آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان میں کورونا وائرس کے مصدقہ مریضوں کی تعداد 21 ہزار سے تجاوز کر گئی ہے جبکہ ہلاکتوں کی مجموعی تعداد 486 ہے۔ گذشتہ 24 گھنٹوں میں پاکستان میں پہلی مرتبہ 1300 سے زیادہ کورونا متاثرین ایک دن میں سامنے آئے ہیں۔
تین آسٹریلوی کوالا ہوں یا ایک مائیکل جورڈن یا پھر نصف واکس ویگن بیٹل، یہ وہ فاصلہ ہے جتنا آپ کو کسی بھی فرد سے کورونا کی وبا کے دوران سماجی دوری اختیار کرتے ہوئے رہنا چاہیے اور اگر بات سمجھ نہیں آئی تو یہ ویڈیو دیکھ کر سمجھ لیں۔
وزیر اعلیٰ پنجاب عثمان بزدار کے مطابق صوبے میں اس وقت کورونا وائرس کے مریضوں کی تعداد 6859 ہوچکی ہے جبکہ اب تک اس وبا سے 115 افراد ہلاک ہوئے ہیں۔
ان کا مزید کہنا تھا کہ: ’90 فیصد زائرین اور تبلیغی جماعت کے افراد صحت یاب ہو کر گھروں میں جا چکے ہیں۔‘
ان کا کہنا تھا کہ کل 90 ہزار افراد کے کورونا ٹیسٹ کیے جا چکے ہیں۔
’بیرون ملک سے آنے والے پاکستانیوں کو ہونے والی شکایت پر انکوائری کا حکم دیا ہے۔۔۔ بیرون ملک سے آنے والے افراد کو گھروں میں قرنطینہ کرنے کی سفارش وفاق کو بھجوائی جائے گی۔‘
انھوں نے یہ بھی کہا کہ لاہور، راولپنڈی، ملتان، گوجرانوالہ اور گجرات میں سمارٹ سیمپلنگ کا سلسلہ شروع کیا گیا ہے۔ مختلف سرکاری اور نجی اداروں میں ٹیسٹ سیمپل لیے جائیں گے۔
وزیر اعلیٰ پنجاب عثمان بزدار نے کہا ہے کہ صوبے میں کٹس اور بیڈز کی کوئی کمی نہیں ہے۔
سنیچر کو پریس کانفرنس کے دوران ان کا کہنا تھا کہ دیہاڑی دار طبقہ سب سے زیادہ متاثر ہو رہا ہے۔ 28 لاکھ خاندانوں میں 34 ارب روپے تقسیم کیے جا چکے ہیں۔
انھوں نے مزید کہا کہ ’صنعت کاروں اور تاجروں کی سہولت کے لیے وفاقی حکومت کو سفارشات پیش کی ہیں کہ تعمیرات سے متعلق دیگر شعبے جیسے روڑ سیکٹر، بیلڈنگ، برآمدات اور اس سے متعلق فیڈنگ سیکٹر، پاور لومز اور ایسی تمام فیکٹریاں جن کی اپنی لیبر کالونیاں ہیں انھیں کھولنے کی درخواست کی گئی ہے۔‘
’آئرن، سٹیل اور ہوم اپلائنسز کی صنعت کو کھولنے کی بھی درخواست کی ہے۔۔۔ مارکیٹوں اور بازاوں کو مختلف ایام میں کھولنے کی درخواست کی گئی ہے۔‘
اس سے قبل ان کا کہنا تھا کہ ’ٹی بی اور ایڈز کے مریض، ہسپتالوں میں حاملہ خواتین اور جیلوں میں بند قیدی، ہم اس طرح عوام کو تقسیم کر کے کورونا کے پھیلاؤ کا جائزہ لیں گے۔‘
عثمان بزدار کا کہنا تھا کہ پنجاب میں تین مزید لیب فعال ہوچکے ہیں۔ کل سے روزانہ پنجاب میں چھ ہزار ٹیسٹ کر سکیں گے۔
وفاقی وزیر ریلویز شیخ رشید نے کہا ہے کہ پاکستان میں کوئی لاک ڈاؤن نہیں یہاں صرف ’مذاق ہو رہا ہے۔‘
انھوں نے لاہور میں اپنی پریس کانفرنس کے دوران کہا کہ ’آپ کیمرے پکڑ کر چلیں میرے ساتھ کہاں لاک ڈاؤن ہو رہا ہے؟‘
شیخ رشید نے عمران خان کے بیانات کی حمایت کرتے ہوئے کہا ہے کہ لاک ڈاؤن سے غریب طبقہ سب سے زیادہ متاثرہ ہوگا۔
انھوں نے کہا کہ 25ویں روزے تک بعض کاروبار کھولنے کی اجازت دینی چاہیے کیونکہ یہی خریداری کا موسم ہے۔
’لاہور سے مطالبہ کرتا ہوں کہ شٹر والی دکانیں کھول دی جائیں۔۔۔ پاکستان میں غربت کا طوفان آرہا ہے۔‘
اس موقع پر ان کا یہ بھی کہنا تھا کہ وزیراعظم نے جب اجازت دی 30 ٹرینیں چلا دیں گے۔
وفاقی وزیر ریلویز نے کہا ہے کہ ان کا محکمہ لاک ڈاؤن کے دوران محدود ٹرینیں چلانے جا رہا ہے جن میں تمام حفاظتی ہدایات پر عمل کیا جائے گا۔
شیخ رشید کہتے ہیں کہ ’قرنطینہ ٹرین میں 50 فیصد سیٹیں خالی ہوں گی۔‘
انھوں نے کہا کہ تیل کی قیمتوں میں کمی کے بعد پی ایس او سے بات کی ہے۔
وفاقی وزیر ریلوے شیخ رشید نے کہا ہے کہ وہ چاہتے ہیں پاکستان ریلویز کے ہر ملازم کا ایک گریڈ بڑھایا جائے۔
انھوں نے وفاقی حکومت سے گزارش کی ہے کہ ریلوے کو اپنا بجٹ خود بنانے کی اجازت دی جائے۔
انھوں نے ان خبروں کی تردید کی ہے کہ لاک ڈاؤن اور معاشی بحران کے دوران پی آئی اے اور ریلویز کے ملازمین کو نکالا جائے گا۔
’کسی افسر یا مزدو کو نہیں نکالا جائے گا۔‘
کورونا وائرس کا پھیلاؤ روکنے کے لیے پاکستان بھر کے تعلیمی ادارے بند ہیں جس کی وجہ سے طلبہ گھروں تک محدود ہو گئے ہیں۔
کراچی میں قائم ’پاکستان سائنس کلب‘ نے گھر بیٹھے بچوں کے لیے دلچسپ سائنسی تجربات مفت آن لائن سکھانے کا سلسلہ شروع کیا ہے۔ تفصیلات اِس ڈیجیٹل ویڈیو میں۔
وزیر اعظم کے معاون خصوصی برائے قومی سلامتی ڈاکٹر معید یوسف کا کہنا ہے کہ دفتر خارجہ کی کوششوں کی مدد سے ’ہم انڈیا میں لاک ڈاؤن کے باوجود وہاں پھنسے 227 پاکستانیوں کو واپس لا رہے ہیں۔‘
وہ کہتے ہیں ان 227 پاکستانیوں کو رواں ہفتے دونوں ملکوں کے درمیان واہگہ کی سرحد سے واپس لانے کے لیے انتظامات کیے جا رہے ہیں۔
’اس سے قبل 46 پاکستانیوں کو واپس لایا گیا تھا۔‘
پاکستان کے صوبہ پنجاب میں مزید 514 افراد میں کورونا وائرس کی تشخیص ہوئی ہے جس کے بعد کل متاثرین کی تعداد 6854 ہوگئی ہے۔
کورونا سے سب سے زیادہ متاثرہ صوبے میں اب تک 115 اموات ہوئی ہیں جبکہ 22 افراد کی حالت تشویشناک بتائی جارہی ہے۔
یہاں اب تک 2206 افراد کووڈ 19 کی تشخیص کے بعد صحتیاب ہوچکے ہیں۔
صوبائی محکمہ صحت کے ترجمان کے مطابق 768 زائرین، 1926 رائے ونڈ تبلیغی جماعت سے منسلک افراد، 86 قیدیوں اور 4075 عام شہریوں میں کورونا وائرس کی تصدیق ہوئی ہے۔
صوبائی دارالحکومت لاہور میں سب سے زیادہ 2154 مصدقہ مریض موجود ہیں۔ یہاں 334 مزید افراد میں کورونا کی تصدیق ہوئی ہے۔
وزیر سائنس اینڈ ٹیکنالوجی فواہد چوہدری نے ایک ٹویٹ میں کہا ہے کہ ’پاکستان کی سیاسی جماعتیں ٹیکنالوجی کے استعمال کی مخالفت کر کے اپنا اور عوام کا نقصان کر رہی ہیں۔‘
’پارلیمان کا ورچوئل سیشن وقت کی ضرورت ہے، عوامی نمائندوں کو اس مشکل وقت میں فیصلہ سازی کے عمل میں لازماً شریک ہونا چاہیے۔ حالات معمول کے مطابق ہونے کے بعد عمارت میں بھی سیشن ہوسکتا۔‘
پاکستان میں سیاسی رہنما اس موضوع پر بٹے ہوئے دکھائی دیتے ہیں کہ آیا پارلیمان کا ورچوئل اجلاس بلایا جانا چاہیے یا نہیں۔
مقامی میڈیا کے مطابق وزیر اطلاعات شبلی فراز نے حال ہی میں کہا تھا کہ پارلیمان کے ورچوئل اجلاس کی قانون میں کوئی گنجائش نہیں ہے اور حکومت اجلاس بلانے کے لیے میڈیکل ایس او پیز بنا رہی ہے۔
پنجاب میں صوبائی ڈیزاسٹر مینجمنٹ اتھارٹی (پی ڈی ایم اے) نے تصدیق کی ہے کہ صوبے میں اس وقت کورونا کے 6733 متاثرین ہیں جبکہ اس وبا سے 115 اموات ہوچکی ہیں۔
اس کا کہنا ہے کہ ’لاہور سب سے متاثرہ شہر ہے جہاں 2,048 متاثرین ہیں۔‘
پنجاب میں اب تک 2205 افراد کورونا سے صحتیاب بھی ہوئے ہیں۔
حکومتی نمائندے اور حکمراں جماعت پاکستان تحریک انصاف کے رہنما شہباز گل نے پاکستان پیپلز پارٹی کے چیئرمین بلاول بھٹو پر تنقید کرتے ہوئے کہا ہے کہ ’ملک کا لاک ڈاؤن کوئی ویڈیو گیم کا بٹن نہیں کہ آپ نے دبا دیا اورسب نظام رک گیا۔‘
’خیالی دنیا سے حقیقت میں واپس آئیں کراچی کی صرف11 یو سیز میں لاک ڈاؤن کا فیصلہ ہوا لیکن آپ عملدرآمد نہیں کرواسکے اور باتیں پورے ملک کے لاک ڈاؤن کی کرتے ہیں۔‘
انھوں نے اپنے ٹویٹ میں یہ بھی کہا ہے کہ دنیا کا چین سے موازنہ ممکن نہیں، نہ ہی ویسا لاک ڈاؤن دنیا میں کہیں ہوسکتا ہے۔ لاک ڈاؤن صرف آپ کوتیاری کے لیے وقت دیتا ہے۔۔۔ خدارا سیاست نہیں، کام کریں۔‘
یاد رہے کہ جمعے کو بلاول بھٹو نے کہا تھا کہ ’وزیراعظم عمران خان کام کریں، کام نہیں کرسکتے تو استعفیٰ دیں تاکہ کوئی اور آسکے۔‘
انھوں نے کہا تھا کہ ’وفاقی حکومت صوبوں کی کوئی مدد نہیں کر رہی۔۔۔ اگر ہم لاک ڈاؤن ختم کرتے ہیں تو ہسپتالوں پر دباؤ بڑھے گا۔‘
حکام کے مطابق پاکستان کے زیر انتظام کشمیر میں ایک صحافی سمیت دو افراد میں کورونا وائرس کی تشخیص ہوئی ہے۔
خطے میں مصدقہ متاثرین کی کل تعداد 68 ہوگئی ہے۔
اس خطے کے وزیر اعظم کے پریس سیکرٹری راجہ وسیم کے مطابق دارالحکومت مظفرآباد میں مزید ایک صحافی میں کورونا وائرس کی تشخیص ہوئی ہے جو ’پہلے سے متاثر ہونے والے صحافیوں سے متاثر ہوئے۔‘
حکام کے مطابق متاثر ہونے والے صحافی کو آئسولیشن ہسپتال میں منتقل کر دیا گیا ہے۔ مذکورہ صحافی گھر میں آئسولیٹ تھے جس بنا پر ان کے خاندان کے افراد کو بھی اپنے گھر میں آئسولیٹ کر دیا گیا ہے۔
یاد رہے اس خطے میں کورونا وائرس سے متاثر ہونے والے صحافیوں کی تعداد تین ہوگئی ہے۔
دوسری جانب کمشنر محمد رقیب خان نے بی بی سی کو بتایا کہ بھمبر سے تعلق والے ایک شخص میں کورونا وائرس کی تشخیص ہوئی ہے۔ ان کے مطابق مذکورہ شخص نے عمان سے سفر کیا۔ ان کو پہلے سے قرنطینہ میں رکھا گیا تھا۔
حکام کے مطابق اس خطے میں قائم مختلف قرنطینہ مراکز میں اب تک 2000 سے زائد مشتبہ افراد کو لایا گیا ہے جس میں 116 کے قریب افراد کے نتائج کا انتظار کیا جا رہا ہے جبکہ اب تک 43 مریض صحتیاب ہوچکے ہیں۔
پاکستان میں منصوبہ بندی کی وزارت کے ذیلی ادارے پاکستان انسٹیٹیوٹ آف ڈویلپمنٹ اکنامکس نے کورونا وائرس کی وجہ سے معاشی سرگرمیوں پر منفی اثرات کا جائزہ لیتے ہوئے ایک کروڑ سے زائد افراد کے بیروزگار ہونے کے خدشے کا اظہار کیا ہے۔
کورونا وائرس کی وجہ سے پیدا ہونے والے معاشی بحران سے لاکھوں افراد کے بیروزگار ہونے کے خدشات کے بارے میں بات کرتے ہوئے پاکستان کے سابق وزیر خزانہ اور ماہر معیشت ڈاکٹر حفیظ پاشا کا کہنا ہے کہ موجودہ صورتحال کی وجہ سے ملک میں ایک خوفناک معاشی منظر نامہ جنم لے رہا ہے۔
ان کے تجزیے کے مطابق اگر کورونا وائرس کے پھیلاؤ کے حالات مزید خراب ہوتے ہیں اور حکومت موجودہ حکمت عملی پر کاربند رہتی ہے تو محتاط اندازے کے مطابق تیس سے پچاس لاکھ افراد کا روزگار داؤ پر لگ سکتا ہے۔
اگر لاک ڈاؤن کی مدت بڑھتی ہے اور اسے تین مہینے تک بڑھایا گیا تو یہ ایک کروڑ افراد کی ملازمتوں کو خطروں سے دوچار کر سکتا ہے۔
پاکستان میں کورونا اور لاک ڈاؤن کی وجہ سے بےروزگار ہونے والے افراد کے لیے ایک نیا ویب پورٹل متعارف کرایا جا رہا ہے۔
سرکاری بیان کے مطابق وزیر اعظم عمران خان آج ایک ایسا ویب پورٹل لانچ کریں گے جس کی مدد سے بے روز گار افراد کو امدادی رقوم ادا کی جائیں گی۔
بیان میں کہا گیا ہے کہ یہ قدم کورونا اور لاک ڈاؤن سے متاثرہ لوگوں کے ریلیف کے لیے اٹھایا گیا ہے۔
ایسے افراد کو 12 ہزار روپے احساس ایمرجنسی کیش کے تحت دیے جائیں گے جو ان حالات میں بےروزگار ہوئے ہیں۔
اس پورٹل میں آن لائن درخواست دائر کی جاسکے گی۔
وزیراعظم کے مشیر ڈاکٹر فیصل سلطان نے کہا ہے کہ ’ہم ملک میں کسی بھی وبا کی انتہائی صورتحال کے بارے میں ہرگز کوئی پیشگوئی نہیں کر سکتے کیونکہ ملک میں کورونا وائرس سے متاثرہ افراد کے یومیہ بنیادوں پر نئے کیسز سامنے آ رہے ہیں۔‘
ریڈیو پاکستان کے مطابق انھوں نے کہا ہے کہ ’ہمارے پاس یومیہ 15 ہزار تشخیصی ٹیسٹ کرنے کی صلاحیت موجود ہے۔ تاہم اب تک ہم روزانہ اوسطاً ساڑھے آٹھ ہزار ٹیسٹ کر رہے ہیں۔‘
دوسری طرف سائنس و ٹیکنالوجی کے وزیر فواد چوہدری کے مطابق پاکستان میں کورونا وائرس کی وبا کی روک تھام کے لیے وینٹی لیٹرز کی مقامی تیاری آخری مرحلے میں ہے۔
صوبہ پنجاب کی حکومت نے صنعتی شعبے کے لیے کچھ ہدایات یا ایس او پیز جاری کیے ہیں جن پر عمل پیرا ہو کر بعض فیکٹریاں اور کارخانے کھولے جاسکتے ہیں۔
پاکستان میں وفاقی حکومت کے نمائندوں کی طرف سے یہ کہا جا رہا ہے کہ کورونا وائرس کی وجہ سے لاک ڈاؤن کے دوران ملک میں پٹرولیم منصویات کی قیمتیں علاقائی سطح پر کئی ممالک کے مقابلے کم ہیں۔
وفاقی وزیر شہریار آفریدی ایک ٹویٹ میں کہتے ہیں کہ ’وزیراعظم عمران خان نے پٹرولیم مصنوعات کی قیمتوں میں 15 سے 30 روپے تک کی کمی کر کے غریب اور عوام دوستی کا ثبوت دیا ہے۔‘
’آج پاکستان میں پٹرول انڈیا، بنگلہ دیش، متحدہ عرب امارات سے بھی سستا ہے۔ صوبائی حکومتوں کو چاہیے اب کرایوں میں کمی کرکے فائدہ عوام کو پہنچائیں۔‘
اسی طرح حکمراں جماعت کے سینیٹر کے ایک ٹویٹ کے مطابق ’ڈیزل کی قیمت میں 27 روپے کمی، پٹرول کی قیمت میں 15 روپے کمی (اور) تیل کی قیمت میں 30 روپے کمی (سے) عام آدمی کے لیے ملکی تاریخ کا بے مثال ریلیف۔‘
تاہم سابق حکومت کے وزیر خزانہ مفتاح اسماعیل کے مطابق نئی قیمتوں میں پٹرول پر ٹیکس 99.7 فیصد ہے۔