آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان میں گذشتہ 24 گھنٹوں کے دوران ملک بھر میں 100 اموات ہوئی ہیں جبکہ 5139 نئے متاثرین سامنے آئے ہیں۔ ہلاک ہونے والوں میں سے 50 افراد کا تعلق صوبہ پنجاب سے ہے۔
وفاقی حکومت اسد عمر کی صدارت میں آج کورونا کی روک تھام کے لیے قائم این سی او سی کا اجلاس ہوا ہے جس میں تمام صوبائی چیف سیکریٹری نے شرکت کی اور صورتحال کا جائزہ لیا۔
اسد عمر نے ٹویٹ میں کہا ہے بیماری کے پھیلاؤ میں اضافہ اور ہسپتالوں میں مریضوں کی آمد میں تیزی دیکھی گئی ہے جس میں خاص کر کووڈ 19 کے انتہائی تشویشناک مریض بڑھ گئے ہیں۔
ان کا کہنا ہے کہ این سی او سی نے مزید سختیوں کا فیصلہ کیا ہے۔
ترجمان پاکستان مسلم لیگ ن مریم اورنگزیب نے کہا ہے کہ جماعت کی نائب صدر مریم نواز شریف کی طبیعت ناساز ہے اور انھوں نے آئندہ چار روز کے لیے سیاسی سرگرمیاں منسوخ کر دی ہیں۔
’مریم نواز کو تیز بخار اور گلے میں شدید درد ہے۔۔۔ (ان کا) کورونا کا ٹیسٹ بھی کرایا گیا ہے۔‘
ان کا مزید کہنا تھا کہ ڈاکٹروں نے مریم نواز کو آرام کا مشورہ دیا ہے۔
جماعت کے پولیٹیکل سیکرٹری ذیشان ملک کے مطابق ان کا کورونا ٹیسٹ منفی آیا ہے۔
انڈیا میں گذشتہ 24 گھنٹوں میں 62714 کیسز سامنے آئے ہیں جس کے بعد ملک کی متعدد ریاستوں نے ہولی اور شبِ بارات کی تقریبات کے حوالے سے نئی پابندیاں عائد کر دی ہیں۔
ریاست مہاراشٹرا میں رات کے وقت کرفیو نافذ کر دیا گیا ہے جبکہ دارالحکومت دلی میں ‘منی لاک ڈاؤن‘ شروع کر دیا گیا ہے۔
واضح رہے کہ دنیا بھر میں کورونا کیسز کے حوالے سے انڈیا، امریکہ اور برازیل کے بعد تیسرے نمبر پر ہے۔
سرکاری اعداد و شمار کے مطابق ملک بھر میں 27 مارچ کو 4767 نئے کیسز سامنے آئے ہیں اور 57 افراد ہلاک ہوگئے ہیں۔
یومیہ کیسز کے حوالے سے یہ 21 جون 2020 کے بعد سب سے زیادہ نئے کیسز کی بلند ترین سطح ہے۔
یاد رہے کہ ملک میں چند ماہ قبل کورونا وائرس کی دوسری لہر کے دوران کسی دن بھی اتنے کیسز سامنے نہیں آئے تھے اور ماہرین کو خدشہ ہے کہ ملک میں جاری کورونا وائرس کی تیسری لہر، دوسری لہر کے مقابلے میں کہیں زیادہ مہلک ہوسکتی ہے۔
کورونا وائرس کے حوالے سے غیر مصدقہ بیان کے بعد فیس بک نے وینزویلا کے صدر نکولاس مڈورو کا پیج منجمد کر دیا ہے۔
جنوری میں صدر مڈورو نے دعویٰ کیا تھا کہ تھائم پودے سے بنی ہوئی ایک ہربل دوا اس مرض کا علاج کر سکتی ہے۔
فیس بک کا کہنا ہے کہ صدر مڈورو نے متعدد بار کورونا وائرس کے حوالے سے معلومات کے تناظر میں کمپنی کی پالیسیوں کی خلاف ورزی کی ہے۔
کمپنی کے اقدام کے بعد صدر مڈورو اب 30 روز تک فیس بک پر کوئی پوسٹ نہیں کر سکیں گے۔
صدر مڈورو وہ واحد عالمی رہنما نہیں ہیں جن کے خلاف ایسا قدم اٹھایا گیا ہو۔ امریکی صدر ڈونلڈ ٹرمپ اور برازیلی صدر ہیئر بولسونارو کے خلاف بھی میں ماضی میں ایسے اقدامات کیے گئے ہیں۔
کورونا کے بڑھتے کیسز کے پیش نظر پنجاب کے محکمہ پرائمری اینڈ سیکنڈری ہیلتھ کیئر کی جانب سے فیصل آباد، گجرات، ملتان اور لاہور کے مزید علاقوں میں سمارٹ لاک ڈاؤن لگانے کا فیصلہ کیا گیا ہے۔
فیصل آباد کے 19، گجرات کے چار، ملتان کے دو اور لاہور کے مزید 27 علاقوں میں سمارٹ لاک ڈاؤن نافذ کر دیا گیا ہے۔
سیکرٹری پرائمری اینڈ سیکنڈری ہیلتھ کیئر پنجاب سارہ اسلم کے مطابق سمارٹ لاک ڈاؤن والے علاقوں میں تمام شاپنگ مالز، ریستوران، نجی و سرکاری دفاتر بند رہیں گے۔ علاقہ مکینوں کی نقل و حمل محدود ہو گی اور انتہائی ضرورت کے پیش نظر ایک فرد ایک سواری استعمال کر سکے گا۔
ان کی جانب سے جاری اعلامیے کے مطابق ہر قسم کے اجتماعات پر مکمل پابندی ہو گی۔ تمام میڈیکل سروسز، فارمیسی، میڈیکل سٹور، لیبارٹریاں، کولیکشن پوائنٹس، ہسپتال اور کلینکس 24 گھنٹے کھلے رہے گے۔
اعلامیے کے مطابق دودھ، چکن اور گوشت/مچھلی کی دکانیں اور بیکریاں صبح 7 سے شام 7 بجے تک کھلی رہیں گی جبکہ گروسری سٹورز، جنرل سٹورز، آٹا چکیاں، فروٹ و سبزی کی دکانیں، تندور اور پیڑول پمپس صبح نو بجے سے شام سات بجے تک کھلے رہیں گے۔
دنیا کے نامور ترین کرکٹرز میں سے ایک سچن تندولکر میں کووڈ 19 کی تشخیص ہوئی ہے۔
تندولکر کو عمومی طور پر دنیا کا عظیم ترین بلے باز قرار دیا جاتا ہے۔ اُنھوں نے سنیچر کو ایک ٹویٹ میں اپنے کورونا سے متاثر ہونے کی خبر دی۔
اُنھوں نے لکھا کہ ’میں نے خود کو گھر پر قرنطینہ کر لیا ہے اور ڈاکٹروں کی ہدایت کے مطابق تمام ضروری پروٹوکولز کی پاسداری کر رہا ہوں۔‘
سینتالیس سالہ سچن تندولکر نے اپنے کورونا سے متاثر ہونے کا اعلان ایسے وقت میں کیا ہے جب انڈیا کورونا وائرس سے شدید متاثر ہے۔
انڈیا میں جمعے کو 59 ہزار 118 نئے متاثرین سامنے آئے جو رواں سال ایک روز میں سامنے آنے والی سب سے بڑی تعداد ہے۔ سب سے زیادہ نئے متاثرین مغربی ریاست مہاراشٹر سے رپورٹ ہوئے جہاں تندولکر بھی ممبئی شہر میں رہتے ہیں۔
عالمی وبا کے آغاز سے اب تک انڈیا میں ایک کروڑ 19 لاکھ افراد میں کووڈ کی تشخیص ہو چکی ہے جبکہ ایک لاکھ 61 ہزار افراد اس مرض کے باعث ہلاک ہو چکے ہیں۔
پاکستان میں وفاقی وزیر اور کورونا کی روک تھام کے لیے قائم این سی او سی کے سربراہ اسد عمر نے اعلان کیا ہے کہ کورونا کی دونوں خوراکیں حاصل کرنے والے افراد پر ویکسین سرٹیفیکیٹ حاصل کر سکیں گے۔
کووڈ امیونائزیشن سرٹیفیکیٹ حاصل کرنے کے لیے ایک ویب سائٹ متعارف کرائی گئی ہے اور کہا گیا ہے کہ یہ سرٹیفیکیٹ نادرا کے میگا سینٹرز سے بھی حاصل کیے جاسکتے ہیں۔
یہ بات معمولی نہیں کہ کوئی عالمی رہنما اپنی غلطی کا اعتراف سب کے سامنے کرے۔
دنیا بھر کے صحافی اس وقت حیران ہوئے جب جرمن چانسلر اینگلا مرکل نے ایسٹر کے تہوار کے دوران سخت لاک ڈاؤن نافذ کرنے کا اعلان کیا، لیکن 30 گھنٹوں بعد اس فیصلے کو واپس لے لیا۔
مرکل نے اس پر معافی مانگی اور کہا ’یہ میری اپنی غلطی ہے۔‘ کئی اخباروں نے اس پر انھیں داد دی لیکن کئی لوگ اس یوٹرن کو باعث تشویش سمجھا۔
جرمنی میں عام طور پر ایسٹر کے موقع پر تین روز تک دکانیں اور مارکیٹیں بند رہتی ہیں لیکن مرکل نے پانچ روزہ تعطیل کا اعلان کیا تھا۔ اطلاعات کے مطابق اس سے کاروباری افراد کا سخت ردعمل سامنے آیا تھا جنھوں نے دعویٰ کیا کہ ایسے میں بڑی سپر مارکیٹوں میں اشیا کی قلت ہوسکتی ہے۔
امریکہ کے رکن پارلیمنٹ مائیک ڈوئیل نے فیس بک، ٹوئٹر اور گوگل پر زور دیا ہے کہ وہ ایک درجن ایسے لوگوں پر پابندی عائد کر دے جن کے بارے میں یہ دعویٰ کیا گیا ہے کہ وہ کورونا وائرس کی ویکسین سے متعلق غلط فہمییاں پھیلا رہے ہیں۔
کانگرس کے اجلاس کے دوران اس بحث کے دوران کہ کیسے تین کمپنیاں جعلی خبروں سے کیسے نمٹ رہی ہیں، مائیک ڈوئیل نے مطالبہ کیا ہے کہ ایسے افراد پر سوشل میڈیا کے استعمال پر پابندی ہونی چائیے۔
انھوں نے فیس بک کے بانی مارک زکربرگ، یوٹیوب کے جیک ڈورسی اور گوگل کے سندر پچائی سے کہا ہے کہ وہ سماجی رابطوں کی ویب سائٹس سے ایسے درجن بھر افراد کو نکال باہر کریں۔
تاہم ابھی تک ان تینوں میں سے کسی ایک نے بھی ابھی تک ایسے مطالبات پر کوئی تبصرہ نہیں کیا ہے۔
فیس بک کا کہنا ہے کہ وہ ایسے اکاؤنٹس کا جائزہ لے رہے ہیں کہ آیا انھوں نے ضوابط کی کوئی خلاف ورزی کی ہے۔
ٹوئٹر اور گوگل نے اکاؤنٹس ہٹانے کے حوالے سے بی بی سی کے رابط کرنے پر کوئی تبصرہ نہیں کیا ہے۔
پاکستان میں گذشتہ 24 گھنٹوں میں 67 افراد کورونا وائرس سے ہلاک ہو گئے ہیں۔ صوبہ پنجاب کے بعد سب سے زیادہ اموات خیبر پختونخوا میں ہوئی ہیں۔ مرنے والوں میں سے 62 افراد مختلف ہسپتالوں میں زیر علاج تھے۔
ایک دن میں 4468 مزید افراد میں کورونا وائرس کی تصدیق ہوئی ہے، یوں ایک دن کے دوران جو ٹیسٹ کیے گئے ان میں مثبت کیسز کی تعداد دس فیصد رہی۔
اس وقت ملک میں اس وائرس سے متاثرین کی فعال تعداد 42,384 بنتی ہے۔
پاکستان کے وفاقی وزیر اور کورونا وائرس کی روک تھام کے لیے قائم این سی او سی کے سربراہ اسد عمر نے کہا ہے کہ پاکستان میں 50 سال سے زیادہ عمر کے افراد کے لیے ویکسین کی رجسٹریشن کا عمل 30 مارچ سے شروع ہوجائے گا۔
ایک ٹویٹ میں ان کا کہنا تھا کہ ملک میں 60 سال سے زیادہ عمر کے افراد کے لیے ویکسین کی مہم جاری ہے۔
’50 سال سے زیادہ عمر کے افراد کو حوصلہ افزائی کریں کہ وہ ویکسین کے لیے خود کو رجسٹر کریں۔ ان کے لیے رجسٹریشن 30 مارچ کو کھل جائے گی۔‘
یورپی یونین کی جانب سے ایک بیان سامنے آیا ہے جس میں کورونا ویکسین بنانے والی کمپنی ایسٹرا زینیکا سے کووڈ ویکسین کی جلد ترسیل کا مطالبہ کیا گیا ہے۔ اس میں کہا گیا ہے کہ وعدے کے مطابق اسے کسی دوسری جگہ خوراکیں برآمد کرنے کی جگہ یورپی یونین کو مدنظر رکھنا چاہیے۔
یورپی کمیشن کی صدر نے کہا کہ کمپنی کو اس کے رکن ممالک کے ساتھ کیے گئے معاہدے کی پاسداری کرنی ہوگی۔
ان کا یہ بیان ایک ایسے وقت میں جاری ہوا ہے کہ جب یورپی یونین کے ممالک کے رہنماؤں نے ایک اجلاس میں ان معاملات پر بات چیت کی ہے۔
فرانس کے صدر میکخواں کے مطابق اس سے یورپی یونین کی ’ناتجربہ کاری ختم ہوگئی ہے۔‘
یورپی یونین کے ممالک نے ایسٹرا زینیکا پر الزام لگایا ہے کہ اس نے ویکسین کی ترسیل میں ضرورت سے زیادہ وقت لگایا ہے۔ تاہم کمپنی کی جانب سے ان الزامات کو رد کیا گیا ہے۔
پاکستان میں گذشتہ 24 گھنٹوں کے دوران کورونا وائرس سے چار ہزار 368 افراد متاثر ہوئے ہیں جبکہ 63 افراد کی کورونا کے باعث ہلاکت ہوئی ہے۔
اب تک پاکستان میں کورونا کے چھ لاکھ 45 ہزار 356 متاثرین کی تصدیق ہو چکی ہے جس میں سے پانچ لاکھ 91 ہزار 145 افراد صحتیاب ہو چکے ہیں۔
گذشتہ 24 گھنٹوں میں سب سے زیادہ اموات پنجاب میں ہوئی ہیں۔
پاکستان میں کورونا وائرس کی تیسری لہر پوری طرح آ چکی ہے اور گذشتہ 24 گھنٹوں میں 3946 نئے متاثرین کی شناخت ہونے کے بعد ملک میں متاثرین کی مجموعی تعداد 640988 تک پہنچ چکی ہے۔
واضح رہے کہ نئے متاثرین کی یہ تعداد گذشتہ سال دو جولائی کے بعد سب سے زیادہ ہے۔دوسری جانب 63 اموات کے ساتھ پاکستان میں ہلاکتوں کی بھی کل تعداد 14 ہزار سے تجاوز کر گئی ہے۔تازہ ترین اعداد و شمار کے تحت اس وقت پاکستان میں 37985 فعال مریض موجود ہیں جبکہ 588975 افراد کورونا وائرس کو شکست دینے میں کامیاب ہو چکے ہیں۔
انڈیا کی وزارت صحت کے ذرائع نے بی بی سی کو بتایا ہے کہ حکومت نے آکسفورڈ ایسٹرازینیکا کی برآمد پر عارضی پابندی عائد کر دی ہے۔
اس کی وجہ بتاتے ہوئے کہا گیا ہے کہ انڈیا میں آنے والے دنوں میں ویکسین کی ضروریات بڑھ سکتی ہیں چناچہ حکومت کو ملک میں ویکسین کی ضرورت ہے۔
حکام کے مطابق لگائی جانے والی عارضی پابندی برآمدات کو اپریل کے آخر تک متاثر کر سکتی ہے۔
اس عارضی پابندی کا سب سے زیادہ اثر عالمی ادارہ صحت کے کوویکس پروگرام پر ہوگا جس کے تحت 190 ممالک کو ویکسین ملنی تھی۔
انڈیا میں ویکسین بنانے والے سب سے بڑے ادارے سیرم انسٹٹیوٹ آف انڈیا نے حالیہ کچھ دنوں میں ایسٹرازینیکا کی خوراکیں بیرونی ممالک کو نہیں بھیجیں جس سے برازیل، برطانیہ اور کئی دیگر ممالک متاثر ہوئے ہیں۔
انڈیا نے اب تک چھ کروڑ خوراکیں 76 ممالک میں برآمد کی ہیں اور ان میں سے اکثریت آکسفورڈ ایسٹرازینیکا کی خوراک ہے۔
انڈیا کی وزارت صحت کے مطابق کورونا وائرس کی مختلف قسموں کے ساتھ ساتھ ملک کی 18 ریاستوں میں کورونا وائرس کی ایک نئی 'ڈبل میوٹینٹ ' قسم دریافت ہوئی ہے۔
نامہ نگار شکیل اختر کے مطابق انڈین وزارت کا کہنا ہے کہ یہ 'ڈبل میوٹنٹ' قسم کا وائرس بڑی تعداد میں نہیں ملا ہے جس سے یہ ثابت ہو سکے کہ آیا بعض ریاستوں میں کورونا کے کیسز میں تیزی سے جواضافہ ہوا اس کا سبب کہیں یہ نئی قسم تو نہیں ہے۔
وزارت صحت کے بیان کے مطابق کورونا وائرس کی مختلف قسموں کے جینیاتی مرکب اور وبائی پہلوؤں کا مسلسل مطالعہ کیا جا رہا ہے۔
واضح رہے کہ انڈیا میں کئی ریاستوں میں کورونا کے متاثرین کی تعداد میں اچانک تیزی آئی ہے۔
صرف گذشتہ چوبیس گھنٹے میں 47 ہزار سے زیا نئے کیسز سامنے آئے ہیں اور اس وائرس سے متاثوہ 275 افراد کی جان گئی ہے۔
پاکستان کے وفاقی وزیر تعلیم شفقت محمود نے اعلان کیا ہے کہ ملک کے بیشتر علاقوں میں 28 مارچ سے سکول کھل جائیں گے تاہم وہ علاقے جہاں کورونا کے کیسز زیادہ ہیں وہاں پر تعطیلات 11 اپریل تک جاری رہیں گی۔
پنجاب کے وزیر تعلیم کے مطابق ان اضلاع میں لاہور، راولپنڈی، گجرانوالہ، گجرات، ملتان، فیصل آباد، سیالکوٹ، سرگودھا اور شیخوپورہ شامل ہیں۔
دیگر صوبوں اور پاکستان کے زیر انتظام کشمیر اور گلگت بلتستان کی حکومتیں خود یہ فیصلہ کر سکتی ہیں کہ کن علاقوں میں سکول بند رکھنے ہیں اور کہاں کھولنے ہیں۔
شفقت محمود نے کہا کہ میٹرک اور انٹر کے امتحان معمول کے مطابق مئی اور جون میں منعقد ہوں گے جبکہ 26 اپریل سے شروع ہونے والے او اور اے لیول امتحانات ملتوی کرنے کے حوالے سے حکومتی کوششیں جاری ہیں۔
حکومت پاکستان نے کورونا سے بچاؤ کی ویکسین کی 10 لاکھ 60 ہزار خوراکوں کا آرڈر دے دیا ہے اور توقع کی جا رہی ہے کہ یہ ویکسین جلد ہی پاکستان پہنچ جائے گی۔
وزیراعظم کے معاون خصوصی برائے صحت ڈاکٹر فیصل سلطان نے بدھ کو ٹوئٹر پر اپنے پیغام میں کہا کہ چین میں بننے والی سائنوفارم ویکسین کی دس لاکھ جبکہ کین سائنو کی ساٹھ ہزار خوارکیں خیریدی جا رہی ہیں۔
خیال رہے کہ کورونا سے حفاظت کے لیے سائنو فارم کی ویکسین کی دو خوراکیں جبکہ کین سائنو کی ایک خوراک درکار ہوتی ہیں۔
فیصل سلطان کا کہنا تھا کہ ویکسین کی لاکھوں مزید خوراکوں کی خریداری کے لیے معاہدوں پر ابھی کام ہو رہا ہے۔
یاد رہے کہ اس سے قبل پاکستان نے عطیہ شدہ خوراکوں کی مدد سے ڈاکٹروں اور معمر افراد کو ویکسین لگائی ہے اور یہ اعلان سرکاری طور پر پہلا موقع ہے جب حکومت کے کسی فرد کی جانب سے ویکسین خریدنے کا عندیہ دیا گیا ہو۔
پاکستان میں برطانوی ہائی کمشنر نے ایک ویڈیو پیغام میں بتایا ہے کہ موجودہ حالات میں تفریحی مقاصد کے لیے برطانیہ سے پاکستان سفر کرنے پر پابندی ہے۔ پاکستان میں کورونا کی تیسری لہر کی بدولت کووڈ 19 کے نئے متاثرین بڑھ رہے ہیں اور مقامی سطح پر سمارٹ لاک ڈاؤن نافذ کیے گئے ہیں۔
’برطانیہ سے آپ اس وقت تک بیرون ملک سفر نہیں کرسکتے جب تک آپ کو قانونی طور پر اس کی اجازت نہیں دی جاتی۔ اس کے لیے آپ کو ایک فارم پُر کرنا ہوتا ہے جس میں آپ ثابت کرتے ہیں کہ آپ کے لیے یہ سفر ضروری ہے۔‘
تاہم ان کا کہنا کسی بھی وقت نئے سرحدی احکامات جاری ہوسکتے ہیں اور حوالے سے مسافروں کے لیے ضروری ہے کہ وہ ہدایات سے باخبر رہیں۔