اسٹیبلشمنٹ نے عدم اعتماد، استعفیٰ یا پھر قبل از وقت انتخابات کے آپشنز دیے: عمران خان

لائیو کوریج

1. 30 مار چ 2022کابینہ نے اعتماد کا اظہار کیا ہے، عمران خان استعفیٰ نہیں دیں گے: شیخ رشید

   وفاقی وزیرِ داخلہ شیخ رشید احمد نے وفاقی کابینہ کے اجلاس کے بعد میڈیا سے گفتگو کرتے ہوئے کہا کہ وفاقی کابینہ نے وزیرِ اعظم عمران خان پر اعتماد کا اظہار کیا ہے اور وہ آج شام قوم سے خطاب کریں گے۔

   اُنھوں نے ایک سوال کے جواب میں کہا کہ عمران خان کے استعفیٰ دینے کا سوال ہی پیدا نہیں ہوتا، اور وہ آخری گیند پر بھی لڑیں گے۔ اُنھوں نے ایک بار پھر کہا کہ اتوار تین اپریل کو تحریکِ عدم اعتماد پر ووٹنگ ہو گی۔

   شیخ رشید کا کہنا تھا کہ ممکن ہے کہ وزیرِ اعظم عمران خان یا وزیرِ خارجہ شاہ محمود قریشی (خط کے معاملے پر) اسمبلی میں ان کیمرا خطاب کریں۔

2. 30 مار چ 2022بلوچستان عوامی پارٹی کے چار ارکان کی اپوزیشن بینچز پر بیٹھنے کی درخواست

3. 30 مار چ 2022متحدہ قومی موومنٹ کا تحریک عدم اعتماد میں متحدہ اپوزیشن کا ساتھ دینے کا فیصلہ

   متحدہ قومی موومنٹ نے متحدہ اپوزیشن کا ساتھ دینے اور وزیراعظم عمران خان کے خلاف عدم اعتماد کی تحریک کی حمایت کا فیصلہ کرلیا ہے، ایم کیو ایم کو اس فیصلے سے کیا سیاسی فوائد ہوں گے اس نے یہ فیصلہ کیوں لیا، سنتے ہیں کراچی سے بی بی سی کے نامہ نگار ریاض سہیل کے فیس بک لائیو میں

4. 30 مار چ 2022علیم خان گروپ نے پنجاب کی وزارت اعلی کے لیے نامزد پرویز الہی کو ووٹ دینے سے انکار کر دیا

   عبدالعلیم خان گروپ کے ترجمان میاں خالد محمود نے بیان میں کہا ہے کہ ان کے گروپ کے اراکین وزیر اعظم عمران خان کی جانب سے وزیر اعلی کے عہدے پر نامزد کیے گئے ق لیگ کے رہنما اور پنجاب اسمبلی کے سپیکر پرویز الہی کو ووٹ نہیں دیں گے۔

   ترجمان میاں خالد نے کہا کہ عمران خان جن القابات سے پرویز الہی کو بلاتے تھے وہ انھیں دہرانے کی جسارت بھی نہیں کر سکتے۔

   ’پہلے چار سال ایک بے ایمان اور نکمے بزدار کو مسلط رکھا اب پرویز الہی کو نامزد کر دیا۔ وہ پی ٹی آئی کے جانثار جنھوں نے نئے پاکستان میں عمران خان کا ساتھ دیا کیا 184 اراکین میں سے ایک بھی وزیر اعلیٰ بننے کا اہل نہیں تھا؟‘

   ان کا کہنا تھا کہ تحریک انصاف کے ہر مخلص کارکن کو پرویز الہی کی نامزدگی پر اعتراض ہے اور اگر ’نئے پاکستان‘ میں پرویز الہی بنائیں گے تو تحریک انصاف بنانے کی کیا ضرورت تھی۔

   انھوں نے عمران خان کو مخاطب کرتے ہوئے پوچھا کہ کیا یہی وہ نظریہ تھا جس کے لے 25سال جدوجہد کی گئی تھی؟

   ’آج حکومت بچانے کی باری آئی تو پنجاب کا وزیر اعلیٰ انھیں نامزد کر دیا جنھیں آپ چور اور ڈاکو کہتے تھے۔‘

   انھوں نے مزید کہا کہ ان کا گروپ کوئی سودے بازی نہیں کرے گا بلکہ اپوزیشن کا غیرمشروط ساتھ دے گا۔ میاں خالد نے اس امید کا اظہار کیا کہ جہانگیر ترین کا گروپ بھی محب وطن اور قوم کا درد رکھنے والا ہے اور توقع ہے کہ وہ ان کا ساتھ دیں گے۔

5. 30 مار چ 2022ایم کیو ایم نے کب کب اور کس سے ڈیل کی؟

6. 30 مار چ 2022’یہ ممکن ہے کہ پارٹی پالیسی سے انحراف پر آرٹیکل 63 کا اطلاق نہ ہو‘, شہزاد ملک، بی بی سی

   سپریم کورٹ میں آج صدارتی ریفرینس پر سماعت کے دوران جسٹس منیب اختر نے ریمارکس دیے کہ پارلیمانی نظام جمہوریت میں پارٹی پالیسی کی اپنی اہمیت ہے جس پر پاکستان مسلم لیگ نون کے وکیل کا کہنا تھا کہ وقت اور حالات کے تحت ہمیشہ ارتقائی عمل جاری رہتا ہے۔

   مخدوم علی خان نے کہا کہ آج جس چیز کو غیر آئینی کہا کل کو وہ آئینی ہوسکتی ہے۔ انھوں نے کہا کہ سپریم کورٹ میں بھیجا گیا صدارتی ریفرنس محض تصوراتی ہے۔ انھوں نے کہا کہ رکن قومی اسمبلی اپنے شعور کے تحت ووٹ ڈال سکتا ہے۔

   اُن کا مزید کہنا تھا کہ رکن قومی اسمبلی انتخابی نشان پر انتخاب لڑتا ہے اور پر پارٹی کا اپنا انتخابی نشان ہوتا ہے۔ انھوں نے کہا کہ تمام پارٹیاں زیادہ تر الیکٹیبلز کو ہی ٹکٹ دیتی ہیں۔

   اس پر جسٹس منیب اختر نے ریمارکس دیے کہ یہ سیاست ہے پارٹی ہمیشہ کوشش کرتی ہے کہ ٹکٹ اس کو دیا جائے جو جیت سکے۔

   مخدوم علی خان نے کہا کہ اگر کوئی آزاد امیدوار جیت جائے تو وہ تمام پارٹیوں کو شکست دیتا ہے۔ انھوں نے کہا کہ جیت کے بعد کسی کے ساتھ شامل ہو جائے تو یہی تصور کیا جاتا ہے کہ ووٹر سے بے وفائی کر لی۔

   جسٹس منیب اختر نے ریمارکس دیے کہ اگر وہ سیاسی پارٹی میں شمولیت اختیار کرتا ہے تو پارٹی پالیسی کا پابند ہوگا لیکن یہ ممکن ہے کہ پارٹی پالیسی سے انحراف پر آرٹیکل 63 کا اطلاق نہ ہو۔

   انھوں نے کہا کہ آزاد ممبر کی سیاسی پارٹی میں شمولیت کے بعد انحراف پر سیاسی نتائج ہوسکتے ہیں۔ بینچ کے سربراہ نے پاکستان مسلم لیگ نون کے وکیل کو مخاطب کرتے ہوئےکہا کہ آپ اگلے نکتے پر دلائل دیں جس پر مخدوم علی خان کا کہنا تھا کہ وہ اپنے دلائل میں سیاسی سوالات سے متعلق عدالتی فیصلوں کے حوالہ جات پیش کریں گے۔

   انھوں نے کہا کہ عدالت کہہ چکی ہے کہ سیاسی سوالات سے اجتناب کیا جائے اور عدالت صرف قانونی سوالات کے جوابات دینے کی پابند ہے۔

   انھوں نے کہا کہ خارجہ امور، معاشی معاملات، قومی و صوبائی اسمبلیوں کے معاملات سیاسی نوعیت کے ہیں۔ انھوں نے کہا کہ ریفرنس میں پوچھے گئے سوالات عدالتی معیار پر پورے نہیں اترتے تو عدالت اُنھیں مسترد کرسکتی ہے۔

   بعد میں اس صدارتی ریفرنس کی سماعت چار اپریل تک ملتوی کردی گئی۔

7. 30 مار چ 2022خان آخری گیند تک لڑے گا: شہباز گل

8. 30 مار چ 2022بریکنگ, مشترکہ اپوزیشن سے معاہدے کی توثیق کرتے ہیں: ایم کیو ایم رابطہ کمیٹی

   متحدہ قومی موومنٹ پاکستان کی رابطہ کمیٹی کی رکن نسرین جلیل نے کراچی میں جماعت کے دفتر کے باہر مختصر پریس کانفرنس سے بات کرتے ہوئے اعلان کیا کہ رابطہ کمیٹی ایم کیو ایم اور مشترکہ اپوزیشن کے درمیان طے کیے جانے والے معاہدے کی توثیق کرتی ہے۔

   ان کا کہنا تھا کہ معاہدے کی تفصیلات مشترکہ پریس کنفرنس میں پیش کی جائیں گی۔

9. 30 مار چ 2022’استعفی نہیں ملے گا، میدان لگے گا‘

   عمران خان کے قوم سے خطاب کے بعد مختلف قسم کی چہ مگوئیاں شروع ہو گئیں تھیں البتہ وفاقی وزیر فواد چوہدری نے ٹویٹ میں کہا کہ وزیر اعظم استعفی نہیں دیں گے۔

10. 30 مار چ 2022بریکنگ, فروغ نسیم، امین الحق کا وزارتوں سے استعفیٰ

    متحدہ قومی موومنٹ پاکستان سے تعلق رکھنے والے وفاقی وزرا فروغ نسیم اور امین الحق نے بی بی سی سے بات کرتے ہوئے تصدیق کی ہے کہ انھوں نے وفاقی کابیہ میں اپنے عہدوں سے استعفی دے دیا ہے۔

    فروغ نسیم عمران خان کی کابینہ میں وزیر قانون اور امین الحق وزیر انفارمیشن ٹیکنالوجی تھے۔

    فروغ نسیم ایوان بالا کے رکن جبکہ امین الحق کراچی سے قومی اسمبلی کے رکن ہیں۔

    واضح رہے کہ گذشتہ شب متحدہ قومی موومنٹ اور اپوزیشن کے درمیان مذاکرات کے بعد اعلان کیا گیا تھا کہ فریقین کے درمیان معاہدہ طے پا گیا ہے اور آج (بدھ) شام چار بجے مشترکہ پریس کانفرنس میں اس کا اعلان کیا جائے گا۔

    اگر ایم کیو ایم وزیر اعظم عمران خان کے خلاف پیش کی گئی تحریک عدم اعتماد میں اپوزیشن کا ساتھ دینے کا اعلان کرتی ہے تو عددی اعتبار سے تحریک انصاف کی حکومت ایوان زیریں میں اپنی اکثریت کھو دے گی۔

11. 30 مار چ 2022بریکنگ, وزیر اعظم عمران خان آج شام قوم سے خطاب کریں گے, دوپہر میں وفاقی کابینہ کا ہنگامی اجلاس بھی طلب

    ملک میں تیزی سے بدلتی سیاسی صورتحال کے تناظر میں پاکستان کے وزیر اعظم عمران خان آج شام قوم سے خطاب کریں گے۔ اس کے علاوہ انھوں نے دوپہر میں وفاقی کابینہ کا ہنگامی اجلاس بھی طلب کیا ہے۔

    اس سے قبل صبح کو ای پاسپورٹ کے اجرا کے موقع پر خطاب کرتے ہوئے وزیر اعظم نے کہا تھا کہ ملک میں اس وقت ’بیرون ملک سے برآمد کیا گیا بحران‘ ہے اور یہ ایک بیرون ملک سے سازش ہے۔

    اسی تقریب سے بات کرتے ہوئے وزیر اعظم نے کہا کہ وہ ’دھمکی آمیز خط‘ آج چند سینئیر صحافیوں اور اتحادیوں کے ساتھ شئیر کریں گے جس کا ذکر انھوں نے اتوار کو اپنے جلسے میں کی تھا۔

    ان کا مزید کہنا تھا کہ لوگوں نے خود فیصلہ کرنا ہے لیکن وہ فیصلہ کرتے وقت یہ ضرور سوچیں کہ وہ کہیں پاکستان کے خلاف ہونے والی سازش کا حصہ تو نہیں بن رہے ہیں۔

12. 30 مار چ 2022‘پاکستانی سیاست میں عجوبے ہوتے رہے ہیں اور ہم سب اس کے ذمہ دار ہیں‘, پاکستان مسلم لیگ نواز کے وکیل مخدوم علی حان

    بینچ کے سربراہ کا کہنا تھا کہ ماضی میں اگر کسی رکن نے پارٹی پالیسیوں سے اختلاف کیا تو منحرف اراکین کو پارٹی سربراہان نے قبول کیا۔

    پاکستان مسلم لیگ نواز کے وکیل مخدوم علی حان کا کہنا تھا کہ پاکستانی سیاست میں عجوبے ہوتے رہے ہیں اور ہم سب اس کے ذمہ دار ہیں۔

    انھوں نے کہا کہ منحرف رکن کو پارٹی سربراہ شوکاز نوٹس جاری کر کے سن سکتا ہے اور ہوسکتا ہے پارٹی سربراہ منحرف رکن کے جواز سے مطمئن ہو جائے۔

    چیف جسٹس نے مخدوم علی حان کو مخاطب کرتے ہویے کہا کہ صدارتی ریفرنس کی ٹائمنگ کا آپ نے سوال اٹھایا ہے۔ جس پر پاکستان مسلم لیگ نواز کے وکیل کا کہنا تھا کہ حکومت کو ایک سال پہلے خرابی کی نشاندہی کرائی تھی لیکن پھر اتنی تاخیر سے ریفرنس کیوں دائر کیا گیا۔

    انھوں نے کہا کہ ایسے وقت میں صدر نے ریفرنس دائر کر کے ہماری تکریم اور وقار پر سمجھوتہ کیا جس پر چیف جسسٹس نے ریمارکس دیے کہ ہم حیران ہیں آپ صدر کے نیوٹرل ہونے سے متعلق بات کررہے ہیں۔

    جسٹس اعجاز الااحسن نے مخدوم علی خان کو مخاطب کرتے ہوئے کہا کہ آپ ہم سے چاہتے ہیں کہ اس صدارتی ریفرنس پر رائے دینے سے پہلے ہم ٹائمنگ کو دیکھیں؟ جس پر پاکستان مسلم لیگ نواز کے وکیل کا کہنا تھا کہ ان کی استدعا ہے کہ تحریک عدم اعتماد آنے کے بعد جو ریفرنس دائر ہوا ہے عدالت صرف اس کو مدنطر رکھے۔

    جسٹس اعجاز الااحسن نے ریمارکس دیے کہ عدالتی تشریح کے دور رس نتائج ہوں گے۔ بینچ میں موجود جسٹس جمال مندوخیل نے سوال اٹھایا کہ کیا ایسے شواہد ہیں کہ پارٹی سربراہ یعنی (عمران خان) نے صدر مملکت کو بتایا ہو کہ اراکین منحرف ہو سکتے ہیں۔ انھوں نے کہا کہ بادی النظر میں صدارتی ریفرنس مفروضے پر مبنی ہے۔

13. 30 مار چ 2022‘منحرف رکن کو شفاف ٹرائل، الزامات کی تصدیق کے بغیر تاحیات نااہل کیسے کردیں؟‘, شہزاد ملک بی بی سی اردو ڈاٹ کام

    آیئن کی ارٹیکل63 اے کی تشریح سے متعلق صدارتی ریفرنس کی سپریم کورٹ میں سماعت کے دوران پارلیمنٹ میں حزب مخالف کی سب سے بڑی جماعت پاکستان مسلم لیگ نواز کے وکیل مخدوم علی حان نے دلائل دیتے ہوئے کہا ہے کہ صدارتی ریفرنس میں اٹھائے گئے سوالات مبہم اور عمومی نوعیت کے ہیں۔

    انھوں نے کہا کہ حکومت عدالتی فیصلے کی بجائے صدارتی ریفرنس کے ذریعے ارکان پارلیمنمٹ کی تاحیات نااہلی مانگ رہی ہے۔

    انھوں نے کہا کہ اٹارنی جنرل کی طرف سے اس ریفرنس کے حق میں دیے گئے دلائل میں گذشتہ برس سینیٹ الیکشن میں ہارس ٹریڈنگ کے ناقابل تردید شواہد ہونے کی دلیل دی گئی۔ ‘ایک سال گزر گیا لیکن حکومت نے سینیٹ انتخابات میں ہارس ٹریڈنگ کے شواہد پر کیوں کارروائی نہیں کی۔‘

    سماعت کے دوران چیف جسٹس نے کہا کہ سوال یہ ہے کہ پارلیمان نے خود سے نااہلی کی مدت کا تعین کیوں نہیں کیا۔ بینچ میں موجود جسٹس اعجاز الااحسن نے ریمارکس دیے کہ منحرف رکن کے خلاف کارروائی کے لیے الیکشن کمیشن اور سپریم کورٹ کے فورمز موجود ہیں تاہم انھوں نے کہا کہ سوال یہ ہے کہ نااہلی کی میعاد کیا ہوگی؟

    مخدوم علی خان نے دلائل دیتے ہوئے کہا کہ میرا موقف یہ نہیں کہ منحرف رکن کے خلاف کارروائی غلط ہے۔ انھوں نے کہا کہ وہ اس نقطے کو سمجھانے کی کوشش کرر ہے ہیں کہ ابھی تک ہارس ٹریڈنگ روکنے کے لیے حکومت نے عملی اقدامات نہیں اٹھائے۔

    پاکستان مسلم لیگ نواز کے وکیل کا کہنا تھا کہ آرٹیکل 63 اے اخلاقیات کی بات نہیں کرتا جس پر جسٹس منیب اختر نے ریمارکس دیے کہ قانون رشوت لے کر ووٹ فروخت کرنے کی اجازت نہیں دیتا۔

    جسٹس جمال مندو خِیل نے ریمارکس دیے کہ منحرف رکن کو شفاف ٹرائل، الزامات کی تصدیق کے بغیر تاحیات ناہل کیسے کردیں؟ انھوں نے کہا کہ کیا منحرف رکن کو پارٹی سربراہ کی ڈیکلریشن کی بنیاد پر تاحیات نااہلی قرار دیا جاسکتا ہے؟

14. 30 مار چ 2022بریکنگ, عمران خان کا’ دھمکی آمیز خط‘ اتحادیوں اور صحافیوں کو دکھانے کا اعلان

    پاکستان کے وزیر اعظم عمران خان نے کہا ہے کہ وہ چند سینئیر صحافیوں کو وہ خط دکھائیں گے جس کا انھوں نے اتوار کے جلسے میں کیا تھا۔

    اسلام آباد میں ای پاسپورٹ کے اجرا کی تقریب سے خطاب کرتے ہوئے وزیر اعظم کا کہنا تھا کہ ملک میں اس وقت ’بیرون ملک سے برآمد کیا گیا بحران‘ ہے اور یہ ایک بیرون ملک سے سازش ہے۔

    واضح رہے کہ 27 مارچ کو اسلام آباد میں جلسے سے خطاب میں وزیر اعظم عمران خان نے اپوزیشن کی تحریک عدم اعتماد کا ذکر کرتے ہوئے کہا تھا کہ انھیں اس سازش کا علم ہے جو ان کے خلاف کی گئی ہے۔

    انھوں نے یہ بھی کہا تھا کہ 'میرے پاس جو یہ خط ہے، یہ ثبوت ہے۔ اگر کوئی بھی اس پر شک کر رہا ہے تو میں دعوت دوں گا، آف دی ریکارڈ بات کریں گے، آپ خود دیکھ سکیں گے کہ میں کیا بات کر رہا ہوں۔'

    تقریب سے بات کرتے ہوئے وزیر اعظم نے کہا کہ وہ یہ خط آج چند سینئیر صحافیوں اور اتحادیوں کے ساتھ شئیر کریں گے۔

    ان کا مزید کہنا تھا کہ لوگوں نے خود فیصلہ کرنا ہے لیکن وہ فیصلہ کرتے وقت یہ ضرور سوچیں کہ وہ کہیں پاکستان کے خلاف ہونے والی سازش کا حصہ تو نہیں بن رہے ہیں۔

15. 30 مار چ 2022پاکستان تحریک انصاف کا وفد متحدہ قومی موومنٹ سے مذاکرات کے لیے اسلام آباد پہنچ گیا

    کراچی سے تعلق رکھنے والے پاکستان تحریک انصاف کے اہم رہنما فیصل واوڈا نے ٹویٹ میں بتایا ہے کہ وہ کراچی سے اسلام آباد پہنچ گئے ہیں جہاں وہ وفاقی وزیر پرویز خٹک اور گورنر سندھ عمران اسماعیل کے ہمراہ اتحادی جماعت متحدہ قومی موومنٹ سے مذاکرات کے لیے ٹیم کا حصہ ہیں۔

16. 30 مار چ 2022بریکنگ, متحدہ اپوزیشن اور ایم کیو ایم کے درمیان معاہدہ طے پا گیا، بلاول بھٹو

    پاکستان پیپلز پارٹی کے چیئرمین بلاول بھٹو نے اپوزیشن اور ایم کیو ایم کے درمیان معاہدہ طے پانے کی تصدیق کرتے ہوئے کہا ہے کہ معاہدے کی توثیق کے بعد کل میڈیا کو تفصیلات سے آگاہ کیا جائے گا۔

17. 30 مار چ 2022متحدہ اپوزیشن اور ایم کیو ایم کے درمیان معاہدے نے حتمی شکل اختیار کر لی، فیصل سبزواری کی ٹویٹ

    ایم کیو ایم رہنما فیصل سبزواری کے مطابق متحدہ اپوزیشن اور ان کی جماعت کے درمیان معاہدے نے حتمی شکل اختیار کر لی ہے۔

    ٹوئٹر پر اپنے پیغام میں فیصل سبزواری نے لکھا کہ ’متحدہ اپوزیشن اور متحدہ قومی موومنٹ پاکستان کے درمیان معاہدے نے حتمی شکل اختیار کر لی ہے۔‘

    انھوں نے یہ بھی لکھا کہ ’پیپلز پارٹی کی سی ای سی اور ایم کیو ایم پاکستان کی رابطہ کمیٹی مجوزہ معاہدے کی توثیق کے بعد اس کی تفصیلات سے کل شام چار بجے باضابطہ طور پر میڈیا کو آگاہ کیا جائے گا۔‘

    واضح رہے کہ منگل کو رات گئے متحدہ اپوزیشن نے تحریک عدم اعتماد کے معاملے پر ایم کیو ایم قیادت سے ملاقات کی، جس کے بعد ایم کیو ایم کی جانب سے پریس کانفرنس بھی متوقع تھی۔

18. 29 مار چ 2022دھمکی آمیز خط کا معمہ: قومی سلامتی کا معاملہ یا سیاسی ہتھیار؟

19. 29 مار چ 2022سپریم کورٹ خود کو خط کے معاملے سے دور رکھے: مریم نواز

20. 29 مار چ 2022شہباز شریف کا اپنا درجہ ہے لیکن وہ بھائی کے ویٹو کا رخ نہیں موڑ سکے: چوہدری پرویز الٰہی

    پاکستان مسلم لیگ (ق) کے رہنما اور گذشتہ روز حکومت کی جانب سے وزیرِاعلیٰ پنجاب کی کرسی کی پیشکش قبول کرنے والے سپیکر پنجاب اسمبلی چوہدری پرویز الٰہی نے کہا ہے کہ ن لیگ سے جن کی حمایت درکار تھی شہبازشریف ان کو نہیں منا سکے، ان کا اپنا درجہ ہے لیکن وہ اپنے بھائی کے ویٹو کا رخ نہیں موڑ سکے۔

    انھوں نے جیو نیوز کے پروگرام کیپیٹل ٹاک میں گفتگو کرتے ہوئے کہا کہ ’جن کو آن بورڈ ہونا چاہیے تھا وہ شہبازشریف سے آن بورڈ نہیں تھے، مثال کے طور پر مریم نواز کو پسند نہیں تھا، وہ گروپ محسوس کرتا تھا کہ ہم سات دس سیٹوں والوں کو کیوں سارا کچھ ہی دے دیں؟‘

    چوہدری پرویز الٰہی کا مزید کہنا تھا کہ ’ان کے ساتھ ہماری ایک پوری تاریخ ہے تین دفعہ ہمارے ساتھ یہ ہو چکا ہے، ہم ان کے ساتھ بڑے ہی محتاط طریقے سے چلتے ہیں۔‘

    پرویز الٰہی کا مزید کہنا تھا کہ ’ن لیگ والے ہمیں بھی مطمئن کر رہے تھے اور آصف زرداری کو بھی، انھوں نے نیا آغاز کیا تھا تو سوچا کہ اور بڑا وفد بنا کر بھیجتے ہیں اور وہ جا کر ان کو کہیں کہ میاں صاحب کا بھی اوکے آ گیا اور سارے معاملات ٹھیک کر لیے۔

    ان کا کہنا تھا کہ ’ان کی بدقسمتی اور ہماری خوش قسمتی کہ ہمیں چیزوں کا علم ہو جاتا ہے، ہمیں اطلاع ملی تھی کہ ہمیں تین سے چار مہینے کا وقت ملے گا۔‘