'US weerara raawwatteef deebii argachuu qabdi - Pirezidantii Iraan

Haguuggii Tamsaasa Kallattii

1. 16 Waxabajjii 2025Gaaffiin ijoo Iraan Yuuraaniyeemii baay'ee badhaadhina eessa jira kan jedhuudha - hogganaa olaanaa IAEA duraanii

   Ittaanaan daareektara -olaanaa Dhaabbata To'ataa Anniisaa Atoomawaa Idil-Addunyaa (IAEA) duraanii, haleellaa Israa’el raawwataa jirtu hordofee sagantaa nikulaaraa Iraan keessatti dhimmoonni eessa akka dhaabbatan sirriitti hin beeknu jedhu.

   Olli Heinonen, Israa’el dandeettii nikularaa Teehraan irratti miidhaa guddaa geessisuu hin oolu jedhan. Dhaabbatichi Naataanz keessa jiru "deebiisuudhaaf yoo xiqqaate waggoota fudhata" jechuun sagantaa Raadiyoo 4'n Today'tti himan.

   "[Warshaan Fordow]s akkasuma natti fakkaata. Haleellaa raawwatameen booda haala baayyee hamaa keessa jira."

   Haata'u malee, gaaffiin ijoo ammallee jira, Iraan kuusaa Yuuraaniyeemii baay'ee badhaadhan kan ''kiiloo giraama 400 ol'' eessatti kuuftee kan jedhuudha jedhan Heinoonan.

   "Iddoo dhoksaa, baayyee ta'uu kan hin barbaachiifne, yoo qabaatan... akkasumas IAEA osoo hin argamin dhoksaan [yuuraaniyeemii] sadarkaa meeshaa waraanaatti badhaadhessuu yoo danda'an, sana booda rakkoo guddaa harka keenyarra jirra."

2. 16 Waxabajjii 2025Tamsaasa kallattii keenya kaleessaa argachuuf

   Israa'eliifi Iraan guyyaa Jimaataa darbe irraa kaasee haleellaan walirratti raawwatan dabalaa dhufeera.

   Tamsaasa kallattii keenya kaleessaa argachuuf asiin seenaa.

   Nagaan oolaa!

3. 16 Waxabajjii 2025Iraan fi Israa'el maaliif akkanaan diina waliif ta'an?

   Iraan keessatti hanga Waraaqsi Islaamaa kan sirna isaa Israa’eliin mormuu qaama ilaalcha siyaasaa taasifate bara 1979tti aangoo qabatuutti, biyyoonni lamaan waliif michuu turan.

   Iraan mirga jiraachuu Israa’eliif beekkamtii hin kennitu, sirumaayyu akka baddu barbaaddi.

   Dursaa olaanaan biyyattii, Ayaatolaah Alii Kaameenii kana dura Israa’eliin ‘‘xannacha kaansarii shakkii tokko malee buqqiifamuufi barbadaa’uu qabdudha’’ jedhanii ture.

   Biyyoota lamaan maaltu walitti buuse?

4. 16 Waxabajjii 2025Haleellaa Iraaniin booda ifti samii Israa'el irratti mul'ate

   Iraan erga ajajoonni dabalataa Israa'eliin halkan darbe jalaa ajjeeffamanii booda akka haaraatti Israa'el irratti haleellaa eegalte.

   Viidiyoon asiin gadi kun haleellaa Iraan Israa'el irratti raawwatteen booda samii Israa'el irratti waan mul'atu agarsiisa.

   Daawwadhaa!

5. 16 Waxabajjii 2025Israa'el fi Iraan gidduu wanti haaraa jiru maali?

   Waan adeemaa jiru isin bira gahuuf:

   • Iraan hoomaa misaa'elaa Israa'el irratti dhukaasteetti
   • Yoo xiqqaate giddugala Israa'el keessatti namoonni afur ajjeefamaniiru, namoonni kurna hedduu ta'an immoo miidhamanii hospitaala geeffaman.
   • Magaalota Israa'el ijoo keessatti, Tel Aviiv fi magaalaa buufata doonii Haayifaa keessa dabalatee, dho'insi gurguddaa dhagahameera. Asittis namoonni 30 ta'an miidhamaniiru.
   • Haleellaan Iraan kan dhagahame erga Israa'el bakkeewwan buufata misaa'elaa Iraan irratti erga haleellaa raawwatte boodadha. Haleellaa kanaanis, ajajaan tikaa waraana Iraan ajjeefamaniiru.
   • Erga biyyoota lamaan gidduu lolli Jimaata eegalee lammiileen Iraan 224 ta'an ajjeefamaniiru. Kanneen keessaa 90% lammiilee nagaa ta'uu ministeerri fayyaa Iraan kan ibse.

6. 16 Waxabajjii 2025Haleellaa Iraanin Israa’el keessa namoonni afur ajjeefaman

   Haleellaa Iraan giddugaleessa Israa’el keessatti eda galgala gaggeessiteen namoonni afur ajjeefamuu Tajaajilli Balaa Hatattamaa Israa’el beeksise.

   Jalqaba hammi namoota ajjeefamanii sadii ture, boodarra tokko dabaleera.

   Dubartoonni lamaafi namni tokko, hunduu umrii 70 keessa jiran ajjeefamuu dura ibsamee ture.

   Namoonni 74 biroo immoo miidhamaniiru.

7. 16 Waxabajjii 2025Ashamaa!

   Tamsaasni kallattii BBC Afaan Oromoo eegaleera.

   Israa'el fi Iraan gidduu lolli itti fufeera. Kanas kallattiin isin biraan geenya.

   Karaa Chaanaalii WhatsApp fi fuula Facebook keenya nu hordofaa.

   Tamsaasa kallattii kana dura ture asiin argattu.

   Lafa nagaa oolaa!

8. 15 Waxabajjii 2025Naayijeeriyaatti hanqina nyaataaf 'Waaqa kadhadhaa' jedhamuun falmii kaase

9. 15 Waxabajjii 2025Riifensa wiigiidhaan dhahachuun miidhaa akka qabaatu beektuu?

10. 13 Waxabajjii 2025''Mootummaan haleellaa diroonii ummata ofii irratti raawwatu hatattamaan haa dhaabu' kan jedhame dogoggoraani' - Amb. Maasiingaa