Cəbhə bölgəsində döyüşlər - ilk on gündə nə baş verib?

Canlı reportaj

1. 29 Sentyabr 2020Azərbaycan: "Ermənistandan Qarabağa S-300 zenit-raket kompleksləri gətirilir"

   “Döyüşlərdə tətbiq edilməsi üçün Ermənistandan hərəkət edən S-300 ZRK işğal onunmuş ərazilərimizə daxil olduğu anda məhv ediləcək”, Müdafiə Nazirliyi açıqlayıb.

   Qurumun sözçüsü Vaqif Dərgahlı deyib ki, "əldə etdiyimiz kəşfiyyat məlumatına əsasən, Yerevanın hava məkanını müdafiə edən S-300 zenit-raket kompleksləri (ZRK) döyüş növbətçiliyindən çıxarılaraq işğal onunmuş ərazilərimiz istiqamətində hərəkət edir."

   

   Şəklin mənbəyi, Ria Novosti

2. 29 Sentyabr 2020“Xarici güclər Azərbaycan ordusunu dayandırmasa, Azərbaycan torpaqlarını azad edə bilər”, AXCP sədri Əli Kərimli BBC News Azərbaycancaya söyləyib ki, Azərbaycan ordusu “heç kimə möhtac deyil”.

   

   “Ordumuz Azərbaycan xalqı tərəfindən dəstəklənir. Ölkə hal-hazırda bir yumruq kimi birləşib, ordumuzun qələbəsini gözləyir. Böyük ruh yüksəkliyi var və inanırıq ki, ordumuz işğal olunmuş torpaqlarımızı azad edəcək”, AXCP lideri Əli Kərimli deyir.

   Cənab Kərimli deyir ki, Azərbaycanı atəşkəsə çağıran ölkələr “yaxşı olar ki, həm də 27 il düşmən işğalında olan Azərbaycan torpaqlarının azad edilməsinə də çağırsınlar”.

   “BMT-nin bu torpaqların qeyd-şərtsiz və dərhal azad edilməsi ilə bağlı dörd qətnaməsi var, amma onlar yerinə yetirilmir. BMT-nin mandat verdiyi ATƏT-in Minsk Qrupu işğalçı ilə işğala məruz qalana demək olar ki, bərabər yanaşır. Açıq-aşkar Ermənistana deyilmir ki, bu torpaqlarda sizin nə işiniz var? Əgər beynəlxalq təşkilatlar atəşkəs çağırışlarında səmimidirlərsə, indiyədək olduğundan daha fərqli təkliflər irəli sürülməlidir. Ermənistana deyilməlidir ki, sən bu torpaqları işğal etməsən heç bir savaş olmaz.

   Əli Kərimli əlavə edib ki, Azərbaycan müharibəyə “son çarə kimi, əks hücumla” başlayıb və buna torpaqları azad etmək üçün beynəlxalq mexanizmlər işləmədiyi üçün məcbur olub.

3. 29 Sentyabr 2020Tofiq Zülfüqarov: "Kiminsə gəlməyinə ehtiyac yoxdur", Azərbaycanın keçmiş Xarici İşlər naziri Tofiq Zülfüqarov Suriyadan döyüşçülərin gəlməsi iddiaları barədə şərh verib.

   Azərbaycanın keçmiş Xarici İşlər naziri Tofiq Zülfüqarov BBC News Azərbaycancaya deyib ki, Azərbaycana "kiminsə gəlməyinə ehtiyac yoxdur".

   "Bu bizə lazım deyil. Ermənilər gah türklərin döyüşlərdə iştirakını uydururlar, gah da başqa şeyləri. Suriyadan döyüşçülərin gəlməsi hərbi cəhətdən mənasız bir şeydir. Azərbaycan cəmiyyət olaraq qərarara gəlib ki, danışıqlar bir nəticə vermir və biz istənilən üsuldan istifadə edib torpaqlarımızı azaq etməliyik".

4. 29 Sentyabr 2020Bakıda Mərkəzi Qan Bankı binası qarşısında növbə

   Bu görüntülər Bakının mərkəzi Qan Bankının qarşısında çəkilib.

   Görüntülərdəki şəxslər Qan Bankının qarşısına cəbhəyə dəstək məqsədilə qan vermək üçün toplaşıblar.

   Azərbaycanla Ermənistan arasında bazar günü başlayan döyüşlər üç gündür ki, davam edir.

   Hər iki tərəf hərbi və mülki itkilərin olduğunu bildirir.

   Azərbaycan Müdafiə Nazirliyi yaralanan və ya həlak olan hərbçilərlə bağlı açıqlama verməyib.

   Bu gün Azərbaycan Xarici İşlər Nazirliyinin və Baş Prokurorluğun keçirilmiş birgə brifinqində XİN sözçüsü Leyla Abdullayeva indiyədək 10 mülki şəxsin öldüyünü, 30 nəfərin isə xəsarət aldığını bildirib.

5. 29 Sentyabr 2020Suriyadan muzdlu döyüşçü gətirilməsi iddiaları "tamamilə yalandır" - Hikmət Hacıyev

   

   Şəklin mənbəyi, Azertag

   Azərbaycan tərəfindən cəbhədəki döyüşlərə Suriyadan döyüşçülər gətirilməsi iddiası "tamamilə yalandır".

   Bunu Prezident Administrasiyasının xarici əlaqələr şöbəsinin müdiri, Prezidentin köməkçisi Hikmət Hacıyev deyib.

   Hikmət Hacıyev BBC News Azərbaycancaya açıqlamasında yayılmış məlumatları “saxta və əsassız" adlandırıb.

   Bazar ertəsi günü Reuters agentliyi “Türkiyənin nəzarəti altındakı Suriyanın şimal bölgələrindəki Türkiyənin dəstəklədiyi üsyançı qruplardan olan iki döyüşçü”yə istinadən təxminən 1000 nəfərin “Ankara ilə koordinasiyalı olaraq Azərbaycana yerləşməsindən” yazıb.

   Agentlik məlumatı Azərbaycana gələn döyüşçülərdən aldığını bildirib, lakin “məsələnin həssaslığı səbəbindən onların adlarının demədiklərini” bildirib.

   Oxşar iddiaları Ermənistanın Rusiyadakı səfiri də səsləndirmişdi.

6. 29 Sentyabr 2020Sülh "yalnız konkret təkliflərdən sonra mümkün olacaq", Azərbaycanın keçmiş Xarici İşlər naziri Tofiq Zülfüqarov BBC-ə müsahibə verib

   

   Azərbaycanın keçmiş Xarici İşlər naziri Tofiq Zülfüqarov BBC News Azərbaycancaya deyib ki, danışıqların və atəşkəs rejiminin bərpası yalnız "konkret təkliflərdən sonra mümkün olacaq".

   "Əslində problemlər danışıqlar yolu ilə həll olunacaqdı, amma ermənilər artıq o danışıqları o vəziyyətə gətirib çıxarıblar ki, danışıqlara inanan yoxdur. Azərbaycan Prezidenti deyib ki, biz danışıqları məhz qrafik şəklində qurulmuş sənədin üzərində qəbul edirik.

   90-cı illərdə ATƏT-in Minsk Qrupu bu danışıqlara başlayanda - Şuşanın və Laçının işğalından sonra qrafik şəklində təkliflər verirdi ki, bu və ya digər gündə işğalçı qüvvələr bu və ya digər ərazilərdən çıxmalıdır, buna bu qədər müddət lazımdır. Çox konkret və sadə sənəd idi. Amma ermənilər bu üslubdan qaçıb, danışıqları demək olar ki, imitasiya şəklinə gətirib çıxarıblar".

   Cənab Zülfüqarov söyləyir ki, Azərbaycanı sülhə çağıran vasitəçilər "öz işini yetərincə icra etmirlər".

   O deyir ki, "humanitar faciəyə son qoyulmalıdır.

7. 29 Sentyabr 2020İlham Əliyev həlak olmuş və yaralı mülki şəxslərin sayını deyib

   

   Şəklin mənbəyi, President.az

   "Bu ana kimi Ermənistan silahlı qüvvələri tərəfindən 10 mülki şəxs, o cümlədən aralarında iki uşaq olan 5 nəfərdən ibarət bir ailə öldürülüb. Mülki şəxslər arasında 20-dən çox yaralı var".

   Prezident İlham Əliyev bunu Pakistan İslam Respublikasının Azərbaycanda yeni təyin olunmuş fövqəladə və səlahiyyətli səfiri Bilal Hayenin etimadnaməsini qəbul edərkən deyib, APA xəbər verir.

8. 29 Sentyabr 2020Xankəndində sakinlərin təxliyəsi başlayıb - media yazır

   

   Şəklin mənbəyi, Getty Images

   Xankəndində (Stepanakert) sakinlərin kortəbii təxliyəsi başlayıb. Bu barədə Rusiyanın İzvestiya qəzeti xəbər verir. Nəşrin müxbirinə əsasən, insanlar kütləvi şəkildə Yerevana göndərilir.

   “Onları eləcə birbaşa göndərirlər, orada nə qohumlarını tanıyırlar, nə heç bir şey bilmirlər. Amma deyirlər ki, onları orada mütləq qarşılayacaqlar. Yerevan hakimiyyəti təşkil edir. Könüllü olaraq avtobuslarla yola salırlar. Polis yol gedənləri dayandırır və onlar bu ailələri pulsuz öz yanlarına alaraq Yerevana aparırlar”,- müxbir bildirib.

9. 29 Sentyabr 2020"Füzuli rayonunun Aşağı Veysəlli kəndi istiqamətində basqının qarşısı alınıb", Müdafiə Nazirliyinin sözçüsü polkovnik Vaqif Dərgahlı deyib.

   Müdafiə Nazirliyi məlumat yayıb ki, Ermənistan ordusu Füzuli rayonunun işğal altında olan Aşağı Veysəlli kəndi istiqamətindən üzbəüz Azərbaycan mövqelərinə basqın etməyə cəhd göstərib, bu "hərəkətin qarşısı bölmələrimiz tərəfindən qətiyyətlə alınıb və düşmən geri çəkilməyə məcbur edilib."

   Nazirlik geri çəkilərkən qarşı tərəfin əsgərlərinin meyitlərinin döyüş meydanında qaldığını bildirib.

   Vaqif Dərgahlı həmçinin bildirib ki, "Xocavənd rayonunun Hadrut yaşayış məntəqəsi istiqamətində yerləşən Ermənistan ordusunun 1-ci alayının, 3-cü taborunun komanda-müşahidə məntəqəsi dəqiq atəşlə darmadağın edilib."

10. 29 Sentyabr 2020Prezidentin köməkçisi: "Azərbaycan TOS-1A, smerç və qadağan olunmuş silahlardan istifadə etmir"

    

    Prezident Administrasiyasının xarici əlaqələr şöbəsinin müdiri Hikmət Hacıyev BBC News Azərbaycancaya deyib ki, Ermənistan Azərbaycana qarşı arsenallarında olan TOS-1A, smerç və beynəlxalq konvensiyalarla qadağan olunmuş digər silahlardan da istifadə edir.

    O, Azərbaycanın bu cür silahlardan istifadə etmədiyini bildirib.

    “Ermənistanın dediyi yalandır, öz məsuliyyətlərini gizlətmək üçün edirlər. Onlar bu cür silahlardan istifadə edirlər”, - cənab Hacıyev söyləyib.

11. 29 Sentyabr 2020Ermənistan MN: “Azərbaycan TOS, Smerç və digər iriçaplı silahlardan istifadə edir”

    “TOS, Smerç və digər iriçaplı sistemlərin istifadəsi hərbi əməliyyatların fəlsəfəsini və miqyasını dəyişdirərək yeni səviyyəyə qaldırır”, Ermənistan Müdafiə Nazirliyinin mətbuat katibi Şuşan Stepanyan twitterdə yazıb.

    O, həmçinin “Azərbaycan tərəfinin səhər tezdən genişmiqyaslı hücum əməliyyatlarını davam etdirdiyini” qeyd edib.

    Qurum rəsmisi “TOS-1A adlı silahın istifadəsi nəticəsində ağır yanğınsöndürənlərin işə cəlb edildiyini” bildirib.

    Paylaşımını ötürün X

    X məzmununa icazə varmı?

    Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Qəbul edin və davam edin

    Xəbərdarlıq : BBC kənar saytların məzmununa görə cavabdeh deyil.

    Paylaşımın sonu X

12. 29 Sentyabr 2020Azərbaycan MN: “Düşmənin “Uraqan” yaylım atəş sistemi məhv edilib”

    “Düşmənin “Uraqan” yaylım atəş sistemi məhv edilib”, Azərbaycan Müdafiə nazirliyi bildirib.

    "Bölmələrimiz bir neçə dəqiqə əvvəl Xocavənd (Martuni) rayonu istiqamətindəki Ermənistan silahlı qüvvələri bölmələrinin “Uraqan” yaylım atəş sistemini məhv edib", qurumun açıqlamasında deyilir.

13. 29 Sentyabr 2020Tərtərin Qapanlı kəndində İTV-nin avtomobili atəşə tutulub

    

    Şəklin mənbəyi, İctimai TV

    Tərtər rayonunun Qapanlı kəndində İctimai Televiziya və Radio Yayımları Şirkətinin (İTV) avtomobili atəşə tutulub.

    Bu barədə şirkət öz Facebook səhifəsindən məlumat paylaşıb.

    İTV avtomobilin yandığını, bir müddət sonra görüntüləri paylaşacağını bildirib.

14. 29 Sentyabr 2020Bakı küçələri Azərbaycan və Türkiyə bayraqlarına bürünüb

    Cəbhədə davam edən döyüşlər fonunda Bakı küçələri Azərbaycan və Türkiyə bayraqlarına bürünüb. Mağaza və iş yerlərinə Azərbaycan və Türkiyə bayrağı asmaqla insanlar Azərbaycan Ordusuna, eləcə də dəstəyi üçün Türkiyəyə təşəkkürlərini ifadə edirlər.

    Paylaşımını ötürün YouTube

    Google YouTube məzmununa icazə varmı?

    Bu məqalədə Google YouTube məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl Google YouTube kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".

    Qəbul edin və davam edin

    Xəbərdarlıq : BBC kənar saytların məzmununa görə cavabdeh deyil. YouTube məzmununda reklam ola bilər.

    Paylaşımın sonu YouTube

15. 29 Sentyabr 2020Ermənistan XİN Daşkəsənin raket atəşinə tutulmasına dair ittihamları “qətiyyətlə təkzib edir”.

    

    Şəklin mənbəyi, Ermənistan Xarici İşlər Nazirliyi

    Ermənistan Xarici İşlər Nazirliyi Azərbaycan Müdafiə Nazirliyinin Ermənistan Respublikası Vardenis rayonundan Azərbaycanın Daşkəsən rayonunun raket atəşinə tutulmasına dair ittihamları “qətiyyətlə təkzib edir”, Ermənistan XİN bildirib.

    “Bu dezinformasiya ağ yalandır və məqsədi döyüş əməliyyatları coğrafiyasını daha da genişləndirmək, həmçinin, Ermənistan Respublikasına qarşı təcavüz etmək üçün zəmin yaratmaqdır“, - qurumun bəyanatında deyilir.

    Ermənistan XİN-i Azərbaycanın “regionda sülh və təhlükəsizliyini sabitsizləşdirmək cəhdlərini” pisləyir və bunun "nəticələrinə görə məsuliyyətin Azərbaycanın hərbi-siyasi rəhbərliyinin üzərinə düşdüyünü" bildirir.

    Bu arada, Müdafiə Nazirliyinin nümayəndəsi Artsrun Hovhannisyan Azərbaycan PUA-sı zərbəsindən bir mülki avtobusun yandığını bildirib.

16. 29 Sentyabr 2020Ermənistan Müdafiə Nazirliyi: "Düşmənin canlı qüvvə və texnikasına böyük zərər vurulub"

    Ermənistan Müdafiə Nazirliyinin məlumatına görə, çərşənbə axşamı günü səhər saatlarında “topçu hazırlığı ilə müşayiət olunaraq müxtəlif intensivlikdə döyüşlər davam edir”.

    “Bir neçə istiqamətdə erməni hərbi bölmələri Azərbaycan Silahlı Qüvvələrinin hücumlarını dəf edib, müəyyən sahələrdə cəzalandırma tədbirləri görüb, düşmənin canlı qüvvə və texnikasına böyük zərər vurublar”, qurumun mətbuat katibi Şuşan Stepanyan öz Facebook səhifəsində yazıb.

    Cənub istiqamətində “düşmənin zirehli texnika qrupu məhv edilib”, qurumun məlumatında deyilir.

17. 29 Sentyabr 2020Azərbaycan Müdafiə Nazirliyi F-16 qırıcıları ilə bağlı iddiaları yalanlayıb

    

    Şəklin mənbəyi, Reuters

    “Hərbi Hava Qüvvələrimizin aviasiya vasitələrinin tərkibində F-16 qırıcıları mövcud deyil”, Müdafiə Nazirliyinin mətbuat xidmətinin rəhbəri Vaqif Dərgahlı çərşənbə axşaı günü açıqlayıb.

    "Ermənistan tərəfinin guya Hərbi Hava Qüvvələrimizə məxsus F-16 qırıcısının vurulması barədə yaydığı məlumat yalandır və təxribat xarakteri daşıyır", - qurum sözçüsü bəyan edib. Cənab Dərgahlı "Hərbi Hava Qüvvələrinin arsenalında F-16 tipli qırıcı təyyarələr mövcud olmadığı üçün, erməni tərəfinə xatırladırıq ki, olmayanı məhv etmək mümkün deyil" deyib.

18. 29 Sentyabr 2020Müdafiə Nazirliyi: "Daşkəsən artilleriya atəşinə tutulub"

    Sentyabrın 29-da səhər saat 07:30-dan etibarən Ermənistanın Vardenis rayonu ərazisindən Azərbaycanın Daşkəsən rayonunun ərazisi artilleriya atəşinə tutulur, Azərbaycan Müdafiə Nazirliyinin mətbuat xidmətindən bildiriblər.

    Qurum bəyan edib ki, "Azərbaycan Ordusu tərəfindən adekvat tədbirlər görüləcək".

19. 29 Sentyabr 2020Müdafiə Nazirliyi: "Füzuli şəhərinin azad olunması uğrunda hücum davam edir"

    

    Şəklin mənbəyi, Azərbaycan Müdafiə Nazirliyi

    "Füzuli şəhərinin işğaldan azad olunması uğrunda Azərbaycan Ordusunun hücumu davam edir", Azərbaycan Müdafiə Nazirliyi bəyan edib. Qurum bildirib ki, Füzulinin işğaldan azad olunması uğrunda döyüşlər çərşənbə axşamı günü səhər saatlarından başlayıb.

    Məlumatda həmçinin "cəbhənin Füzuli-Cəbrayıl istiqamətində Ermənistan qoşunlarının daha 4 tankının... məhv edildiyi" bildirilir.

    Hazırda döyüşlər davam edir, qurum açıqlayıb.

    Gecə ərzində "gərgin döyüşlər" davam edib

    Sentyabrın 28-dən 29-na keçən gecə bütün cəbhə boyu gərgin döyüşlər davam edib, Azərbaycan bildirib.

    Ermənistan silahlı qüvvələri cəbhənin Füzuli-Cəbrayıl və Ağdərə-Tərtər istiqamətlərində itirdikləri mövqeləri geri qaytarmaq üçün bir neçə dəfə əks-hücum cəhdi göstərib və bu cəhdlərin qarşısı dərhal alınıb, Müdafiə Nazirliyi açıqlayıb.

20. 29 Sentyabr 2020Britaniya "regionda gərginliyin azaldılmasına çağırıb"

    Britaniyanın Baş naziri Boris Johnson və Türkiyə Prezidenti Recep Tayyip Erdoğan bazar ertəsi günü axşamı telefon söhbətində Dağlıq Qarabağda Ermənistan və Azərbaycan arasında münaqişənin son vəziyyətindən danışıblar.

    Britaniya regionda təcili olaraq gərginliyin azaldılmasına çağırıb, Baş nazirin ofisi məlumat yayıb