ኣብ ኢትዮጵያ ብኮሮናቫይረስ ናይ ዝሞቱ ሰባት ብዝሒ 209 በጺሑ

ኣብ ኢትዮጵያ ብሰንኪ ኮሮናቫይረስ ናይ ዝሞቱ ሰባት ብዝሒ ልዕሊ ክልተ ምኢቲ ከምዝበጽሐ ተገሊጹ።

ዛጊድ፡ ኣብ’ታ ሃገር ምስ ኮሮናቫይረስ ብዝተተሓሓዘ፡ 209 ሰባት ሞይቶም እዮም።

ካብ’ዚ ገሊኡ፡ ኣብ ሬሳ ብዝተገበረ ምርመራታት እዩ ተፈሊጡ።

ትማሊ ቀዳም ሚኒስትሪ ጥዕና ናይ’ታ ሃገር ዘውጸኦ መግለጺ ከምዘርእዮ፡ 8,490 ምርመራታት ተገይሩ ካብዚኦም እቶም 555 እቲ ቫይረስ ተረኺብዎም እዩ።

ኣብ’ቲ ዕለት ከምዝተገለጸ ድማ፡ ኣብ ሕክምና ካብ ዝጸንሑ ሰባት ተወሰኽቲ 181 ሓውዮም።

ኣብ ኢትዮጵያ፡ ክሳብ ሕዚ 372,812 ምርመራታት ተገይሩ። 13,248 ሰባት ድማ እቲ ቫይረስ ተረኺብዎም።

ብዝሒ ዛጊት ዝሓወዩ ሰባት ድማ 5,966 እዩ።

ብደረጃ ዓለም ንዘሎ ኩነታት ክንርእይ እንከለና ድማ፡ ብዝሒ በዚ ቫይረስ ዝተለኸፉ ሰባት ካብ 16 ሚልዮን ሓሊፉ’ሎ።

ኣብ ዓለምና፡ ብዝሒ ብኮቪድ-19 ዝሞቱ ሰባት ድማ 644,661 ኮይኑ’ሎ።

ብብዝሒ ዝተለኸፉ ሰባት ቅድሚት ተሰሪዐን ዝርከባ ሃገራት፡ ኣመሪካ፡ ብራዚልን ህንድን እየን።

ብብዝሒ ምውታት ድማ ኣመሪካ ብራዚልን ብሪጣንያን ኣብ ቅድሚት ኣለዋ።