minlərlə tır silahı ora daşıyanlardır... Bunlar indi gəlib burada Türk əsgər varmı? Türkiyə bura silah nəql edirmi sualı verirlər... İşğala uğrayan torpaqlar kimin torpaqlarıdır? Azərbaycanın torpaqlarıdır. Bunu hamınız qəbul edirsiniz... Burada bir milyondan artıq insan torpaqlarından uzaq düşüb, indi Azərbaycanda yaşayır. İşğalçılar isə orada (yaşayır). Artıq hesab vaxtı gəldi deyən Azərbaycan öz göbəyini özü kəsmək məcburiyyətində qaldı”.

    Paylaşımını ötürün X
    X məzmununa icazə varmı?

    Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Xəbərdarlıq : BBC kənar saytların məzmununa görə cavabdeh deyil.

    Paylaşımın sonu X

  3. Avropa İttifaqı: "Bu qarşıdurmaya hər hansı xarici müdaxilə yolverilməzdir"

    Avropa İttifaqı (Aİ) regional sabitliyi təhdid edən "ciddi gərginliyi" qınayıb və regional gücləri Dağlıq Qarabağda gedən döyüş əməliyyatlarına müdaxilə etməkdən çəkinməyə çağırıb.

    “Aİ-nin xarici siyasət üzrə məsul şəxsi olan Peter Stano bazar ertəsi günü Brüsselin münaqişədə xarici güclərin iştirakını təsdiqləyə bilmədiyini bildirib” və əlavə edib ki, “bu qarşıdurmaya hər hansı xarici müdaxilə yolverilməzdir”, France-Presse agentliyi yazır.

  4. Azərbaycanın Müdafiə Nazirliyi bildirib ki, "düşmənin daha iki tankı məhv edilib”.

    Qurum bildirib ki bazar ertəsi və bu gün aparılmış döyüşlər nəticəsində cəbhənin müxtəlif istiqamətlərində Ermənistan qoşunlarının çoxlu sayda canlı qüvvəsi, hərbi obyektləri və döyüş texnikaları məhv edilib.

    tank, ermənistan

    Şəklin mənbəyi, Müdafiə Nazirliyi

  5. Ermənistan müdafiə naziri Dağlıq Qarabağdadır

    Ermənistan müdafiə naziri qarabağda

    Şəklin mənbəyi, mil.am

    Ermənistan Müdafiə naziri David Tonoyan “Dağlıq Qarabağ prezidenti” Arayik Harutyunyan, “müdafiə naziri” Calal Harutyunyanla Stepanakertdə (Xankəndində) Ordunun Döyüş İdarəetmə Mərkəzində olub, "Qarabağ-Azərbaycan qarşıdurma xətti" boyunca döyüş əməliyyatların vəziyyəti və gələcək mümkün inkişafları müzakirə edib, nazirlik bildirib.

    “Qarabağ müdafiə naziri“ general-mayor Calal Harutyunyan Ermənistan müdafiə nazirini operativ-taktiki vəziyyət və görülən əməliyyatlarla tanış edib.

    Harutyunyan “müdafiə ordusunun vəziyyətə tam nəzarət etdiyi və əldə edilmiş uğurların gələcək inkişafı üçün” yaxşı zəmin yaradıldığını bildirib.

  6. Bərdədən həkim: Ağır yaralılar başqa hospitala göndərilir

    Bərdə rayonundan olan adının açıqlanmasını istəməyən həkim BBC News Azərbaycancaya deyib ki, “yaralılar Bərdə və Tərtər mərkəzi rayon xəstəxanalarında qəbul edilir”.

    Yaralıların sayı barədə məlumat verməyən həkim deyib ki, yüngül yaralılar adıçəkilən xəstəxanalarda müalicə olunur.

    O bildirib ki, ağır yaralılar Ağdam ərazisindəki Sarıcalı hərbi hospitalına göndərilir.

  7. Azərbaycan: "Ermənistan ordusuna Ağdərə istiqamətində zərbələr endirilib"

    Azərbaycanın Müdafiə Nazirliyi bildirib ki, "yaşayış məntəqələrimizi atəşə tutan Ermənistan silahlı qüvvələrinin Ağdərə istiqamətində yerləşən artilleriya bölmələrinə zərbələr endirilib".

    Qurum bildirir ki, həmin artilleriya bölmələri Ermənistan ordusunun 5-ci dağatıcı alayının tərkibindədir.

    "Artilleriyaçılarımızın sərrast atəşi nəticəsində ağır itkilərə məruz qalan düşmən bölmələri yerləşdiyi atəş mövqelərindən geri çəkilməyə məcbur edilib", məlumatda deyilir.

    Ermənistan tərəfi bundan bir qədər əvvəl bu barədə məlumat paylaşmışdı.

  8. Rusiya: "İndi çox vacib olan döyüş əməliyyatlarını dayandırmaqdır"

    Peskov, Rusiya

    Şəklin mənbəyi, Mikhail Metzel/TASS

    "Dünən Xarici İşlər Nazirliyi vasitəsi ilə Ankara ilə təmaslar olub. Odur ki, burada da Rusiya tərəfi tam təmasdadır", - Rusiya prezidentinin mətbuat katibi Dmitri Peskov deyib.

    "İndi çox vacib olan döyüş əməliyyatlarını dayandırmaqdır, daha kimin haqlı, kimin haqsız olduğunu araşdırmaq yox", o deyib.

  9. "Ermənistan lazım gələrsə, Rusiyadan silah istəyəcək" - Səfir

    "Lazım gələrsə, Ermənistan Rusiyadan yeni silah təchizatı istəyəcək, lakin bu barədə hələ heç bir söhbət yoxdur", - RIA Novosti-yə verdiyi müsahibədə Ermənistanın Rusiyadakı səfiri deyib.

  10. Tanınmamış "DQR Müdafiə Nazirliyi" bazar ertəsi günü daha 28 hərbçisinin həlak olduğunu bildirib.

    Daha əvvəl Dağlıq Qarabağda gedən döyüşlərdə 31 hərbçinin həlak olduğu haqqında xəbər verilib.

    Beləliklə, ikinci gün davam edən döyüşlər nəticəsində erməni tərəfi 59 hərbçisini itirib.

  11. Hulusi Akar: "Ermənistan dərhal hücumları dayandırmalıdır"

    Türkiyə Milli Müdafiə naziri Hulusi Akar Ermənistanın Azərbaycanın mülki yaşayış məntəqələrinə yönəlmiş hücumlarına münasibət bildirib, ölkənin Müdafiə Nazirliyinin saytında açıqlanıb.

    “Sülh yolu ilə həll istəyənlər, “dərhal atəşkəs” deyənlər, dialoq məsələsini hələ indi xatırlayanlar Dağlıq Qarabağla Azərbaycanın 20 faiz torpaqları işğal altında ikən, Xocalıda barbarlıqla, hüquq-qanun nəzərə almadan, uşaq, qadın, yaşlı deməyib minlərlə məsum şəxs qətlə yetirilərkən, milyonlar öz ev-eşiyindən didərgin edilərkən 30 ildir harada idilər?”, Hulusi Akar deyib.

    Hulusi Akar həmçinin deyib ki, “Ermənistan dərhal hücumları dayandırmalı, xaricdən gətirdikləri muzdlu əsgərləri, terrorçuları geri göndərməli, işğal etdikləri Azərbaycan torpaqlarını boşaltmalıdır. Beləcə atəşkəsin, sülhün, sabitliyin önü açılmalıdır”.

    Paylaşımını ötürün X
    X məzmununa icazə varmı?

    Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Xəbərdarlıq : BBC kənar saytların məzmununa görə cavabdeh deyil.

    Paylaşımın sonu X

  12. İran Ermənistana silah göndərilməsi iddialarını təkzib edib, İrana raket düşüb

    İranın Bakıdakı səfirliyi Ermənistana İran ərazisindən keçməklə silahlar göndərilməsi ilə bağlı iddiaları təkzib edib.

    “Bu qədim iddiadır. Biz bu məsələ ilə bağlı hələ uzun müddət öncə də təkzib verdik. O da hər yerdə yayımlandı”, İran Səfirliyinin sözçüsü Əli Musəvi BBC News Azərbaycancaya bildirib.

    Bu gün səhər saatlarında isə İsna xəbər agentliyi Azərbaycan-Ermənistan cəbhəsində gedən döyüşlər zamanı İran ərazisinə raket düşməsi ilə bağlı məlumat yayıb.

    İranın Bakıdakı səfirliyi faktı təsdiqləyib.

    Lakin səfirlik detallarla bağlı məlumatın bir qədər sonra veriləcəyini açıqlayıb.

    Paylaşımını ötürün X
    X məzmununa icazə varmı?

    Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Xəbərdarlıq : BBC kənar saytların məzmununa görə cavabdeh deyil.

    Paylaşımın sonu X

  13. Dinc sakinlər həlak olublar

    Azərbaycanın Xarici İşlər naziri Ceyhun Bayramov açıqlayıb ki, atışma nəticəsində 6 dinc sakin həlak olub.

    Təhsil Nazirliyi bildirib ki, 27 sentyabrda Naftalanda həlak olmuş 5 nəfərlik bir ailənin iki üzvü məktəbli olub.

    2007-ci il təvəllüdlü Şəhriyar Qurbanov və onun əmisi qızı, 2006-cı il təvəllüdlü Fidan Qurbanova Z.Rüstəmov adına Qaşaltı Qaraqoyunlu kənd tam orta məktəbinin şagirdləridir, Nazirlik açıqlayıb.

    həlak olan məktəblilər

    Şəklin mənbəyi, Təhsil Nazirliyi

    Ermənistan tərəfi 2 dinc sakinin - qadın və bir uşağın həlak olduğunu açıqlayıb.

  14. Ermənistan: "Döyüşlər müxtəlif intensivliklə baş verir"

    Qarabağ münaqişəsi zonasında döyüş əməliyyatları müxtəlif intensivliklə davam edir, Ermənistan müdafiə nazirliyinin mətbuat katibi Şuşan Stepanyan bildirib.

    "Döyüşlər müxtəlif intensivliklə baş verir. Qarabağ müdafiə ordusunun bölmələri ayrı-ayrı sahələrdə uğurla "qisas əməliyyatlarını" həyata keçirirlər”, - Stepanyan Facebook-da yazıb.

    O, həmçinin döyüş əməliyyatlarının videosunu yayımlayıb.

  15. Rusiya rublunun məzənnəsi Qarabağ xəbərlərinin fonunda ucuzlaşıb

    Dağlıq Qarabağda hərbi münaqişənin kəskinləşməsi fonunda Moskva birjasında dolların məzənnəsi bahalaşaraq 79 rubla çatıb, Reuters xəbər verib.

    Dolların bu dərəcəyədək Rusiyada bahalaşması aprelin 2-dən bəri ilk dəfədir qeydə alınıb.

    "Düşünürəm ki, həyəcan artacaq: Rusiyanın bu münaqişədə hansı mövqe tutacağı şəxsən mənim üçün cavabsız qalan bir sualdır. Düşünmürəm ki, hadisələr Türkiyə ilə açıq qarşıdurma istiqamətində inkişaf etsin, lakin münaqişə özü-özlüyündə xoşagəlməzdir. Buna görə, [rublda olan] aktivlərdən və valyutadan çıxışın əsası varır", - Rosbank-ın təhlilçisi Yevgeniya Koşelevanın sözlərini agentlik iqtibas edib.

  16. Cəbhə bölgəsinə 6500 təkər göndərilib

    Bakı Nəqliyyat Agentliyi açıqlayıb ki, cəbhə bölgəsinə 6500 təkər göndərilib.

    Qurum bildirib ki, Tovuz döyüşlərindən bəri 26500 ədəd təkər cəbhə bölgəsinə yola salınıb.

  17. Ağdamda bir sakin həlak olub

    Sentyabrın 28-də qrad atəşi nəticəsində Ağdam rayonunun Evoğlu kənd sakini 1979-cu il təvəllüdlü Coşqun Paşayev həlak olub, Azərbaycan Baş Prokurorluğu bildirib.

    Qurum açıqlayıb ki, hadisə ilə bağlı Ağdam rayon prokurorluğunda Azərbaycan Respublikasının Cinayət Məcəlləsinin “cinayətkar birlik–təşkilat tərəfindən qəsdən adam öldürmə”, “xüsusi amansızlıqla və ya ümumi təhlükəli üsulla qəsdən adam öldürmə”, “milli, irqi, dini ədavət və ya düşmənçilik niyyəti ilə qəsdən adam öldürmə”, “təcavüzkar müharibəni aparma” və digər maddələri ilə cinayət işi başlanıb.

    Baş Prokurorluğun məlumatında deyilir ki, hazırkı vaxtadək ümumilikdə mülki əhalidən 27 nəfər müxtəlif dərəcəli bədən xəsarətləri alaraq xəstəxanalara yerləşdirilib.

  18. Tərtərdə bir sakin həlak olub, 3 nəfər yaralanıb

    Bu gün Tərtərdə bir sakin ölüb, 3 nəfər yaralanıb.

    Tərtər şəhərində rayon Məhkəməsinin inzibati binasının yanına düşmüş mərmi qəlpələrindən 1975-ci il təvəllüdlü Əliyev Mehman Sovet oğlu həlak olub, Baş Prokurorluq bildirib.

    Qurum bildirib ki, həmin vaxt ərazidən keçən təcili tibbi yardım maşının sürücüsü 1968-ci il təvəllüdlü Əsədov Qənbər Əsgər oğlu və maşında olan hərbi polisin əməkdaşı 1994-cü il təvəllüdlü Hüseynov Fəxrəddin Fərman oğlu, həmçinin ərazidə olan digər Tərtər şəhər sakini 1991-ci il təvəllüdlü İbrahimov Tural Firdovsi oğlu yaralanıb.

  19. Bəzi bölgələrdə avtobuslar saat 20:00-dək işləyəcək

    Sentyabrın 28-dən ölkə ərazisində Bakı istisna olmaqla, komendant saatı elan edilən bölgələrdə avtobuslar saat 6:00-dan 20:00-dək işləyəcək, Dövlət Avtomobil Nəqliyyatı Xidməti bildirib.

    Qərarda paytaxtın istisna olduğu deyilsə də, bu qaydanın Bakı-Sumqayıt istiqamətinə hərəkət edən avtobuslara da aid ediləcəyi qeyd olunub.

    Dövlət Avtomobil Nəqliyyatı Xidmətinin sözçüsü Nuridə Allahyarova bildirib ki, bu qərar avtobus sürücülərinin komendant saatı çərçivəsində evlərinə çata bilməsi üçündür.

    Sentyabrın 28-dən gecə saat 00-00-dan Azərbaycanın bütün ərazisində hərbi vəziyyət elan edilib.

    Bakı, Gəncə, Sumqayıt, Yevlax, Mingəçevir, Naftalan şəhərlərində, Abşeron, Cəbrayıl, Füzuli, Ağcabədi, Beyləqan, Ağdam, Bərdə, Tərtər, Goranboy, Göygöl, Daşkəsən, Gədəbəy, Tovuz, Şəmkir, Qazax və Ağstafa rayonlarında hərbi vəziyyət dövründə saat 21:00-dan saat 06:00-dək komendant saatı tətbiq edilib.

    Şəxslərin xüsusi icazə və ya şəxsiyyəti təsdiq edən sənədlər olmadan küçəyə çıxması qadağandır.

    avtobus, bakı, komendant saatı