دلی میں 400 ہلاکتیں، پاکستانی پنجاب میں 78 ہزار افراد کو ویکسین لگائی گئی

لائیو کوریج

1. 29 اپريل 2021بریکنگ, پاکستان: وبا کے آغاز کے بعد سے اپریل 2021 سب سے زیادہ ہلاکت خیز مہینہ بن گیا, جون 2020 کے مقابلے میں رواں ماہ سب سے زیادہ نئے مریض اور اموات

   

   ،تصویر کا ذریعہGetty Images

   پاکستان میں کورونا وائرس کی وبا کے آغاز کے بعد سے اپریل 2021 میں سب سے زیادہ نئے مریض اور اموات دیکھنے میں آئی ہیں۔ اس سے قبل جون 2020 وہ مہینہ جب ملک میں کیسز اور اموات کی تعداد سب سے زیادہ تھی۔

   ہمارے نامہ نگار عابد حسین کے مطابق اپریل کے مہینے میں اب تک ایک لاکھ 42 ہزار 780 افراد متاثر ہو چکے ہیں اور یہ تعداد گذشتہ برس جون میں ایک لاکھ 41 ہزار تھی۔

   اسی طرح رواں ماہ ہلاک ہونے والوں کی تعداد 3150 رہی جبکہ جون 2020 میں یہ تعداد 2852 تھی۔

   خیال رہے کہ پاکستان میں کورونا وائرس کے پھیلاؤ میں مارچ کے وسط سے خاصی تیزی دیکھنے میں آ رہی ہے جس کے بعد سے حکومت کی جانب سے متعدد پابندیوں کا نفاذ بھی کیا جا رہا ہے۔

   اس کے علاوہ رواں ماہ سب سے زیادہ افراد اس وائرس سے صحتیاب بھی ہوئے اور ان کی کل تعداد ایک لاکھ تین ہزار سے زیادہ ہے۔ تاہم گذشتہ برس جون کے مہینے کے دوران مثبت کیسز کی شرح 18 اعشاریہ نو تھی جو اپریل 2021 نو اعشاریہ چھ رہی۔

2. 29 اپريل 2021بریکنگ, انڈیا نے اقوامِ متحدہ کی مدد کی پیشکش مسترد کر دی

   

   ،تصویر کا ذریعہReuters

   انڈیا نے اقوام متحدہ کی مدد لینے سے انکار کر دیا ہے۔ اقوام متحدہ کے سربراہ انتونیو گٹیرس کے نائب وکیل، فرحان حق نے نیوز ایجنسی پی ٹی آئی کو بتایا کہ انڈیا نے مدد کی پیش کش کو مسترد کردیا ہے۔

   اقوام متحدہ کی جنرل اسمبلی کے صدر نے دو دن پہلے ہی کہا تھا کہ اب وقت آ گیا ہے کہ دنیا انڈیا کی مدد کرے کیونکہ انڈیا نے ان ممالک کو مشکل وقت میں کورونا ویکسین پہنچائی تھی جو آسان نہیں تھا۔

   فرحان حق نے پی ٹی آئی سے پوچھے گئے سوال کے جواب میں کہا ’ہم نے ضرورت پڑنے پر کووڈ سے متعلق سامان کی سپلائی چین میں مدد کے لئے کہا تھا۔ ہمیں بتایا گیا کہ انڈیا کو اس کی ضرورت نہیں ہے کیونکہ پہلے ہی ایک مضبوط نظام موجود ہے لیکن ہمارے پاس ابھی بھی ایک تجویز ہے اور ہم ابھی بھی مدد کرنے کے لیے تیار ہیں۔‘

   پی ٹی آئی نے پوچھا کہ کیا اقوام متحدہ سے ضروری سامان کی کوئ سپلائی ہندوستان آنے والی ہے؟اس پر فرحان حق نے کہا ’ابھی تک ایسا کچھ نہیں ہے لیکن ان معاملات پر نظر رکھنے والے حکام مدد کرنے کے لئے تیار ہیں۔

   ’ہم انڈیا میں اقوام متحدہ کے لوگوں سے رابطے میں ہیں اور ضرورت پڑنے پر مدد کرنے کے لیے تیار ہیں۔ انڈیا میں کورونا وبا کا بحران بہت بڑا ہے اور ہم اس کا جائزہ لے رہے ہیں۔‘

3. 29 اپريل 2021بی بی سی اردو کے لائیو پیج میں خوش آمدید

   بی بی سی اردو کے خصوصی لائیو پیج میں خوش آمدید!

   یہاں آپ کورونا وائرس سے متعلق دنیا بھر کی خبروں کے بارے میں پڑھ سکیں گے۔

   گذشتہ چند دنوں کی خبروں سے متعلق جاننے کے لیے یہاں کلک کریں۔