'US weerara raawwatteef deebii argachuu qabdi - Pirezidantii Iraan

Haguuggii Tamsaasa Kallattii

1. 22 Waxabajjii 2025Ministirri dhimma alaa Israa'el Tiraamp maqaansaa galmee seenaarratti warqeen barraa'e jedhan

   Ministirri dhimma alaa Israa'el, Geediyoon Saa'aar, haleellaa Ameerikaan dhaabbilee gabbisa nikulaara Iraan irratti raawwachuu hordofee, maqaan Tiraamp galmee seeraa irratti warqeen barraa'a jedhan.

   Aanga'aan kun barreeffama toora X isaanii irratti qoodaniin, pirezidanti Doonaald Tiraamp haleellaa kana raawwachuuf ''murtee ija jabiinaan guutame'' kana fudhachuusaaniitti leellisaniiru.

   Itti dabaluunis, Ministirri Mummee Israa'el Beenjaamiin Neetaaniyaahuun ''murtee seena qabeessa'' kana dursaniiru jedhan.

2. 22 Waxabajjii 2025Tiraamp fi aanga'oonni biraa haleellaa Iran irratti raawwatame kallattiin yoo hordofan suuraan

   Pirezdantiin Ameerikaa Doonaald Tiraamp fi aanga'oonni biroo haleellaan buufataalee nikulaara Iraan irratti yoo raawwatamu kallattiin hordofaa turan.

   Kana ilaalchisee suraaleen qoodaman akka mul'isanitti, eddoowwan gabbiisa nikulaaraa Iraan sadii boombiin kan haleellaman yoo ta'u, isaan keessaa tokko bakka icciitii gabbisa nikulaaraa kan jedhamu Foordoon keessatti argama.

   Garuu hangi miidhaa eddoowwan kanneen irra qaqqabee ilaalchisee kan jedhame hin jiru.

3. 22 Waxabajjii 2025Amma nu gahe, Iraan iddoowwan gabbisa nikulaaraashee sadi haleellamuu mirkanneessite

   Aanga'oonni Iraan haleellaan boombii buufataalee gabbiisa nikulaara biyyattii sadii irratti raawwatamu mirkanneessan.

   Mirkaneeffannaa jalqabaa haleellaa boombii buufata gabbisa nikulaaraa Iraan Foordoo jedhamuun beekamurratti raawwatamuu qondaala Iraanitu kenne.

   Dubbi himaan Bulchiinsa Rakkoo Bulchiinsa Qoom, Mortezaa Heydaarii, ''kutaan naannoo iddoo nikularaa Foordoo haleellaa qilleensaa jala gale'' jechuusaanii dhaabbanni oduu mootummaa Iraan Tasnim gabaaseera.

   Akkasumas boodarra ammoo buufataalee gabbiisa nikulaara biyyattii Naataanz fi Isfaahaanis haleellamuun mirkanaa'eera.

   Itti aanaan bulchaa nageenyaa Isfaahaan, Akbaar Saalehi: "Dhohinsi hedduun Nataanz fi Isfaahaan keessaa dhaga'ameera, naannawa iddoowwan nikularaa Isfaahaan fi Naataanz irratti haleellaan raawwatamu argarreera."

   Iddoowwan haleellaa sadan duraan Tiraamp barreeffama isaanii keessatti eere amma qondaaltota Iraaniin mirkaneessaniiru.

4. 22 Waxabajjii 2025US sagantaa nikularaa Iraan 'laamshessuu' dandeessi ta'a jedhan ogeessi

   Faawundeeshinii Ittisa Dimokiraasii keessatti daayreektarri olaanaa Sagantaa Iraan kan ta'an Behnaam Been Taaleblu, chaanaalii BBC News waliin haasa'aa turaniiru.

   Haleellaan Ameerikaa yoo milkaa'ee sagantaa nikularaa Iraan ''beekamaa kan laamshessuu'' akka ta'e ragaaleen akka jiran dubbataniiru.

   Taalebluun, Hogganaan Olaanaa Iraan Ayaatolaah Ali Kaameeniin haleellaa Ameerikaan raawwatte kana yoo akka ''haleellaa mataa muruu'' sirnicha irratti raawwatameetti fudhatan haaloo bahuu danda'a jedhan.

   "Boonuun, of tuuluun fi sadarkaan sirni Iraan barbaaduu" haalichaa caalaa kan hammeessuu ta'u danda'a jedhan.

5. 22 Waxabajjii 2025US iddoowwan nikulaaraa Iraan irratti haleellaa raawwachu Tiraamp himan

   Doonaald Tiraamp Ameerikaan iddoowwan gabbiisa nikulaaraa Iraan keessa jiran sadi irratti haleellaa raawwachuu beeksiisan.

   Iddoowwan kunneenis Foordoo, Naataanz fi Esfaahan kan jedhaman yoo ta'u, Ameerikaan haleellaa buufataalee kanneen irratti raawwattu xumurtee jirti jedhan.

   "Fordow, Naataanz fi Esfaahaan dabalatee iddoowwan gabbiisa nikulaaraa sadan Iraan irratti haleellaa baayyee milkaa'aa ta'e xumurree jirra. Xiyyaaronni hundi amma naannoo qilleensa Iraaniin ala jiru," jechuun miidiyaa 'Truth Social' irratti barreessan.

   Tiraamp itti dabaluudhaan, ''boombiiwwan guutummaan fe'aman'' Foordao irratti kan darbatamee yoo ta'u, xiyyaaronni hundi ammoo gara UStti deebi'aa akka jiran himan.

6. 21 Waxabajjii 2025Viidiyoo yeroo dhohiinsii Iraan Ahvaaz keessatti mudatu waraabamee

   Viidiyoon miidiyaa hawaasaa irratti qoodame akka agarsiisutti dhohinsi Lixa Iraan magaalaa Ahvaaz jedhamtu keessatti mudateera.

   Aarri guddaan samiitti ol ka'ee gamoolee gurguddoo gubbaatti kan mul'atu yoo ta'u, miidiyaaleen biyya keessaa dhohinsi akka mudate gabaasaniiru.

   Waraanni Israa'el naannoo daangaa biyyattiin Iraaq waliin qooddattuu fi naannoo oomisha boba'aa Iraan guddaa ta'e kana keessatti "bu'uuraalee waraanaa" irratti oppareeshinii gaggeessaa akka jiru ibseera.

   Viidiyoon kun ogeeyyii BBC kan naannoo viidiyicha keessatti agarsiifame teessuma lafaatiin wal madaalchiisuun mirkanaa'eera.

7. 21 Waxabajjii 2025Shirri Iraan lammiilee Israa'el Qophros keessa jiran haleeluu fashalaa'e - Ministirri Dhimma Alaa Israa'el

   Miseensonni Korporeeshinii Eegdota Warraaqsa Islaamaa Iraan (IRGC) ''lammiilee Israa'el Qophros keessa jiran irratti haleellaa raawwachuuf yaalan'' jedhu ministirri dhimma alaa Israa'el.

   Gidiyoon Saar toora X irratti barreessa, aanga'oonni nageenyaa odola kanaa tajaajila nageenyaa Israa'el cinatti hojjechuun haleellaa kana "fashaleessaniiru".

   "Sirni yakkamtoota Iraan itti yaadee namoota nagaa Israa'el, Israa'el keessas ta'e biyya alaa irratti xiyyeeffatee hojjechaa jira," jedha.

   Israa'el ''balaa jiraachuu Iraan geessistu maqsuuf tarkaanfii fudhachuu itti fufti'' jechuun barreeffama kana xumura.

8. 21 Waxabajjii 2025Pirezidantiin Iraan biyyattiin sagantaa nikularaa hin dhaabdu jedhan

   Pirezidantiin Iraan Masuud Pezeshkiyaan biyyisaanii sochii nikularaa ishee hin dhaabdu, akkasumas mirga sagantaa nikularaa siiviilii hordofuuf qabdu hin dhiiftu jechuun dhaabbanni oduu ofiisaa biyyattii IRNA gabaaseera.

   Pezeshkiyaan bilbilaan Pirezidantii Faransaay Imaanu'eel Maakroon waliin taasisaniin, Iraan sochii nikularaa Iraan irratti amantaa uumuuf wabii kennuudhaaf qophii ta'uushee ibsuun, garuu sagantaa nikularaashee doorsisa ykn waraanaan fudhatamuu hin danda'u jechuun gabaafameera.

   Pezeshkiyaan haleellaa Israa'el itti fufee jiruuf deebiin biyyisaanii kennitu "caalaatti gaaga'ama" akka ta'u Maakroon akeekkachiisaniiru jechuun IRNA gabaaseera.

   Pezeshkian Iraan ''sochii nikularaa nagaa ilaalchisee amantaa uumuuf mariifi tumsaaf qophii ta'uushee ejensichi dabalee ibseera.

9. 21 Waxabajjii 2025Tarkiiin dhimma nikulaaraa furuuf karaa tokkichi mariin Ameerikaa fi Iraan akka ta'u gaafatteetti

   Pirezdaantiin Tarkiyaan Raajep Xaayib Erdogaan, waldhabdee Israa'el waliin uumamee fi waldhabdee sagantaa nikulaaraashee irratti uumame furuudhaaf karaa tokkicha, US waliin marii nikulaaraa deebi'anii jalqabuu qofa akka ta'e ministira dhimma alaa Iraanitti himuu dhaabbanni oduu Rooyitars.

   Erdogaan har'a Istaanbulitti Abbaas Araaqchii waliin kan wal argan yoo ta'u, Tarkiin marii nikularaa Iraan fi US gidduutti taasifamaa jiru deebi'ee akka eegaluuf gargaaruuf gahee haala mijeessituu taphachuuf qophii ta'uu dubbataniiru.

   Pirezidantiin Tarkii Israa'el marii nikularaa Ameerikaa waliin taasiftu dura Iraan irratti haleellaa raawwachuuf murteessite gocha dabaa ta'uu ibsaniiru.

10. 21 Waxabajjii 2025Hidhattoonni Yaman kanneen Iraaniin deeggaraman US akeekkachiisan-gabaasa

    Gareen hidhattootaa Yaman keessatti Iraaniin deeggaraman Huutiin yoo Ameerikaan kan haleellaa Iraan irratti raawwatamu keessatti kan hirmaattu ta'e, dooniiwwan Ameerikaa Galaanaa Diimaa keessatti akka haleelan akeekkachiisuusaanii maddi oduu AFP gabaase.

    Kanaan dura Ameerikaafii gareen kun baatii Caamsaa keessa dooniiwwan Galaana Diimaa keessa qaxxaamuran irratti akka hin xiyyeeffanneef dhukaasa dhaabuuf walii galunsaanii ni yaadatama.

    Gareen Huutii kanaan dura dooniiwwan irratti haleellaa kan raaawwataa ture Filisxeemoota Gaazaa keessaa waliin dhaabbachusaa mirkanneessuuf ta'u hime.

    Kanaaf deebii kennuuf ammoo pirezidantii duraanii Ameerikaa Joo Baayidan Huutii irratti haleellaa raawwachuu kan eegalan yoo ta'u, kunis bara bulchiinsa Tiraampiitti itti cimee ture.

11. 21 Waxabajjii 2025Biraazil keessatti balaa baaloonii qilleensa ho'aatiin mudateen yoo xiqqaate namoonni saddeet du'an

    Sambata ganama magaalaa Piraayaa Giraande jedhamu keessatti baalooniin namoonni 21 qabattee turte dhohuun yoo xinnaate namoonni saddeeti du'u bulchaan naannichaa beeksiisan.

    Bulchaan Saantaa Kaataarinaa, Jorginho Meeloon barreeffama toora X irratti qoodaniin kan balaa kana ibsan.

    Gareen lubbuu baraarsitootaa bakka balaan kun itti mudateetti argamuun namoota lubbuun hafan barbaadaa turan. Boodarra Meelloon namoonni 13 lubbuun hafanii saddeet ammoo du'usaanii beeksiisan.

    Itti dabaluunis, ''Hundi keenya balaa kanaan rifanneerra,'' jedhan.

    "Gareen keenyas maatii fi miidhamtootaaf deeggarsa barbaachisu hunda gochuu itti fufaniiru." Nutis "haala jiru hordofuu itti fufneera," jedhan.

    Piraayaa Girandeen kibba Saantaa Caataarina keessatti kan argamtu yoo ta'u, bakka hawwata turistii beekamaadha. Naannoo ishee keessatti gaarreen 11 waan qabduuf "Magaalaa guddoo Kaaniyoons" jedhamuun beekamt.

12. 21 Waxabajjii 2025Amma nu gahe, Israa'el saayintistii biraa Iraan jalaa ajjeeste

    Erga walitti bu'iinsi eegalee as Israa'el saayintistii Iraan kurnaffaa ajjeesuu Iraan amante.

    Miidiyaalen Iraan akka gabaasanitti, haleellaa Israa'el gaggeessiteen saayintistiin Tabatabei Gomsheeh jedhamu ajjeefamee jira.

    Saayintistiin kun du'uunsaa jalqaba kan gabaafame barruu Yuunivarsiitii Tehraan Shaarifiin yoo ta'u, boodarra miidiyaalen biyyattii gurguddoon mirkaneessan.

    Miifiyaalen Iraan akka jedhanitti saayintistiin kun haadha warraasaa Mansuraah Hajisalaam jedhamtu wajjj ajjeefame.

    Iraan duraan saatintistoonni nikularaa sagal jalaa ajjeefamuu mirkaneessitee turte. Saayintistiin kurnaffaan ammoo du'uunsaa har'a dhagahame.

    Miidiyaan Israa'el Channel 12 akka gabaasetti, saayintistoonni nikularaa Iraan 9 guyyaa jalqaba Israa'el haleellaa gaggeessite yoo ajjeefaman, Tabatabei Gomsheeh ammoo ergasii ajjeefame.

13. 21 Waxabajjii 2025Amma nu gahe, Namtichi basaasaan shakkamee Qophrositti to'annoo jala oole - poolisii

    Poolisiin Qophros akka jedhutti, namni tokko yakka shororkeessummaan waliin walqabatuu fi basaasummaan shakkamee to'annoo jala ooleera.

    Shakkamaan kunis Samabata har'aa mana murtii aanaatti dhiyaachuun qorannoon itti fufee jiru hanga xumuramuutti guyyoota saddeetiif akka hidhamu ajajamun himame.

    Poolisiin sababa nageenya biyyaatiif jecha kana caalaa gadi fageenyaan dubbachuu akka hin barbaanne ibseera.

    Haata'u malee, Rooyitars miidiyaalee oduu Qophros hedduu wabeeffachuudhaan, shakkamaan kun magaalaa qarqara galaanaa Limaasol kan naannoo Zaakaakii jedhamutti to'annoo jala oolfamuusaa ibseera.

    Dhaabbanni oduu Qophros ANT1 akka gabaasetti, walakkeessa baatii Eblaa irraa eegalee buufata xiyyaaraa waraanaa Biriteen RAF Akrotiri akkasumas buufata qilleensaa Qophroosotaa 'Andreas Papandreou' kan naannoo lixa Paafoositti argamu irratti hordoffii gaggeessaa ture jedhamee amanama.

    Dhimma akanarratti odeeffannoo dabalataa akkuma arganneen isiniif fidna.

14. 21 Waxabajjii 2025Iraan gonkumaa meeshaa nikulaaraa qabaachu hin qabdu -Maakroon

    Pirezidantiin Faransaay Imaanu'eel Maakroon, Iraan gonkumaa meeshaa nikulaaraa qabaachuu hin qabdu jedhu erga pirezidantii Iraan waliin bilbilaaan dubbataniin booda.

    Maakroon kan gita isaanii Iraan, Maasuud Pezeshkiyaaan irraa bilbilli akka isaaniif bilbilame dubbatan irraa amma odeeffannoon kun kan argame.

    Maakroon, pirezidantichi sagantaa nikulaaaraa falmisiisaa ta'e isaanii irratti humnoota Awurooppaa fi Iraan gidduutti marii saffisiisuuf waliigaluu isaanii ibsaniiru.

    Pirezidantiin Faransaay, Imaanu'eel Maakroon barreeffaman toora X isaanii irratti baasaniin itti dabaluudhaan: "Ani gaafachaa jira: Iraan gonkumaa meeshaa nikulaaraa hidhachuu hin qabdu, akeekni ishee nagaaf ta'uu isaa mirkaneessuuf ragaa hunda kennuun gahee isaati."

    Xumura irrattis, "karaan waraana keessaa ba'amuu fi balaa guddaa irraa ittiin fagaachuu danda'u akka jiru nan amana" jechuun xumura.

    Kana galmaan ga'uuf ammoo, "marii Faransaayii fi michoota Awurooppaa Iraan waliin geggeeffamu ni saffisifna" jedhan.

15. 21 Waxabajjii 2025Iraan erga Israa'el haleellaa bantee as lammiilenshee 430 ajjeefamu himte

    Erga Israa'eli fi Iraan gidduutti walitti bu'iinsi eegalee Waxabajjii 13, 2025 eegalee as yoo xiqqaate namoonni 430 Iraan jalaa ajjeefamu maddi oduu biyyattii Nour jedhamu gabaase.

    Kanneen du'aniin alatti namoonni 3,500 ammoo madaa'uu misiteera fayyaa Iraan waabeffachuun maddi oduu kun gabaaseer.

    Dilbata darbe namoonni 224 du'uu ministeerri fayyaa Iraan beeksisee ture. Ergasii mootummaan Iraan lakkoofsa namoota du'aniifi miidhamanii guyyootaf osoo hin ibsin ture.

    Gama Israa'eliin lakkoosi namoota du'anii hanga ammaa 25 ta'uu ibsameera.

16. 21 Waxabajjii 2025Amma nu gahe, Israa'el qondaala olaanaa biraa humnoota Iraan ajjeesuu beeksifte

    Waraanni Israa'el qoqndaala olaanaa humnoota Iraan ajjeesuu beeksifte.

    Waraanni Israa'el, qondaala waraanaa olaanaa humnoota Iraan, Behnaam Shaahriyaari halkan darbe osoo inni konkolaataadhaan gara lixa Iraan keessa deemaa jiruu irratti xiyyeeffatachuun ajjeesuu hime.

    Qondaalli waraanaa Iraan kun damee waraana Iraan kan Humnoota Quds jedhamaniifi hidhattoota Iraan naannoo Baha Giddu Galaatti deeggartu to'atu keessatti itti gaafatamaa daddabarsa meeshaalee waraanaa ta'uun nama tajaajiluudha.

    Itti dabaluudhaanis, Gaazaatti Hamaas fi Libaanos keessatti garee Hezbolaa dabalatee, gareewwan bakka bu'oota guutuu naannichaaf misaa'elaa fi rookkeettii Iraan geejjibuuf itti gaafatamummaa akka ta'e himeera waraanni Israa'el.

17. 21 Waxabajjii 2025Amma nu gahe, Ameerikaan lola kanatti yoo hirmaatte 'baay'ee baay'ee balaa qaba'- ministirri dhimmaa alaa Iraan

    Ministirri Dhimma Alaa Iraan Abbaa Araaghchi, biyyi isaanii "osoo ummanni keenya haleellaa boombii jala jiruu US waliin marii keessa galuu hin dandeessu" jechuun gaazexeessitootatti himan.

    Itti dabaluunis, "US guyyaa tokko irraa eegalee weerara kana keessatti hirmaattee jirti" jedha, haata'u malee himannaa kanaaf ragaa hin dhiheessinel.

    Araaghchi bakka marii dippilomaasii itti fufuuf jiran Istaanbul keessatti gaazexeessitootatti wayita dubbataniitti, waldhabdee Israa'elii fi Iraan gidduutti deemaa jiru keessatti Ameerikaan hirmaachuun "baay'ee baay'ee balaa qaba" jechuun akeekkachiisaniiru.

    Akka yaadachiisaatti, pirezidantiin Ameerikaa Doonaald Traamp jalqaba torban kanaatti karoora Iraan haleelu raggaasisaniiru, garuu ammoo Iraan sagantaa nikilaaraa ishee dhiisuuf yoo waliigalte jechuun haleellaa irraa of qusatan.

    Ministirri dhimma alaa Iraan kun, ''karaa mariitiin sagantaa nikulaaraa keenyaaf furbaata barbaaduuf baayyee qophiidha'' jedhan.

    Bara 2015tti, Iraan sagantaa nikulaaraa ishee irratti garee biyyoota aanga'oota addunyaa waliin waliigaltee yeroo dheeraa taasiftee turte. Kunis kan taasifame erga biyyattiin meeshaa nikulaaraa hojjechuuf tattaaffii goote jedhamuun waggootaaf mudamni uumamee ture boodadha.

    Araaghchiin itti dabaluudhaan: "Dippilomaasiin kanaan dura ittiin hojjeteera, gara fuulduraattis deebi'ee hojjechuu danda'a. Gara dippilomaasiitti deebi'uuf haleellaan kun dhaabbachuu qaba."

18. 21 Waxabajjii 2025IDF haleellaan magaalaa Qoom keessatti raawwatame hojii basaasaa yeroo dheeraa hordofeeti jedhe

    Amma gabaasni keenya waa'ee ajjeechaa haar'aa kan waraanni Israa'el magaalaa kaaba bahaa Qoom keessatti ajajaa waraanaa olaanaa Iraan halkandarbe ajjeese jedhu irra deebiin mirkaneeffataa jirra.

    Raayyaan Ittisa Israa'el (IDF)n ibsa kenneen, yaalii odeeffannoo walitti qabuu yeroo dheeraa hordofuun xiyyaaronni waraanaa isaa ''bakka dhokataa wallakkaa Iraan keessa jiru,'' haleelluu himeera.

    Ibsichi itti dabaluudhaan, "Izaadiin qondaalaa ijoo hundeessitootaa fi guddiftoota karoora qabatamaan sirni Iraan Israa'el balleessuuf baasan keessaa tokko ture, kunis sa'aatii baniinsa Opireeshinii "Leenca Ka'aa jira" irratti ifa ta'eera jedhe.

    Ajjeeffamuun Izaadiin Iraan irraa ifatti wanti mirkanaa'e hin jiru.

19. 21 Waxabajjii 2025Tiraamp odeeffannoon gareen tikaasaa sagantaa nikulaara Iraan irratti qabu dogongora jedhan

    Daareektarri Odeeffannoo Biyyaaleessa Ameerikaa Iraan meeshaa waraanaa nikulaaraa ijaaraa jiraachuu irratti odeeffannoo homaatuu hin qabnu jechuun ilaalchisee gaaffiin kan dhiyaateef pirezidanti Tiraamp ''kun odeeffannoo dogongoraadha'' jechuun deebii kennan.

    Daareektarri Odeeffannoo Biyyaaleessaa Ameerikaa, Tuulsi Gaabaard, ji'a Bitooteessaa keessa koree Seenetitti Iraan meeshaa nikulaaraa ijaaraa akka hin jirre himaniiru.

    Pirezidantii Tiraamp kun dogoggora akka ta'e erga dubbatanii booda ammoo, Aadde Gabbaard jechashee jalaa jallisuu isaaniitiif miidiyaa komachuun amma Iraan torbanoota muraasa keessatti meeshaa nikularaa ijaaruu akka dandeessu akka amantu dubbatteettii.

    Pirezidaant Traamp garuu Iraan “kuusaa meeshaalee baay’ee guddaa” walitti qabdee jirtuuf torban muraasa keessatti ykn torbanootaan yoo ta’uu baate ji’oota keessatti meeshaa waraanaa qabaachuu akka dandeessu cimsanii dubbatan, US immoo akkas ta’u hayyamuu hin dandeessu jedhan.

    Tiraamp daareektarri odeeffannoo biyyaaleessaa sagantaa nikulaaraa Iraan irratti odeeffannoo akka hin qabne ilaalchiisuun wayita gaafatamaniitti, ''kana yoo ta'e hawaasni tikaa dogongoreera. Hawaasa tikaa keessaa eenyutuu akkasi jedhe?'' jechuun deebiisanii gaafatan.

    Gaazexessichis kana kan jedhe Daareektara Odeeffannoo Biyyaaleessaa Tuulsii Gaabaard ta'u itti himnaan, ''dogongorteetti'' jechuun deebiisan Tiraamp.

    Iraan buufataaleen gabbisa nikulaaraashee kaayyoowwan siiviiliitti qofaa itti fayyadamaa akka jirtu irra deddeebiin ibsaa turte.

20. 21 Waxabajjii 2025Gorsaan Ayaatolaa Kameenii haleellaa Israa'eliin ajjeefame jedhamu lubbuun hafuun himame

    Guyyaa jalqaba Israa'el Iraanirratti haleellaa bante namoota ajjeefaman keessaa tokko qondaala siyaasaafi gorsaa olaanaa Ayaatolaa Kameenii kan ta'e Alii Shamkaaniiti jedhamee ture.

    Haata'u malee, miidiyaan biyyattii IRNA akka gabaasetti, gorsaa olaanan mootummaa biyyattii kun haleellaa Israa'el irraa lubbuun hafeera.

    Akka gabaasa miidiyaa Iraanitti, Alii Shamkaanii haleellaa irratti gaggeeffamerraa hospitaalatti yaalamaafi fayyaansaa haala tasgabbaa'aa irra jira.

    Miidiyaa hawaasaa X gubbaatti haleellaa irratti gaggeeffame irraa lubbuun oolee bayyanataa jiraachuu barreesse.

    "Madaa'ee lubbuun hafeera...Iraanif jecha si'a dhibba tokko ofan wareega," jedha barreeffamni gorsaan Ayaatolaa fuula X gubbaatti barreesse kun.