انڈیا کے دارالحکومت دلی میں مسلسل دوسرے روز بھی ہلاکتوں کی تعداد 400 سے زیادہ ہو گئی ہے جبکہ جے پور گولڈن ہپستال نے کہا ہے کہ اس کے پاس فقط تین گھنٹوں کی آکسیجن سپلائی رہ گئی ہے۔ ادھر پاکستان کے صوبہ پنجاب میں مزید 78 ہزار افراد کو ویکسین لگائی گئی ہے۔
،تصویر کا ذریعہDC Office
لاہور میں کورونا ایس اوپیز کی خلاف ورزیوں پر سٹور، سنوکر کلب اور سیلون سیل کر دیے گئے ہیں۔
کمشنر لاہور کے احکامات پر سپیشل سکواڈ نے اطلاعات موصول ہونے پر یہ کارروائیاں کی ہیں۔
کمشنر لاہور کیپٹن (ر) محمد عثمان نے کہا ہے کہ کورونا ایس او پیز کی خلاف ورزی کسی صورت قابل برداشت نہیں اور خلاف ورزی کے مرتکب افراد کیخلاف سخت کارروائی عمل میں لائی جائے گی۔
کورونا ٹیسٹ مثبت آنے کے باوجود آکاش نامی شخص نے فیصلہ کیا کہ وہ شادی تو پھر بھی کریں گے۔
انڈیا میں کورونا کی بھیانک دوسری لہر کے دوران مدھیہ پردیش میں ایک جوڑے نے کورونا وائرس سے بچاؤ کی ’پی پی ای‘ کٹ پہن کر شادی کی۔
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
YouTube پوسٹ کا اختتام
پاکستان کے وفاقی دارالحکومت اسلام آباد کے ڈپٹی کمشنر حمزہ شفقات نے کہا ہے کہ ملک میں کورونا وائرس کے بڑھتے کیسز کے پیش نظر اسلام آباد میں عید کی چھٹیاں آٹھ سے 16 مئی تک دینے کی تجویز دی گئی ہے۔
بی بی سی اردو کی آسیہ انصر سے بات کرتے ہوئے حمزہ شفقات نے کہا ہے کہ ان چھٹیوں کے دوران شہر کے تمام سیاحتی مقامات کو بند رکھا جائے گے اور اس بات کو یقینی بنایا جائے گا کہ لوگ جمع نہ ہوں۔
انھوں نے اس امید کا اظہار بھی کیا کہ اگر اس دوران ایس او پیز پر عمل درآمد کیا گیا تو اسلام آباد میں کورونا کے مثبت کیسز کی شرح 10 فیصد سے کم ہو کر پانچ فیصد تک آ سکتی ہے۔
،تصویر کا ذریعہReuters
انڈین حکومت کے قائم کردہ سائنسی مشیروں کے ایک فورم نے مارچ کے اوائل میں ہی حکومتی عہدیداروں کو ملک میں کورونا وائرس کی گرفت میں آنے کے بارے میں خبردار کیا تھا۔
اس فورم میں شامل سائنسدانوں نے یہ بات خبر رساں ادارے روئٹرز کو بتائی ہے۔
سائنسدانوں کے مطابق وارننگ دینے کے باوجود وفاقی حکومت نے وائرس کے پھیلاؤ کو روکنے کے لیے کوئی اہم اقدامات نہیں کیے۔
واضح رہے کہ انڈیا میں کورونا وائرس کی دوسری لہر شدید مہلک ثابت ہو رہی ہے اور یومیہ تین ہزار مریض ہلاک ہو رہے ہیں۔
انڈیا میں جمعے کو پہلی مرتبہ کووڈ 19 کے نئے مریضوں کی یومیہ تعداد چار لاکھ سے بڑھ گئی ہے جو ایک اور ریکارڈ اضافہ ہے۔
پاکستان کے صوبہ پنجاب میں گذشتہ 24 گھنٹے میں کورونا وائرس کے 2068 نئے کیس سامنے آئے ہیں جس کے بعد صوبے میں کورونا متاثرین کی تعداد 303،182 ہو گئی ہے۔
گذشتہ 24 گھنٹے میں صوبہ بھر میں کورونا وائرس سے مزید 90 ہلاکتیں بھی ہوئی ہیں جس سے وائرس سے اموات کی کل تعداد 8500 ہو گئی ہے۔
،تصویر کا ذریعہEPA
،تصویر کا ذریعہANI
کورونا وائرس کی دوسری مہلک لہر میں انڈیا اپنے 18 برس سے زائد عمر کے تمام شہریوں کی ویکسینیشن کے عمل کا آغاز کرنے والا ہے لیکن کئی ریاستوں کا کہنا ہے کہ ان کے پاس ویکسین کی مطلوبہ خوراکیں موجود نہیں۔
انڈیا میں اب تک کورونا وائرس ویکسین کی 15 کروڑ خوراکیں دی جا چکی ہیں لیکن اس کے باوجود ملک میں یومیہ تین لاکھ سے زیادہ نئے متاثرین اور روزانہ تین ہزار سے زیادہ اموات ہو رہی ہیں۔
18 سے 45 برس کی عمر کے افراد کو ویکسین لگانے کا فیصلہ ایسے وقت میں آیا ہے جب متعدد ریاستوں میں ویکسین کی قلت کی خبریں آ رہی ہیں۔
18 سے 45 برس کی عمر کے 13 ملین سے زائد افراد ویکسین کے لیے اپنی رجسٹریشن کرا چکے ہیں لیکن کئی ریاستوں نے کہا کہ ان کے پاس ویکسین کی شدید قلت ہے۔
کورونا وائرس نے دنیا بھر کی معیشت اور بہت سی زندگیوں کو متاثر کیا ہے مگر ایسا پہلی مرتبہ نہیں ہوا کہ کسی وائرس نے دنیا کو ہلا کر رکھ دیا ہو۔
سارس، سوائین فلو اور ایبولہ وائرس جیسی کئی مہلک بیماریوں نے اس صدی کے آغاز پر دنیا کو پریشان کیا۔
کئی سو ایسے نئے وائرس جانوروں میں موجود ہیں جو انسانوں کو نقصان پہنچا سکتے ہیں اور محققین ان کے بارے میں معلومات جمع کرنے میں مصروف ہیں مگر کیا ہم ان خطرات کو نظر انداز کر سکتے ہیں؟
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
YouTube پوسٹ کا اختتام
،تصویر کا ذریعہEPA
پاکستان میں گذشتہ 24 گھنٹوں کے دوران مزید 4696 افراد میں کورونا وائرس کی تشخیص ہوئی ہے جبکہ 146 اس وائرس کی وجہ سے دم توڑ گئے ہیں۔
ہلاک ہونے والے 146 افراد میں سے 132 مریض ہسپتال میں زیر علاج تھے جن میں سے 61 وینٹیلیٹر پر تھے۔
اس وقت ملک بھر میں کورونا کے فعال کیسز کی تعداد 90,553 ہے جبکہ 717,009 صحت یاب بھی ہو چکے ہیں۔
،تصویر کا ذریعہANI
انڈیا کی ریاست گجرات کے شہر بہروچ کے ایک ہسپتال میں آگ لگنے کی وجہ سے کورونا وائرس کے 18 مریض ہلاک ہو گئے ہیں۔
چار منزلہ ہسپتال میں جب آگ لگی تو اس وقت وہاں 50 مریض موجود تھے۔
انڈیا کے خبر رساں ادارے پی ٹی آئی کے مطابق ہسپتال میں رات ایک بجے آگ لگی۔ آگ لگنے کے بعد مقامی لوگوں اور فائر فائٹرز کی مدد سے باقی مریضوں کو ہسپتال سے باہر نکالا گیا۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
ایک پولیس افسر نے پی ٹی آئی کو بتایا کہ سنیچر کی صبح ساڑھے چھ بچے تک مرنے والوں کی تعداد 18 تھی۔ اس سے قبل صرف 12 لوگوں کی موت کی تصدیق ہو سکی تھی۔
گجرات کے شہر بہروچ کے ایس پی راجندرا سین چوڈاساما نے بتایا کہ 12 لوگ دم گھٹنے سے ہلاک ہوئے۔ ان کے مطابق ابھی یہ واضح نہیں کہ باقی چھ لوگ مر گئے ہیں یا پھر انھیں کسی دوسرے ہسپتال منتقل کر دیا گیا ہے۔
وزیر اعظم نریندرا مودی نے اس واقعے پر افسوس کا اظہار کیا ہے اور متاثرین کے خاندان سے تعزیت کا اظہار کیا ہے۔
،تصویر کا ذریعہGetty Images
آسٹریلیا کی حکومت کی جانب سے عارضی طور پر انڈیا کے سفر کو غیر قانونی بنائے جانے کے بعد آسٹریلیائی شہریوں کو انڈیا سے وطن واپس آنے والے پانچ سال قید اور جرمانے کی سزا ہوسکتی ہے۔
وزارت صحت نے کہا کہ یہ فیصلہ ’قرنطینہ میں موجود لوگوں کے تناسب کی بنیاد پر کیا تھا جنیں انڈیا سے کووڈ 19 انفیکشن لاحق ہوا‘۔
اس ہفتے کے اوائل میں آسٹریلیا نے انڈیا سے آنے والی تمام پروازوں پر پابندی عائد کردی تھی۔
انڈیا میں ایک اندازے کے مطابق 9،000 آسٹریلوی باشندے ہیں جن میں سے 600 خطرے سے دوچار ہیں۔
پیر سے ، جو بھی شخص آسٹریلیا میں اپنی آمد کی تاریخ سے قبل 14 دن کے دورانیے میں انڈیا گیا ہے، اس کے ملک میں داخلے پر پابندی ہوگی۔
نئے فیصلے کی خلاف ورزی کے نتیجے میں پانچ سال قید کی سزا 66000 آسٹریلوی ڈالر جرمانہ یا دونوں کی سزا ہوسکتی ہے۔
وزارت صحت نے بتایا کہ اس فیصلے پر 15 مئی کو نظر ثانی کی جائے گی۔
،تصویر کا ذریعہget
دہلی میں عہدیداروں پر زور دیا گیا ہے کہ وہ شمشان گھاٹوں کے لیے مزید مقامات کی تلاش کریں کیونکہ کووڈ کی وجہ سے ہونے والی ہلاکتوں کے باعث شہر کے مردہ خانےاور شمشان بھر چکے ہیں۔
جمعہ کو وائرس کی دوسری لہر کے دوران انڈیا میں انفیکشنز کی تعداد میں ریکارڈ اضافے کے بعد ملک میں اب انفیکشنز کی کل تعداد ایک کروڑ اسی لاکھ ہوچکی ہے۔
انڈیا بھر میں اب بھی ہسپتالوں میں آکسیجن اور بستروں سخت کمی کا سامنا ہے۔ کووڈ مریضوں کے لواحقین سوشل میڈیا پر مدد کی درخواست کر رہے ہیں۔
امریکہ نے انڈیا میں کووڈ کی بگڑتی صورتحال کی وجہ سے وہاں سے امریکہ کے سفر پر پابندی لگانے کا فیصلہ کیا ہے۔
شمالی امریکہ کے لیے بی بی سی کے نمائندے پال ڈیناہر کے مطابق وائٹ ہاؤس کی پریس سیکریٹری کا کہنا ہے کہ ’ہم فوری طور پر انڈیا سے سفر پر پابندی لگا رہے ہیں جس کا نفاذ منگل چار مئی سے ہو گا‘۔
پریس سیکریٹری کے مطابق اس پابندی کی وجہ انڈیا میں کووڈ کے مریضوں کی انتہائی زیادہ تعداد اور وائرس کی مختلف اقسام کی موجودگی ہے۔
خیال رہے کہ امریکہ سے قبل برطانیہ بھی انڈیا کو سفر کے حوالے سے ریڈ لسٹ میں شامل کر چکا ہے۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
انڈیا میں جمعے کو پہلی مرتبہ کووڈ 19 کے نئے مریضوں کی تعداد چار لاکھ سے بڑھ گئی ہے
کورونا وائرس سے متعلق انڈیا میں جاری ہونے والے تازہ ترین اعداد و شمار کے مطابق ملک میں مزید 401911 افراد میں کورونا وائرس کی تصدیق ہوئی ہے۔
یہ کووڈ 19 سے متاثرہ افراد کی یومیہ تعداد میں ایک اور ریکارڈ اضافہ ہے۔
گذشتہ کئی روز سے انڈیا میں روزانہ ریکارڈ تعداد میں لوگ وائرس سے متاثر ہو رہے ہیں اور ہر آنے والے دن اس تعداد میں اضافہ ہی ہوتا چلا جا رہا ہے۔
اگر اموات کی بات کی جائے تو جمعے کو لگاتار تیسرا ایسا دن تھا جب انڈیا میں 3500 سے زیادہ افراد اس وبا کی وجہ سے جان سے گئے۔ جمعے کو یہ تعداد 3521 رہی۔
انڈیا میں کووڈ 19 کے مثبت آنے کی شرح 18 فیصد سے زیادہ ریکارڈ کی گئی ہے۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
پاکستان کے زیر انتظام کشمیر میں حکام کا کہنا ہے کہ جن اضلاع میں کورونا وائرس کے کیسز کی شرح دس فیصد ہے یا سے زیادہ ہے وہاں معمول کے آپریشنز نہ کیے جائیں۔
یہ حکم نامہ سرکاری ہسپتالوں میں معمول کے آپریشنز سے متعلق ہے۔
حکام کا کہنا ہے کہ ان سرجریز کو تاحکم ثانی ملتوی کر دیا جائے۔
،تصویر کا ذریعہAJ&K
،تصویر کا ذریعہDC LAHORE
پاکستان کے صوبہ پنجاب کے سیکرٹری پرائمری اینڈ سیکنڈری ہیلتھ کیئر کی جانب سے جاری بیان میں کہا گیا ہے کہ وزیر اعلیٰ پنجاب کی ہدایات کے مطابق صوبے کے ہسپتالوں میں آکسیجن کی دستیابی یقینی بنانے سے متعلق اہم فیصلہ کیا گیا ہے۔
سیکرٹری پرائمری اینڈ سکینڈری ہیلتھ کیئر سارہ اسلم کی جانب سے جاری نوٹیفکیشن کے مطابق لاہور کے علاقے مصری شاہ میں سکریپ انڈسٹری 17 مئی تک مکمل طور پر بند رہے گی۔
حکام کا کہنا ہے کہ یہ فیصلہ کرنے کا مقصد آکسیجن کی زیادہ سے زیادہ سپلائی ہسپتالوں کو دینا ہے۔
سکریپ انڈسٹری کو بند کرنے سے ہسپتالو ں کو 20 سے 25 میٹرک ٹن ا ضافی آکسیجن کی فراہمی ممکن ہو سکے گی جس سے قیمتی انسانی جانیں بچائی جا سکیں گی۔
سیکرٹری پرائمری اینڈ سکینڈری ہیلتھ کیئر نے شہریوں سے اپیل ہے کہ عید شاپنگ کے دوران مار کیٹوں میں رش سے پرہیز کریں۔
پاکستان کے صوبہ بلوچستان میں جمعے کو ایک اور مریض کی ہلاکت کے بعد کورونا سے ہلاک ہونے والوں کی مجموعی تعداد 236 ہو گئی ہے۔
محکمہ صحت کی جانب سے جاری تازہ ترین اعدادو شمار میں بتایا گیا ہے کہ مزید 91 مثبت نتائج کے بعد کورونا سے متاثر ہونے والوں کی مجموعی تعداد 22369 ہو گئی ہے۔
پاکستان کے زیر انتظام کشمیر میں گذشتہ 24 گھنٹوں کے دوران کورونا وائرس کے مزید 130 کیسز سامنے آئے ہیں اور ایک مریض ہلاک ہوا ہے۔
حکام کی جانب سے جاری تازہ ترین رپورٹ میں بتایا گیا ہے کہ مجموعی طور پر یہاں کل ہلاکتوں کی تعداد 476 ہو گئی ہے جبکہ ایکٹو کیسز کی کل تعداد 2239 ہے۔
24 گھنٹوں کے دوران صحتیاب ہونے والے افراد کی تعداد 113 بتائی گئی ہے۔
،تصویر کا ذریعہAJ&K GOVT
،تصویر کا ذریعہGetty Images
انڈیا کے وزیراعظم نریندر مودی نے جمعے کو ایک اجلاس میں معیشت اور ویلفئیر سے متعلق متعدد گروپس کے ساتھ ویڈیو کانفرنس میں بہت سے فیصلے کیے ہیں۔
ان فیصلوں میں فرنٹ لائن ورکرز کے لیے انشورنس پلان میں چھ ماہ کی توسیع کر دی ہے۔
وزیراعظم مودی نے مرکزی حکومت کو ہدایت کی کہ وہ غریب افراد کو مفت خوراک فراہم کریں۔
پاکستان کے صوبہ پنجاب کے دارالحکومت لاہور کے ڈپٹی کمشنر کا کہنا ہے کہ ائیر لائین سوسائٹی اور اس کے نواحی علاقوں میں کورونا کے حوالے سے ایس او پیز کی خلاف ورزی پر چیکنگ کی گئی۔
سماجی رابطوں کی ویب سائٹ ٹوئٹر پر اپنے پیغام میں انھوں نے بتایا کہ ان علاقوں سے شکایات موصول ہو رہی تھیں۔ جائزہ لینے والی ٹیموں جن میں پولیس، رینجرز اور آرمی کے اہلکار شامل تھے نے خلاف ورزی کرنے والی 6 دکانوں کو سیل کیا اور دو افراد گرفتار کیا گیا۔
ان افراد اور دکانداروں نے لاک ڈاؤن سے متلعق ضوابط کی خلاف ورزی کی تھی۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
،تصویر کا ذریعہCM PUNJAB
پاکستان کے صوبہ پنجاب کے وزیراعلیٰ سردار عثمان بزدار نے کہا ہے کہ ماسک نہ پہننے والے دوسروں کے لیے بھی کورونا کے خطرے کا باعث بن رہے ہیں۔
عثمان بزدار نے کہا کہ مریضوں اور شرح اموات میں اضافہ بے حد تشویشناک ہے۔
ان کا کہنا تھا کہ حکومت شہریوں کی زندگیوں کے تحفظ کے لیے مزید سخت اقدامات کرنے پر غور کررہی ہے۔
عثمان بزدارکا کہنا تھا کہ صورتحال مزید خراب ہوئی تو پابندیاں سخت کردیں گے۔
ان کا کہنا تھا کہ پابندیوں سے بچنے کے لیے عوام کو ایس او پیز پر من و عن عمل کرنا ہوگا۔
انھوں نے بتایا کہ کورونا میں شدت آنے سے پبلک ہیلتھ سسٹم پر دباؤ بڑھ رہا ہے۔
