سابق صدر آصف زرداری کے خلاف الزامات عائد کرنے کے مقدمے میں عوامی مسلم لیگ کے سربراہ شیخ رشید گرفتار

لائیو کوریج

1. 27 جنوری 2023فواد چوہدری سے متعلق بیان پر پرویز الہی کی معافی

   سابق وزیر اعلی پنجاب پرویز الہی نے پی ٹی آئی رہنما فواد چوہدری کی گرفتاری پر دیے بیان پر معافی مانگ لی ہے۔

   ٹوئٹر پر پیغام میں وہ کہتے ہیں کہ ’آج تقریر کے دوران پی ٹی آئی رہنما فواد چودھری کے متعلق جو گفتگو ہوئی اس پر معذرت خواہ ہوں۔ فواد چودھری کی پوری فیملی سے ہمارے دیرینہ تعلقات ہیں۔

   ’میرے بیان سے ان کی فیملی کو دُکھ پہنچا جس پر میں ان سے معذرت خواہ ہوں۔‘

   خیال رہے کہ پرویز الہی نے گذشتہ روز ایک بیان میں کہا تھا کہ اگر فواد چوہدری ’پہلے پکڑا جاتا تو ہمارا کام ہو جانا تھا۔‘ ان کا کہنا تھا کہ اگر پنجاب اسمبلی مدت پوری کرتی تو ’ن لیگ کے کپڑے بھی نہ نظر آتے۔‘ انھوں نے کہا تھا کہ ’میں نے خان صاحب کو کہا تھا آپ اسمبلی جب مرضی توڑ دیں، ان لوگوں نے خان صاحب کو غلط مشورہ دیا۔‘

2. 27 جنوری 2023کار سرکار میں مداخلت اور ڈکیتی کا الزام، سابق وزیر مملکت فرخ حبیب کے خلاف مقدمہ درج

   پاکستان تحریک انصاف کے رہنما اور سابق وزیر مملکت فرخ حبیب کے خلاف ڈکیتی اور کار سرکار میں مداخلت کے الزامات میں مقدمہ درج کیا گیا ہے۔

   تھانہ کوہسار کے پولیس افسر کی مدعیت میں یہ مقدمہ تھانہ فیروز والا شیخوپورہ میں درج کیا گیا جس میں کہا گیا ہے کہ فرخ حبیب نے نامعلوم مسلح افراد کے ساتھ گرفتار پی ٹی آئی رہنما فواد چوہدری کو چھڑوانے کی کوشش کی۔

   اس میں الزام عائد کیا گیا ہے کہ فرخ حبیب سمیت دیگر افراد نے ’اسلحہ آتشیں سے لیس ہو کر ہمارے ساتھ ڈکیتی کرتے ہوئے سرکاری اسلحہ و ایمونیشن سرکاری گاڑی اور وائر لیس سیٹ زبردستی چھینے، گرفتار برسفری ریمانڈ ملزم کو چھڑوانے اور کار سرکار میں مداخلت کرتے ہوئے نقصان پہنچانے کی کوشش کرتے ہوئے سخت زیادتی کی ہے۔‘

   مقدمے کے ردعمل میں فرخ حبیب کا ٹوئٹر پر کہنا ہے کہ ’میں نے تو ویسے بغیر نمبر پلیٹ کالے ویگو کو روکا تھا۔ عدالتی احکامات بتانے کے لیے۔ یہ پولیس کے ساتھ ڈکیتی کہا سے آگئی؟‘

   خیال رہے کہ سوشل میڈیا پر موجود ایک ویڈیو میں دیکھا جاسکتا ہے کہ فرخ حبیب اور تحریک انصاف کے کارکنان کی پولیس حکام کے ساتھ اس وقت تلخ کلامی ہوئی تھی جب وہ فواد چوہدری کو لے جا رہے تھے۔

3. 26 جنوری 2023نیا پاکستان ایسے نہیں بن سکتا کہ کسی سے مل کر پنجاب حکومت لے لیں: حماد اظہر

   اس کے کچھ دیر بعد سابق وزیرِ خزانہ و پی ٹی آئی رہنما حماد اظہر نے ایک پریس کانفرنس میں کہا کہ چوہدری پرویز الہٰی ان کے بزرگ اور پاکستان تحریکِ انصاف کے اتحادی ہیں۔

   اُنھوں نے کہا کہ پی ٹی آئی آج اگر پاکستان کی سب سے مقبول جماعت ہے تو اس کی وجہ ہے کہ پی ٹی آئی اور عمران خان نے روایتی سیاست کو رد کیا ہے۔ اُنھوں نے کہا کہ پی ٹی آئی جانتی تھی کہ اسمبلیاں توڑنا ایک مشکل راستہ ہے مگر حماد اظہر نے کہا کہ ملک میں جاری مسائل کے دوران وہ اسمبلیوں میں بیٹھے رہیں، یہ سیاست نہیں ہے۔

   حماد اظہر نے کہا ہے کہ عمران خان آج بھی سودے بازی کر لیں تو واپس اقتدار میں آ جائیں گے۔ اُنھوں نے کہا کہ یہ کہنا کہ فواد چوہدری کو پہلے اندر ہو جانا چاہیے تھا، فواد چوہدری تو قوم کے ہیرو بن گئے ہیں۔

   حماد اظہر نے کہا کہ جو نیا پاکستان پی ٹی آئی چاہ رہی ہے وہ اس طرح نہیں ہو سکتا کہ کبھی کسی سے مل کر پنجاب حکومت لے لیں اور نیچے ووٹ بینک ہے نہیں، جماعت ہے نہیں، چار لوگ ادھر سے ملائے، پانچ ادھر سے ملائے۔ اُنھوں نے کہا کہ عمران خان کی سیاست اس سے مختلف ہے۔

4. 26 جنوری 2023پرویز الہٰی: عمران خان کے ساتھیوں میں سے ایک پہلے گرفتار ہو جاتا تو کام آسان ہو جاتا

   چوہدری پرویز الہٰی نے پی ٹی آئی سربراہ عمران خان کے ساتھیوں کے بارے میں کہا ہے کہ اُنھوں نے عمران خان کو غلط مشورے دیے اور اگر ان میں سے ایک بندہ پہلے پکڑا جاتا تو ان کا کام آسان ہو جانا تھا۔

   لاہور میں ایک پریس کانفرنس سے خطاب کرتے ہوئے اُنھوں نے کہا کہ وہ چاہتے تھے کہ اسمبلیاں مدت پوری کریں اور مسلم لیگ (ن) بھی یہی چاہتی تھی، اگر ایسا ہو جاتا تو ’نون والوں کے کپڑے بھی نہیں ملنے تھے۔‘

   لیکن اُنھوں نے کہا کہ خان صاحب کے ساتھ بیٹھنے والے پارٹی کو لے ڈوبے۔

   چوہدری پرویز الہٰی نے دعویٰ کیا کہ مسلم لیگ (ن) کے کئی رہنماؤں نے اُنھیں کہا ہے کہ اچھا ہوا آپ نے اسمبلیاں توڑ دیں ورنہ ہمارا یہاں کچھ بھی نہیں بچنا تھا۔

   چوہدری پرویز الہٰی نے کہا کہ عمران خان آج بھی پاکستان کے مقبول ترین لیڈر ہیں اور اگلا الیکشن اُنھوں نے پی ٹی آئی کے شانہ بشانہ لڑنا ہے۔

5. 26 جنوری 2023بریکنگ, روپے کی قدر میں ریکارڈ تنزلی: انٹربینک میں ڈالر 24.54 روپے اضافے کے بعد 255 روپے کا ہو گیا

   پاکستان میں زرِ مبادلہ کی ایکسچینج کمپنیوں کی جانب سے ڈالر کی قیمت پر لگایا جانے والا کیپ ہٹائے جانے کے ایک روز بعد انٹربینک میں ڈالر کی قیمت میں اضافےاور پاکستانی روپے میں زبردست تنزلی کا سلسلہ جاری ہے۔

   جمعرات کی روز انٹربینک ریٹ 24.54 روپے کے اضافے کے بعد 255.43 روپے کا ہو چکا ہے۔

   یاد رہے کہ گذشتہ رات انٹربینک کا ریٹ 230.89 روپے پر بند ہوا تھا۔ ماہرین کے مطابق یہ ایک روز میں روپے کی تنزلی کا ایک نیا ریکارڈ ہے۔

6. 26 جنوری 2023انڈیا سے دعوت نامہ موصول ہوا ہے، سوچ بچار کے بعد شرکت کا فیصلہ کیا جائے گا: پاکستان

   پاکستان کی وزارت خارجہ کا کہنا ہے کہ انڈیا نے رواں برس مئی میں ہونے والی شنگھائی تعاون تنظیم کے وزرائے خارجہ کے اجلاس کے لیے پاکستان کو دعوت نامہ بھیجا ہے جس پر سوچ بچار کے بعد فیصلہ کیا جائے گا۔

   جمعرات کو ہفتہ وار پریس بریفنگ کے دوران وزارت خارجہ کی ترجمان نے ایک سوال کے جواب میں بتایا کہ ’پاکستان اور انڈیا دونوں ہی شنگھائی تعاون تنظیم کے ارکان ہیں اور اس بار انڈیا کونسل آف فارن منسٹرز اجلاس کی میزبانی کر رہا ہے جس میں بحیثیت چیئرمین انڈیا نے پاکستان کو بھی دعوت نامہ بھیجا ہے۔‘

   ترجمان کا مزید کہنا تھا کہ ’دعوت نامے کا جائزہ لیا جا رہا ہے اور اجلاس میں شرکت کے حوالے سے سوچ بچار کے بعد فیصلہ کیا جائے گا۔

7. 26 جنوری 2023پی ٹی وی حملہ کیس: دہشتگردی دفعات کے خلاف متفرق درخواست پر نوٹس جاری, شہزاد ملک، بی بی سی

   انسداد دہشتگری عدالت کے جج راجہ جواد عباس حسن کی عدالت نے پی ٹی وی، پارلیمنٹ حملہ کیس میں سابق وزیر اعظم عمران خان کی جانب سے دہشتگردی دفعات کے خلاف متفرق درخواست پر جواب کے لیے نوٹس جاری کر دیے ہیں۔

   جمعرات کو سماعت کے دوران عمران خان کی قانونی ٹیم کی جانب سے دہشتگردی کی دفعہ 23 اے تحت درخواست دائر کرتے ہوئے انسداد دہشتگردی عدالت کے دائرہ اختیار کو چیلنج کیا گیا۔

   عمران خان کے وکیل نعیم حیدر پنجوتھا نے کہا کہ انسداد دہشتگردی عدالت کا کیس نہیں بنتا، متعلقہ عدالت کو منتقل کیا جائے۔ ’پی ٹی وی پارلیمنٹ حملہ کیس میں دہشتگردی دفعات نہیں بنتی۔ پُرامن احتجاج کیا گیا تھا جس پر دہشتگردی کی دفعات لگائی گئیں۔ احتجاج آئینی دہارے میں رہتے ہوئے کیا گیا تھا۔‘

   عدالت نے پراسیکیوشن کو نوٹس جاری کرتے ہوئے آئندہ سماعت پر پراسیکیوشن سے درخواست پر دلائل طلب کر لیے اور سماعت 9 فروری تک کے لیے ملتوی کردی گئی۔

   یاد رہے کہ کیس میں چیئرمین پی ٹی آئی عمران خان کو مستقل حاضری سے استثنیٰ حاصل ہے۔

8. 26 جنوری 2023خیبر پختونخوا کی 15 رکنی نگران صوبائی کابینہ کا اعلان، صرف ایک خاتون شامل

   خیبر پختونخوا کے گورنر حاجی غلام علی نے صوبے کی 15 رکنی نگران کابینہ کے ناموں کی منظوری دے دی ہے۔

   نگران وزیراعلیٰ اعظم خان کی کابینہ میں شامل وزرا کے نام: عبدالعلیم قصوریہ، سید مسعود شاہ، حامد شاہ، ایڈووکیٹ سوال نذیر، بخت نواز، فضل الٰہی، عدنان جلیل، شفیع اللہ خان، شاہد خان خٹک، حاجی غفران، خوشدل خان ملک، تاج محمد آفریدی، محمد علی شاہ، جسٹس ارشاد قیصر اور منظور خان آفریدی ہیں۔

   نگران کابینہ میں صرف ایک خاتون شامل ہیں۔

9. 26 جنوری 2023روپے کی قدر میں زبردست تنزلی: انٹربینک میں ڈالر 11.11 روپے اضافے کے بعد 242 روپے کا ہو گیا

   پاکستان میں زرِ مبادلہ کی ایکسچینج کمپنیوں کی جانب سے ڈالر کی قیمت پر لگایا جانے والا کیپ ہٹائے جانے کے ایک روز بعد انٹربینک میں ڈالر کی قیمت میں اضافے کا سلسلہ جاری ہے۔

   جمعرات کی صبح 11 بجے ڈالر کا انٹربینک ریٹ 11.11 روپے کے اضافے کے بعد 242 روپے ہو چکا ہے۔ یاد رہے کہ گذشتہ رات انٹربینک کا ریٹ 230.89 روپے پر بند ہوا تھا۔

   دوسری جانب پاکستان سٹاک ایکسچینج میں بھی اضافے کا رجحان نوٹ کیا گیا ہے کے ایس ای 100 انڈیکس 830 پوائنٹس بڑھ کر 40 ہزار کی نفسیاتی حد عبور کر گیا ہے۔

   ڈالر پر عائد کیپ ہٹانے سے متعلق خبر پڑھنے کے لیے یہاں کلک کیجیے۔

10. 26 جنوری 2023عمران خان کی گرفتاری کا کوئی پلان نہیں لیکن انھیں خوف ہے: خواجہ آصف

    وزیر دفاع خواجہ آصف نے کہا ہے کہ حکومت نے سابق وزیر اعظم عمران خان کی گرفتاری کا کوئی منصوبہ نہیں بنایا۔

    جب جیو نیوز پر اینکر شاہزیب خانزادہ نے اس حوالے سے وزیر دفاع سے سوال کیا تو ان کا کہنا تھا کہ ’ایسا کوئی پلان نہیں لیکن جو خوف عمران خان کی آواز سے ظاہر ہو رہا تھا، وہ اس کی پیشگوئی کرنے کی کوشش کر رہے ہیں۔‘

    خواجہ آصف نے الزام لگایا کہ عمران خان ’عدلیہ پر دباؤ ڈالنے کی کوشش کر رہے ہیں۔ اداروں کی طرف اشارے کر کے انھیں دباؤ میں لانے کوشش کر رہے ہیں۔‘

    ان کا کہنا تھا کہ ’فواد صاحب نے فرمایا ہم ان کے گھروں تک پہنچیں گے۔۔۔ عمران خان اور اس کے حواریوں کے پاس کیا جواز بچا ہے کہ وہ قانون اور انصاف کی بات کریں۔‘

    وزیر دفاع نے کہا کہ ’آج قانون اس کے خلاف آپریٹ ہونا شروع ہوا ہے تو چیخیں نکل رہی ہیں۔ عدلیہ، اسٹیبلشمنٹ کو گالیاں۔۔۔ چار بینچ ٹوٹے، میری ضمانت کا کیس کوئی نہیں سنتا تھا۔‘

    فواد چوہدری کی گرفتاری کی ردعمل دیتے ہوئے انھوں نے دعویٰ کیا کہ پی ڈی ایم جماعتوں کی حکومت ’سیاسی انتقام پر یقین نہیں رکھتی۔‘

    ان کا کہنا تھا کہ ’میاں نواز شریف قید تھے، مریم نواز قید تھیں، شہباز شریف اور ان کے بچے قید کیے گئے، شاہد خاقان عباسی قید تھے، مجھے قید کیا گیا لیکن یہ تو ابھی کل رات پکڑے گئے ہیں اور ہمیں پوچھنا شروع کردیا گیا ہے کہ کیا کردیا ہے۔‘

11. 26 جنوری 2023’روسی تیل خریدنے پر پابندی نہیں‘: امریکی دفتر خارجہ کا پاکستان سے متعلق مؤقف

    امریکی دفتر خارجہ نے کہا ہے کہ دیگر ممالک کی طرح پاکستان بھی روسی تیل درآمد کر سکتا ہے کیونکہ عالمی سطح پر روسی تیل خریدنے پر کوئی پابندی نہیں ہے۔

    پاکستان کی جانب سے روسی تیل درآمد کرنے کی کوششوں سے متعلق سوال پر ردعمل دیتے ہوئے امریکی دفتر خارجہ کے ترجمان نیڈ پرائس نے منگل کی شب ایک پریس بریفنگ میں بتایا تھا کہ ’ہم نے جان بوجھ کر روسی تیل پر پابندی نہیں لگائی۔

    ’مگر اس پر پرائس کیپ عائد ہے (یعنی اس کی قیمت کی حد طے کی گئی ہے)۔ ہم نے ملکوں کی حوصلہ افزائی کی ہے کہ اس سے فائدہ اٹھائیں، ان ملکوں کی بھی جنھوں نے قیمت کی حد کے معاہدے پر دستخط نہیں کیے۔ تاکہ کچھ واقعات میں کم قیمت پر تیل خریدا جاسکے۔‘

    وہ کہتے ہیں کہ ’ہم نے واضح طور پر کہا ہے کہ یہ روس میں معاشی سرگرمیاں بڑھانے کا وقت نہیں۔ مگر ہم توانائی کی عالمی منڈی میں وسائل کی اہمیت جانتے ہیں۔ ہم سمجھتے ہیں کہ پرائس کیپ اس میں مددگار ثابت ہوسکتا ہے۔‘

12. 25 جنوری 2023فواد چوہدری کا دو روزہ جسمانی ریمانڈ منظور، 27 جنوری کو عدالت پیش کرنے کا حکم, شہزاد ملک، بی بی سی اردو ڈاٹ کام، اسلام آباد

    اسلام آباد کی مقامی عدالت نے پولیس کی درخواست پر تحریک انصاف رہنما فواد چوہدری کا دو روزہ جسمانی ریمانڈ منظور کر لیا ہے۔

    مقامی عدالت کے جج نوید خان نے پولیس کی جانب سے آٹھ روز کے لیے جسمانی ریمانڈ کی درخواست پر محفوظ فیصلہ سنایا جس کے مطابق فواد چوہدری کو 27 جنوری کو عدالت میں پیش کیا جائے گا۔

    واضح رہے کہ فواد چوہدری کو بدھ کی صبح لاہور سے گرفتار کیا گیا تھا جس کے بعد ان کو اسلام آباد لایا گیا۔ پولیس کی تحویل میں دیے جانے سے قبل فواد چوہدری کا طبی معائنہ بھی کروایا گیا۔

13. 25 جنوری 2023شاہ محمود قریشی کی ممبرانِ اسمبلی، پارٹی ورکرز و سپورٹرز کو فی الفور زمان پارک پہنچنے کی ہدایت

    وائس چیئرمین پی ٹی آئی شاہ محمود قریشی نے تمام سینیٹرز، سابق ممبران قومی اسمبلی، سابق ممبران صوبائی اسمبلی، پارٹی ورکرز اور سپورٹرز کو فی الفور زمان پارک پہنچنے کی ہدایت کی ہے۔

14. 25 جنوری 2023’اب پھر کیوں میڈیکل کرانا ہے، پہلے ریمانڈ تو ہونے دیں‘ فواد چوہدری کا پولیس سے مکالمہ

    اسلام آباد میں ڈیوٹی مجسٹریٹ نوید خان کی عدالت میں دلائل مکمل ہونے کے بعد عدالت نے ملزم فواد چوہدری کے جسمانی ریمانڈ سے متعلق فیصلہ محفوظ کر لیا ہے۔

    وقفے کے دوران پولیس نے فواد چوہدری کو اپنے ساتھ جانے کی ہدایت کی جس پر فواد چوہدری کا کہنا تھا ’جج صاحب کہیں گے تو میں جاؤں گا‘۔

    نامہ نگار شہزاد ملک کے مطابق پولیس زبردستی انھیں کمرہ عدالت سے لے گئی ہے اور کہا ہے کہ ’دوسرے کمرے میں آجائیں، یہاں بہت رش ہے۔‘

    پولیس اہلکاروں کا کہنا ہے کہ ابھی پمز میڈیکل کے لیے بھی لے کر جانا ہے، جس پر فواد چوہدری نے پوچھا کہ اب پھر کیوں میڈیکل کرانا ہے، جس پر پولیس اہلکاروں نے انھیں بتایا کہ پری اور آفٹر میڈیکل کرانا ہوتا ہے۔

    فواد چوہدری نے پولیس اہلکاروں کو مخاطب کرتے ہوئے کہا کہ ’پہلے ریمانڈ تو ہونے دیں۔‘

15. 25 جنوری 2023وزیراعظم شہباز شریف سے نگران وزیر اعلیٰ پنجاب سید محسن نقوی کی ملاقات

    وزیراعظم شہباز شریف نے آج نگران وزیر اعلیٰ پنجاب سید محسن رضا نقوی سے ملاقات کی ہے۔

    وزیراعظم نے محسن رضا نقوی کو نگران وزیر اعلیٰ پنجاب کا عہدہ سنبھالنے پر مبارکباد دی اور نیک خواہشات کا اظہار کیا۔

    اس موقع پر وزیراعظم کا کہنا تھا کہ ’امید ہے آپ اپنی ذمہ داری آئین کےمطابق احسن طریقے سے سر انجام دیں گے اور الیکشن کے عمل کو غیر جانبدارانہ اور شفاف بنانے میں اپنا بھرپور کردار ادا کریں گے۔‘

16. 25 جنوری 2023بریکنگ, عدالت نے فواد چوہدری کے جسمانی ریمانڈ سے متعلق فیصلہ محفوظ کر لیا

    اسلام آباد میں ڈیوٹی مجسٹریٹ نوید خان کی عدالت دلائل مکمل ہونے کے بعد عدالت نے ملزم کے جسمانی ریمانڈ سے متعلق فیصلہ محفوظ کر لیا ہے۔

    دورانِ سماعت فواد چوہدری کے تیسرے وکیل نے بھی دلائل دینا شروع کیے تو الیکشن کمیشن کے وکیل نے کہا کہ لگتا ہے طویل دلائل کا مقصد کورٹ کو تھکا کر کوئی آرڈر لینا ہے۔

    دلائل مکمل ہونے کے بعد ملزم نے عدالت سے اپنی فیملی کے ساتھ ملاقات کی اجازت چاہی جس پر عدالت نے انھیں حکم دیا کہ وہ کمرہ عدالت میں پانچ دس منٹ تک ملاقات کر لیں۔

17. 25 جنوری 2023بریکنگ, ’میں دہشتگرد نہیں ہوں کہ مجھے سی ٹی ڈی میں رکھا گیا‘ فواد چوہدری

    اسلام آباد میں ڈیوٹی مجسٹریٹ نوید خان کی عدالت میں سماعت جاری ہے:

    دورانِ سماعت فواد چوہدری نے بیان دیا کہ وہ تقریر نہیں بلکہ میڈیا سے گفتگو کر رہے تھے اور انھوں نے کہا تھا کہ نفرتیں نہ پھیلائیں کہ لوگ ذاتی لیول پر آجائیں۔

    انھوں نے کہا کہ مجھے لاہور پولیس نے گرفتار کیا، میرا موبائل قبضے میں لیا اور لاہورپولیس نے مجھے اسلام آباد پولیس کے حوالے کیا۔

    فواد چودھری کا کہنا تھا کہ میں سینئیر وکیل ہوں، پارلیمنٹیرین ہوں، تحریک انصاف کا ترجمان ہوں، سابق وفاقی وزیر ہوں، میں دہشتگرد نہیں ہوں کہ مجھے سی ٹی ڈی میں رکھا گیا۔

    فواد چودھری کا کہنا تھا کہ افسر نے مجھ سے کوئی تفتیش نہیں کی اور میری گرفتاری غیرقانونی ہے۔

18. 25 جنوری 2023بریکنگ, ’عدالت پولیس سے پوچھے انھوں نے موکل سے کیا برآمد کرنا ہے‘ فواد چوہدری کے وکیل کی جسمانی ریمانڈ کی مخالفت

    اسلام آباد میں ڈیوٹی مجسٹریٹ نوید خان کی عدالت میں سماعت جاری ہے:

    فواد چوہدری کے وکیل علی بخاری نے تفتیشی افسر کی جانب سے آٹھ روزہ جسمانی ریمانڈ کی مخالفت کرتے ہوئے کہا کہ عدالت پولیس سے پوچھے کہ انھوں نے ان کے موکل سے کیا برآمد کرنا ہے۔

    انھوں نے کہا کہ عدالت پولیس سے پوچھے کہ چوبیس گھنٹوں میں کیا تفتیش کی ہے۔

    انھوں نے کہا کہ کی عدالت پوچھے کہ اسلام آباد پولیس نے ان کے موکل کو گرفتار کرنے کے لیے ضلعی انتظامیہ سے اجازت لی یا ویسے ہی لاہور سے بندہ اٹھا لائے۔

    ملزم فواد چوہدری نے عدالت کو بتایا کہ تفیشی افسر کہتا ہے کہ انھیں ان کے گھر سے گرفتار کیا، انھوں نے عدالت سے استدعا کی کہ وہ تفتیشی افسر سے یہ تو پوچھ لیں کہ ان کے گھر کے گیٹ پر کونسا رنگ ہوا ہوا ہے۔

19. 25 جنوری 2023بریکنگ, ’فواد چوہدری نے اپنی تقریر سے عوام کو بغاوت پر اکسانے کی کوشش کی‘ الیکشن کمیشن کے وکیل

    اسلام آباد میں ڈیوٹی مجسٹریٹ نوید خان کی عدالت میں سماعت جاری ہے:

    دورانِ سماعت الیکشن کمیشن کے وکیل سعد حسن دلائل دیے کہ الیکشن کمیشن ایک آئینی ادارہ ہے اور جب سے پی ٹی آئی نے رجیم چینج کا منشور اپنایا ہے تب سے الیکشن کمیشن کو ٹارگٹ کیا جا رہا ہے۔

    انھوں نے کہا کہ سوچے سمجھے منصوبے کے تحت عوام کو الیکشن کمیشن کے خلاف اکسایا جا رہا ہے۔

    الیکشن کمیشن کے وکیل کا کہنا تھا کہ فواد چوہدری نے اپنی تقریر سے عوام کو بغاوت پر اکسانے کی کوشش کی۔

    انھوں نے کہا کہ فواد چوہدری کی تقریر صرف بغاوت پر اکسانا نہیں بلکہ الیکشن کمیشن کے ملازمین کی زندگیوں کو خطرے میں ڈالنا بھی تھا۔

    انھوں نے کہا کہ وہ عدالت کے سامنے مواد رکھ سکتے ہیں جس میں الیکشن کمیشن کو پرائیویٹ لوگوں کی جانب سے دھمکی آمیز خط لکھے جا رہے ہیں، تاہم ان کا کہنا ہے کہ ’میں وہ مواد عدالت کو چیمبر میں دکھا سکتا ہوں، پبلک میں نہیں۔‘

20. 25 جنوری 2023بریکنگ, ’جو بولتا ہوں وہ جماعت کی پالیسی ہوتی ہے‘ فواد چوہدری کا عدالت میں بیان

    اسلام آباد میں ڈیوٹی مجسٹریٹ نوید خان کی عدالت میں پی ٹی آئی فواد چوہدری اپنا بیان دے رہے ہیں:

    دورانِ سماعت فواد چوہدری نے عدالت کو بتایا ہے کہ مدعی کے وکیل کے مطابق الیکشن کمیشن کو اگر تنقید کا نشانہ بنایا گیا تو ان کے خلاف بغاوت کا مقدمہ درج ہو گا۔

    انھوں نے کہا کہ وہ جو بولتے ہیں ’وہ جماعت کی پالیسی ہوتی ہے‘ اور ان کے خلاف کوئی مقدمہ بنتا ہی نہیں ہے۔

    فواد چوہدری کا کہنا ہے کہ اگر تنقید کرنے پر مقدمات درج ہوں گے تو پھر جمہوریت ملک میں فروغ نہیں پائے گی۔

    انھوں نے کہا کہ الیکشن کمیشن نہ ریاست ہے اور نہ ہی حکومت۔

    انھوں نے کہا کہ انھیں گرفتار کرکے اسلام آباد پولیس کے حوالے کیا گیا اور ان کا موبائل بھی پولیس کے پاس ہے۔

    فواد چوہدری کے بیان کے بعد اس مقدمے کے تفتیشی افسر نے عدالت سے ملزم کے آٹھ روزہ جسمانی ریمانڈ کی استدعا کی ہے۔