Дунё: Мусулмонлар Америка ҳаво йўлларига қарши ва Путинни қувмоқчи бўлган шомон тақдири

Икки мусулмон АҚШдаги парвоз бекор қилингани устидан тергов талаб қилмоқдалар

Абдуррауф Алҳавалдеҳ ва Иссам Абдуллоҳ American Airlines ширкати устидан шикоят қилдилар.

Бунга улар ўтирган рейс бекор қилингани сабаб бўлган.

Ўзбекистон: Гулнора Каримова оддий жиноятчи - журналист

Ўзбекистон: "Буюк Келажак"нинг келажаги йўқми?

Афғонистон: Ўзбек қишлоғи устига ҳукумат тўртта бомба ташлаган

Мусулмонларнинг айтишларича, 14 сентябр куни Алабаманинг Бирмингем шаҳридан ўзлари туғилиб ўсган Техас штатидаги Далласга учадиган рейсга чипта олганлар ва самолётга чиқиб ўтирганлар.

Чиптани Абдуррауф ўзича, Иссам алоҳида сотиб олганлар.

Йўловчилар самолётга чиқиб ўтираётган вақтида улар бир-бирларини кўриб қолишган ва қўлларини кўтариб саломлашганлар.

Экипаж аъзолари парвоз кечикаётганини эълон қилганидан кейин Иссам Абдуллоҳ самолёт ҳожатхонасига кирган.

Қайтиб чиққанида ҳожатхона эшиги олдида ичкарида нима бўлаётганини англаш мақсадида тинглаб турган стюардессани кўрган.

Сўнг парвоз бекор қилингани ҳақида эълон берилган.

Икки мусулмонга фуқаро кийимидаги Федерал Тергов бюроси ходими ва униформадаги зобитлар яқинлашганлар ва аэропортнинг алоҳида хонасига олиб бориб сўроқ қилганлар.

Экипаж аъзолари икки мусулмонни ўзаро тил бириктиришда гумон қилганлари аниқ бўлган.

American Airlines баёнот эълон қилди, баёнотда айтилишича, "экипаж аъзоси ва йўловчи билдирган хавотир" парвозни бекор қилишга мажбурлаган.

"Америкадаги ва бошқа барча бизнинг минтақавий ҳамкорларимиз экипаж аъзолари ва йўловчиларнинг хавотирига жиддий қараш мажбуриятига эгамиз", дейилади American Airlines баёнотида.

Икки мусулмон эълон қилишича, авиа ширкат ўзларига ирқий ва диний ётқараш билан муносабатда бўлгани учун жавобгарликка тортилмоғи лозим.

Путинни қувмоқчи бўлган шомон руҳий шифохонада

Москвага Путинни Кремлдан қувиш учун йўл олган ёқутистонлик шомон Александр Габышев руҳий шифохонага юборилган.

Ёқутистон Соғлиқни сақлаш вазирлигига кўра, у ерда Габышев билан "мутахассислар шуғулланишади".

Ўзини "жангчи шомон" деб атаган Александр Габышев шу йил мартида Ёқутистондан Москвага йўл олган эди.

У Путинни "иблис" деб ҳисоблаши ва уни фақат шомонгина Кремлдан қувиб чиқариши мумкинлигини айтган.

Габышев олти ойда 3 минг километр йўл босган эди.

Йўлда унга тарафдорлар қўшилишган.

12 июн куни Габышев Читадаги норозилик намойишида чиқиш қилган, унинг нутқи ижтимоий тармоқларда тарқаган.

Ўз нутқида у халқ йиғинларини ташкил қилишни таклиф этган.

Унинг фикрича, ушбу йиғинлар қабул қиладиган қарор қонун кучига эга бўлади.

"Унутманг, Путин сизлар учун қонун эмас", - деган ёқутистонлик шомон.

Путин демократияга ишонмайди

Британияда собиқ бош вазир Девид Кэмероннинг мемуарлари нашр этилган.

Унда Кэмерон Россия президенти Путин ҳақидаги қарашлари билан ҳам ўртоқлашади.

Жумладан, у бир пайтлар Совет Иттифоқига қилган саёҳати ҳақида Путинга гапириб бераркан, Москва, Ленинград, Ялта, Киев сингари шаҳарлар номини тилга олганини эслайди.

Унинг хотирлашича, Путин Кэмероннинг сўзини бўлади ва "Ялта ва Киев энди менинг мамлакатимнинг бир қисми эмас", дейди.

"Мен Совет Иттифоқининг парчаланиши бу эски қарашдаги миллатчи учун қанчалик шахсий фожиага айланганини бир лаҳзага бўлса ҳам ҳис қилдим", деб ёзади Кэмерон.

Унинг қайд этишича, 2013 йил Сочидаги саммит чоғида Путин унга демократияга ишонмаслигини айтган.

"Ўйлайсанки, мен демократияга ишонмайман. Умуман олганда, сен унчалик ҳам адашаётганинг йўқ", дея Путиннинг сўзларини келтиради Британия собиқ бош вазири.

2008 йилдаги Россия-Гуржистон уруши ҳақида ёзаркан, Кэмерон "бу ноқонуний тажовуз ва ишғолнинг яққол намунаси эди", - дейди у.

Ўша пайт Британия матбуоти учун ёзган колонкасида "Бу эртага қаерда такрорланади? Украинадами ёки Марказий Осиёда? Ё Латвиядами?" дея савол қўйганини хотирлаган Кэмерон шундай хулоса қилади: "Сиёсатда башорат қилмаган маъқулроқ, дейилади. Аммо баъзан ўзинг англамаган ҳолда башорат қилиб қўяркансан".

Дунёнинг энг кекса одами ким?

Франция ва швейцариялик олимлар 1997 йилда ҳаётдан кўз юмган француз Жанна Калман ҳақиқатан ҳам қарийб 122 ярим ёшида вафот этгани ва дунёнинг энг узоқ умр кўрган одами бўлганини исботлашган.

Янги тадқиқотга россиялик олимларнинг яқинда қилган баёнотлари сабаб бўлган.

Шу йил февралида москвалик табиатшунослар жамиятидан Николай Зак Rejuvenation Research журналидаги мақоласида Жанна Калман 1934 йилда 54 ёшида вафот этганини иддао қилганди.

Зак ва мақола ҳаммуаллифларининг фикрича, олтмиш йилдан кўпроқ вақт мобайнида Жанна қиёфасида унинг қизи Ивонна яшаб юрган.

Гўёки у мерос учун солиқ тўлмаслик мақсадида онасининг ҳужжатлари билан умргузаронлик қилган.

Шундай қилиб, 1997 йилда Жанна Калман эмас, балки унинг қизи Ивонна 99 ёшида ҳаётдан кўз юмган, дея хулоса қилган россиялик олим.

Аммо Франция ва швейцариялик олимларнинг хулосасига кўра, россияликларнинг фикри "нотўғри фактларга асосланган фитна назарияси"дан бошқа нарса эмас.

Улар архив ҳужжатлари ва математик моделлар воситасида рус олимларининг давосини рад этганлар.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek