خیبر: باڑہ میں پولیس کمپاؤنڈ پر حملے میں ایک اہلکار اور دو دہشتگرد ہلاک, بلال احمد/ بی بی سی اردو، پشاور
خیبر پولیس کے ترجمان کا کہنا ہے کہ تحصیل باڑہ میں مسلح شدت پسندوں کے حملے میں ایک پولیس اہلکار ہلاک ہوا ہے۔
ادھر خیبر پختونخوا کے پولیس سربراہ اختر حیات نے کہا ہے کہ دو خودکش حملہ آوروں نے ضلع خیبر کی تحصیل باڑہ میں پولیس کمپاؤنڈ پر حملہ کیا۔
پشاور میں میڈیا ٹاک کے دوران آئی جی کے پی کا کہنا تھا کہ ’ایک حملہ آور نے فرنٹ گیٹ، دوسرے نے عقب سے عمارت میں داخلے کی کوشش کی۔
’پولیس کی جوابی فائرنگ میں دونوں خودکش حملہ آور مارے گئے، حملہ آوروں کو عمارت کے اندر داخل ہونے نہیں دیا گیا۔‘
وہ مزید کہتے ہیں کہ ’ڈی این اے ٹیسٹ کے لیے حملہ آوروں کے اعضا کے نمونے حاصل کر لیے گئے ہیں۔‘
ایک بیان میں خیبر پولیس کے ترجمان کا کہنا ہے کہ دہشت گردوں کی جانب سے ممکنہ طور پر پولیس کمپاؤنڈ پر خودکش حملہ کیا گیا مگر گیٹ پر موجود اہلکار انھیں بروقت کارروائی سے روکنے میں کامیاب رہے۔
ان کا کہنا ہے کہ پولیس اور حملہ آوروں کے درمیان فائرنگ کے تبادلے میں طیب آفریدی نامی ایک اہلکار ہلاک ہوا جبکہ چار اہلکار زخمی ہوئے ہیں۔
ان کا کہنا ہے کہ دہشتگروں کی جانب سے کیے گئے دھماکے کی وجہ سے عمارت اور گیٹ کو نقصان پہنچا ہے۔ ’حملہ آوروں نے اندر جانے میں ناکامی پر خود کو اُڑایا۔ حتمی طور پر تفتیش کے بعد ہی کچھ کہنا ممکن ہوگا۔‘
