امریکہ: ہائیڈروکسی کلوروکوین کا ایمرجنسی استعمال روک دیا گیا
امریکہ کی فوڈ اینڈ ڈرگ اینڈمنسٹریشن (ایف ڈی اے) نے کووڈ۔19 کے علاج کے لیے ہائیڈروکسی کلوروکوین کے ایمرجنسی استعمال کا حکم واپس لے لیا ہے۔ صدر ڈونلڈ ٹرمپ اس دوا سے علاج کے لیے کہتے رہے ہیں۔
ایف ڈے اے نے کہا ہے کہ تازہ ترین شہادتوں کے بعد یہ ماننا معقول نہیں ہو گا کہ ہائیڈروکسی کلوروکوین اور اس سے متعلقہ دوا کلوروکوین کووڈ۔19 کے علاج کے لیے موثر ادویات ہیں۔
ہائیڈروکسی کلوروکوین اور کلوروکوین کو کافی عرصے سے ملیریا، جلد کی بیماری لیوپس اور جوڑوں کے درد کے علاج کے طور پر استعمال کیا جاتا رہا ہے۔ صدر ٹرمپ نے ہائیڈروکسی کلوروکوین کے تشہیر کی بلکہ کچھ عرصہ وہ خود بھی اسے استعمال کرتے رہے۔ اگرچہ بہت سی تحقیقات میں کہا گیا تھا کہ یہ ادویات موثر نہیں ہیں اور ڈاکٹروں نے بھی خبردار کیا تھا کہ ان سے دل کے مسائل ہو سکتے ہیں، ایف ڈی اے نے کلینیکل ٹرائلز کے دوران اور ہسپتالوں میں ان کی اجازت دے دی تھی۔
یونیورسٹی آف آکسفورڈ کی طرف سے کیے گئے دنیا کے سب سے بڑے ٹرائلز کے بعد حال ہی میں کہا گیا تھا کہ ’کووڈ۔19 کی وجہ سے ہسپتالوں میں آنے والے مریضوں میں ہائیڈروکسی کلوروکوین کا کوئی فائدہ مند اثر نہیں دیکھا گیا ہے۔‘