آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
اسلام آباد پولیس کا کہنا ہے کہ گذشتہ رات گرفتار ہونے والے عوامی مسلم لیگ کے سربراہ شیخ رشید احمد کو آج جسمانی ریمانڈ حاصل کرنے کی غرض سے عدالت میں پیش کیا جائے گا۔ شیخ رشید کی گرفتاری کے بعد اُن کے وکیل نے اسلام آباد پولیس کے خلاف توہین عدالت کی کارروائی شروع کرنے کا اعلان کیا ہے۔
پولیس لائن پشاور میں دھماکے میں ہلاکتوں کی تعداد بڑھ کر 87 ہو گئی ہے۔
لیڈی ریڈنگ ہسپتال کے ترجمان کے مطابقاس وقت ہسپتال میں 65 کے قریب زخمی داخل ہیں جبکہ ہلاکتوں کی تعداد 87 ہو گئی ہے۔‘
دوسری جانب ریسکیو 1122پشاور کے حکام کے مطابق ریسکیو اپریشن اس وقت بھی جاری ہے۔
ترجمان 1122 پشاور کے ترجمان کے مطابق ’رات 12 بجے سے اب تک 21 لاشیں ملبے سے نکالی جا چکی ہیں۔‘
سابق وزیر اعظم عمران خان کے خلاف توشہ خانہ کیس میں فوجداری کارروائی کے لیے الیکشن کمیشن کی درخواست پر اسلام آباد کی مقامی عدالت میں سماعت ہوئی۔
سماعت شروع ہونے پر ایڈیشنل سیشن جج ظفر اقبال نے پی ٹی آئی کے وکیل علی بخاری سے استفسار کیا کہ عمران خان کی طرف سے وکالت نامہ کدھر ہے ؟
الیکشن کمیشن کی جانب سے وکیل نے کہا کہ ’وکالت نامہ اس وقت تک نہیں آ سکتا جب تک عمران خان خود نہ آئیں۔‘ عمران خان کے وکیل نے کہا کہ ہم نے گزشتہ سماعت پر عمران خان کا میڈیکل سرٹیفکیٹ پیش کیا تھا جس پرعدالت نے کہا کہ آج وکالت نامہ بھی جمع کرادیں۔
الیکشن کمیشن کے وکیل نے اعتراض اٹھایا کہ جب تک ضمانتی مچلکے نہیں آ جاتے تب تک یہ وکالت نامہ نہیں دے سکتے۔
دوران سماعت الیکشن کمیشن کے وکیل کی جانب سے عدالت سے عمران خان کے وارنٹ گرفتاری جاری کرنے کی استدعا کی گئی۔ عدالت نے عمران خان پر فرد جرم عائد کرنے کے لیے 7 فروری کی تاریخ مقرر کر دی۔
واضح رہے کہ عدالت نے اس مقدمے میں آج عمران خان کو طلب کر رکھا تھا۔
الیکشن کمیشن نے توشہ خانہ کیس میں عمران خان کو نااہل قرار دینے کا فیصلہ سنانے کے بعد کے ان کے خلاف فوجداری کارروائی کا ریفرنس عدالت کو بھیجا تھا۔
پولیس لائنز دھماکے کے واقعہ پر صوبہ خیبرپختونخوا میں آج ایک روزہ سوگ منایا جا رہا ہے۔
سوگ کے تحت آج پورے صوبے میں قومی پرچم سرنگوں ہے۔
نگران وزیر اعلی خیبر پختونخوا محمد اعظم خان نے اس واقعے پر پورے صوبے میں ایک روزہ سوگ کا اعلان گزشتہ روز کیا تھا۔
اپنے بیان میں نگران وزیر اعلی کہا تھا کہ ’حکومت لواحقین کے غم میں برابر کی شریک ہے، صوبائی حکومت متاثرہ خاندانوں کو تنہا نہیں چھوڑے گی۔ ‘
تحریک انصاف کے رہنما فواد چوہدری کے خلاف الیکشن کمیشن کے حکام کو سنگین نتائج کی دھمکیاں دینے کے مقدمے میں ضمانت بعد از گرفتاری درخواست کی سماعت اسلام آباد کی مقامی عدالت میں جاری ہے۔
ایڈشنل سیشن جج فیضان بخاری کی عدالت میں مقدمہ کی سماعت کے دوران الیکشن کمیشن کے وکلاء نے جمعرات تک کا وقت مانگا جس پر عدالت نے جمعرات تک کی مہلت دینے کی استدعا مسترد کردی۔
ایڈیشنل سیشن جج نے 12 بجے پراسیکیوٹر کو ریکارڈ سمیت طلب کر لیا ہے ۔
پشاور پولیس لائنز کی مسجد میں پیر کے روز ہونے والے دھماکے کے بعد امدادی کارروائیاں تاحال جاری ہیں۔
ریسکیو 1122 کے ترجمان محمد بلال فیضی نے بی بی کو بتایا ہے کہ ’ ریسکیو آپریشن کو 18 گھنٹے سے زیادہ کا وقت گزر گیا ہے۔ رات سے اب تک مزید 20 افراد کے جسد خاکی نکالے جا چکے ہیں اور خدشہ ہے کہ ابھی بھی کچھ لاشیں ملبے تلے موجودہو سکتی ہیں۔ ‘
ترجمان 1122 پشاور کے مطابق ’اس وقت مسجد کا ایک آخری پلررہتا ہے جس کو ہٹانے کا کام جاری ہے۔ امکان ہے کہ ریسکیو آپریشن مزید دو سے تین گھنٹے جاری رہے گا۔`
ترجمان کا کہنا ہے کہ ’مسجد کی عمارت کا ملبہ نمازیوں پر گرنے کے باعث پہلی ترجیح یہ تھی کہ جتنے بھی زخمی افراد ملبے تلے موجود ہیں ان کی زندگی بچائی جا سکے۔ ‘
ترجمان بلال فیضی نے بتایا کہ ’ ہمارے پاس ہیوی مشینری موجود تھی تاہم ابتدا میں ہیوی مشینری کے بجائے چھوٹے ٹولز استعمال کر کے ملبے کی کٹنگ کی اور نیچے دبے لوگوں تک امداد پہنچائی۔‘
لیڈی ریڈنگ ہسپتال پشاور کے ترجمان محمد عاصم نے تصدیق کی ہے کہ گذشتہ روز پشاور کی پولیس لائن میں واقع مسجد میں ہونے والے دھماکے کے نتیجے میں ہونے والی ہلاکتوں کی تعداد بڑھ کر 83 ہو گئی ہے۔
انھوں نے کہا کہ گذشتہ روز سے اب تک 83 لاشیں لیڈی ریڈنگ ہسپتال منتقل کی گئی ہیں۔
ترجمان محمد عاصم نے بتایا کہ گذشتہ رات کے دوران مزید 7 لاشیں ہسپتال منتقل کی گئی تھیں۔ لیڈی ریڈنگ ہسپتال میں اس وقت تقریبا 57 زخمی زیر علاج ہیں جن میں کم از کم تین کی حالت ابھی تشویشناک ہے۔‘
تحریکِ طالبان پاکستان نے پشاور پولیس لائنز میں ہونے والے حملے سے لاتعلقی کا دعویٰ کیا ہے۔
تحریک طالبان پاکستان کی جانب سے جاری کردہ وضاحت میں دعویٰ کیا گیا ہے کہ ’اس واقعہ سے تحریک طالبان پاکستان کا کوئی تعلق نہیں ہے اور ہمارے لوائح اور عمومی دستور کے مطابق مساجد، مدارس، جنازہ گاہ اور دیگر مقدسات میں کسی قسم کی کاروائی قابل مواخذہ جرم ہے۔‘
وزیرداخلہ رانا ثنااللہ خان نے نجی ٹی وی جیو نیوز سے گفتگو کرتے ہوئے کہا کہ آج دورہ پشاور کے دوران وزیراعظم شہباز شریف نے آئی جی خیبرپختونخوا سے پوچھا کہ دہشتگرد اتنے محفوظ علاقے میں کیسے داخل ہوا؟
ان کے مطابق آئی جی نے جواب دیا کہ یہاں دو ہزار خاندان بھی رہ رہے ہیں۔
لیڈی ریڈنگ ہسپتال کے ترجمان کے مطابق کل 157 زخمیوں میں سے اس وقت ہسپتال میں 65 زخمی داخل ہیں جبکہ باقی افراد کو ابتدائی طبی علاج معالجے کے بعد ڈسچارج کر دیا گیا ہے ۔
ترجمان کے مطابق ہسپتال میں 59 افراد کی لاشیں لائی گئی ہیں۔ ہلاک اور زخمی ہونے والوں میں بیشتر پولیس اہلکار ہیں۔
پشاور پولیس لائن کی مسجد دھماکہ میں ہلاک ہونے والے پولیس افسروں اور جوانوں میں سے ابتدائی طورپر 27 کی اجتماعی نماز جنازہ تھوڑی دیر قبل پیر کی رات کو پولیس لائن کے گراونڈ میں ادا کر دی گئی ہے۔
حکام کے مطابق ’پولیس کے چاق وچوبند دستے نے قومی پرچم میں لپٹے پولیس شہدا کی تابوتوں کو سلامی پیش کی گئی۔‘
نگران وزرا، کور کمانڈر پشاور، چیف سیکرٹری خیبرپختونخوا، کمانڈنٹ فرنٹیئر کا نسٹبیلری، آئی جی فرنٹیئر کور، آئی جی پی خیبرپختونخوا، اعلیٰ فوجی وسول حکام، شہدا کے لواحقین اور زندگی کے مختلف شعبوں سے تعلق رکھنے والے افراد نے کثیر تعداد میں جنازہ میں شرکت کی۔
’اس موقع پر شہدا کی روح کے ایصال ثواب اور ملک کی قومی یکجہتی اور امن وسلامتی کے لئے خصوصی دعابھی کی گئی۔‘
پشاور میں ریسکیو حکام کا کہنا ہے کہ ملبے تلے سے چھ افراد کو نکالا جا چکا ہے، جن میں سے صرف دو زخمی افراد ہی زندہ ہیں۔
اس وقت مسجد کے منہدم ہونے والے حصے میں ریسکیو 1122 کا سرچ آپریشن ہیوی مشینری کے ساتھ جاری یے۔
وزیراعظم شہباز شریف نے پشاور واپسی پر اپنے ایک ٹویٹ میں کہا ہے کہ پشاور میں جو انسانی المیہ ہوا وہ ناقابل تصور ہے۔ انھوں نے کہا یہ پاکستان پر حملے سے کم نہیں ہے۔
ان کے مطابق قوم گہرے صدمے میں ہے۔ وزیراعظم کے مطابق انھیں اس میں کوئی شک نہیں ہے کہ دہشتگردی ہمارے لیے بہت بڑا قومی سلامتی کا چیلنج ہے۔
وزیراعظم نے کہا کہ متاثرہ خاندانوں کا غم الفاظ میں بیان نہیں کیا جا سکتا ہے۔ انھوں نے لواحقین سے تعزیت اور ہمدردی کا اظہار کرتے ہوئے کہا کہ ’میرا آج کے واقعے میں ملوث منصوبہ سازوں کے نام یہ پیغام ہے کہ آپ ہمارے لوگوں کے عزم کو نظر انداز نہیں کر سکتے۔‘
خیال رہے کہ آج وزیراعظم شہباز شریف نے اپنے وزرا کے ہمراہ پشاور کا دورہ کیا۔ پشاور میں ان کا استقبال آرمی چیف جنرل عاصم منیر نے کیا۔ وزیراعظم نے وزیر داخلہ، وزیردفاع، گورنر خیبرپختونخوا اور آرمی چیف کے ساتھ لیڈی ریڈنگ ہسپتال جا کر اس پولیس لائن دھماکے میں زخمی ہونے والوں کی عیادت بھی کی۔
وزیراعظم شہباز شریف نے وفاقی وزرا اور آرمی چیف چیف کے ہمراہ پشاور کی لیڈی ریڈنگ ہسپتال کا دورہ کیا اور وہاں پولیس لائن مسجد دھماکے میں زخمی ہونے والے افراد کی عیادت کی۔
لیڈی ریڈنگ ہسپتال کے ترجمان کے مطابق پیر کو پشاور کی پولیس لائن میں واقع مسجد میں ہونے والے دھماکے میں کم از کم 44 افراد ہلاک جبکہ 157 زخمی ہوئے ہیں جن میں سے بیشتر پولیس اہلکار ہیں۔
سی سی پی او پشاور کے مطابق دھماکے کے وقت تین سے چار سو پولیس اہلکار نماز ادا کر رہے تھے۔ ان کا کہنا تھا کہ دھماکے کی جگہ سے بارود کی بو آ رہی ہے تاہم حتمی بات تفتیش کے بعد ہی معلوم ہو سکے گی۔
دوسری جانب پشاور کے ریسکیو حکام کے مطابق مسجد کے منہدم شدہ حصے میں دبے افراد کو نکالنے کا عمل جاری ہے۔
پشاور پولیس لائنز مسجد میں دھماکہ آئی جی سندھ نے سندھ پولیس کو ہائی الرٹ رہنے کے احکامات جاری کردیے۔ مساجد،امام بارگاہوں سمیت دیگر تمام مذہبی مقامات پر سکیورٹی اقدامات مزید سخت کیے جائیں۔
پشاور میں ریسکیو حکام کا کہنا ہے کہ پولیس لائن میں دھماکے کے نتیجے میں مسجد کے منہدم ہونے والے حصے کی چھت میں پانچ سے چھ سوراخ کر دیے گئے ہیں تاکہ ملبے تلے زندہ بچ جانے والے افراد کو قدرتی آکسیجن کی فراہمی بھی مل سکے۔
حکام کے مطابق ان افراد کو زندہ رکھنے کے لیے آکسیجن ماسک سمیت ڈرپس لگا دی گئی ہیں جبکہ چھت کو حتیاط کے ساتھ کاٹا جا رہا ہے تا کہ انھیں نکالا جا سکے۔
پاکستان کے وزیراعظم شہباز شریف اور آرمی چیف عاصم منیر پشاور میں پولیس لائن میں ہونے والے دھماکے کے بعد ہنگامی دورے پر پشاور پہنچے ہیں۔
وزیراعظم نے آرمی چیف کے ہمراہ دھماکے میں زخمی ہونے والے افراد کی عیادت بھی کی۔ وزیراعظم کو پشاور پولیس لائنز مسجد میں ہونے والے دھماکے کے حوالے سے تمام تر پہلؤوں پر بریفنگ دی جائے گی۔
وزیراعظم کے ہمراہ وزیر دفاع خواجہ آصف، وزیر داخلہ رانا ثنا اللہ اور وزیر اطلاعات مریم اورنگزیب بھی ہیں۔
ترجمان لیڈی ریڈنگ ہسپتال کے مطابق پشاور میں پولیس لائنز کی مسجد میں نماز ظہر کی ادائیگی کے دوران دھماکے میں ہلاکتوں کی تعداد 32 ہو گئی ہے جبکہ زخمیوں کی تعداد 147 بنتی ہے۔
وزیراعظم شہباز شریف نے اپنے ایک ٹویٹ میں کہا ہے کہ ’مسلم لیگ (ن) کے کارکنوں کو ہدایت کرتا ہوں کہ خودکش حملے میں زخمیوں کی جان بچانے کے لیے خون کے عطیات دیں۔