Путин ва сиёсат: Россияда бугун одамлар қанчалар эркин? Rossiya Putin O‘zbekiston dunyo yangiliklar

Россияда янги сўров ўтказилди. Социологларга кўра, сўнгги етти йил ичида Россия жамиятида ўзини одам сифатида эркин ҳис қилмайдиганлар сони ортиб бормоқда.

Янги сўров "Левада" омма фикрини ўрганиш маркази томонидан олиб борилган.

Сўров шу йилнинг 20-26 май кунлари ўтказилган.

Респондентлардан "жамиятда ўзларини қанчалик эркин одам, деб ҳис қилишлари ёки йўқ"лиги ҳақида сўралган.

Сўровдан хулоса қилинишича, бугун россияликларнинг учдан бири ўзини эркин, деб ўйламайди.

64 фоизи эса, ўзини у ёки бу даражада эркин, деб ҳисоблайди.

Бу кўрсаткичдан ўзини эркин эканига амин бўлганларнинг фоизи эса, 25%ни ташкил этган.

11 фоиз одам "мутлақ эркин эмасман", деган тўхтамдалигини билдирган.

Яна чорак фоизчаси шунга яқин фикрни изҳор этган.

Социологларга кўра, сўнгги етти йил ичида Россияда бу каби негатив кўрсаткич ошиб бормоқда.

Ўзини эркин одам, деб ҳис қилаётганларнинг сони изчил равишда камаймоқда.

Эркини бўғилган, деб ҳисобловчилар ва саволларига аниқ жавоб беришга қийналаётганлар фоизи эса, тобора ортмоқда.

Агар, қиёс тариқа олинса, 2014 йили Россияда 69 фоиз одам ўзининг эркин эканини айтган.

2015 йилда бу кўрсаткич 66%ни ташкил этган.

2014, 2015 ва 2019 йилларда Россия жамиятида ўзини одам сифатида эркин ҳис қилмаётганлар фоизи 22% дан 31% га қадар кўтарилган.

Худди шу тариқа, жорий йилга келиб, Россияда бу каби салбий фикрда бўлганлар сони 13% га ортган.

Сўров жараёнида россияликлар учун қай бир ҳақ-ҳуқуқларининг муҳим экани ҳам ўрганилган.

Сўров иштирокчиларининг энг кўпи - ярмидан кўпроғи яшаш ва дахлсизлик ҳуқуқини кўрсатишган.

Яна шунча фоизга яқин одам тиббий ёрдам, иш ва яхши меҳнат шарт-шароитларини тилга олишган.

53 фоиз респондент меҳнатга яраша ҳақ тўланишини белгилаган.

Сўров иштирокчиларининг ярмидан сал кўпроғи эса, ижтимоий ҳимоя ва муносиб турмуш даражасига тўхталишган.

Социологларнинг таъкидлашларича, 2017 йилдан буён россияликлар ўзлари учун энг муҳим, деб билган бешта ҳақ-ҳуқуқлари ўзгаришсиз қолмоқда.

Фақат 2017 йилда улар одил судловни учинчи ўринга қўйишган, холос.

"Левада" омма фикрини ўрганиш маркази Россияда "чет эл жосуси вазифасини бажарувчи ташкилот"лар рўйхатига киритилган.

Россия аҳолисининг сони 144 миллиондан кўпроқни ташкил этади.

Уларнинг 10 миллиондан ошиқроғи яқин-яқингача чет эллик мигрантлар ҳисобига тўғри келган.

Энг катта сондаги ўзбекистонликлар ҳам айнан Россияда меҳнат муҳожирлигида банд бўлиб келишган.

Пандемиягача уларнинг сони расман 2 миллиондан ортиши айтилган.

Улар ортга юбориб келаётган миллиардлаб долларлик маблағлар, йилларки, Ўзбекистонда ижтимоий тангликни юмшатиб, мамлакат иқтисодини тутиб, юритиб келаётган энг муҳим молиявий манбалардан бири сифатида кўрилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek