آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا میں کورونا کے مصدقہ متاثرین کی تعداد 56 لاکھ 18 ہزار سے زیادہ جبکہ ہلاکتوں کی تعداد ساڑھے تین لاکھ سے تجاوز کر گئی ہے۔ پاکستان میں متاثرین کی تعداد 60 ہزار کے قریب ہے۔ کراچی کے این آئی بی ڈی میں جمعرات سے کورونا اینٹی باڈی ٹیسٹنگ کا آغاز متوقع ہے جبکہ پنجاب میں عید کے بعد کاروبار صرف پیر تا جمعرات کھلیں گے۔
وزیر اعلی سندھ نے کہا کہ ان پر اکثر تنقید ہوتی ہے کہ وہ کڑی باتیں کرتے ہیں لیکن وہ تو صرف حقیقت بتانے میں یقین رکھتے ہیں۔
انھوں نے کہا کہ عید آ رہی ہے اور عید کے موقعے پر لوگ ایک دوسری سے ملتے ہیں اور مٹھائیاں اور تحفے بانٹتے ہیں۔ ان کا کہنا تھا کہ اس عید پر ہم سب کی ذمہ داری ہے کہ پیرامیڈیکل سٹاف کو عید کا تحفہ دیا جائے اور گھر میں رہا جائے۔
وزیر اعلی سندھ نے اپنی پریس کانفرنس میں کہا کہ کل جمعتہ الوداع ہے پھر عید ہے اور وہ ان مبارک دنوں کو فرنٹ لائن ورکرز کے نام کرنا چاہتے ہیں۔
ان کے مطابق صوبے میں 364 طبی اہلکار کورونا وائرس کے باعث بیمار ہوئے جن میں سے 27 صحتیاب ہوئے اور سات ہلاک ہوگئے۔
وزیر اعلی سندھ مراد علی شاہ اس وقت ایک پریس کانفرنس سے خطاب کر رہے ہیں۔
انھوں نے کہا ہے کہ لاک ڈاؤن سے ہمیں بہت فائدہ ہوا۔ 26، 27 فروری کو بنائی ٹاسک فورس نے جو قدم اٹھائے ان سے بہت فائدہ ہوا اور انھیں اقدامات کی دیگر صوبوں نے پیروی کی۔
اب سے کچھ دیر قبل ہم نے آپ کو ایک دوا ساز کمپنی کے ویکسین بنانے کے دعوے کے حوالے سے خبر دی تھی۔
تاہم اب ایک امریکی سائسندان کا بیان سامنے آیا ہے جس کے مطابق ہمیں کووڈ 19 کے لیے کامیاب ویکسین کی جلد تیاری کی کوئی امید نہیں رکھنی چاہیے۔
خبر رساں ادارے روئٹرز کی ایک رپورٹ کے مطابق امریکی سائنسدان ولیم ہیسل ٹائن کا کہنا ہے کہ متبادل طریقوں سے وائرس کا مقابلہ ممکن ہے، مثلاً کانٹیکٹ ٹریسنگ وغیرہ۔
انھوں نے عوام پر زور دیا کہ وہ ماسک پہنیں، اپنے ہاتھ باقاعدگی سے دھوئیں، ایک دوسرے سے مناسب فاصلہ برقرار رکھیں اور تمام سطحوں کو صاف کرتے رہیں۔
’ممکن ہے کہ کوئی ویکسین دریافت ہو جائے لیکن مجھے اس کی خاص امید نہیں۔‘
کورونا وائرس کی عالمی وبا نے ہماری روزمرہ کی زندگی میں کئی نئے الفاظ اور اصطلاحات متعارف کرائی ہیں، چاہے بات قرنطینہ، وائرس، مدافعت یا سماجی فاصلے کی ہو۔ لیکن آخر ان سب اصطلاحات کا مطلب کیا ہے؟
ان تمام اصطلاحات کے معنی جاننے کے لیے آپ ہمارا ’کورونا وائرس مترجم‘ ٹول استعمال کر سکتے ہیں۔
خبر رساں ادارے اے ایف پی کے انفو گرافک کے مطابق ایشیا کے ممالک میں کورونا وائرس کے باعث ہونے والی اموات کے حوالے سے پاکستان کا چوتھا نمبر ہے۔
لیکن دوسری جانب دیکھا جائے تو جہاں دیگر ایشیائی ممالک میں وائرس کے باعث ہونے والی اموات کی تعداد میں کمی آ رہی ہے وہیں پاکستان، انڈیا اور افغانستان میں یہ شرح خطرناک رفتار سے بڑھ رہی ہے۔
آسٹریلیا کے سب سے کم آبادی والے شمالی علاقہ جات میں کورونا کے آخری مریض کی صحتیابی کے بعد خطے کو وائرس سے پاک قرار دے دیا گیا ہے۔
اس دور دراز علاقے سے وائرس کے صرف 29 کیسز سامنے آئے تھے اور یہیں سے مئی میں لاک ڈاؤن کا سلسلہ شروع ہوا تھا تاہم اب زیادہ تر کاروبار سماجی دوری کی پابندیوں کے ساتھ کھل گئے ہیں۔
تاہم شمالی علاقے نے اب تک باقی ملک کے لیے اپنی سرحدیں بند کر رکھی ہیں۔
آسٹریلیا میں اس وقت کووڈ 19 کے صرف 600 مریض باقی ہیں اور ملک تیزی سے لاک ڈاؤن سے باہر آ رہا ہِے۔
روس کے سرکاری اعدادوشمار کے مطابق ملک میں اب تک کورونا وائرس کے باعث 3,099 افراد ہلاک ہو چکے ہیں۔
حکام نے بتایا کہ گذشتہ 24 گھنٹوں کے دوران 127 افراد ہلاک ہوئے جبکہ متاثیرین کی تعداد میں 8,849 مریضوں کا اضافہ ہوا۔
روس میں کورونا وائرس سے متاثرہ افراد کی کُل تعداد 317,554 ہے۔
پاکستان کے وزیر داخلہ اعجاز شاہ نے عوام سے اپیل کی ہے کہ کورونا وائرس کے پھیلاؤ سے بچنے کے لیے جمعۃ الوداع اور عید کی نمازوں کے موقع پر حکومت کی جانب سے جاری احتیاطی اصولوں پر عمل کریں۔
ریڈیو پاکستان کے مطابق انھوں نے کہا کہ لوگ ماسک پہنیں، سماجی دوری کا خیال رکھیں اور مساجد میں نماز کے دوران دیگر احتیاطی ردابیر پر عمل کریں۔
ان کا کہنا تھا کے وزیر اعظم عمران خان نے غریبوں کے لیے روز گار کے حصول میں مدد کے لیے لاک ڈاؤن میں نرمی کی ہے۔
ان کا مزید کہنا تھا کہ لاک ڈاؤن میں نرمی کا مطلب ہرگز یہ نہیں کہ وبا ختم ہو چکی ہے۔ ہم تب تک اس پر قابو نہیں پا سکتے جب تک اس کی ویکسین یا دوا ایجاد نہیں کر لی جاتی۔
دوا ساز کمپنی ایسٹرو زینیکا نے اعلان کیا ہے کہ اس کی کورونا وائرس کے لیے ایک ممکنہ ویکسین ستمبر تک تیار ہو جائے گی۔
کمپنی کے مطابق اس نے آکسفورڈ یونیورسٹی کے اشتراک سے ویکسین کی 40 کروڑ خوراکیں بنانے کا معاہدہ طے کر لیا ہے۔
ایسٹرو زینیکا کا دعوی ہے کہ وہ اگلے 24 ماہ میں ویکسین AZD1222 کی 100 کروڑ خوراکیں تیار کر سکتے ہیں تاہم ان کا ماننا ہے کہ یہ ویکیسن ابھی تجرباتی مرحلے میں ہے اور ممکن ہے کہ یہ کام نہ کرے۔
کمپنی نے بتایا کہ وہ اس حوالے سے سیرم انسٹی ٹیوٹ آف انڈیا اور دیگر ممکنہ شراکت داروں سے ساتھ بات چیت کر رہے ہیں۔
سائنسدانوں نے خبر دار کیا ہے کہ اگر کوئی ویکسین بنتی بھی ہے تو ہو سکتا ہے وہ پوری طرح مؤثر نہ ہو تام اس کے باوجود کئی کمپنیاں ویکسین کی تلاش میں دن رات ایک کر رہی ہیں۔
پاکستان کے دیگر علاقوں کی طرح صوبہِ سندھ میں بھی کورونا وائرس سے بچاؤ کے لیے جزوی لاک ڈاؤن کیا جا رہا ہے۔
شہروں کے ساتھ ساتھ سندھ کے دیہات کی زندگی کس طرح پابندیوں سے متاثر ہو رہی ہے، دیکھیے ضلع بدین کے ایک چھوٹے سے گاؤں محمد خان نظامانی سے زاہد نظامانی کے اِس وی لاگ میں۔
چین کے دارالحکومت بیجنگ میں آج سے ملک کی پارلیمان کا اجلاس شروع ہو رہا ہے۔
یہ ملک کا سب سے اعلی سطح کا مشاورتی ادارہ ہے اور خیال کیا جاتا ہے کہ یہ ملک کی کمیونسٹ پارٹی کے فیصلوں کی تاید کرتا ہے۔
عام طور پر قومی عوامی کانگریس کا اجلاس مارچ میں منعقد ہوتا ہے لیکن اس سال کورونا وائرس وبا کے بعث اسے ملتوی کر دیا گیا تھا۔ یہ 1995 کے بعد پہلا موقع ہے کہ یہ اجلاس تاخیر کا شکار ہوا ہو۔
کسے معلوم تھا کہ انڈیا کے سب سے جانے مانے کرکٹر سچن تندولکر اچھے بال بھی کاٹتے ہوں گے؟
ملک بھر میں حجام کی دکانوں کی بندش کے باعث سچن نے اپنے بیٹے کی حجامت بنانے کا کام اپنے ذمے لے لیا اور نتیجے میں سامنے آنے والا ہیئر سٹائل، بز کٹ، اتنا بُرا نہیں تھا۔
انھوں نے انسٹا گرام پر اپنی پوسٹ کے ساتھ لکھا: ’ایک والد ہونے کے ناطے آپ کو سب کچھ کرنا ہوتا ہے۔۔۔‘
تاہم انھوں نے اقرار کیا کہ ان کی بیٹی سارہ نے ان کی اس کام میں مدد کی۔
سچن کے انسٹا گرام پر دو کروڑ سے زیادہ فالوورز بھی ان کی ویڈیو سے خوب محظوظ ہوئے۔
جاپان کا کہنا ہے کہ اوساکا، کیوٹو، اور ہیوگو میں نافذ ایمرجنسی ختم کی جا رہی ہے کیونکہ وہاں وائرس سے متاثرہ افراد کی تعداد میں کمی واقع ہوئی ہے۔
وزیر اقتصادیات یاسوتوشی نشیمورا کا کہنا تھا کہ ان علاقوں میں نئے کیسز کا تناسب ایک لاکھ میں 0.5 سے کم ہے۔
ملک کے بیشتر علاقوں میں ہنگامی حالت پہلے ہی ختم کر دی گئی ہے تاہم دارالحکومت ٹوکیو سمیت چار علاقوں میں ابھی اس کا نفاذ قائم ہے۔
ٹوکیو میں نئے کیسز کی شرح ایک لاکھ میں 0.59 ہے۔
ہنگامی حالت کے تحت گرونرز کو اختیار حاصل ہے کہ وہ کاروبار بند رکھوا سکیں اور لوگوں کو گھروں تک محدود رھیں۔ تاہم اس پر عمل د آمد نہ کرنے والوں کے خلاف کوئی قانونی دفع نہیں لگتی۔
امریکہ کے صدر ڈونلڈ ٹرمپ نے ایک بار پھر چین کو تنقید کا نشانہ بنانے کے لیے ٹوئٹر کا سہارا لیا ہے۔
تازہ ٹویٹ میں ان کا کہنا ہے کہ چین ’بہت آسانی سے اس طاعون کو روک سکتے تھے لیکن انھوں نے ایسا نہیں کیا
اگرچہ انھوں نے چین کے صدر شی جن پنگ کا نام نہیں لیا تاہم ان کا کہنا تھا ’یہ سب اوپر سے کیا گیا۔‘
انھوں نے ایک بار پھر دہرایا کے چین ڈیموکریٹک پارٹی کے نامزد امیدوار جو بائیڈن کو آئندہ انتخابات میں کامیاب دیکھنا چاہتا ہے تاکہ وہ ’امریکہ کی دھجیاں بکھیرنا جاری رکھ سکیں جیسا کہ وہ میرے آنے سے پہلے دہائیوں سے کر رہے ہیں۔‘
وفاقی وزیر ریلوے شیخ رشید نے ایک ویڈیو بیان میں بتایا ہے کہ محکمے کے آن لائن ٹکٹنگ نظام میں خرابی کے باعث صارفین کو انٹرنیٹ پر ٹکٹ حاصل کرنے میں دشواری ہو رہی ہے۔
ان کا کہنا تھا کہ اس لیے ملک کے متعدد شہروں میں ریلوے سٹیشنز پر ٹکٹ خریدنے والوں کے لیے ایک ایک کھڑکی صبح آٹھ بجے سے شام پانچ بجے تک کھولی جا رہی ہے۔ وزیر کے مطابق یہاں تمام تر سرکاری ایس او پیز کو مدنظر رکھا جائے گا۔
ان شہروں میں راولپنڈی، لاہور، کراچی، ملتان، سکھر، پشاور اور کوئٹہ شامل ہیں۔
دنیا میں کورونا وائرس سے متاثر ہونے والے افراد کی تعداد پچاس لاکھ سے تجاوز کر گئی ہے۔
امریکہ کی جانز ہاپکنز یونیورسٹی کے اعدادوشمار کے مطابق دنیا میں کورونا وائرس سے ہلاک ہونے والوں کی تعداد 328,172 ہے جبکہ 1,899,350 افراد اب تک اس مرض سے صحتیاب ہونے میں کامیاب ہوئے ہیں۔
دنیا کی سب سے کامیاب سماجی رابطوں کی ویب سائٹ کے بانی مارک زکربرگ نے کہا ہے کہ فیس بُک سے کورونا وائرس کے حوالے سے لگائی گئی جھوٹی معلومات ہٹا دی جائیں گی۔
بی بی سی کے سائن جیک کے ساتھ انٹرویو میں انھوں نے بتایا: ’یہ کہنا کہ کوئی چیز وائرس کا مصدقہ علاج ہے جبکہ ایسا نہیں ہے، ہم ایسے مواد کو ہٹا دیں گے۔‘