ኔታንያሁ፡ ‘እዚ እዋን ኲናት’ዩ’ ብምባል ምስ ሓማስ ተኹሲ ደው ምባል ነጺጕ

ቀጥታዊ ሸፈነ

1. 31 ጥቅምቲ 2023ኣብ ኲናት እስራኤልን ሓማስን 31 ጋዜጠኛታት ተቐቲሎም - ሲፒጄ

   ኣብ ሞንጐ እስራኤልን ሓማስን ዝቕጽል ዘሎ ጐንጺ ዝሽፍኑ ዝነበሩ ብውሕዱ 31 ጋዜጠኛታት ከም ዝተቐትሉ ኮሚቴ ሓለዋ ጋዜጠኛታት (ሲፒጄ) ገሊጹ።

   ካብዚኦም እቶም 26 ፍልስጤማውያን ክዀኑ እንከለው 4 እስራኤላውያን 1 ሊባኖሳውን እውን ይርከቡዎም።

   ካልኦት ሸሞንተ ጋዜጠኛታትድማ ጉድኣት ከም ዝበጽሖም ብምግላጽ፡ ትሸዓተ ድማ ከም ዝጠፍኡ ወይ ከም ዝተኣስሩ ይግመት ክብል እቲ ኮሚቴ ኣምልኪቱ።

   እቲ ትካል ትማሊ ሰኑይ ኣብ ዘውጽኦ መግለጺ፡ “ብፍላይ ኣብ ጋዛ ዝርከቡ ጋዜጠኛታት እስራኤል ብመሬት እትፍጽሞ ዘላ መጥቃዕቲ፣ ኣዕናዊ ደብዳባት ነፈርቲ፣ ሰፊሕ ምቁራጽ ሓይሊ ኤሌክትሪክን ምቁራጽ ኮምዩኒኬሽንን ኣብ ዘለወሉ ነቲ ግጭት ክሽፍኑ ኣብ ዝፍትኑሉ እዋን ልዑል ሓደጋታት የጋጥሞም ኣሎ” ኢሉ።

   ሮሽዲ ሳራጅ ዝተባህለ ፍሉጥ ፍልስጤማዊ ኣፍራዪ ፊልም ሓደ ካብቶም ግዳያት ኰይኑ ኣብ ከባቢ ዶብ ሊባኖስ ካብ ኣንፈት እስራኤል ብዝመጽአ ደብዳብ ዝተቐትለ ኣብ ቤይሩት መደብሩ ፍሉጥ ፍልስጤማዊ ሰኣሊ ሮይተርስ (ቪድዮግራፈር) ኢስማን ዓብደላን ይርከብዎም።

   ሰራዊት ምክልኻል እስራኤል፡ ንሮይተርስ ኣብ ዝሃቦ ቃል ነቲ ክሲ ይምርምሮ ከም ዘሎ ሓቢሩ።

   ብተወሳኺ ኣብ ጋዛ ንዝንቀሳቐሱ ጋዜጠኛታት ውሕስነት ክህብ ከም ዘይክእል፡ ንማዕከናት ዜና ሮይተርስን ኤኤፍፒን ገሊጹ።

2. 30 ጥቅምቲ 2023ትካላት ጸጥታ እስራኤል ተጨውያ ንዝነበረት ወተሃደር ናጻ ኣውጺኦም

   

   ምንጪ ስእሊ, ISA

   ሓይልታት ምክልኻልን ትካል ሃገራዊ ድሕነትን እስራኤል ኣብ ዘውጽእዎ ናይ ሓባር መግለጺ፡ ሓንቲ ኣብ ቓዛ ብሓማስ ጅሆ ተታሒዛ ዝጸንሐት ወተሃደር ከምዘድሓኑ ኣፍሊጦም።

   ወተሃደር ኦሪ መግዲሽ፡ ሰራዊት እስራኤል ትማሊ ለይቲ ናብ ውሽጢ እታ ወሽመጥ ብምእታው ኣብ ዘካየዶ ስርሒታት’ያ ናጻ ወጺኣ።

   “እታ ወተሃደር ሕክምናዊ መርመራ ተኻዪዱላ ኣብ ድሓን ኩነታት ትርከብ። ምስ ስድራቤታ ተረኺባ’ላ። ሓይልታት ምክልኻልን ትካል ሃገራዊ ድሕነትን ነቶም ጅሆ ተታሒዞም ዘለዉ ንምውጻእ ኩሉ ዘድሊ ክገብሩ እዮም” ይብል እቲ ዝወጸ መግለጺ።

   ሚኒስተር ምክልኻል ዮኣቭ ጋላንት ብዛዕባ ኩነታት እታ ወተሃደር ተሓቲቱ ኣብ ዝሃቦ መልሲ፡ ሓበሬታ ክህብ ከምዘይደሊ ገሊጹ።

   “ዝነገረትና ነገራት ኣብ መንጎኣን እቲ ዝተዛረባ ኣካልን ዝተርፍ’ዩ። ዝርዝራቱ ድማ ብሓቂ ብኸምዚ ተሰቲሩ ክዕቀብ ዘለዎ’ዩ። ምኽንያቱ፡ ብዙሓት ኣብ ኢዶም ጅሆ ዝተታሕዙ ስለዘለዉ” ኢሉ።

   ቀዳማይ ሚኒስተር በንጃሚን ነታንያሁ’ውን “እንቋዕ ናብ ገዛኺ ተመለስኪ” ክብል ሓጎሱ ገሊጹ’ሎ።

3. 30 ጥቅምቲ 2023ሓማስ ዘውጽኦ ቪድዮ ግዳያት ጅሆ ‘ጨካን ስነኣእምሮኣዊ ፕሮፖጋንዳ’ዩ’

   

   ምንጪ ስእሊ, Al Qassam

   ምስ እስራኤል ዝዋጋእ ዘሎ ጉጅለ ሓማስ ብ7 ጥቅምቲ ኣብ ልዕሊ እስራኤል ሃንደበታዊ መጥቃዕቲ ብምኽፋት ዝጨወየን ሰለስተ ደቂኣንስትዮ ዘርኢ ቪድዮ ኣውጺኡ።

   ዋላ’ኳ ኩነታት ኣተሓሕዘአን ብንጹር ክፍለጥ ዘይክእል እንተኾነ፡ እተን ኣብቲ ቪድዮ ዝራኣያ ግዳያት ጅሆ ኣብ ድሓን ኩነታት ዘለዋ ይመስላ። ኣብ ገጸን ይኹን ቅሉዕ ክፋል ኣካላተን ዝኾነ ዝርአ መጉዳእቲ የብለንን።

   ሓንቲ ካብአን፡ ንቀዳማይ ሚኒስተር ነታንያሁ ዘለዋ ነቐፌታ ብምግላጽ፡ ኩሎም ግዳያት ጅሆ ክፍትሑ ክትጽውዕ ትስማዕ።

   እቲ ብሰንኪ መጥቃዕቲ ሓማስ ሓያል ነቐፌታ ክቐርበሉ ጀሚሩ ዘሎ ነታንያሁ፡ ኣስማት ናይተን ግዳያት ብምጥቃስ፡ ነቶም ጅሆ ተታሒዞም ዘለዉ ንምፍታሕ ዝክኣሎ ይገብር ከምዘሎ ኣብ ዘውጽኦ መግለጺ ቃል ኣትዩ።

   “ናብተን በቲ ገበናት ኲናት ዝፈጸመ ሓማስ ዝተጨውያ ኢለና ትሩፓኖቭ፡ ዳኒኤል ኣሎኒ ከምኡ’ውን ሪሞን ኪርሽት ክምለስ። እሓቚፈክን” ክብል ጓሂኡ ገሊጹ።

   “ልብና ምሳኽንን ምስቶም ካልኦት ግዳያት ጅሆን እዩ ዘሎ። ንኹሎም ጅሆ ተታሒዞም ዘለዉን ሃለዋቶም ዘይተፈልጠን ንምምላስ ዝከኣለና ኩሉ ንገብር ኣለና”።

   ቢቢሲ፡ ዝህብዎ መግለጺ ብኣስገዳድ ዝግበር ክኸውን ስለዝኽእል ንቪድዮታት ምሩኻት ኲናትን ጅሆ ዝተታሕዙ ሰባትን ኣይሓትምን’ዩ።

4. 30 ጥቅምቲ 2023ንኣይሁዳውያን ከጥቅዑ ናብ መዓርፎ ነፈርቲ ጠኒኖም ዝኣተዉ ዕስለ ሰባት

5. 30 ጥቅምቲ 2023ኣብ ቤትማእሰርቲ ኬንያ ዝጸንሑ 60 ኤርትራውያን ናብ መዓስከር ስደተኛታት ተላኢኾም

6. 30 ጥቅምቲ 2023ሰብ መዚ ሕቡራት ሃገራት ኣብ ቓዛ ‘ውሑስ ቦታ’ የለን ኢሎም

7. 29 ጥቅምቲ 2023እስራኤል 'ንኹሉ ስጉምቲ ክወስድ ተገድድ ኣላ' - ፕረዚደንት ኢራን

8. 28 ጥቅምቲ 2023እስራኤል ሙሉእ ለይቲ ብዝፈፀመቶ ከቢድ ደብዳብ፡ ኣብ ጋዛ ህውከት ሰፊኑ

   

   ምንጪ ስእሊ, Getty Images

   ኣብ ጋዛ ዝርከብ ጋዜጠኛ ቢቢሲ ሩሽዲ ኣቡኣሉፍ፡ ብዓርቢ ምሸት ሰሜናዊ ወሽመጥ ጋዛ ክሳብ ሕዚ ተራእዩ ብዘይፈልጥ መጠን፡ ብኸቢድ ከም ዝተደብደበ ገሊፁ።

   ብሰንኪ እዚ ድማ ሰሜናዊ ጋዛ ሙሉእ ብሙሉእ ኣብ ሕንፍሽፍሽ ጥሒላ ኣላ ኢሉ።

   ሰራዊት እስራኤል ብዓርቢ ናብ ቀዳም ኣብ ዘውግሕ ለይቲ 150 ዒላማታት ሓማስ ከም ዝደብደበ ሓቢሩ።

   ትማሊ ምሸት ዝነበረ መጥቃዕቲ፡ ብሓይሊ ኣየር፣ ታንክን እግረኛ ሰራዊትን ዝተዓጀበ ምዃኑ ተገሊፁ።

   ሓላፊ ስርሒታት ሓይሊ ኣየር እስራኤል ብርጋዲየር ጀነራል ጊላድ ኬኢናን፡ ብዓርቢ ለይቲ ኣስታት 100 ጀታት ኣብ ወሽመጥ ጋዛ ንዒላማታት ሓማስ ከም ዝደብደባ ተዛሪቡ።

   ወተሃደራዊ ክንፊ ሓማስ ብርጌድ ኣል ቃሳም ብወገኑ፡ ኣብ ሰሜናዊ ጋዛ ምስ ሰራዊት እስራኤል ይዋጋእ ከምዘሎ ኣፍሊጡ።

9. 28 ጥቅምቲ 2023ሓማስ ምስ ሰራዊት እስራኤል ይዋጋእ ከምዘሎ ገሊፁ

   

   ምንጪ ስእሊ, AFP

   ወተሃደራዊ ክንፊ ሓማስ ብርጌድ ኣል ቃሳም፡ ኣብ ሰሜናዊ ጋዛ ምስ ሰራዊት እስራኤል ይዋጋእ ከምዘሎ ኣፍሊጡ።

   እቲ ብርጌድ ኣብ ጋዛ ከባብታት ቤኢት ሃኑን ቡሩጄን ይዋጋእ ከም ዘሎ ካብ ምግላፅ ወፃኢ ዝሃቦ ተወሳኺ ሓበሬታ የለን።

   ሓማስ ምስ እግረኛ ሰራዊት እስራኤል ይታኾስ ከም ዘሎ ዝሓበረ፡ እስራኤል እተካይዶም ስርሒታት ከም ዘስፈሐት ድሕሪ ምግላፃ’ዩ።

   ኣፈኛ ሰራዊት እስራኤል፡ እግረኛ ሰራዊትን ታንክታትን ኣብ ወሽመጥ ጋዛ ከም ዝርከቡ ንኒውዮርክ ታይምስ ተዛሪቡ።

10. 28 ጥቅምቲ 2023100 ነፈርቲ ውግእ እስራኤል ንቓዛ ክድብድባ ሓዲረን

    ሰብ መዚ እስራኤል ኣስታት 100 ነፈርቲ ውግእ፡ ንቓዛ ክድብድባ ከም ዝሓደራ ገሊፆም።

    ሓላፊ ስርሒታት ሓይሊ ኣየር እስራኤል ብርጋዲየር ጀነራል ጊላድ ኬኢናን፡ ብዓርቢ ለይቲ ኣስታት 100 ጀታት ኣብ ወሽመጥ ጋዛ ንዒላማታት ሓማስ ከም ዝደብደባ ኣፍሊጡ።

    ሰራዊት እስራኤል ንሓላፊ እቲ ሓይሊ ኣየር ብምፅራሕ ኣብ ዘውፅኦ መግለፂ፡ ዕላማ እቲ መጥቃዕቲ ኣየር፡ “ዓሻራ ሓማስ ዝዓረፎ ሕድሕድ ነገር ምዕናው’ዩ” ኢሉ።

    

    ምንጪ ስእሊ, Getty Images

11. 28 ጥቅምቲ 2023ኣብ ጋዛ ኣገልግሎት ስልክን ኢንተርነትን ተቛሪፁ

    

    ምንጪ ስእሊ, Getty Images

    ኣብ ጋዛሙሉእ ብሙሉእ መራኸብቲ መስመራት ተቛሪፆም።

    ኩባንያ ቴሎኮምዩኒኬሽን ፍልስጤም፡ሰራዊት እስራኤል ተደጋጋሚ ደብዳብ ምፍፃሙ ስዒቡ፡ ኣብ ጋዛ ኣገልግሎት ስልክን ኢንተርነትን ከም ዝተቛረፀ ኣፍሊጡ።

    ሰራሕተኛታት ረድኤትንመራኸብቲ ሓፋሽን፡ ብሰንኪ እዚ ምቁራፅ ኣብ ጋዛ ምስ ዝርከቡ ሰራሕተኛታቶም ክራኸቡ ከም ዘይከኣሉ ይገልፁ ኣለዉ።

12. 28 ጥቅምቲ 2023ኣሜሪካ ኣብ ሊባኖስ ዝርከቡ ዜጋታታ ክወፅኡ ኣዚዛ

    

    ምንጪ ስእሊ, EPA

    ኣሜሪካ ኣብ ሊባኖስ ዝርከቡ ዜጋታታ ብቕልጡፍ ነታ ሃገር ለቒቖም ክወፅኡ ኣዚዛ።

    መንግስቲ ኣሜሪካ፡ ኣብቲ ከባቢ ዘሎ ኩነታት ደሕንነት ንምግማት ዘፀግም ብምዃኑ፡ ሕዚ ኣገልግሎት መጓዓዝያ እንከሎ ዜጋታቱ ካብ ሊባኖስ ክወፅኡ ሓቲቱ።

    ሓማስ ኣብ ልዕሊ እስራኤል መጥቃዕቲ ድሕሪ ምፍፃሙ፡ ኣብ መንጐ ሊባኖስ ዝመደበሩ ሂዝቦላሕን እስራኤልን ዝካየድ ውግእ እናወሰኸ ይመፅእ ኣሎ።

    ነዚ ስዒቡ እስራኤል ሰራዊታን ወተሃደራዊ ተሽከርከርታን ናብ ዶብ ሊባኖስ ኣፀጊዓ ትርከብ።

    ኣብ ሊባኖስ ብዘሎ ኩነታት ዝተሻቐለ ሚኒስትር ጉዳያት ወፃኢ ኣሜሪካ፡ መንግስቲ ቅልውላው ኣብ ዝፍጠረሉ ኩነት ዜጋታት ከውፀአሉ ኣብ ዝኽእል ኩነታት መረጋገፂ ስለዘየለ፡ ኣሜሪካውያን ብኣጋ ካብ ሊባኖስ ክወፅኡ ኣገንዚቡ።

13. 28 ጥቅምቲ 2023እስራኤል ንውሳነ ዕርቂ ሕቡራት ሃገራት ነጺጋቶ

14. 27 ጥቅምቲ 2023ግጭት እስራኤል-ቓዛ፡ ስእላዊ መግለጺ መበል 20 መዓልቲ

15. 27 ጥቅምቲ 2023ተል ኣቪቭ፡ ሮኬታት ኣብ ሰብን ንብረትን ጉድኣት ኣውሪዱ

    

    ምንጪ ስእሊ, Reuters

    ኣብታ ዝዓበየት እስራኤላዊት ከተማ ተል ኣቪቭ ዝወደቐ ሮኬታት ኣርባዕተ ሰባት ከምዘቑሰለ ሰብመዚ እታ ከተማ ሓቢሮም።

    እቲ ካብ ቓዛ ከምዝተወንጨፈ ዝተገልጸ ሮኬታት ኣብ ሓደ ኣፓርታማ ዘለዎ ህንጻ ብምህራም ዕንወት ኣውሪዱ’ሎ።

    ምክትል ኣዛዚ ምክልኻል እታ ከተማ ዳኒ ገቫ ንሮይተርስ ኣብ ዝሃቦ ሓበሬታ፡ ክልተ ሰባት ማእከላይ መቑሰልቲ ከጋጥሞም እንከሎ፡ እቶም ካልኦት ክልተ ግን ብቐሊል ማህረምቲ ተገላጊሎም ኢሉ።

    “ዝሰዓበ ሞት ዘይምህላዉ ምኽንያት፡ ሰባት ነቲ ዝተዋህቦም መምርሒ ኣብ ግብሪ ብምውዓሎም’ዩ። ንዝተዋህበ ደወል መጠንቀቕታ ሰሚዖም. . .ናብ ኣስካላ ብምምራሕ ናብ ውሑስ ቦታ ኣትዮም፡ ስለዚ ድማ ህይወት ድሒኑ”።

    በቲ ብ7 ጥምቲ ዝተኻየደ መጥቃዕቲ ሓማስ 1400 እስራኤላውያን ክሞቱ እንከለዉ፡ 224 ድማ ናብ ቓዛ ከምዝተወስዱ ይፍለጥ።

16. 27 ጥቅምቲ 2023ሓማስ ንሆስፒታላት ቓዛ ንኲናት ይጥቀመሎም ኣሎ- ሰራዊት እስራኤል

    

    ምንጪ ስእሊ, Reuters

    እቲ ብ7 ጥቅምቲ ኣብ ልዕሊ እስራኤል ሃንደበታዊ መጥቃዕቲ ብምፍናው ሓድሽ ኲናት ዝወልዐ ጉጅለ ሓማስ ንሆስፒታላት ቓዛ ንውግእ ይጥቀመሎም ከምዘሎ ኣፈኛ ሓይልታት ምክልኻል እስራኤል ከሲሱ።

    ዳኒኤል ሃጋሪ ንጋዜጠኛታት ኣብ ዝሃቦ መብርሂ፡ እቲ ጉጅለ “ካብ ሆስፒታላት ኲናት ይእውጅ” ኣሎ ድሕሪ ምባል፡ ነተን ትካላት ጥዕና ናብ “ናይ ሽበራ ትሕተቅርጺ” ቀይርወን ኣሎ ኢሉ።

    ነቲ ኣብ ወሽመጥ ቓዛ ዝዓበየ ሆስፒታል ኣል-ሺፋ ከም ኣብነት ብምጥቃስ፡ ኣብ ትሕቲኡ ገለርያታት ብምህናጽ ንቐጻሊ መጥቃዕቲ ይውጥን ከምዘሎ እቲ ወተሃደራዊ ኣፈኛ ተዛሪቡ።

    ድሕሪ’ቲ ናይ 7 ጥቅምቲ መጥቃዕቲ “ኣማኢት ኣሸበርቲ ናብቲ ሆስፒታል ብምእታው ተሓቢኦም ኣለዉ” ዝብል ሃጋሪ፡ እስራኤል ብዝረኸበቶ ስለያዊ ሓበሬታ መሰረት፡ “ኣብ ሆስፒታላት ቓዛ ነዳዲ ኣሎ፡ ሓማስ ድማ ንሽበራዊ ትሕተቅርጹ ይጥቀመሎም ኣሎ” ኢሉ።

    ሰራዊት እስራኤል “ኣሸበርትን ሲቪላውያንን” ፈላልዩ ዝርኢ ምዃኑ ዝምጉት እቲ ኣፈኛ፡ ሓማስ ግን ንእስራኤላውያንን ነበርቲ ቓዛን ሲቪላውያን ይጎድእ ከምዘሎ ገሊጹ።

    ሓማስ ግን ንክስታት እስራኤል ብምንጻግ፡ መግለጺ ናይቲ ሰራዊት “ኣብ ልዕሊ ህዝብና ሓድሽ ጃምላዊ ቅትለት ንምፍጻም” ዝዓለመ’ዩ ክብል ግብረመልሲ ሂቡ’ሎ።

17. 27 ጥቅምቲ 2023እስራኤል-ቓዛ፡ ኣብ ትሕቲ ጽንኩር ኩነታት ዝሓረሰት ኣደ

18. 27 ጥቅምቲ 2023ኣሜሪካ፡ ሓማስ ዳግማይ ክውደብ ዘኽእል ስምምዕ ተኹሲ ደው ምባል ከምዘይትድግፍ ገሊጻ

    

    ምንጪ ስእሊ, Reuters

    ወሃቢ ቃል ሚኒስትሪ ጉዳያት ወጻኢ ኣሜሪካ ንቢቢሲ ኣብ ዝሃቦ ሓበሬታ፡ ሓማስ "ከዕርፍን ዳግማይ ክውደብን ከምኡ'ውን ኣንጻር እስራኤል ግብረሽበራዊ ስርሒታት መሊሱ ክቕጽል" ዘኽእል ስምምዕ ተኹሲ ደው ምባል ከም ዘይትድግፍ ኣፍሊጡ።

    ማቲው ሚለር ወሲኹ፡ ሓማስ ብዘይካ'ቲ ብ7 ጥቅምቲ ኣብ ልዕሊ እስራኤል ዝፈጸሞ መጥቃዕቲ "መዓልታዊ ሮኬታት ይውንጭፍን ኣብ እስራኤል ንዝርከቡ ሰላማውያን ዜጋታት ዒላማ ይገብርን ኣሎ" ኢሉ።

    ወሲኹ "ነቲ ስርሒታት ክቕጽሉ ዘኽእሎም ዝዀነ ዓይነት ስምምዕ ተኹሲ ደው ምባል ንቃወሞ" ክብል ገሊጹ።

    "ክልቲኦም ወገናት ሓገዝ ንምብጻሕ ዘኽእል ሰብኣዊ ደውታ ተኹሲ ምግባር ኣብ ግምት ከእትዉ ምደገፍናን ምሓሰብናን እብል። በዚ ድማ ነቲ ኣብ ደቡባዊ ቓዛ ዘሎ መእተዊ ራፋ ንክኽፈት ብዕቱብ ምሰራሕና" ኢሉ።

19. 27 ጥቅምቲ 2023ኣብ ኤርትራ መደበር እስራኤል ተጠቒዑ ድዩ? ኤርትራኸ እንታይ ትብል?

20. 27 ጥቅምቲ 2023ሓፈሻዊ ባይቶ ሕቡራት ሃገራት ኣብ ቓዛ ቅልጡፍ ተኹሲ ደው ምባል ክፍጸም ሎሚ ዓርቢ ድምጺ ክህብ እዩ

    

    ምንጪ ስእሊ, Getty Images

    ኣምባሳደራት እስራኤልን ፍልስጤምን ኣብ ሓፈሻዊ ጉባኤ ሕቡራት ሃገራት መደረ ኣስሚዖም።

    ክልቲኦም ድማ ኣብ ውሽጢ'ቲ ኣስታት ሰለስተ ሰሙን ዘቝጸረ ውግእ ህዝቦም ዘጋጠሞ ስቓይ ብንጹር ኣቕሪቦም።

    ሓፈሻዊ ጉባኤ ሕቡራት ሃገራት ኣብ ቓዛ ቅልጡፍ ተኹሲ ደው ምባል ንክፍጸም ህጹጽ ኣኼባ ከካይድ ኣብ ዝተዳለወሉ እዩ መደረ እቶም ኣምባሳደራት ተሰሚዑ።

    እቲ ሎሚ ዓርቢ ድምጺ ክወሃቦ ትጽቢት ዝግበር ረቂቕ ውሳነ፡ ገደብ ኣልቦ ሰብኣዊ ሓገዝ ክህሉ፣ ዓለምለኻዊ ሕግታት ሰብኣውነት ክኽበሩን ተሓታትነት ክረጋገጽን ዝጽውዕ ይኸውን።