امریکی صدارتی انتخاب: اب تک کیا کیا ہوا ہے؟
ہمیں بتایا گیا ہے کہ امریکہ میں آخری سوئنگ ریاست نیواڈا میں بھی صدر کے انتخاب کے لیے ووٹنگ شروع ہو چکی ہے۔
اب تک امریکہ میں صدارتی انتخاب کے دوران کیا کیا ہوتا رہا ہے:
- تقریباً تمام ہی امریکی ریاستوں میں اب ووٹنگ شروع ہو چکی ہے۔ الاسکا اور ہوائی میں تقریباً دو گھنٹوں بعد ووٹرز ووٹ ڈالنے کے لیے نکلیں گے۔
- امریکی ریاستوں میں صداتی انتخاب کے لیے ووٹنگ کا اختتام مختلف اوقات پر ہوگا لیکن ایسٹ کوسٹ میں تمام ہی ریاستوں میں ووٹنگ مقامی وقت کے مطابق 23:00 بجے ختم ہوجائے گی۔ صرف الاسکا اور ہوائی وہ ریاستیں ہیں جہاں پولنگ کا اختتام ایک گھنٹے دیر سے ہوگا۔
- امریکہ میں صدارتی انتخاب امریکی عوام کے لیے صرف اگلا صدر چُننے کی مشق نہیں بلکہ ووٹرز اپنے ووٹ کے ذریعے دیگر اہم معاملات پر بھی اپنی رائے دیں گے۔ اس صدارتی انتخاب میں ایریزونا اور نیواڈا جیسی سوئنگ ریاستوں سمیت 10 ریاستیں یہ بھی فیصلہ کریں گی کہ خواتین کو اسقاطِ حمل کے حقوق حاصل ہونے چاہییں یا نہیں۔ اس کے علاوہ امریکی سینیٹ کی ایک تہائی یعنی 100 میں سے 34 نشستوں پر بھی الیکشن آج ہی ہو رہے ہیں جہاں فی الحال ڈیموکریٹک پارٹی کو رپبلکن پارٹی پر ایک نشست کی برتری حاصل ہے۔ امریکہ کے ایوانِ نمائندگان کی 435 نشستوں پر انتخابات بھی آج ہی ہو رہے ہیں جہاں اس وقت رپبلکن پارٹی کو ڈیموکریٹک پارٹی پر برتری حاصل ہے۔
- ڈونلڈ ٹرمپ اور کملا ہیرس آج کہاں موجود ہیں؟ ٹرمپ واپس فلوریڈا روانہ ہو چکے ہیں جہاں وہ تھوڑی دیر میں اپنا ووٹ بھی ڈالیں گے۔ دوسری جانب توقع کی جا رہی ہے کہ کملا ہیرس ہاروڈ یونیورسٹی میں الیکشن پارٹی میں شرکت کریں گی۔