Россия ва Украина: Украиналикларнинг ярмидан кўпи Путиннинг фикрига қўшилмайди - NATO Rossiya Ukraina Qrim dunyo yangiliklar

Руслар ва украинлар битта халқми? Украиналиклар бу хусусда ўз сўзини айтди. Россия Президенти Владимир Путин эса "бизлар битта халқмиз", деганди.

"Рейтинг" омма фикрини ўрганиш маркази янги сўрови натижаларини эълон қилди.

Унга кўра, Украина аҳолисининг ярмидан кўпроғи ёки 55 фоизи ўзларини руслар билан битта халқ, деб билмайди.

Айни пайтда, 41 фоиз украиналикнинг бунга зид фикрда эканликлари маълум бўлган.

Сўровда мамлакатнинг ғарби ва шарқидагиларнинг фикрлари бир-биридан жиддий фарқ қилган.

Аммо, шу билан бирга, кўпчилик украианлар ўз мамлакатларини Киев Русининг вориси, деб билишларини айтишган.

"Рейтинг"нинг сўрови бутун Украина бўйлаб ўтказилган, одамларнинг фикрлари телефон суҳбати орқали ўрганилган.

Фақат Украинанинг расмий Киев назорати остида бўлмаган шарқий туманлари ва Россия томонидан аннексия қилинган Қрим ярим оролидагилар бу сўровдан четда қолишган.

Путиннинг севимли тезиси

13 июль куни Россия президенти Владимир Путиннинг "Руслар ва украинларнинг тарихий бирлиги тўғрисида", деб номланган мақоласи эълон қилинган.

Унда Россия президенти ўзининг севимли тезисларидан бири фойдасига рус, украин ва беларусь халқлари яхлит бир бутун экани, аммо Ғарб уларнинг тарихий бирлигини тиклашига доимо халақит беришга уринаётганига оид далилларни келтирган.

Путин ўз мақоласида, "Руслар, украинлар ва беларуслар - Европадаги энг йирик давлат бўлган Қадимги Русь давлатининг меросхўрлари экани"ни таъкидлаган.

Россия президенти шу йил июль ойидаги "Тўғридан-тўғри мулоқоти"чоғида ҳам худди шундай иддаоларини яна бир бор такрорлаган.

Бунинг ортидан Украина президенти Путин билан сиртдан тортишиб ҳам қолган.

Владимир Зеленский Россия президентининг бу масалага нуқта қўйишга чақираркан, ўзларининг "аниқ битта халқ эмасликлари"ни таъкидлаганди.

Агар, янги сўров натижаларига таянилса, Украина халқининг 55 фоизи бу хусусда ўз президенти билан якдил, 41 фоизи эса, унинг айни мазмундаги баёнотига қўшилишмайди.

Украина ва турфафикрлилик

Украинанинг шарқий минтақалари ва Москва Патриархатининг Украина православ черкови аъзолари назарда тутилганда, уларнинг 60 фоизи ўзларининг "руслар билан бир халқ" эканликларини айтишган.

Мамлакат ғарбида, аксинча, бу каби фикрда бўлганларнинг сони чорак фоизга ҳам етмаган, 70 фоиз одам эса, бунга бутунлай зид қарашда эканликлари маълум бўлган.

Украина марказидаги кўпчилик ҳам ўзларини руслар билан бир миллат, деб ҳисобламасликларини билдиришган - у ерда респондентларнинг 60 фоизи Путиннинг тезисига қарши чиқишган ва 36 фоизи Россия президентининг фикрига қўшилишган.

Украина жанубида эса, одамларнинг ярмидан кўпи бу фикрни ёқлаган, 40 фоизи унга қарши чиққан.

Аксарият украиналик ўзларини Киев Русининг тарихий вориси, деб ҳисоблашларини айтган бўлса, Россиянинг ўзида бу рақамлар 10 фоизга ҳам етмаган.

"Рейтинг"нинг сўрови шу йилнинг 23-25 июль кунлари ўтказилган.

Сўровда 2500 одам иштирок этган.

Туб аҳолиси масаласи

Шу ой бошида эса, Киев туб аҳоли тўғрисидаги қонунни қабул қилган.

Шахсан президент Владимир Зеленскийнинг ўзи муаллифи бўлган янги қонунга мувофиқ, руслар Украинанинг ерлик аҳолиси, деб тан олинмайди.

Бу қонун лойиҳасини Путин "русларга қарши оммавий қирғин қуроли деб атаган".

Олий Радада янги қонун лойиҳаси муҳокамаси узоққа чўзилмаган, овоз бериш натижаси ҳам қарсаклар билан олқишланган.

Расмий Киев эса, янги қонуннинг халқаро меъёрларга зид ҳеч бир жиҳати йўқлиги, унга тўлиқ мос келишини таъкидлаб келади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek