Шимолий Афғонистон: Толибонга қарши ўзбек аёллари қўлларига қурол олишди - Afg‘oniston dunyo yangiliklar

Қўлларига қурол олган ва ораларида оддий уй бекалари ҳам бўлган ўзбек аёллари агар ўз ҳужумларини тўхтатмаса, толибларга қарши жанг олиб боришга тайёр эканликларини айтишмоқда.

Марказий Осиёга бевосита чегарадош шимол ва шимол-шарқ ҳозир Афғонистоннинг толиблар ўз ҳужумларини шиддатлаштирган минтақалари бўлади.

Толибон сўнгги икки ҳафта ичида бу ерларда ўттиздан ортиқ туман назоратини қўлга киритган ва энди шаҳарларини ҳам босиб олиш пайига тушган.

Аммо шу вақт оралиғида афғон хотин-қизларининг қўлларига қурол олиб, мамлакат хавфсизлик кучларини дастаклаш ва толибларга қарши жанг олиб бориш истакларини ошкора намойиш этишгани кўрилмаганди.

Ўзбек аёлларининг Толибонга қарши қўлларига қурол олишгани акс этган фотосуратлар кеча, 23 июнь куни ижтимоий тармоқларда бўй кўрсатган.

Бунинг ортидан, бу суратлар Жаузжон вилояти ҳокимининг Facebook саҳифасида ҳам чоп қилингани кўрилган.

Минтақада бўлган мухбиримиз Ҳаёт Шайбоннинг айтишича, вилоят кенгаши раисининг ўринбосари ҳам ўзи билан суҳбатда бир гуруҳ шибирғонлик аёлларнинг қўлларига қурол олишганини расман тасдиқлаган.

Маълум бўлишича, бирдамлик акцияси Жаузжон вилояти Хотин-қизлар қўмитасининг йиғилиши ортидан бўй кўрсатган.

Афғонистон хавфсизлик кучларини қўллаб-қувватлашга бағишланган йиғин ниҳоясида ўнлаб аёл қўлларига рамзий маънода қурол олишган.

Улар ўз амаллари билан толибларга қарши ва мамлакат хавфсизлик кучлари билан бирдамликларини изҳор этишган.

Бу хотин-қизлар, "уруш ножоиз иш экани, лекин Толибон зўравонликлардан тийилмаса, одамларни ўлдираверса, ҳеч кимга раҳм-шафқат қилмаса, хавфсизлик кучлари билан бир сафда жанг қилишга тайёр эканликлари"ни ҳам баён қилишган.

"Қўлларидаги қуролни ишлатишни билишлари, буни ўрганганликлари"ни айтишган.

"Ўз Ватанларини ҳимоя қила олишлари учун ҳам буни билишлари кераклиги"ни таъкидлашган.

Мухбиримиз шибирғонлик бу аёлларнинг орасида давлат хизматчилари ва фаоллардан ташқари уй бекалари ҳам борлигини айтади.

Жаузжон Афғонистоннинг Туркманистонга бевосита чегарадош иккита вилоятидан биттаси бўлади.

Ўзбек аёлларининг бирдамлик акцияси ва лозим бўлса, қўлларига қурол олиб жанг қилишга оид баёноти, бошқа томондан, маҳаллий собиқ мужоҳиддин қўмондонлари қолиб, ҳатто, Афғонистон мудофаа вазирлиги ўзининг ҳам оддий халқни толибларга қарши сафарбар қилиш ҳаракатида бўлган бир пайтга тўғри келган.

Аммо бу жаузжонлик ўзбек аёлларининг қўлларига қурол олиб, жангариларга қарши жанг қилиш истагини илк бор изҳор қилишлари эмас.

Маҳаллий ўзбек аёллари 2017 йилда ҳам шундай ташаббус билан чиқишган.

Ўнлаб хотин-қизлар ўшанда Толибондан ташқари ИШИДга қарши жанг олиб бориш учун ҳам қўлларига қурол олишган.

Улар бу икки жангари гуруҳ ўзларига бундан бошқа танлов қолдирмаганини айтишган.

Толибон ва ИШИДнинг шафқатсизликларига ортиқ тоқат қилиш ниятлари йўқлигини билдиришган.

Би-би-си Ўзбек хизмати билан суҳбатида бу аёлларнинг "қўмондони" ўзларининг "ҳеч нарсадан қўрқмасликлари, эркаклардек уришишлари"ни айтишган.

Ўз аҳд ва қатъиятлари сабабини ўша пайтда "ўзларини ўзлари ҳимоя қилишдан бошқа чоралари қолмагани, акс-ҳолда бу жангарилар уларни ўлдиришлари" билан изоҳлашганди.

Жаузжон вилоят ҳокимлиги ўшанда мустақил, кўнгилли равишда жанг қилаётган ва қилмоқчи бўлаётган бу аёлларга кўмак бериш, уларни маҳаллий полиция сафларига жалб қилиш ниятида экани ҳам маълум бўлган.

Бунақаси президент Муҳаммад Ашраф Ғани илк бор қудратга келган 2014 йилдан буён Афғонистоннинг қолган бирор бир вилоятида кузатилмагани билан кўпчиликнинг диққат-эътиборини ўзига тортган, айрим йирик халқаро нашрлар нигоҳига ҳам тушганди.

Жаузжон Афғонистон шимолидаги энг қудратли ўзбек қўмондони сифатида кўрилувчи маршал Абдулрашид Дўстумнинг она вилояти бўлади.

Минтақадаги мухбиримизнинг айтишича, сўнгги икки ой ичида Толибон бу вилоятдаги деярли барча туманларни босиб олган.

Яқинда маршал Дўстумнинг ўзи ҳам толибларга қарши жангларга бошчилик қилгани кўрилганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek