ሓደ ውልቀሰብ "ዓው ኢልኩም ተዛሪብኩም" ብዝብል ሓሙሽተ ሰባት ቀቲሉ

ኣብ ሩሲያ ሓደ ውልቀ ሰብ ካብ መጠን ንላዕሊ ዓው ኢሎም ብምዝራብ ረቢሾምኒ ንዝበሎም ሓሙሽተ ሰባት ከምዝቐተለ ተገሊፁ።

እዚ ውልቀሰብ፡ ሰዓት ኣርባዕተ ናይ ምሸት፡ ኣብ ኣፍደገ ገዝኡ ኮይኖም ብዓውታ የውግዑ ንዝነበሩ ሓሙሽተ ሰባት፡ "በይዛኹም ድምፂ ነክዩ፡ ትርብሹኒ ኣለኹም" ይብሎም እሞ፡ ንሶም ግና ክሰምዕዎ ኣይከኣሉን።

ኣብ ሞንጎኦም ዝተፈጠረ ዘይምስምማዕ ብምንሃሩ፡ ንመህደኒ ኣራዊት ብዝጥቀመሉ ጠበንጃ ተኵስሎም። ሓሙሽቲኦም ሰባት ድማ ሞይቶም።

እዚ ተግባር ካብ ከተማ ሞስኮ 200 ኪሎሜትር ርሒቓ ኣብ ዝርከብ ኣውራጃ ሪያዛን፤ የላትማ ኣብ ትበሃል ቁሸት እዩ ተፈፂሙ።

ነበርቲ እታ ኣውራጃ ብሰንኪ ኮሮናቫይረስ፡ ካብ ገዝኦም ንከይወፅኡ መምርሒ ተዋሂብዎም እዩ።

እዚ ውልቀሰብ ነዚ ተግባር ቅድሚ ምፍፃሙ፡ ነቶም ግዳያት 'ድምፂ ነክዩ' ብምባል ተማሕፂንዎም ከምዝነበረ ፖሊስ ሓቢሩ።

ፖሊስ ነዚ ተግባር ንዝፈፀመ ውልቀሰብ ኣብ ቀይዲ ኣውዒልዎ'ሎ።