آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا بھر میں کورونا کے مصدقہ متاثرین کی تعداد 81 لاکھ سے بڑھ گئی ہے جبکہ پاکستان میں میں لگاتار دوسرے روز بھی اموات کی ریکارڈ تعداد سامنے آئی ہیں۔ منگل کو دنیا کے دوسری سب سے متاثرہ ملک برازیل میں وائرس کے تقریباً 35 ہزار نئے کیس سامنے آئے ہیں جبکہ انڈیا چوتھے نمبر پر ہے اور وہاں مزید دو ہزار اموات ہوئی ہیں۔
وہ علاقے جہاں کورونا وائرس کے مریض بڑھنے لگیں ان کو سیل کیا جارہا ہے اور حالات بہتر نہ ہونے تک کہا گیا ہے کہ انھیں بند رکھا جائے گا۔
اس متعلق رہائشیوں میں یہ اضطراب پایا جاتا ہے کہ آیا سمارٹ لاک ڈاؤن سے قبل اور اس دوران انھیں کن ایس او پیز پر عمل کرنا ہے؟ اسلام آباد میں اس پر عمل درآمد شروع ہو چکا ہے۔
سمارٹ لاک ڈاون سے متعلق ایس او پیز کیا ہیں یہ بتا رہے ہیں اسلام آباد کے ڈپٹی کمشنر حمزہ شفقات۔
پاکستان میں لگاتار دوسرے روز ریکارڈ اموات ہوئی ہیں۔ گذشتہ روز صبح میں سرکاری اعداد و شمار کی اپ ڈیٹ کے بعد سے اب تک پاکستان میں اموات کی تعداد ایک روز کی بلند ترین سطح پر ہے۔
اب تک ملک میں ایک روز میں کم سے کم 129 اموات ہوئی ہیں۔ خیال رہے کہ ان اموات میں ابھی اسلام آباد کے اعداد و شمار شامل نہیں کیے گئے ہیں۔
گذشتہ روز پاکستان میں کم از کم پانچ ہزار سے زائد متاثرین بھی سامنے آئے۔
امریکی سینٹرز فار ڈیزیز کنٹرول اینڈ پریوینشن (سی ڈی سی) کی ایک رپورٹ کے مطابق جن امریکی شہریوں کو صحت کے پہلے ہی مسائل ہیں ان کا کووڈ۔19 کا وائرس لگنے کے بعد ہسپتال میں علاج کے چھ گنا زیادہ امکانات ہیں جبکہ اس وائرس سے ان کے مرنے کے امکانات 12 گنا زیادہ ہیں۔
کووڈ۔19 کے 13 لاکھ متاثرین کا جائزہ لینے کے بعد رپورٹ میں کہا گیا ہے کہ سب سے عام بیماریاں جو کووڈ۔19 کے مریضوں کے علاج میں پیچیدگیاں پیدا کرتی ہیں وہ دل کا عارضہ، ذیابیطس اور پھیپھڑوں کی بیماری ہے۔
رپورٹ میں یہ بھی کہا گیا ہے کہ کووڈ۔19 کے 15 فیصد امریکی مریضوں کو ہسپتال داخل کرنا پڑا جبکہ 5 فیصد ہلاک ہو گئے۔
خیبر پختونخوا کے قبائلی اضلاع کے علاقے خارسب ڈویژن، عنایت کلی اور خار میں سمارٹ لاک ڈاؤن
ڈپٹی کمشنر باجوڑ فیاض شیرپاؤ کی خصوصی ہدایات پر ان علاقوں میں سمارٹ لاک ڈاؤن کا نفاذ کیا گیا ہے۔
لاک ڈاؤن ایریاز میں متعین حکام کو ڈیوٹی کے بابت ضروری ھدایات اور کورونا وائرس سے بچاؤ کے اقدامات کے بارے میں احکامات جاری کر دیے گئے ہیں۔
گذشتہ چند دنوں میں اندرون خار اور عنایت کلی کے انیس خان محلہ میں کورونا وائرس کے متعدد کیسز سامنے آنے کے بعد ضلعی انتظامیہ نے ٹھوس اقدامات اٹھانے کا فیصلہ کیا ہے۔
پاکستان کے صوبے پنجاب میں گذشتہ 24 گھنٹوں کے دوران کورونا وائرس کے 2361 نئے متاثرین کی تصدیق کی گئی ہے جبکہ ایک دن میں ریکارڈ 68 اموات ہوئی ہے۔
صوبائی محکمہ قدرتی آفات کے جاری کردہ اعدادو شمار کے مطابق صوبے میں 16 جون کی رات دس بجے تک کورونا متاثرین کی کل تعداد 58239 تک پہنچ گئی ہے۔
جبکہ صوبے میں 68 مزید اموات کے بعد کورونا کے باعث ہلاک ہونے والوں کی مجموعی تعداد 1149 تک پہنچ گئی ہے۔
گذشتہ 24 گھنٹوں کے دوران کل 9088 ٹیسٹ کیے گئے۔
صوبے میں کورونا وائرس سے صحتیاب ہونے والوں کی مجموعی تعداد 17780 ہے۔
محکمہ صحت گلگت بلتستان کے مطابق خطے میں مزید 21 افراد میں کورونا وائرس کی تصدیق ہوئی ہے جس کے بعد یہاں کورونا کے متاثرین کی تعداد 1164 ہوگئی ہے۔
جبکہ گذشتہ 24 گھنٹوں میں دس مریض صحت یاب ہوئے ہیں جس کے بعدصحت یاب مریضوں کی مجموعی تعداد 738 ہوگئی ہے۔
ابتک 17 افراد کورونا کے باعث ہلاک ہوئے ہیں جبکہ اس وقت409 مریض زیر علاج ہیں۔
ہنزہ میں اس وقت سب سے زیادہ 128 مریض جبکہ دوسرے نمبر گلگت میں 89، استور 54، سکردو 44، غذر22، نگر 28، دیامیر میں پندرہ مریض زیر علاج ہیں جبکہ گلگت بلتستان کے دس اضلاع کورونا سے متاثر ہیں۔
برطانیہ میں ماہرین کی جانب سے کورونا وائرس کے خلاف جنگ میں کم مقدار والی سٹیرائڈ دوا ڈیکسامیتھازون سے کامیاب علاج کو ایک ’زبردست پیش رفت‘ قرار دیا جانے کے بعد پنجاب حکومت نے صوبے میں اس کے سٹاک کو محفوظ بنانے کے لیے احکامات جاری کر دیے ہیں۔
صوبائی محکمہ صحت کی جانب سے جاری مراسلے میں ڈرگ انسکپٹرز کو ہدایات کی گئی ہے کہ مذکورہ دوا کی مارکیٹ میں خرید و فروخت پر نظر رکھتے ہوئے دوا سازوں کے پاس اس دوا کے سٹاک کا ریکارڈ مرتب کیا جائے۔
اگر کورونا وائرس کے مریضوں کے علاج کے لیے اس کی ضرورت پیش آئے تو ہسپتالوں میں اس کر فراہمی کو یقینی بنایا جا سکے۔
پاکستان کے صوبہ بلوچستان میں گذشتہ 24 گھنٹوں کے دوران 110 نئے متاثرین میں کورونا وائرس کی تصدیق کی گئی ہے جس کے بعد صوبے میں مجموعی متاثرین کی تعداد8437 ہوگئی ہے۔
محکمہ صحت حکومت بلوچستان کے ترجمان ڈاکٹر وسیم بیگ کے مطابق 15 جون کو کورونا کے479 ٹیسٹ کیے گئے جن میں سے 110 افراد کا نیتجہ مثبت آیا۔
بلوچستان حکومت کی جانب سے جاری کردہ سرکاری اعداد و شمار کے مطابق گذشتہ 24 گھنٹوں کے دوران صوبے میں کورونا سے مزید چار افراد کی ہلاکت ہوئی ہے جس کے باعث ہلاک ہونے والے افراد کی مصدقہ تعداد 89 ہوگئی ہے۔
کورونا کے باعث ہلاک ہونے والوں میں سے تین افراد کا تعلق کوئٹہ جبکہ ایک کا تعلق قلعہ سیف اللہ سے تھا اور ان مریضوں میں تین مرد اور ایک خاتون شامل ہے جن کی عمریں 65 سے85 سال کے درمیان تھی۔
بلوچستان میں اب تک کورونا کے مجموعی طور پر 38675 ٹیسٹ کیے گئے ہیں جن میں سے30238 کے نتائج منفی آئے۔
بلوچستان میں مجموعی طوپر پر87293 افراد کی سکریننگ کی گئی ہے۔
کورونا وائرس سے اب تک صوبے میں3023 افراد صحتیاب ہوئے ہیں۔
پاکستان کے وفاقی دارلحکومت اسلام آباد میں کورونا کے بڑھتے متاثرین اور وبا کے پھیلاؤ کے پیش نظر سیکٹر آئی ایٹ اور سیکٹر آئی ٹین کے متعدد علاقوں کو سیل کرنے کا نوٹیفکیشن ضلعی انتظامیہ نے جاری کر دیا ہے۔
اسلام آباد کے ڈپٹی کمشنر حمزہ شفقات نے بی بی سی سے بات کرتے ہوئے کہا کہ اس جاری کردہ نوٹیفکیشن کے مطابق اسلام آباد کے سیکٹر آئی ایٹ کے مرکز سمیت سیکٹر آئی ایٹ تھری اور فور کو سیل کیا جا رہا ہے جبکہ سیکٹر آئی ٹین کے مرکز سمیت آئی ٹین ون اور ٹو کے علاقوں میں سمارٹ لاک ڈاؤن کا نفاذ کیا جا رہا ہے۔
ڈی سی اسلام آباد کا کہنا تھا کہ یہاں کے رہائشیوں کو اس کے متعلق آگاہ کر دیا گیا ہے اور بدھ اور جمرات کی درمیان شب 12 بجے سے ان علاقوں کو مکمل سیل کر دیا جائے گا۔
ان کا کہنا تھا کہ ان علاقوں کے رہائشیوں کو 17 جون کا دن دیا گیا ہے تاکہ وہ اپنے لیے اشیا ضروریہ سمیت دیگر معاملات کو مناسب انداز میں نمٹا لیں۔
پاکستان کے وفاقی دارلحکومت اسلام آباد کی ضلعی انتظامیہ نے کورونا کے پیش نظر جاری کردہ ضابطہ کار کی خلاف ورزی پر شہر کے مختلف علاقوں میں کارروائیاں کرتے ہوئے 64 دکانوں اور 11 ہوٹلوں کو سیل کیا ہے۔
ان کے مالکان کو ایک لاکھ دس ہزار روپے جرمانہ بھی عائد کیا گیا ہے۔
ضلعی انتظامیہ کی جانب سے جاری کردہ اعداد و شمار کے مطابق ایسے انفرادی دکانداروں اور کاروباری افراد کو بھی جرمانے عائد کیے گئے ہیں جو ناجائز منافع خوری کرتے ہوئے ضرورت کی اشیا کو مہنگے داموں فروخت کر رہے تھے۔
کورونا وائرس سے شدید بیمار مریضوں کی زندگی ایک سستی اور وسیع پیمانے پر دستیاب دوا سے بچائی جا سکتی ہے۔
برطانیہ میں ماہرین کا کہنا ہے کہ اس مہلک وائرس کے خلاف جنگ میں کم مقدار والی سٹیرائڈ دوا ڈیکسامیتھازون سے کامیاب علاج ایک ’زبردست پیش رفت‘ ہے۔
آکسفورڈ یونیورسٹی کی ایک ٹیم کی نگرانی میں ہونے والی اس آزمائش کے دوران ہسپتال میں داخل کووِڈ19 کے دو ہزار مریضوں کو ڈیکسامیتھازون دی گئی اور پھر ان کا مقابلہ چار ہزار ایسے مریضوں سے کیا گیا جنھیں یہ دوا نہیں دی گئی۔
وینٹیلیٹرز پر رکھے گئے مریضوں کے موت کے خطرے میں 40 سے 25 فیصد کمی آئی۔ جن مریضوں کو آکسیجن کی ضرورت تھی ان میں موت کے خطرے میں 25 سے 20 فیصد کمی آئی۔
برطانیہ میں کورونا وائرس پر دی جانے والی روزانہ کی بریفنگ میں برطانوی وزیرِ اعظم بورس جانسن نے کہا ہے کہ انھیں خوشی ہے کہ اب تک کورونا وائرس کے علاج کے لیے سب سے بڑی پیش رفت برطانوی سائنسدانوں نے کی ہے۔
انھوں نے کہا کہ ’مجھے برطانوی سائنسدانوں پر فخر ہے۔‘
’اب یہ دوا این ایچ ایس پر دستیاب ہو گی۔‘
انھوں نے کہا کہ ہم نے ایسے اقدامات کیے ہیں کہ ہمارے پاس اس کی کافی سپلائی ہو، وبا کے دوسرے عروج کی صورت میں بھی۔‘
یاد رہے کہ برطانیہ میں ماہرین کا کہنا ہے کہ کووڈ۔19 جیسے مہلک وائرس کے خلاف جنگ میں کم قیمت والی سٹیرائڈ دوا ڈیکسامیتھازون سے کامیاب علاج ہو سکتا ہے۔
مانچیسٹر سٹی کے مینیجر پیپ گارڈیولا نے کورونا وائرس کی وجہ سے ہلاک ہونے والی اپنی ماں کے متعلق بات کی ہے۔
82 سالہ ڈولرز سالا کیریو کا اپریل میں کورونا وائرس کی وجہ سے انتقال ہو گیا تھا۔ ان کی موت سے کچھ ہفتے قبل گارڈیولا نے وبا کی روک تھام میں مدد کے لیے 11 لاکھ ڈالر کا چندہ دیا تھا۔
سپین کے کیٹالونیا علاقے سے تعلق رکھنے والے فٹبال کے باس نے کہا کہ ’جو میں ذاتی طور پر رہ رہا ہوں وہ اسی طرح ہے جس طرح ہر کوئی رہتا ہے۔‘
’ہم نے جن لوگوں کو بھی کھویا ہے وہ اپنے خاندانوں کے لیے اہم تھے۔ اسی لیے ہماری خاندان ہوتے ہیں کہ اکٹھے رہیں، مضبوط رہیں۔‘
پاکستان کے زیر انتظام کشمیر کے حکام کے مطابق گذشتہ 24 گھنٹوں کے دوران 19 خواتین سمیت 40 افراد میں کورونا وائرس کی تشخیص ہوئی ہے جس کے بعد اس خطے میں کورونا وائرس سے متاثر ہونے والے افراد کی تعداد 703 ہوگئی ہے۔
ضلع مظفرآباد کے ہیلتھ آفیسر ڈاکٹر سعید کے مطابق دارالحکومت مظفرآباد میں آٹھ خواتین سمیت 19 افراد کورونا وائرس سے متاثر ہوئے ہیں۔
میرپور ڈویژن کے کمشنر محمد رقیب خان کے مطابق وائرس سے متاثر ہونے والیچھ خواتین سمیت 10 افرادکا تعلق بھمبر سے جبکہ چار افرادکا تعلق میرپورسے ہے۔
ڈپٹی کمشنر راولاکوٹ مرزا ارشد جرال کے مطابق راولاکوٹ سے تعلق رکھنے والی چار خواتین میں کورونا وائرس کی تشخیص ہوئی۔ جبکہ ضلع باغ کے ہیلتھ آفیسر ڈاکٹر منظور کے مطابق کورونا وائرس سے ایک خاتون متاثر ہوئی ہے۔
حکام کے مطابق گذشتہ 24 گھنٹوں کے دوران کورونا کے 26 مریض صحتیاب ہوئے ہیں جس کے بعد اس خطے میں صحتیاب مریضوں کی تعددا 290 ہوگئی ہے۔ حکام کے مطابق اب تک 11727 مشتبہافراد کے ٹیسٹ لیے گے ہیں۔
برطانیہ میں گھوڑ دوڑ کے مداح آج گھروں سے ہی رائل ایسکوٹ دیکھ سکیں گے، کیونکہ کورونا وائرس کی وجہ سے بڑے ہجوم پر پابندی ہے۔
گھوڑ دوڑ کے مداح یہ دوڑ اپنے ٹی وی پر دیکھ سکیں گے لیکن اس سے ان کے رائل ایسکوٹ کے لیے تیار ہونے کی خواہش ختم نہیں ہوئی۔
لوگ سوشل میڈیا پر اپنے رائل ایسکوٹ کے لباس کی تصاویر ہیشٹیگ SharedWithThanks and #hatsfromhome# استعمال کرتے رہے لگا رہے ہیں۔
پاکستان کے صوبہ خیبر پختونخوا کے محکمہ صحت نے صوبے میں کورونا کے مریضوں کے لیے گذشتہ دس روز میں ہسپتالوں میں 32 وینٹی لیٹر آراستہ بستروں جبکہ 144 ہائی ڈیپینڈنسی یونٹ کا اضافہ کیا ہے۔
محمکمہ صحت نے اس کی تفصیلات شئیر کرتے ہوئے ٹویٹ کیا جس کے مطابق ان میں سے 19 وینٹی لیٹر آراستہ بستر اور 11 ہائی ڈیپینڈنسی یونٹس کا اضافہ پشاور کے لیڈی ریڈنگ ہسپتال میں کیا گیا ہے۔
اسی طرح پانچ وینٹی لیٹر حیات آباد میڈیکل کمپلکس میں دئیے گئے ہیں۔ جبکہ 36 ہائی ڈیپینڈنسی یونٹس کا اضافہ خیبر ٹیچنگ ہسپتال میں کیا گیا ہے۔
اس کے علاوہ دیگر ہسپتالوں کو دی جانے والی سہولیات کی تفصیلات بھی جاری کی گئی ہیں۔
پاکستان کے صوبہ پنجاب ہیلتھ کیئر کمیشن نے نجی ہسپتالوں کو کووڈ- 19 کے مریضوں کے علاج معالجہ کے ریٹس آویزاں کرنے کے احکامات جاری کر دیے ہیں جو کہ فروری2020کے چارجزکے مطابق ہوگے۔
اس سلسلہ میں ایک مراسلہ جاری کیا گیا ہے جس کے مطابق تمام نجی ہسپتالوں کو ہدایات دی گئی ہیں کہ کورونا کے مریضوں کے روزانہ کے چارجز بشمول بستر، کمرہ، ہائی ڈیپینڈنسی یونٹ، انتہائی نگہداشت یونٹ، وینٹی لیٹر اور ایکٹیمرا انجیکشن (جہاں لگایاجا رہا ہو) ہسپتال میں نمایاں جگہ پر آویزاں کیے جائیں۔
مزید برآں ریٹس کی فہرست ہسپتالوں کی ویب سائٹس پر بھی پوسٹ کی جائے۔ کمیشن کی جانب سے نجی ہسپتالوں کو یہ حکم بھی دیا گیا ہے کہ اس برس فروری کے ریٹس سے زائداخراجات کی وصولی ہرگزنہ کی جائے۔
کمیشن نے ہسپتالوں کویہ تنبیہ بھی کی ہے کہ ہدایات پر عدم عملدرآمد کی صورت میں سخت تادیبی کارروائی کی جائے گی۔
ترجمان کے مطابق کمیشن کی ٹیمیں ہسپتالوں کا معائنہ کر رہی ہیں اور کوئی بھی ہسپتال خلاف ورزی کرتا ہوا پایا گیا تو سخت ایکشن لیا جائے گا۔
برطانیہ میں کورونا وائرس کے انفیکشنز سے مزید 233 افراد ہلاک ہو گئے ہیں۔
اس طرح ان لوگوں کی تعداد جن میں کورونا وائرس کا ٹیسٹ مثبت آیا تھا لیکن بعد میں ہلاک ہو گئے، 41,969 ہو گئی ہے۔
صوبہ بلوچستان کے وزیر اعلیٰ جام کمال کے فوکل پرسن برائے تدراک کورونا وائرس میر عمیر محمدحسنی خود کورونا سے متاثر ہوگئے ہیں۔
اپنے ایک ٹوئٹر پیغام میں میر عمیر محمد حسنی نے کہا ہے کہ ان کا کورونا کا ٹیسٹ مثبت آگیا ہے۔ اور کورونا وائرس کا ٹیسٹ پازیٹو آنے کے بعد انھوں نے خود کو قرنطینہ کر لیا ہے۔
اپنی ٹویٹ میں انھوں نے لکھا کہ وائرس ابھی ابتدائی مرحلے میں ان پر حملہ آور ہوا ہے۔انھوں نے اس امید کا اظہار کیا ہے کہ وہ جلد صحت یاب ہوں گے۔
ڈپٹی کمشنر ایبٹ آباد کے مطابق ایبٹ آباد میں کورونا کے مریضوں کی تعداد میں اضافے کے بعد سمارٹ لاک ڈاون کی پالیسی کے تحت ضلع میں 6 یونین کونسلوں کو بند کر دیا گیا ہے۔
ان کا کہنا تھا کہ جن علاقوں میں وائرس کی موجودگی ہے ان علاقوں میں سمارٹ لاک ڈاون لگا رہے ہیں۔ ضلعی انتظامیہ اپنے اقدامات سے کورونا کے پھیلاو کو روکنے کے لیے حکمت عملی بنا رہی ہے۔
انھوں نے بتایا کہ لاک ڈاؤن والے علاقوں کے رہائشی صرف آشیاء ضرورت خریدنے کے لیے ہی کچھ وقت کے لیے گھروں سے باہر آسکیں گے۔
تاہم بند کی جانے والی یونین کونسلوں کے مقامی افراد کو ہسپتال اور ادویات خریدنے کے لیے باہر نکلنے کی اجازت ہوگئی۔
ڈپٹی کمشنر ایبٹ آباد کا کہنا ہے کہ عوام سماجی فاصلوں کو یقینی بنائیں اور احتیاطی تدابیر اپناتے ہوئے کورونا وائرس کو شکست دیں۔