Cəbhə bölgəsində döyüşlər - ilk on gündə nə baş verib?

Canlı reportaj

1. 30 Sentyabr 2020Türkiyə PUA və təyyarələrindən Ermənistana qarşı istifadə edilmədiyini deyir

   “Ermənistan ona qarşı Türkiyə təyyarələri və PUA-larından istifadə olunmasına dair heç bir dəlilə söykənməyən yalan iddialarla çıxış edir”.

   Bu barədə Türkiyə Milli Müdafiə Nazirliyinin yaydığı açıqlamada bildirilib.

   “Bu, Ermənistanın qarşısında Türkiyənin olduğu faktını yaratmaqla arxasındakı dəstəyi artırmaq məqsədi güdür və "qara piar"dan başqa bir şey deyil. Həmçinin bu iddialar onları dəstəkləyənlərdən başqa, heç kim tərəfindən ciddiyə alınmayıb. Digər tərəfdən, Azərbaycan Silahlı Qüvvələri tək başına qələbə qazanacaq imkan və qabiliyyətə, işğal altındakı torpaqlarını azad edəcək əzm və qətiyyətə sahib olduğunu ötən bir neçə gün ərzində bütün dünyaya göstərib”, - deyə qeyd olunub.

   Ermənistan Müdafiə Nazirliyinin sözçüsü Şuşan Stepanyan Azərbaycan Hava Qüvvələrinin Türkiyə istehsalı PUA-lardan istifadə etdiyini deyib.

   O, Facebook səhifəsində yazıb ki, Azərbaycan Hava Qüvvələri bu silahlardan istifadə etməklə "Artsax Müdafiə Ordusu"nun şimal istiqamətində havadan bombardman aparmaqla qarışıq tipli döyüş aparır".

   "Düşmən hava qüvvələri yardım müdafiəsi nişan bölgəsindən uzaq məsafədə fəaliyyət göstərir. Hava-yerüstü uzun mənzilli raketlərdən istifadə olunur", - Şuşan Stepanyan yazıb.

   "Çərşənbə günü Azərbaycan hərbçiləri tərəfindən yayımlanmış videoda erməni tanklarına və canlı ehtiyat qüvvəsinə Türkiyə istehsalı olan Bayraktar TB2 PUA-nin endirdiyi zərbələr göstərilib", London Kral kollecinin hərbi tədqiqatlar fakültəsinin aspirantı, amerikalı ekspert Rob Lee yazır.

   "Erməni qüvvələri əvvəllər də pilotsuz uçan aparatların təhdidlərinə məruz qalırdı, lakin TB2-lər oturuşmuş mənzərəni dəyişir – o mənada ki, onları eşitmək /görmək daha çətindir və [onlar] cəbhə xəttindən daha uzaq məsafədə yerləşən hədəfləri vura bilir, " - ekspert yazıb.

   Azərbaycan döyüşlərdə Türkiyənin hər hansı hərbi iştirakını təkzib edib.

2. 30 Sentyabr 2020BBC-nin Qarabağdakı "suriyalı muzdlu" ilə müsahibəsi

   BBC News Ərəbcə Xidməti Türkiyəyönlü "Suriya milli ordusunun" komandirlərindən biri tərəfindən cəlb edildiyini və hazırda Azərbaycanda olduğunu söyləyən bir suriyalı ilə bir müsahibə dərc edib.

   Onun sözlərinə görə, ona "hərbi obyektləri qorumaqla bağlı iş təklif edilib və buna görə ayda 2 min dollar ödəniş ediləcəyi deyilib. Onların Azərbaycana Türkiyə ərazisindən keçdiyi qeyd edilir".

   Suriyalı deyib ki, "vədlərə baxmayaraq, o və digər muzdlular Qarabağda erməni qüvvələri ilə döyüşlərdə iştirak etməli olubllar".

   O, "ölən 10 suriyalının cəsədini gördüyünü, daha 70 suriyalının yaralandığını və tibbi yardım almadığını deyir".

   Suriyanın şimalındakı BBC mənbələri söyləyiblər ki, "bir neçə ailə Azərbaycandakı qohumlarının ölməsi barədə xəbərlər alıb".

   Azərbaycan və Türkiyə suriyalı muzdluların cəlb edilməsi və onların Qarabağa göndərilməsi barədə məlumatları qətiyyətlə inkar edir.

   Prezident Əliyev ötən gün Rusiya telekanalına verdiyi müsahibədə "Suriyadan heç bir silahlı yoxdur" və bu barədə "heç bir dəlil- sübut yoxdur" deyib.

3. 30 Sentyabr 2020Horadizə atılan top mərmisi nəticəsində 1 mülki şəxs ölüb, 3 nəfər yaralanıb

   

   Şəklin mənbəyi, Azərbaycanın Baş Prokurorluğu

   Azərbaycanın Baş Prokurorluğu bildirib ki, sentyabrın 30-da Ermənistan Silahlı Qüvvələrinin Füzuli rayonunun Horadiz şəhərinə atdığı top mərmisi yanacaqdoldurma məntəqəsinin yaxınlığına düşüb.

   Hadisə nəticəsində 1990-cı il təvəllüdlü Rüstəmov Murad Tahir oğlu həlak olub, 3 nəfər isə müxtəlif dərəcəli bədən xəsarətləri alaraq xəstəxanaya yerləşdirilib.

   Qurumun məlumatında deyilir ki, erməni silahlı qüvvələrinin həmin gün ağır artilleriya qurğularının açdığı atəş nəticəsində Tərtər rayonu, Yenikənd kənd sakini Lyuda Vasilyevnanın yaşayış evinin həyətinə top mərmisi düşüb və yardımçı tikili dağılıb.

4. 30 Sentyabr 2020Fransa Prezidenti "döyüş xarakterli" ritorikaya görə Türkiyəyə xəbərdarlıq edib

   

   Şəklin mənbəyi, REUTERS

   Fransa Prezidenti Emmanuel Macron Türkiyəyə "Dağlıq Qarabağın yenidən fəth ediləcəyi ilə bağlı Azərbaycan tərəfindən hər hansı bir qadağanı aradan qaldıran döyüş xarakterli şərhlərə görə" xəbərdardarlıq edib.

   O, bu axşam Rusiya Prezidenti Vladimir Putinlə, sabah ABŞ Prezidenti Donald Trumpla danışacağını deyib.

   Həm Azərbaycan, həm də Ermənistan keçmiş Sovet respublikalarıdır. Rusiyanın Ermənistanda hərbi bazası olsa da, Azərbaycanla da yaxşı münasibətləri var.

   Fransa Prezidentinin çıxışından yaxın günlərdə Ermənistana daha çox dəstək vəd etdiyi görünürdü: "Ermənistana və ermənilərə deyirəm, Fransa öz rolunu oynayacaq."

   Münaqişənin bu həftə keçiriləcək Avropa İttifaqı liderlərinin sammitində də müzakirə ediləcəyi gözlənilir.

5. 30 Sentyabr 2020"Əgər bu şərtimə Ermənistan hökuməti əməl edərsə, döyüşlər dayanacaq" - İlham Əliyev, Prezident İlham Əliyev birinci xanım Mehriban Əliyeva ilə birgə yaralanmış hərbçilərlə görüşüb.

   

   Şəklin mənbəyi, President.az

   “Biz mülki əhaliyə qarşı heç vaxt vuruşmamışıq”.

   Bu sözləri Prezident İlham Əliyev dörd gündür ki, davam edən döyüşlərdə yaralanmış hərbçilərlə görüşündə deyib. Rəsmi saytda çap olunmuş fotolarda 8 hərbçi görünür.

   İlham Əliyev əlavə edib ki, Azərbaycanın hədəfi “erməni silahlı birləşmələrinin mövqeləri, texnikası, canlı qüvvəsi" olsa da, qarşı tərəf Azərbaycanın "kənd və şəhərlərini atəşə tutur".

   "13 dinc insan həlak olub, 40-dan çox mülk şəxs yaralanıb, 168 ev dağıdılıb," cənab Əliyev qeyd edib.

   İlham Əliyev həmçinin deyib ki, Azərbaycanın şərti onların torpaqlardan "qeyd-şərtsiz, tam və dərhal"çıxmasıdır.

   "Bu şərtim qüvvədədir və əgər bu şərtimə Ermənistan hökuməti əməl edərsə, döyüşlər dayanacaq, qan tökülməyəcək, sülh olacaq, bizim bölgəmizə sülh gələcək. Biz sülh istəyirik, biz məsələnin həllini istəyirik, əks təqdirdə 30 ilə yaxın danışıqlara ümid bəsləməzdik", o əlavə edib.

6. 30 Sentyabr 2020Ermənistan F-16 ilə vurulduğu deyilən təyyarənin görüntülərini yayıb

   

   Şəklin mənbəyi, Ermənistan Müdafiə Nazirliyi

   Ermənistan Türkiyənin F-16-sı ilə "vurulduğu" iddia edilən təyyarəsinin fotosunu paylaşıb.

   Bundan əvvəl təyyarənin pilotunun mayor Valeriy Danelin olduğunu bildirib.

   Türkiyə və Azərbaycan Türkiyəyə məxsus F-16 təyyarəsinin Ermənistanın Su-25 təyyarəsini vurması xəbərini təkzib edib.

   Azərbaycan prezidentinin köməkçisi Hikmət Hacıyev bildirib ki, Azərbaycan tərəfində olan məlumata əsasən, sentyabrın 29-da Ermənistan ərazisində iki Su-25 tipli təyyarə havaya qalxıb və hər ikisi dağa çırpılaraq partlayıb.

   Prezident İlham Əliyev Türkiyənin F-16 təyyarələrinin döyüşlərdə heç bir tərzdə iştirak etmədiyini və təyyarənin vurulması xəbərinin heç nə ilə təsdiqlənmədiyini deyib.

7. 30 Sentyabr 2020Qarabağ cəbhəsində vəziyyət gərginləşdiyi zaman Yerevanda görüntülər

   Ermənistanın paytaxtında Qarabağda gedən döyüşlər çox da hiss olunmur.

   Bəzi yerlərdə reklam lövhələrində "biz qalib gələcəyik" kimi şüarlar yazılıb.

   Gənclərdən ibarət qruplar cəbhəyə göndərmək üçün gec xarab olan məhsullar və şirniyyat yardımı toplayırlar.

   Hərbi xidmətə getməyə könüllü yazılanlar xüsusi komissiyaların qarşısına toplanıb növbə gözləyirlər.

   Paylaşımını ötürün YouTube

   Google YouTube məzmununa icazə varmı?

   Bu məqalədə Google YouTube məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl Google YouTube kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

   Qəbul edin və davam edin

   Xəbərdarlıq : BBC kənar saytların məzmununa görə cavabdeh deyil. YouTube məzmununda reklam ola bilər.

   Paylaşımın sonu YouTube

8. 30 Sentyabr 2020Azərbaycan XİN: "Beynəlxalq humanitar hüquqa tam və qəti şəkildə riayət edilir”

   Əks-hücum əməliyyatları zamanı “beynəlxalq humanitar hüquqa tam və qəti şəkildə riayət edilir”, Azərbaycan Xarici İşlər Nazirliyi bildirir.

   XİN Avropa İnsan Haqları Məhkəməsinin (AİHM) 29 sentyabr qərarına münasibətini açıqlayarkən, "qərarın Ermənistana …zorakı əməllərə son qoymağa dair çağırış mənasına gəldiyini” bəyan edib.

   “Sentyabrın 27-də Ermənistanın Azərbaycana qarşı törətdiyi təcavüz aktına cavab olaraq, Silahlı Qüvvələrin başlatdığı əks-hücum əməliyyatının gedişi zamanı beynəlxalq humanitar hüquqa tam və qəti şəkildə riayət edilir və heç bir formada mülki əhali və mülki obyektlər hədəfə alınmır. Azərbaycan tərəfi Avropa Məhkəməsinin qərarına uyğun olaraq, öz beynəlxalq öhdəliklərinə riayət edilməsi istiqamətində görülmüş tədbirlər barədə Məhkəməyə müvafiq qaydada məlumatlar təqdim edəcəkdir”, - qurum bildirir.

   Sentyabrın 29-da AİHM Ermənistan hökumətinin verdiyi şikayətə cavab olaraq Məhkəmə Reqlamentinin 39-cu qaydasına müvafiq olaraq qərar qəbul edib.

   Həmin qərarda Avropa Məhkəməsi həm Ermənistanı və həm də Azərbaycanı mülki əhalinin Konvensiya hüquqlarının pozulmasına gətirib çıxara biləcək tədbirlərdən çəkinməyə dəvət edir.

9. 30 Sentyabr 2020Azərbaycanın Baş Prokurorluğu: “46 mülki yaralanıb, 14 nəfər həlak olub”

   “Ümumilikdə, mülki əhalidən 46 nəfər müxtəlif dərəcəli bədən xəsarətləri alaraq xəstəxanalara yerləşdirilmiş, 14 nəfər şəxs isə həlak olub,” Baş Prokurorluq bildirir.

   Qurum həmçinin "Ermənistan silahlı qüvvələrinin mülki infrastruktur obyektlərini atəşə tutması nəticəsində 116 yaşayış evinə zərər dəydiyini" bəyan edib.

   Bundan başqa "26 mülki obyektə, o cümlədən Tərtər şəhərində Xalça-toxuculuq fabrikinə, Ağdam rayonu, Təzəkənd kəndində inşa edilmiş modul tipli məktəb binasına, Tərtər rayonu, Şıxarx qəsəbəsi 1 saylı tam orta məktəbin binasına, Tərtər şəhəri 2 saylı məktəb-liseyin binasına, Tərtər rayonunun Azad Qaraqoyunlu kəndi ərazisində yerləşən “MKT İstehsal Kommersiya” MMC-nin Pambıq zavoduna, Tərtər rayonu Qapanlı kəndində tibb məntəqəsinə külli miqdarda ziyan vurulub, eləcə də dinc sakinlərə məxsus nəqliyyat vasitələri yararsız vəziyyətə düşüb”, qurum bildirib.

   Baş Prokurorluğun açıqlamasında həmçinin çoxsaylı “xırda və iribuynuzlu heyvanların tələfatı barədə” məlumat var.

   “Ermənistan hərbi birləşmələri əhalinin kompakt olduğu məntəqələri - rayon və kənd mərkəzlərini – yaşayış evlərini, xəstəxanaları, tibb məntəqələrini, məktəb binalarını, uşaq bağçalarını, dövlət qurumlarının inzibati binalarını, təsərrüfat təyinatlı əraziləri ağır artilleriya qurğularından intensiv atəşə tutmaqda davam edir”, qurumun məlumatında deyilir.

10. 30 Sentyabr 2020

    

    Şəklin mənbəyi, Müdafiə Nazirliyi

    Azərbaycan Ordusunun bölmələri Ermənistan silahlı qüvvələrinin Füzuli istiqamətində yerləşən 4-cü taborunu ağır artilleriya atəşinə məruz qoyub, Müdafiə Nazirliyi bildirib.

    Azərbaycan Ordusunun bölmələri tərəfindən Ermənistan silahlı qüvvələrinin 1-ci ümumqoşun ordusunun 10-cu dağatıcı diviziyasının 5-ci dağatıcı alayının Ağdərə yaşayış məntəqəsində yerləşən qərargahına zərbə endirilib, Müdafiə Nazirliyi bildirib.

    MN qarşı tərəfin canlı qüvvə və hərbi texnika baxımından "xeyli sayda itki verdiyini" bildirir.

    Nazirlik bundan əvvəl "Ermənistanın 1-ci ümumqoşun ordusunun 10-cu dağatıcı diviziyasının Tonaşendə yerləşən 7-ci dağatıcı alayının 2-ci taborunun şəxsi heyəti ağır itkilərə məruz qaldığını" deyib.

    

    Şəklin mənbəyi, Müdafiə Nazirliyi

    Ermənistan Müdafiə Nazirliyinin sözçüsü Şuşan Stepanyan deyib ki, konkret bölgələrdə "əks cavab tədbirləri" həyata keçirilir.

    "TOS-1A ağır odsaçan sistemlər də daxil olmaqla, çox sayda hərbi texnika məhv edilib", - Şuşan Stepanyan yazıb.

11. 30 Sentyabr 2020Bakı: Erməni təyyarələri vurulmayıb - onlar dağa çırpılıb

    

    Şəklin mənbəyi, Azertag

    Çərşənbə axşamı günü Ermənistan hərbi hava qüvvələrinin iki Su-25 təyyarəsi dağa çırpılaraq partlayıb, Azərbaycan prezidentinin köməkçisi Hikmət Hacıyev bildirib.

    "Türkiyə silahlı qüvvələrinə məxsus F-16 təyyarəsinin erməni Su-25 təyyarəsini vurması barədə bəyanatlar absurd və Ermənistanın növbəti dezinformasiyasıdır. Azərbaycan tərəfində olan məlumata əsasən, sentyabrın 29-da Ermənistan ərazisində iki Su-25 tipli təyyarə havaya qalxmışdır. Hər iki təyyarə dağa çırpılaraq partlayıb," - Hacıyev APA agentliyinə bildirib.

12. 30 Sentyabr 2020Rusiya hərbçiləri Qarabağdakı döyüşləri izləyirlər

    Rusiya Prezidentinin mətbuat katibi Dmitri Peskov Azərbaycana Türkiyənin dəstəyi ilə bağlı suala cavab olaraq bildirib ki, Rusiya hərbçiləri vəziyyəti izləyir və təhlil edirlər.

    "Hərbçilərimiz hərbi əməliyyatların davam etdiyi təmas xəttində (Dağlıq Qarabağda) hadisələrin inkişafını çox diqqətlə izləyirlər. Bütün məlumatlar diqqətlə təhlil olunur, - Peskov deyib. - Biz eləcə də dünyanın müxtəlif ölkələrindən ali, yüksək səviyyədə edilən, beynəlxalq liderlərin etdikləri bütün bəyanatları diqqətlə qeydə alırıq."

    Çərşənbə axşamı Ermənistan F-16 Türk qırıcısının erməni Su-25 hücum təyyarəsini vurduğunu iddia edib.

    Türkiyə və Azərbaycan bu məlumatı təkzib edib.

    Rusiya və Ermənistanı ümumi Hava Hücumundan Müdafiə Sistemi birləşdirir.

13. 30 Sentyabr 2020Azərbaycan FHN mülki əhaliyə dəyən ziyanı açıqlayıb

    

    Şəklin mənbəyi, Azərbaycan Fövqəladə Hallar Nazirliyi

    Azərbaycan Fövqəladə Hallar Nazirliyi (FHN) bildirib ki, Ermənistan Silahlı Qüvvələri Azərbaycan əhalisinin sıx yaşadığı yaşayış məntəqələrini və mülki obyektləri atəşə tutur, nəticədə dağıntı və yanğınlar baş verir.

    Qurumun məlumatında deyilir ki, sentyabrın 29-da Ermənistan Silahlı Qüvvələrinin atdığı mərmilər nəticəsində Tərtər rayonu, Şıxarx qəsəbəsi ərazisində yerləşən və "Azərişıq" ASC-yə məxsus transformatorda yanğın baş verib.

    FHN bildirib ki, Ağdam və Tərtər rayonlarının müxtəlif kənd və qəsəbələrində mərmi düşməsi nəticəsində vətəndaşlara məxsus ev və təsərrüfat obyektlərində yanğın baş verib.

14. 30 Sentyabr 2020İlham Əliyev və Mehriban Əliyeva yaralı hərbçilərlə görüşüblər

    Çərşənbə günü Prezident İlham Əliyev və birinci xanım Mehriban Əliyeva Müdafiə Nazirliyinin Mərkəzi Hərbi Klinik Hospitalına baş çəkiblər.

    Prezidentin saytı yazır ki, onlar sentyabrın 27-dən gedən döyüşlər zamanı yaralanan və hospitalda müalicə alan hərbçilərlə görüşüblər.

15. 30 Sentyabr 2020Paşinyan: "Bizim gündəliyimizdə Dağlıq Qarabağın müstəqilliyinin tanınması məsələsi var"

    Ermənistanın Baş naziri Nikol Paşinyan bir daha bəyan edib ki, Yerevan yaranmış hərbi vəziyyətlə bağlı "Dağlıq Qarabağın müstəqilliyinin tanınması" imkanlarını nəzərdən keçirir.

    Bu barədə o, çərşənbə günü Rusiya KİV-ləri üçün keçirdiyi mətbuat konfransında bildirib, TASS müxbiri Yerevandan xəbər verir.

    "Bəli, bizim gündəliyimizdə Dağlıq Qarabağın müstəqilliyinin tanınması məsələsi var. Qarabağla hərbi-siyasi ittifaqın bağlanması imkanı da var", - o qeyd edib.

    O, bundan əvvəl, bazar günü Parlamentdə çıxışı zamanı Ermənistan hökumətinin belə bir niyyətinin olması barədə fikirlər səsləndirmişdi.

    Paşinyan həmçinin deyib ki, Prezident Vladimir Putinlə Rusiyanın Qarabağ münaqişəsinə mümkün hərbi müdaxiləsini müzakirə etməyib.

16. 30 Sentyabr 2020"Gündəmimizdə belə bir məsələ yoxdur", Bunu Nikol Paşinyan beynəlxalq sülhməramlı qüvvələrin Qarabağa yerləşdirilməsi barədə deyib.

    

    Şəklin mənbəyi, AFP

    Ermənistan beynəlxalq sülhməramlı qüvvələrin Qarabağ münaqişəsi zonasına yerləşdirilməsini nəzərdən keçirmir, Ermənistanın Baş naziri deyib.

    "Gündəmimizdə belə bir məsələ yoxdur," – Nikol Paşinyanın sözləri İnterfax agentliyində iqtibas olunur.

    Ermənistan lideri həmçinin Kollektiv Təhlükəsizlik Müqaviləsi Təşkilatına (KTMT) müraciət etmək niyyətində olmadığını açıqlayıb.

    "KTMT ilə sıx işləyirik, amma konkret prosedurlara başlamaq başqa bir məsələdir. Ermənistan silahlı qüvvələri ölkənin təhlükəsizliyini qorumağa qadirdir," - Nikol Paşinyan deyib.

17. 30 Sentyabr 2020Ermənistan MN: “Azərbaycan geniş miqyaslı hücum əməliyyatlarına keçib”

    Ermənistan Müdafiə Nazirliyinin rəsmisi Artsrun Hovannisyan Azərbaycan hərbçilərinin Dağlıq Qarabağda yeni hücuma başladığını elan edib, Interfaxs bu xəbəri Bakı vaxtilə saat 12-dən sonra yazıb.

    "Bu səhər Qarabağın şimalında Azərbaycan silahlı qüvvələri genişmiqyaslı hücum əməliyyatlarına keçib, döyüşlər bu dəqiqələrdə davam edir. Düşmən aviasiya, top və raket silahlarından atəş açır. Uzaq mənzilli və hədəfi dəqiq vuran pilotsuz təyyarələrdən istifadə olunur", Hovannisyan deyib.

18. 30 Sentyabr 2020Təcili xəbər, Tərtər sakini: "Üç gündür gecə-gündüz çöldə yatırıq, balalarımıza görə qorxuruq"

    Paylaşımını ötürün YouTube

    Google YouTube məzmununa icazə varmı?

    Bu məqalədə Google YouTube məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl Google YouTube kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Qəbul edin və davam edin

    Xəbərdarlıq : BBC kənar saytların məzmununa görə cavabdeh deyil. YouTube məzmununda reklam ola bilər.

    Paylaşımın sonu YouTube

    Bərdəyə toplaşan Tərtər sakinləri bildiriblər ki, Tərtər şəhəri və onun kəndləri artileriya atəşi altındadır. Buna görə sakinlər daha uzaq məsfələrə və ya atəşin vura bilmədiyi ərazilərə çəkilib orada gözləyirlər.

19. 30 Sentyabr 2020BMT tərəfləri danışıqları "dərhal bərpa etməyə" çağırır

    

    Şəklin mənbəyi, AA

    BMT Təhlükəsizlik Şurası Azərbaycanı və Ermənistanı danışıqları “dərhal bərpa etməyə” çağırır, Anadolu xəbər agentliyi yazıb.

    Agentliyin xəbərinə görə, çərşənbə günü Birləşmiş Millətlər Təşkilatı Təhlükəsizlik Şurası Dağlıq Qarabağda baş verənlərə görə qapalı görüş keçirib.

    “Görüşdən sonra keçirilmiş mətubat konfransında “təmas xəttindəki genişmiqyaslı hərbi əməliyyatlardan narahatlıq ifadə edilib. Döyüş zamanı baş vermiş mülki itkiləri və güc tətbiqini pisləyən BMT Təhlükəsizlik Şurası tərəfləri münaqişəyə dərhal son qoymağa, gərginliyi azaltmağa və danışıqları dərhal bərpa etməyə çağırıb”, xəbərdə deyilir.

20. 30 Sentyabr 2020Tərtər: "Fasiləsiz top səsləri eşidilir"

    BBC News Azərbaycancanın Bərdədə olan müxbiri bildirir ki, döyüşlərə görə Tərtərdən Bərdəyə gedən mülki sakinlər bu gün atışmaların səhər saatlarından başlandığını deyirlər.

    Müxbirimiz Tərtər istiqamətində fasiləsiz top səsləri eşidildiyini söyləyir. "Tərtərdə yaşayan və hazırda Bərdəyə sığınan sakinlər deyir ki, mülki infrastrukturlar vurulub.

    Sakinlərin sözlərinə görə, erməni silahlı qüvvələri zərbələrinin məhz insanlar yaşayan yerlərə düşdüyünü bilirlər.

    Tərtərin Qaynaq kənd sakini Murad Məmmədov BBC News Azərbaycanaya deyib ki, kənd atəş altında olduğu üçün oradan uzaqlaşır və atəş yavaşlayanda geri qayıdırlar.

    Onun sözlərinə görə, dünən mal-qaraya baxmaq üçün kəndə gedib və qayıtdıqdan qısa müddət sonra onun olduğu yerə mərmi düşüb.

    Murad Məmmədov deyir ki, sentyabrın 27-dən mərmi səslərindən kənddə durmaq mümkün deyil.

    O, kənddə evlərin dağıdıldığını və bir mülki şəxsin yaralandığını söyləyir.