آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
تازہ تحقیق میں بات سامنے آئی ہے کہ ادویات بنانے والی عالمی کمپنیوں فائزر اور بائیو این ٹیک کی ویکسین کورونا وائرس کی نئی اقسام کے خلاف بھی کارگر ہیں۔ ادھر جان ہاپکنز یونیورسٹی اور امریکی میڈیا کے جاری کردہ اعداد و شمار کے مطابق امریکہ میں پہلی بار ایک دن میں چار ہزار اموات ہوئی ہیں۔
یہ کہانی ہے ایسے افراد کی جن کے ازدواجی رشتے لاک ڈاؤن کے باعث دباؤ کا شکار ہو گئے۔
دنیا بھر میں کئی ممالک میں لاک ڈاؤن کے دوران طلاق کی شرح میں اضافہ ہوا ہے، بی بی سی نے مختلف ممالک میں پانچ افراد سے بات کی۔۔۔
روس میں اتوار کے روز کورونا وائرس کے 29،039 نئے متاثرین سامنے آئے ہیں۔ ملک میں وبائی بیماری شروع ہونے کے بعد سے اب تک متاثرین کی کل تعداد 2،460،770 ہوگئی ہے۔
حکام نے گذشتہ 24 گھنٹوں کے دوران کورونا وائرس کے باعث 457 مزید اموات کی تصدیق کی ہے، جس سے سرکاری سطح پر ہلاکتوں کی تعداد 43،141 ہوگئی ہے۔
جنوبی کوریا میں کورونا متاثرین کی تعداد میں اضافے کے بعد کووڈ 19 خطرے کی سطح کو بڑھا دیا گیا ہے۔
منگل سے دارالحکومت سیئول اور آس پاس کے علاقوں میں 50 سے زائد افراد کے اجتماعات پر پابندی ہوگی جبکہ جم اور کراوکی بار بند کردی جائیں گی۔
اتوار کے روز ایک دن میں 631 نئے انفیکشن کی اطلاع ملی ، جو نو ماہ میں سب سے زیادہ ہے۔
اس سال کے شروع میں وقیع پیمانے پر جارحانہ انداز میں کی گئی ٹیسٹنگ اور کونٹیکٹ ٹریسنگ کے باعث، وائرس سے نمٹنے کے حوالے سے جنوبی کوریا کے ردعمل کی وسیع پیمانے پر تعریف کی گئی تھی۔
لیکن حالیہ ہفتوں میں حکام کو مشکلات کا سامنا رہا ہے۔ جنوبی کوریا میں اب فعال کیسوں کی تعداد 7873 ہے، اور ہسپتالوں میں مریضوں کی تعداد بڑھنے کے خدشات ہیں۔
اب تک جنوبی کوریا میں کورونا وائرس کے 37،546 متاثرین اور 545 اموات ہوئیں ہیں۔
نئی اور مسلسل کھانسی:ایک گھنٹے سے زیادہ تک آنے والی کھانسی یا چوبیس گھنٹوں میں تین مرتبہ کھانسی کے دورے۔
بخار:37.8 سیلسیئس یا 100 فارن ہائٹ کا بخار
سونگھنے اور چکھنے میں فرق:سونگھنے اور چکھنے کی حِس ختم ہونا یا پہلے سے مختلف ہو جانا۔
انگلینڈ کے محکمہ صحت عامہ کا کہنا ہے کہ کووڈ سے متاثر ہونے والے 85 فیصد لوگوں میں کم از کم ایک علامت ظاہر ہوئی۔
اگر آپ میں ان میں سے کوئی بھی علامت ظاہر ہوتی ہے تو جلد از جلد ٹیسٹ کروائیں اور کسی بھی وجہ سے گھر سے نہ نکلیں۔
کوئی بھی شخص جو آپ کے ساتھ رہتا ہو یا آپ پر انحصار کرتا ہو اسے بھی الگ تھلگ ہونا ہو گا کم از کم ٹیسٹ کے نتائج آنے تک۔
عموماً انفیکشن لگنے سے لے کر علامات ظاہر ہونے تک اوسطاً کم از کم پانچ دن لگتے ہیں لیکن عالمی ادارۂ صحت کا کہنا ہے کہ اس میں 14 دن بھی لگ سکتے ہیں۔
اگر ٹیسٹ مثبت آیا ہے تو گھر میں موجود تمام افراد کو خود کو الگ تھلگ کرنا ہو گا۔
مکمل سٹوری پڑھنے کے لیے اس لنک پر کلک کریں۔
کورونا کی دوسری لہر اور تیزی سے بڑھتے ہوئے کیسز کے مدد نظر صوبے بھر میں کورونا کے مریضوں کے علاج کے لیے مختص ہسپتالوں سمیت ایکسپوسنٹر لاہور میں کورونا فیلڈ ہسپتال کو بھی از سر نو فعال کر دیا گیا ہے۔
وزیر اعلیٰ پنجاب عثمان بزدار نے فیلڈ ہسپتال میں کورونا کے متاثرہ مریضوں کے علاج معالجے کی سہولتوں کا جائزہ لیا اور ہسپتال میں موجود ڈاکٹروں، نرسوں اور دیگر عملے سے ملاقات کی۔
اس موقع پر عثمان بزادار کا کہنا ہے کہ لاہور کورونا کی دوسری لہر سے بہت زیادہ متاثر ہو رہا ہے۔ تاہم طبّی سہولیات کی فراہمی کے لیے حکومت کی تمام تر تیاری مکمل ہے۔
ان کا کہنا ہے کہ جبکہ اس کام کے لیے محکمہ صحت کو ایک ارب روپے سے زائد کے فنڈز بھی فراہم کیے گئے ہیں۔ انھوں نے بتایا کہ اب دوبارہ ٹیچنگ ہسپتالوں کو جون 2020 کی پوزیشن پر بحال کر دیا گیا ہے جبکہ ہسپتالوں میں ایچ ڈی یوز کو واپس بحال کر دیا گیا ہے۔
اسلام آباد کی ضلعنی انتظامیہ نے دارالحکومت کی مرکزی مسجد فیصل مسجد کے اندرونی ہال کو سیل کر دیا ہے۔
نامہ نگار شہزاد ملک کے مطابق ضلعی انتظامیہ کی جانب سے فیصل مسجد کے اندرونی ہال کو سیل کردیا گیا مسجد کے اندرونی ہال میں باجماعت نماز ادا نہیں کی جاسکے گی۔
انتظامیہ کا کہنا ہے کہ گذشتہ نماز جمعہ میں ایس او پیز پر عملدرآمد نہیں گیا۔
نیشنل کمانڈ اینڈ کنٹرول سینٹر کی جانب سے جاری تفصیلات کے مطابق گذشتہ 24 گھنٹوں میں پاکستان میں 58 افراد کورونا وائرس کے باعث ہلاک ہوئے ہیں۔
ملک میں مجموعی ہلاکتوں کی تعداد 8361 بتائی گئی ہے جبکہ نئے مریضوں کی تعداد 3308 ہے۔
حکام کی جانب سے میڈیا کو ارسال کیے گئے تحریری بیان میں بتایا گیا ہے کہ اس وقت ملک میں کورونا کے کل کیسز کی تعداد 53126 ہے اور 24 گھنٹوں کے دوران مزید 41645 ٹیسٹ کیے گئے۔
کورونا وائرس سے صحت یاب ہونے والے مریضوں کی تعداد355012 بتائی گئی ہے۔ پاکستان کو صوبہ سندھ 13684 کیسز کے ساتھ سر فہرست ہے وہاں اب تک 3011 افراد ہلاک ہو چکے ہیں۔
خیبر پختونخوا کے دارالحکومت پشاور میں کورونا وائرس سے ایک اور ڈاکٹر ہلاک ہو گئے ہیں۔ کورونا وائرس سے مرنے والے ڈاکٹروں کی تعداد 25 ہوگئی ہے۔ ینگ ڈاکٹرز ایسوسی ایشن کے مطابق پروفیسر ڈاکٹر انور علی شاہ بنوری کورونا کے باعث نجی ہسپتال میں زیر علاج تھے۔
صوبے میں کورونا وائرس سے مرنے والے ڈاکٹرز کی تعداد 25 ہوگئی ہے۔
پراونشل ڈاکٹرز ایسوسی ایشن پشاور کے مطابق ڈاکٹر انورعلی شاہ خیبر میڈیکل کالج میں بایئو کیمسٹری کے پروفیسر تھے۔ ایسوسی ایشن کے مطابق خیبر پختونخوا حکومت نے تا حال کسی مرنے والے ڈاکٹر یا ہیلتھ ملازمین کو پکیج نہیں دیا۔
ڈاکٹرز کی تنظیم کا کہنا ہے کہ خیبر پختونخوا کے ڈاکٹرز اور ہیلتھ ملازمین تا حال کورونا رسک الاونس سے بھی محروم ہیں۔
فرنٹ لائن پر موجود عملے میں ڈاکٹرز نرسز اور دیگر طبی عملہ زیادہ وقت ان مریضوں کے ساتھ گزارتے ہیں جو کووڈ 19 وائرس سے متاثر ہوتے ہیں اور ان کی حالت تشویشناک ہوتی جاتی ہے۔ فرنٹ لائن پر موجود دیگر عملہ جیسے پولیس ،امدادی کارکن، صحافی اور دیگر افراد بھی ان مریضوں کے قریبی تعلق میں ضرور آتا ہے لیکن وہ ایک محدود وقت کے لیے ہوتے ہیں۔
خیال رہے کہ وزارت صحت کے 29 مئی کو جاری کیے گئے اعداد و شمار کے مطابق خیبر پختونخوا میں 249 ڈاکٹروں اور 97 نرسوں سمیت کم از کم 552 ہیلتھ کیئر ورکزر اس وائرس سے متاثر ہوچکے ہیں۔
پاکستان کے زیر انتظام کشمیر میں گذشتہ 24 گھنٹوں کے دوران مزید 59 افراد میں کورونا وائرس کی تصدیق ہوئی ہے۔ خطے میں کورونا وائرس سے متاثر ہونے والے 62 مریض صحت یاب ہوئے ہیں جبکہ اس عرصے میں دو ہلاکتیں بھی ہوئی ہیں۔ مرنے والوں کا تعلق ضلع کوٹلی اور باغ سے تھا۔
اس وائرس کے نئے متاثرین میں سے ضلع مظفرآباد میں دس، ضلع نیلم میں چار، ضلع پونچھ میں آٹھ، ضلع سدھنوتی میں چھ، ضلع میرپور میں 22 اور نو کا تعلق ضلع بھمبر سے ہے۔
پاکستان کے زیر انتظام کشمیر میں اب تک 86490 افراد کے کورونا وائرس کے شبے میں ٹیسٹ لیے گئے ہیں اور 7278 افراد میں کورونا وائرس کی موجودگی پائی گئی ہے، جن میں سے5629 افراد صحت یاب ہو چکے ہیں جبکہ1472 مریض زیر علاج ہیں۔ اس وائرس سے کل 177مریضوں کی موت ہوئی ہے۔
بھارت بائیوٹیک انٹرنیشنل کے صدر ڈاکٹر کرشنا ایلا بھی انڈین ویکسین بننے کی امید کر رہے ہیں۔
انڈیا کورونا ویکسین تیار کررہا ہے جسے بائیوٹیک انٹرنیشنل کوویکسین نام دیا گیا ہے۔ اس کے تیسرے مرحلے کے تجربات (آزمائشی) کے حوصلہ افزا نتائج سامنے آئے ہیں۔
حیدرآباد میں موجود ڈاکٹر کرشنا ایلا نے بی بی سی سے فون پر گفتگو کرتے ہوئے انھوں نے کہا: 'انڈیا میں کلینیکل ٹرائلز ایک بہت مشکل کام ہے۔ میں رضاکاروں کو مبارکباد پیش کرتا ہوں کیونکہ ہم انڈیا میں واحد کمپنی ہیں جو موثر ٹرائلز کرواتی ہیں۔ اس میں وقت لگے گا لیکن ہم عالمی اصولوں پر عمل پیرا ہیں۔'
ہر ویکسین کی موثر جانچ کا مطلب یہ ہے کہ جن لوگوں کے گروپ کو وہ ویکسین دی گئی ہے ان میں بیماری کی شرح میں کمی واقع ہوئی ہے۔
ماہرین کا دعویٰ ہے کہ جینیاتی اور نسلی پس منظر کے لحاظ سے یہ رینج مختلف ہوسکتی ہے۔ اسی لیے بڑی فارما کمپنیاں مل کر مختلف ممالک میں ٹیسٹ کرتی ہیں۔
چنانچہ ڈاکٹر ریڈی کی لیب روسی ویکسین سپوتنک- وی کی جانچ کر رہی ہے اور برطانیہ میں قائم آکسفورڈ یونیورسٹی کی ٹیم نے پونے میں سیرم انسٹی ٹیوٹ آف انڈیا کے ساتھ معاہدہ کیا ہے تاکہ وہ یہ ٹیسٹ کرائے۔
مارکیٹ میں موجود دکانداروں اور راہگیروں سے کورونا وائرس روکنے کے لیے کیے گئے ’سمارٹ لاک ڈاؤن‘ اور ’ایس او پیز‘ پر بات کی تو زیادہ تر لوگوں نے بات ہنسی میں اُڑا دی یا طنزیہ جواب دیے۔
ایک ٹائر شاپ سنبھالنے والے شخص مظہر علی سے جب اُن کے علاقے میں کورونا ایس او پیز پر عملدرآمد کے بارے میں پوچھا تو وہ مسکرا دیے اور کہا کہ آپ یہاں آس پاس خود دیکھ سکتے ہیں کہ کتنے لوگوں نے ماسک پہن رکھا ہے یا کتنے لوگوں نے ایک دوسرے سے فاصلہ برقرار رکھا ہوا ہے۔
انتظامیہ کا پشاور بھر میں کورونا ضابطہ اخلاق کی خلاف ورزی پر کریک ڈاؤن۔
اطلاعات کے مطابق انتظامیہ نے شہریوں کو بار بار نوٹس کے باوجود سیفٹی ماسک کا استعمال نہ کرنے، مارکیٹوں میں رش اور سماجی فاصلے کا خیال نہ رکھنے پر کاروائیاں کیں۔
بی آر ٹی سٹیشنوں اور بسوں میں سیفٹی ماسک استعمال نہ کرنے پر 23 افراد موقع پر جرمانہ کیا گیا۔
ضابطہ اخلاق کی خلاف ورزی پرصدر میں خیبر انصاف ریسٹورنٹ سیل کر دیا گیا۔
صدر کے بازاروں میں بغیر ماسک پہنے گھومنے پر 21شہریوں کو جرمانہ کیا گیا، 16 دکانیں سیل کر دی گئیں اس کے علاوہ دیگر بازاروں میں بھی متعدد دکانیں سیل کی گئیں۔
جمہوریہ کانگو میں طبّی عملے کو بڑھتے کورونا کیسز پر قابو پانے اور کورونا سے متاثر افراد کی مدد کرنے میں مشکلات کا سامنا ہے۔
طبی عملے کے بطابق اس کے پاس اب آکسیجن کا سٹاک ختم ہو رہا ہے، جبکہ ملک کے متعدد علاقوں میں آکسیجن کی سپلائی بھی مشکلات کا شکار ہے۔
انتظامیہ کے مطابق ملک کے دارلحکومت میں طویل دورانیے کی بجلی کی بندش کی وجہ سے آکسیجن کی معیاری پیداروار میں مشکلات درپیش ہیں۔
جمہوریہ کانگو میں حکومتی اعدادو شمار کے مطابق فعال کیسز کی تعداد تیرہ ہزار پانچ سو سے زیادہ ہے۔
ایران میں سرکاری اعداد و شمار کے مطابق کورونا وائرس سے ہلاکتوں کی تعداد 50 ہزار سے تجاوز کر چکی ہے۔
مشرق وسطیٰ میں ایران وبا سے سب سے زیادہ متاثر ہونے والا ملک ہے۔ ملک میں ایک روز میں مزید 321 اموات ریکارڈ کی گئی ہیں۔
سرکاری اعداد و شمار کے مطابق کورونا وائرس کے کیسز کی تعداد میں بارہ ہزار سے زائد کا اضافہ ہوا ہے جس کے بعد مریضوں کی تعداد 10 لاکھ سے بڑھ گئی ہے۔
ایران نے لاک ڈاؤن اور دکانوں کو کھولنے کے لیے مختلف اقدامات کے لیے توازن پیدا کرنے کی کوشش کی ہے۔ کیونکہ وہاں معاشی صورتحال پہلے ہی خراب ہے۔
کورونا وائرس کی ویکسین سامنے آنے کے بعد انٹرنیٹ پر اس عالمی وبا اور اس کی ویکسین کے بارے میں کئی غلط خبریں اور افواہیں گردش کرنے لگی ہیں۔ طبی ماہرین ان افواہوں کے خلاف ایک جنگ لڑ رہے ہیں تا کہ دنیا کو اس وبا سے نجات حاصل ہو سکے۔
پاکستان کے زیر انتظام کشمیر میں لاک ڈاؤن میں مزید ایک دن کی توسیع کر دی گئی ہے۔ یہاں گذشتہ ماہ 22 نومبر کو دو ہفتے کے لیے لاک ڈاؤن لگایا گیا تھا جس کی مدت کل رات تک تھی.
صحافی اورنگزیب جرال کے مطابق اس کا اطلاق سات اور آٹھ دسمبر پیر کی درمیانی شب رات بارہ بجے تک ہو گا۔