Azərbaycan və Ermənistan arasında sentyabrın 27-də başlamış döyüşlər bu gün də davam edir. Hər iki tərəf hərbi və mülki itkilərin olduğunu deyir. Azərbaycan Müdafiə Nazirliyi çərşənbə axşamı gününün ilk saatlarında "hazırda bütün cəbhə boyu əməliyyat və hərbi üstünlük ordumuzun tərəfində" olduğunu açıqlayıb.
Ermənistan tərəfində döyüşlərdə həlak olan əsgərlərin sayı 84-ə çatıb. Məlumata görə, bu gün tanınmamış “DQR Müdafiə Nazirliyi” daha 26 hərbçinin həlak olması barədə məlumat paylaşıb.
Azərbaycan hərbi qulluqçular arasında itkilər və yaralılar barədə hələ ki məlumat verməyib, amma Müdafiə Nazirliyinin saytında döyüşlər başlayan günü bu haqda "məlumat dəqiqləşdirilir" yazılıb.
Ermənistan Müdafiə Nazirliyinin söçüsü elan edib ki, təmsil etdiyi qurum silahlı qüvvələr üçün ərzaq və təchizat qəbul edəcək.
Müdafə Nazirliyinin təmsilçisi Şuşan Stepanyan öz rəsmi Facebook hasabında yazıb ki, müxtəlif təşkilatlardan və fərdlərdən bu barədə çoxlu zənglər və məktublar alıblar.
O təchizatların Yeravandan toplanılması üçün Müdafiə Nazirliyinin əasa bölməsinə müraciə etməyə çağırış edib və onların ünvan və telefonlarını paylaşıb.
Şuşan Stepanyan deyib ki, verilən ərzaq və məhsullar təsnif edilməlidir.
Bundan əvvəl Azərbaycanın Müdafiə Nazirliyi deyib ki, “Ermənistan ordusu ərzaq qıtlığı və dərman ləvazimatları çatışmazlığı ilə üzləşib” və bu, qarşı tərəfin "verdiyi çoxsaylı itkilərlə əlaqədardır."
"Lələ Təpə ya Lələ Ləgi – nə olur olsun, bu gün heç bir yüksəkliyin əhəmiyyəti yoxdur. Çünki hərtərəfli genişmiqyaslı müharibəyə doğru gedirik. Sabah iş elə gətirə bilər, biz geri çəkiləsi olarıq, ya əksinə, irəli gedərik. Lakin bu müvəqqətidir. Biz daha ağır, daha uzunmüddətli hərbi hərəkətlərə hazır olmalıyıq".
Bu sözləri tanınmamış “DQR prezidenti” Arayik Harutyunyan bu günkeçirdiyi mətbuat konfransında bir jurnalistin sualına cavab olaraq deyib.
Jurnalist sual verib ki, “məlumat yayılıb ki, bizimkilər Lələ Təpəni azad edib. Bu barədə nə deyə bilərdiniz? Və Baş nazir Paşinyan bəyan etmişdi ki, Artsaxın [Dağlıq Qarabağ] müstəqilliyi məsələsini müzakirəyə çıxara bilər. Bununla bağlı nə deyə bilərsiniz? Doğurdanmı bu gün buna ehtiyac var?”
Arayik Harutyunyan buna cavab olaraq deyib ki, ilk suala cavab vermək istəmir.
"Nə edək? Düşmən bütün ordusu, bütün hərbi imkanlarından bizə qarşı istifadə edib və istifadə etməkdə davam edir. Bizim imkanımız olacaq [özümüzü] göstərməyə... ön xəttə onların ən azı bir neçə yüz, yüzlərlə döyüş texnikası var...
Odur ki, biz mövqe verəcəyik, ya mövqe alacağıq – danışmağın yeri deyil.
O ki qaldı Ermənistan siyasi qüvvələri, Milli Məclisin, Baş nazirin bəyanatlarına – müzakirələr davam edir. Və yenə qeyd edirəm: bizim üçün bu gün ən vacibi – təhlükəsizlikdir. Əvvəllər mən deyəndə ki, ən əsası təhlükəsizlikdir... Mən qabaqcadan görürdüm indiki vəziyyəti. Bəli, bizim üçün bu gün ən əsas təhlükəsizlikdir.
Tanısınlar ya tanımasınlar... – biz müharibədə qalib gəlməliyik. Ondan sonra biz düzgün qərara gələrik - qələbədən sonra ya qələbə yolunda...”
Azərbaycan Müdafiə Nazirliyi axşam saatlarında Azərbaycan Hərbi Hava Qüvvələrinə məxsus təyyarənin vurulması barədə yayılan məlumat yalan və dezinformasiya adlandırıb.
Bu barədə nazirliyin sözçüsü Vaqif Dərgahlı deyib.
Bildirirəm ki, Azərbaycan Ordusunun bütün aviasiya vasitələri yerindədir və işləkdir, o deyib.
Bundan əvvəl Rusiya mediası yazıb ki, Ermənistan tərəfi Azərbaycana məxsus An-2 təyyarəsinin vurulduğunu iddia edib.
Bu xəritə cəbhə bölgəsində döyüşlərin getdiyi rayonları göstərir. BBC News Rusca Xidməti xəritəni tərəflərin verdiyi rəsmi məlumatlar və öz mənbələrinə əsasən hazırlayıb.
Müxbirimiz bildirir ki, Bakı küçələrində əvvəlki vaxtlara nisbətən qat-qat az avtomobil var.
Postlarda çox yoxlayırlar, sənədləri yoxlayırlar, müxbirimiz qeyd edib.
Bu gün axşam saat 9-da Bakı, Gəncə, Sumqayıt, Yevlax, Mingəçevir, Naftalan şəhərlərində, Abşeron, Cəbrayıl, Füzuli, Ağcabədi, Beyləqan, Ağdam, Bərdə, Tərtər, Goranboy, Göygöl, Daşkəsən, Gədəbəy, Tovuz, Şəmkir, Qazax və Ağstafada komendant saatı başlayıb.
Komendant saatı 29 sentyabr saat 6-dək davam edəcək.
Prezident İlham Əliyev ötən gün cəbhədə döyüşlər başlayandan sonra bütün ölkə ərazisində hərbi vəziyyət elan edilməsi barədə Fərman imzalayıb və adı çəkilən şəhər və rayonlarda komendant saatı tətbiq edilir.
BMT-nin Baş katibi Antonio Guterres Azərbaycan Prezidenti İlham Əliyevə telefon zəngi edərək atəşi "dərhal dayandırmağa və substantiv danışıqları bərpa etməyə çağırıb", İnterfax Baş katibin sözçüsü Stephane Dujarric-i iqtibas edir.
Dujarric-in sözlərinə görə, tezliklə Guterres-in Ermənistanın Baş naziri ilə də telefon danışığı olacaq "və Ermənistanın Baş nazirinə də biz tamamilə eyni şeyi deyəcəyik",- o əlavə edib.
Frans Press-in məlumatına görə, sabah sentyabrın 29-da BMT-nin Təhlükəsizlik Şurası Dağlıq Qarabağ ətrafında vəziyyəti müzakirə etmək üçün bağlı qapılar arxasında fövqəladə iclas keçirmək üçün toplaşacaq. İclas Fransa və Almaniyanın təşəbbüsü ilə keçiriləcək, adları çəkilməyən diplomatlar deyiblər.
Sentyabrın 28-də Tərtər rayonunun Şıx arx qəsəbəsində əlillər və məcburi köçkünlər üçün inşa edilmiş çoxmənzilli yaşayış binasının həyətinə top mərmisinin atılıb və nəticədə Tərtər rayon sakinləri 1981-ci il təvəllüdlü Abbasov Xaliq və onun qardaşı 1987-ci il təvəllüdlü Abbasov Elşən həlak olub, Baş Prokurorluq açıqlayıb.
Qurum bildirib ki, hadisə nəticəsində 1984-ci il təvəllüdlü Məmmədov Seymur və 1989-cu il təvəllüdlü Mahmudov Faiq müxtəlif dərəcəli bədən xəsarətləri alaraq xəstəxanalara yerləşdirilib.
Azərbaycan Baş Prokurorluğunun məlumatında deyilir ki, qarşı tərəfin silahlı qüvvələri Azərbaycan əhalisinin kompakt olduğu məntəqələri - rayon və kənd mərkəzlərini, mülki infrastruktur obyektlərini - xəstəxanaları, tibb məntəqələrini, məktəb binalarını, uşaq bağçalarını ağır artilleriya qurğularından intensiv atəşə tutmaqda davam edir.
Türkiyənin hakim Ədalət və İnkişaf Partiyası (AKP) da daxil olmaqla üç ən böyük siyasi partiyası "Ermənistanın Azərbaycana hücumunu" pisləyib, Anadolu agentliyi bildirir.
Ümumilikdə, birgə bəyanata dörd partiya qoşulub - Ədalət və İnkişaf Partiyası, iri müxalifət partiyaları - Respublika Xalq Partiyası və Millətçi Hərəkat Partiyası, həmçinin kiçik İyi Partiya da bu sırada yer alıb.
Şəklin mənbəyi, Getty Images
Azərbaycanın cəbhə zonasında yerləşən yaşayış məntəqələrində bir sıra enerji infrastrukturu obyektlərinə zərər dəyib, Azərbaycan Energetika Nazirliyi bildirib.
Nazirlik açıqlayıb ki, Tərtər rayonunun Borsunlu, Hüləbəndi kəndlərində və Tərtər şəhərində qaz xətləri və avadanlıqları qismən zədələnib.
Sentyabrın 27-də “Ağdam 4 yol ölçü qovşağı”ndan qidalanan qaz təchizatı şəbəkəsinin üzərinə mərmi düşüb, qurum bildirib.
Energetika Nazirliyinin məlumatında deyilir ki, döyüş əməliyyatı aparılan sərhədyanı rayonların elektrik enerjisi ilə təchizatını təmin edən infrastrukturlar da hücuma məruz qalıb.
Tərtər, Goranboy, Ağcabədi, Füzuli, Ağdam rayonlarında bir neçə elektrik xətləri vurulub.
Şəklin mənbəyi, EPA
Hər iki tərəf səfərbərlik elan edib. Ermənistanda hərbiyə yola salma mərasimi belə görünür.
Goranboy rayonu ərazisini atəşə tutulub, Azərbaycan Müdafiə Nazirliyi (MN) bildirib.
Nazirlik açıqlayıb ki, qarşı tərəf Goranboy rayonunun Yuxarı Ağcakənd və Qaramusalı kəndlərini artilleriya atəşinə məruz qoyub.
Mülki infrastruktur obyektlərinə ciddi ziyan dəymədiyi bildirilir.
Azərbaycan MN kənd sakinləri arasında itkinin olmadığını qeyd edib.
Ermənistan Müdafiə Nazirliyi Dağlıq Qarabağın cənub istiqamətində irimiqyaslı zirehli maşın və tank hücumunun dayandırıldığını bildirir, nazirliyin mətbuat katibi Şuşan Stepanyan Facebook səhifəsində yazıb.
Ermənistanın Müdafiə Nazirliyi bildirib ki, “Azərbaycan şimal-şərq istiqamətində tank hücumuna başlasa da, “müdafiə ordusunun tank və tankəleyhinə birliklərinin inadkar müqaviməti ilə üzləşib”.
Ermənistan Müdafiə Nazirliyinin mətbuat xidmətinin sözçüsü Şuşan Stepanyan deyib ki, “Dağlıq-Qarabağın şimal-şərqində 10 ədəd Azərbaycan zirehli hərbi texnikası məhv edilib”.
Azərbaycan Müdafiə Nazirliyi buna şərh olaraq BBC News Azərbaycancaya bildirib ki, “hələlik bu barədə məlumatımız yoxdur”.
Azərbaycan Müdafiə Nazirliyi bundan əvvəl bildirib ki, Azərbaycan ordusu bölmələrinin dəqiq zərbələri nəticəsində cəbhənin müxtəlif istiqamətlərdə Ermənistan silahlı qüvvələrinə məxsus daha bir neçə hərbi texnika məhv edilib.
Bundan əvvəl Nazirlik qarşı tərəfə aid iki tankın vurulmasını əks etdirən görüntülər də paylaşmışdı.
Azərbaycanda elan olunan hərbi vəziyyət dövründə dəfn məsələlərinin təşkili forması müəyyənləşib.
Daxili İşlər Nazirliyindən BBC News Azərbaycancaya bildirilib ki, komendant saatı müddətində yalnız birinci dərəcəli qohumların - ata, ana, bacı, qardaş, ər və ya arvadın hərəkətinə icazə verilir.
Nazirlik qeyd edibki, vəfat edən şəxsin yaxın qohumları komendant saatı müddətində dəfndə iştirak etmək üçün Daxili İşlər Nazirliyinin “102” Xidmətinə və ya “Qaynar xətt”inə (012 590-80-20) müraciət etməlidirlər.
Bundan sonra onların müraciəti qısa müddət ərazində araşdırılır və şəxslərin hərəkətinə icazə verilir.
Komendant saatı tətbiq edilən yerlərdə bəzi dövlət qurumlarına xidməti vəsiqə ilə, bəzilərinə "icaze.e-gov.az" portalından qeydiyyatdan keçməklə hərəkət etməyə icazə verilir. Qurumların siyahısı Daxili İşlər Nazirliyinin saytında yayımlanıb.
Eləcə də komendant saatı müddətində fəaliyyətinə icazə verilən sahələr də açıqlanıb.
Komendant saatında hərəkətinə icazə verilən şəxslərdən şəxsiyyəti təsdiq edən sənədlərin üzərlərində olması tələb olunur.
Komendant saaatının tələblərin pozulmasına görə fiziki, hüquqi və vəzifəli şəxslər İnzibati Xətalar və Cinayət məcəllələrində nəzərdə tutulmuş qaydada məsuliyyət daşıyırlar, DİN bildirib.
Tələblərin riayət olunmasına nəzarəti Daxili İşlər Nazirliyi həyata keçirir.
Komendant saatı tətbiqi dövründə Azərbaycandan daxili və xarici uçuşlara bileti olan şəxslərin hərəkətinə onların biletləri əsasında, ölkəyə gələnlərin hərəkətinə isə onların pasportuna vurulmuş ştamp əsasında icazə verilir.
“Orada çox təbliğat aparılır. Hər iki tərəf haqlı ola bilməz, amma hər ikisi də səhv ola bilməz - və onlar tez-tez öz iddialarında olurlar. Hər iki tərəfin bütün rəsmi bəyanatlarına skeptik yanaşın!”
Bu sözləri Carnegie Mərkəzinin baş elmi işçisi Thomas de Waal Twitterdə bildirib.
Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".
Paylaşımın sonu X, 1
Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".
Paylaşımın sonu X, 2
Səfərbərlik və Hərbi Xidmətə Çağırış üzrə Dövlət Xidməti açıqlayıb ki, ehtiyatda olan birinci dərəcəli hərbi vəzifəlilər, əsgərlər, matroslar, çavuşlar, gizirlər və miçmanlar 35 yaşadək, zabitlər hərbi rütbəsindən asılı olaraq 50 və daha yuxarı yaş həddində Azərbaycan Ordusunun komplektləşdirilməsinə cəlb olunacaqlar.
“Xidmət adından hərbi vəzifəlilərin diqqətinə çatdırırıq ki, tərəfimizdən zənglər və SMS-lər daxil olduqda dərhal hərbi qeydiyyatda olduqları Səfərbərlik və Hərbi Xidmətə Çağırış üzrə Dövlət Xidmətinin yerli idarə, şöbə və bölmələrinə gəlsinlər”, - Xidmətinin rəisinin birinci müavini Zaur Abdullayev deyib.
General-mayor Abdullayev həmçinin qurumun “Silahlı Qüvvələrin sifarişləri əsasında tələb olunan sayda hərbi vəzifəlilərin və hərbi-nəqliyyat vasitələrinin hərbi hissələrə təhvil verilməsini təmin etmək üçün imkanlara malik” olduğunu deyib.
Azərbaycanda bu gün qismən səfərbərlik elan edilib. Bu, ölkə Prezidentinin müvafiq sərəncamı ilə mümkün olub.
Şəklin mənbəyi, Azertag
Azərbaycanın Xarici İşlər naziri Ceyhun Bayramov Dağlıq Qarabağ münaqişəsində Türkiyənin iştirakı ilə bağlı Yerevanın bəyanatlarına cavab verib.
"Heç bir türk müdaxiləsi yoxdur. Əgər Biz Türkiyə ilə Azərbaycan arasında hərbi-texniki əməkdaşlıqdan danışırıqsa, Azərbaycanın bir sıra ölkələrlə hərbi-texniki əməkdaşlığı var və hətta daha da çox dərəcədə Rusiya ilə", - RİA Novosti nazirə istinadən yazıb.
"Əgər Azərbaycan silahlı qüvvələrinin bu gün istifadə etdiyi silahlara nəzər salsaq, bu, daha çox dərəcədə Rusiyanındır", - deyə o əlavə edib.
Cənab Bayramov onu da deyib ki, Türkiyə ilə mütəmadi olaraq birgə keçirilən təlimlər planlı xarakter daşıyır.
