کورونا: برطانیہ کا ویکسین کے لیے 84 ملین پاؤنڈز دینے کا اعلان، بلوچستان میں 148 نئے متاثرین

لائیو کوریج

1. 15 مئ 2020فلپائن: سمندری طوفان کا خطرہ، ڈیڑھ لاکھ افراد شیلٹرز میں پناہ لینے پر مجبور

   فلپائن سے ٹکرانے والے ایک طاقتور سمندری طوفان نے تقریباً ڈیڑھ لاکھ لوگوں کو تنگ پناہ گاہوں میں جمع ہونے پر مجبور کر دیا ہے جس سے کورونا وائرس کے پھیلاؤ کے خدشات میں آصافہ ہو رہا ہے۔

   طوفان ونگ فونگ اپنے ساتھ تیز بارشیں لے کر آیا ہے۔ اطلاعات کے مطابق فلپائن کے لاکھوں رہائشی اپنی گھروں میں محصور ہو کر رہ گئے ہیں لیکن تقریباً 141700 افراد اپنے گھر بار چھوڑ کر محفوظ مقامات میں منتقل کر دیے گئے ہیں۔

   حکام کے مطابق سماجی دوری کے مدنظر پناہ گاہوں کی صرف نصف گنجائش استعمال کی جارہی ہے اور ہر آنے والے کو ماسک فراہم کیے جا رہے ہیں۔ تاہم وبا کے پھیلاؤ کے بعد کئی پناہ گاہوں کو قرنطینہ مراکز میں تبدیل ک دیا گیا تھا جس سے امدادی کارووائیوں میں دشواری ہو رہی ہیں۔

2. 15 مئ 2020یہ آر نمبر کیا ہے اور اس کی اہمیت کیا ہے؟

   کورورنا وائرس کے خطرے کو سمجھنے کے لیے ایک سادہ لیکن نہایت اہم چیز ریپروڈکشن نمبر ہے جسے عرف عام میں اس کے مخفف ’آر‘ سے شناخت کیا جاتا ہے۔

   یہ نمبر دنیا بھر میں حکومتوں کی رہنمائی کر رہا ہے کہ وبا کے دوران انسانی جانیں بچانے کے لیے انھیں کیا کرنا چاہیے اور یہ ہمیں ایسے اشارے دینے کے لیے بھی استعمال ہوتا ہے کہ کس حد تک لاک ڈاؤن اٹھایا جا سکتا ہے۔ مزید دیکھیے ہماری اس ڈیجیٹل ویڈیو میں۔

3. 15 مئ 2020قومی اسمبلی کا اجلاس:’بلوچستان حکومت غریبوں میں راشن اور رقم سیاسی بنیادوں پر تقسیم کر رہی ہے‘

   بلوچستان سے رکن قومی اسمبلی اسلم بھوتانی نے قومی اسمبلی میں اپنی تقریر میں بلوچستان کی صوبائی حکومت پر تنقید کرتے ہوئے کہا ہے کہ صوبائی حکومت غریبوں میں راشن اور رقم کی تقسیم سیاسی بنیادوں پر کر رہی ہے۔

   ان کا کہنا تھا کہ جس طرح وفاقی حکومت کے احساس پروگرام میں تمام افراد کو بلاتفریق امداد کی جا رہی ہے اس طرح بلوچستان کی صوبائی بلاتفریق غریبوں کی مدد نہیں کر رہی۔

   انھوں نے بلوچستان کی صوبائی حکومت پر الزام عائد کرتے ہوئے کہا کہ صوبائی حکومت کی جانب غریبوں کو راشن اور امدادی رقوم کی تقسیم اس بنیاد پر کی جا رہی ہے کہ کس نے کس جماعت کو ووٹ دیا تھا۔

4. 15 مئ 2020سنگاپور: عازمین حج کو سعودی عرب جانے سے روک دیا گیا

   سنگاپور نے ملک بھر سے 900 عازمین حج کو اس سال سعودی عرب بھیجنے کا منصوبہ مؤخر کر دیا ہے۔

   تاہم سعودی عرب نے اب تک اس سال کے حج کے حوالے سے کوئی باضابطہ اعلان نہیں کیا۔

   سنگاپور کی اسلامی مذہبی کونسل نے کہا کہ عازمین میں سے 80 فیصد سے زیادہ ایسے افراد ہیں جن کی عمریں 50 برس سے زیادہ ہیں اور انھیں کورونا سے زیادہ خطرہ ہے۔

5. 15 مئ 2020قومی اسمبلی کا اجلاس: ’چین میں پھنسے پاکستانی طلبا کو 18 مئی کو وطن لایا جائے گا‘

   پاکستان کی قومی اسمبلی میں اب سے کچھ دیر پہلے اپنی تقریر میں حکومتی وزیر غلام سرور خان کا کہنا تھا کہ چین میں پھنسے پاکستانی طلبا کو 18 مئی کو خصوصی پرواز سے وطن واپس لایا جائے گا۔

   قومی اسمبلی میں اظہار خیال کرتے ہوئے ان کا کہنا تھا کہ حکومت کو بیرون ملک پھنسے اپنے شہریوں کا بالکل خیال ہے اور اس کے لیے حکومت ہر ممکن کوشش کر رہی ہے۔

6. 15 مئ 2020قومی اسمبلی کا اجلاس: ’پاکستان میں وائرس تیزی سے پھیل رہا ہے‘

   اس وقت پاکستان کی قومی اسمبلی کا اجلاس جاری ہے اور کورونا وائرس سے نمٹنے کے طریقوں پر بحث ہو رہی ہے۔ اب سے کچھ دیر پہلے اپنی تقریر میں مسلم لیگ ن کے رہنما احسن اقبال کا کہنا تھا پاکستان دنیا کا واحد ملک ہے جہاں کورونا تیزی سے پھیل رہا ہے اور ہم نے لاک ڈاون ختم کر دیا ہے۔

   پاکستان کی قومی اسمبلی کے اجلاس میں خطاب کرتے ہوئے ان کا کہنا تھا کہ حکومت کی کورونا کی وبا کے حوالے سے کوئی واضح پالیسی نہیں ہے۔ انھوں نے کہا کہ ’ماہرین کہہ رہے ہیں کہ آنیوالے دنوں میں کورونا میں اضافے کا خدشہ ہے۔‘

   ان کا مزید کہنا تھا کہ دنیا بھر میں لاک ڈاون ہوا بڑی تعداد میں کورونا ٹیسٹنگ کی گئی۔

7. 15 مئ 2020برازیل: ایک دن میں کورونا کے مریضوں کی تعداد میں ریکارڈ اضافہ

   برازیل میں جمعرات کو تقریباً 14 ہزار افراد میں کورونا وائرس کی تشخیص ہوئی ہے۔

   لاطینی امریکہ کے سب سے زیادہ آبادے والے ملک میں یہ ایک دن میں اب تک سامنے آنے والی سب سے بڑی تعداد ہے۔

   اس کے بعد ملک میں متاثرین کی کُل تعداد 202918 ہوگئی ہے جبکہ وائرس کے باعث 13933 افراد ہلاک ہو چکے ہیں۔

   ماہرین نے خبردار کیا ہے کہ برازیل میں کورونا کی وبا اپنے عروج کے قریب ہے تاہم صدر جائیر بولسونارو نے کاروباری حلقوں سے لاک ڈاؤن اٹھوانے کے لیے ریاستی حکومتوں پر دباؤ ڈالنے کا کہا ہے۔

8. 15 مئ 2020کورونا: پاکستان کی تازہ صورتحال

   اگر آپ ابھی ابھی ہمارے پیج پر آئے ہیں تو پاکستان سے خاص خبروں کا یہ خلاصہ ٰضرور پڑھ لیجیے!

   • پاکستان کے وفاقی دارالحکومت اسلام آباد میں گذشتہ 24 گھنٹوں میں کورونا کے 44 نئے مریض سامنے آئے ہیں، جبکہ ایک ہلاکت بھی ہوئی ہے۔ جس کے بعد شہر میں کل متاثرین کی تعداد 866 جبکہ ہلاکتیں سات تک پہنچ گئی ہیں۔ وفاقی دارالحکومت میں اب تک 100 مریض صحت یاب ہوئے ہیں۔
   • پاکستان کے زیر انتظام کشمیر میں گذشتہ 24 گھنٹوں میں 19 افراد کورونا وائرس سے متاثر ہوئے ہیں جو اس خطے میں ایک دن میں متاثر ہونے والے افراد کی اب تک کی سب سے بڑی تعداد ہے۔ ان میں سے چند متاثرین دارالحکومت مظفرآباد اور چند میر پور ڈویژن میں سامنے آئے ہیں۔
   • پاکستان کے صوبہ سندھ میں حکومت کی جانب سے دوپہر تین بجے تک لاک ڈاؤن کا اعلان کیا گیا ہے اور صوبے میں ہر قسم کے اجتماع اور جلسے جلوسوں پر پابندی عائد ہے۔

9. 15 مئ 2020کراچی: اجتماعات پر پابندیوں کے باوجود یوم علی کا جلوس برآمد

   کراچی میں یوم علی پر روایتی جلوس نشتر پارک سے برآمد ہوگیا ہے جو کاریڈور 2 اور ایمپریس مارکیٹ سے ہوتا ہوا ریگل چوک اور تبت سینٹر سے ایم اے جناح روڈ پر آئے گا۔

   اس کے بعد جلوس امام بارگاہ حسینیہ ایرانیہ تک جائے گا۔ جلوس برآمد ہونے سے قبل مجلس عزا بھی منعقد کی گی تھی۔

   نامہ نگار ریاض سہیل کے مطابق حکومت سندھ نے ہر قسم کے اجتماعات پر پابندی عائد کر دی تھی لیکن شیعہ تنظیموں نے اعلان کیا کہ یوم علی پر روایتی جلوس ہر صورت میں نکالے جائیں گے اور اس میں سماجی فاصلے کا خیال رکھا جائے گا۔

   اس سال جلوس میں گذشتہ برسوں کی نسبت شرکا کی تعداد کم ہے۔

   شہر میں پبلک ٹرانسپورٹ بند ہے جبکہ جمعہ کا دن ہونے کی وجہ سے لاک ڈاون میں نرمی بھی تین بجے کے بعد ہی ہوگی۔ اس کے علاوہ سندھ کے دوسرے بڑے شہر حیدرآباد میں بھی حوم علی کا جلوس نکالا جا رہا ہے جس میں انتظامیہ نے شرکا کی تعداد محدود رکھی ہے۔

10. 15 مئ 2020ڈاکٹر ظفر مرزا: آنے والے دنوں میں مریضوں کی تعداد میں اضافہ ہوگا

    اپنی پریس کانفرنس میں ڈاکٹر ظفر مرزا نے خدشہ ظاہر کیا کہ آنے والے دنوں میں پاکستان میں کورونا وائرس سے متاثر ہونے والے مریضوں کی تعداد میں مزید اضافہ ہوگا۔

    کورونا وائرس کے حوالے سے پاکستان کی سرکاری ویب سائٹ کے مطابق اس طرح ملک میں کورونا کے کل متاثرین کی تعداد 37220 ہو گی ہے جبکہ ہلاکتوں کی کل تعداد 803 ہے۔

    ملک کا سب سے متاثرہ صوبہ سندھ ہے جہاں کورونا کے مریضوں کی تعداد 14099 ہے، پنجاب میں 13914، خیبر پختونخوا میں 5423، بلوچستان میں 2310، وفاقی دارالحکومت اسلام آباد میں متاثرین کی تعداد 866 تک پہنچ گئی ہے۔

    جبکہ گلگت بلتستان میں 501 اور پاکستان کے زیر انتظام کشمیر میں کووڈ 19 کے مریضوں کی تعداد 105 ہے۔

    ملک میں کورونا کے مرض سے صحت یاب ہونے والوں کی کل تعداد 10155 ہے۔

    سرکاری اعداد و شمار کے مطابق گذشتہ 24 گھنٹوں میں ملک میں کل 13700 ٹیسٹ کیے گئے ہیں۔

    پاکستان میں مجموعی طور پر اب تک 344450 ٹیسٹ کیے جا چکے ہیں۔

11. 15 مئ 2020ڈاکٹر ظفر مرزا: کورونا کی دوا ریمڈیسیور چھ سے آٹھ ہفتوں میں تیار ہونا شروع ہو گی

    وزیر اعظم عمران خان کے معاون خصوصی برائے صحت ڈاکٹر ظفر مرزا نے کہا ہے کہ پاکستان میں چند ہفتوں میں کورونا وائرس کی دوا ریمڈیسیور کی تیاری شروع ہو جائے گی۔

    جمعہ کی صبح ایک پریس کانفرنس سے خطاب کرتے ہوئے ان کا کہنا تھا کہ دنیا میں ابھی تک کورونا وائرس کی کوئی ویکسین ہے نہ کوئی مستند علاج۔

    تاہم ان کے مطابق سات مارچ کو وزیراعظم نے دوا ساز کمپنی کے حکام سے میٹنگ کی تھی جس میں بتایا گیا ہے کہ اس دوا کے استعمال سے مرض کی شدت میں 30 فیصد کمی آتی ہے۔

    ڈاکٹر ظفر مرزا نے کہا کہ دنیا میں صرف پانچ کمپنیوں کو یہ دوا بنانے کا لائسنس دیا گیا ہے اور پاکستان سے یہ دوا 127 ممالک کو ایکسپورٹ بھی کی جاسکے گی۔

    ان کے مطابق ریمڈیسیور انجیکشن کی صورت میں دستیاب ہوگی۔

12. 15 مئ 2020چین کے شہر ووہان میں بغیر علامات والے متاثرین کی تلاش

    چین کے سرکاری میڈیا کے مطابق کورونا وائرس کے عالمی سطح پر پھیلاؤ کے مرکز چین کے شہر ووہان میں اپریل سے لے کر اب تک تقریباً 30 لاکھ شہریوں کے ٹیسٹ کیے گئے ہیں اور اب انتظامیہ نے اپنی توجہ باقی ماندہ 11 ملین کی آبادی کے ٹیسٹ کرنے پر مرکوز کر لی ہے۔

    چین کی سرکاری نیوز ایجسنی زنگوا کے مطابق ووہان میں اب ہر شہری کا ٹیسٹ کیا جائے گا تاکہ ایسے افراد کی نشاندہی کی جا سکے جو کورونا وائرس سے متاثر تو ہیں لیکن ان میں اس کی کوئی علامات نہیں ہیں۔ یہ اقدام اس کیے اٹھایا گیا ہے تاکہ شہر میں سکول اور کاروبار کھولنے میں مدد مل سکے۔

    ووہان میں ہونے والے ایک سرکاری اجلاس میں کہا گیا ہے کہ اس عمل میں سب سے پہلی ترجیح ان شہریوں کو دی جائے گی جن کے پہلے ٹیسٹ نہیں کیے گئے، یا ایسے افراد جو ان رہائشی علاقوں میں رہتےہیں جہاں پہلے کورونا کے متاثریب سامنے آئے تھے۔ اور اس کے ساتھ ساتھ بزرگ افراد اور زیادہ آبادی والے علاقوں میں بھی ٹیسٹ کیے جائیں گے۔

    ووہان میں ویک اینڈ پرایک مرتبہ پھر کورونا کے متاثرین سامنے آئے تھے جو آٹھ اپریل کا لاک ڈاؤن ختم کیے جانے کے بعد پہلے کیسز تھے۔ ملک میں نئے کیسز سامنے آنے کے بعد کورونا وائرس کے دوسرے مرحلے کے حملے کا خطرہ بڑھ گیا ہے۔

13. 15 مئ 2020میکسیکو میں ’وبا عروج پر‘

    جمعرات میکسیکو کے لیے کورونا وائرس کے پھیلاؤ کے حوالے سے سب سے بُرا دن تھا۔

    ملک کی وزارت صحت کے مطابق گذشتہ 24 گھنٹوں میں ملک میں کورونا کے 2400 نئے مریض سامنے آئے جبکہ 257 افراد ہلاک ہوئے۔

    اس کے ساتھ میکسیکو میں کورونا کے باعث ہلاک ہونے والوں کی کُل تعداد ساڑھے چار ہزار کے قریب ہے۔

    میکسیکو میں کورونا وائرس سے مقابلہ کرنے کے لیے بنائی گئی سرکاری تنظیم کے سربراہ ہیوگو لوپیز گاتیل کے مطابق ملک میں کورونا کی وبا اپنے عروج پر ہے اور سماجی دوری کی پابندیوں میں نرمی لانے کا سوال ہی نہیں پیدا ہوتا۔

14. 15 مئ 2020مرغیوں کا فضلہ کووڈ 19 کے خلاف جنگ میں کیسے استعمال ہو رہا ہے؟

    سویڈین کے ایک قصبے میں مرغیوں کے فضلے کو کووڈ 19 کے خلاف جنگ میں ایک ہتھیار کے طور پر استعمال کیا جا رہا ہے۔ یہ غیرمعمولی طریقہ کتنا مؤثر ثابت ہو رہا ہے؟

    دیکھیے ہماری اس ڈیجیٹل ویڈیو میں۔۔۔

15. 15 مئ 2020پاکستان: لاک ڈاؤن میں نرمی کے ایس او پی کیا ہیں؟

    پاکستان میں جب سے کورونا وائرس کے مریض سامنے آئے ہیں تب سے ایس او پیز کی گردان روزانہ میڈیا اور روز مرہ زندگی میں سنی جا رہی ہے۔ یہ ایس او پیز سٹینڈرڈ آپریٹنگ پروسیجر کا مخفف ہے اور عام الفاظ میں اس کا مطلب ایک معیار کے مطابق کام کرنے کا ضابطہ کار ہے۔

    ان ایس او پیز کا مطلب بنیادی طور پر ایسے اقدامات یا ایسا طریقہ کار وضع کرنا ہے جس پر عمل کر کے اس وائرس کو پھیلنے سے روکا جائے۔ یہ ایس او پیز قومی ادارہ صحت نے دیگر محکموں اور اداروں کی مدد سے تیار کیے ہیں اور انھیں وفاقی اور صوبائی حکومتوں نے اپنے اپنے طور پر جاری کیا ہے۔ قومی ادارہ صحت کی ویب سائٹ کے مطابق اب تک دو درجن کے قریب ایسے ایس او پیز جاری کیے جا چکے ہیں۔

    ان ایس او پیز یا رہنما اصولوں میں کورونا وائرس کے بارے میں نئے اور حیران کن انکشافات سامنے آنے کے بعد ترامیم کی جا رہی ہیں۔

    پاکستان میں کورونا وائرس کے باعث لگائے گئے لاک ڈاؤن میں نرمی کے حوالے سے کیا ایس او پی جاری کیے گئے ہیں؟ جاننے کے لیے کلک کیجیے

16. 15 مئ 2020کورونا وائرس کے مریضوں کو پیٹ کے بل کیوں لٹایا جاتا ہے؟, فرنینڈو پال، بی بی سی منڈو

    دنیا میں کووڈ 19 کے کیسز بڑھنے کے ساتھ ساتھ ہمارے ذہنوں میں ہسپتالوں کی تصاویر بھی نقش ہوئی ہیں۔

    لیکن جب ہم انتہائی نگہداشت کے شعبوں میں مریضوں کو سانس لینے میں مدد کے لیے جدید وینٹیلیٹروں کے ساتھ دیکھتے ہیں تو جو ایک چیز ہمیں بڑی عجیب لگتی ہے وہ یہ ہے کہ کیوں ان میں سے اکثر اپنے پیٹ کے بل الٹے لیٹے ہوئے ہیں۔

    اس پرانی تکنیک کو 'پروننگ' کہتے ہیں اور سامنے آیا ہے کہ یہ کچھ مریضوں کو جنھیں سانس لینے میں دشواری ہو رہی ہو مدد دیتی ہے۔

    یہ پھیپھڑوں میں زیادہ آکسیجن پہنچانے میں مدد کرتی ہے۔ لیکن اس تکنیک کے کچھ مسائل بھی ہیں۔

    مزید پڑھنے کے لیے کلک کیجیے

17. 15 مئ 2020’ریمڈیسیور‘ کی تیاری کے لیے امریکی کمپنی کے انڈین اور پاکستان کمپنیوں سے معاہدے

    ادویات تیار کرنے والی امریکہ کی ایک کمپنی نے کووڈ 19 کا علاج کرنے والی دوا 'ریمڈیسیور' کو وسیع پیمانے پر تیار کرنے کے لیے جنوبی ایشیا سے تعلق رکھنے والی پانچ دوا ساز کمپنیوں سے معاہدے کیے ہیں۔

    یہ معاہدے 'گیلیڈ' اور انڈیا اور پاکستان کی پانچ دوا ساز کمپنیوں کے درمیان طے پائے ہیں اور یہاں تیار کی جانے والی دوا دنیا کے 127 ملکوں کو فراہم کی جائے گی۔

    'ریمڈیسیور' کے دنیا کے کئی ہسپتالوں میں کیے جانے والے تجرباتی استعمال میں کورونا وائرس سے پیدا ہونے والی علامات کو پندرہ دن کے بجائے دس دن میں ختم کر دیا تھا۔

    وائرس کو ختم کرنے والی یہ دوا اصل میں ایبولا کے علاج کے طور پر تیار کی گئی تھی۔

    گیلیڈ کمپنی کی طرف سے جاری کردہ ایک بیان میں کہا گیا ہے کہ ان پانچوں کمپنیوں کو لائسنس کے تحت ریمڈیسویر بنانے کی ٹیکنالوجی فراہم کی جائے گی تاکہ اس دوا کی وسیع پیمانے پر تیاری کو ممکن بنایا جا سکے۔

    اس بیان میں مزید کہا گیا کہ ان لائسنس پر کوئی رائلٹی یا معاوضہ اس وقت تک نہیں لیا جائے گا جب تک عالمی ادارۂ صحت کووڈ 19 سے پیدا ہونے والی ہنگامی صورت حال ختم ہونے کا اعلان نہیں کر دیتا یا دوسری کوئی دوا یا ویکسین تیار اور علاج کے لیے منظور نہیں کر لی جاتی۔

    یہ معاہدے سپلا لیمیٹڈ ، فیروزسنز لیباٹری، ہیٹرو لیبز لیمیٹڈ، جوبیلینٹ لائف سائنسز اور میلن کے ساتھ طے ہوئے ہیں۔

    مزید پڑھنے کے لیے کلک کیجیے

18. 15 مئ 2020بی بی سی اردو کی کورونا وائرس کوریج جاری ہے!

    صبح بخیر اور بی بی سی اردو کی لائیو کوریج میں خوش آمدید۔ اس صفحے پر آپ کو پاکستان سمیت دنیا بھر سے کورونا وائرس سے جڑی ہر قسم کی خبریں، تجزیے اور معلوماتی ویڈیوز ملیں گی۔

    اگر آپ جاننا چاہتے ہیں کہ گذشتہ دو روز دنیا میں کیا کیا ہوا تو کلک کیجیے۔