சோனம் வாங்சுக், காக்ரோச் இயக்கம் இடையே முரண்பாடு தெரிவது ஏன்? கேள்விகள் எழுவதன் முழு பின்னணி

சோனம் வாங்சுக், ஜூலை 18ஆம் தேதி டெல்லி காவல்துறையால் ஜந்தர் மந்தரில் இருந்து பலவந்தமாக அழைத்துச் சென்று சஃப்தர்ஜங் மருத்துவமனையில் அனுமதிக்கப்பட்டபோது, அவரது மனைவி கீதாஞ்சலி ஆங்மோ கடும் அதிருப்தியை வெளிப்படுத்தியிருந்தார்.

சோனம் வாங்சுக் சம்மதமின்றி அவருக்கு வாய் வழியாகவோ அல்லது நரம்பு வழியாகவோ எதையும் வழங்கக்கூடாது என்று கீதாஞ்சலி கூறியிருந்தார்.

ஆனால், ஒரே ஒரு நாளுக்குப் பிறகு, "தலைவர்கள் தன்னைச் சந்தித்து நாடாளுமன்றத்தில் கல்விச் சீர்திருத்தங்கள் தொடர்பான விவகாரங்களை எழுப்பினால் சோனம் வாங்சுக் உண்ணாவிரதத்தை முடித்துக் கொள்வார்" என்று கீதாஞ்சலி கூறத் தொடங்கினார். தர்மேந்திர பிரதானின் ராஜினாமா கோரிக்கையையும் கீதாஞ்சலி மீண்டும் வலியுறுத்தவில்லை.

இறுதியாக, வியாழக்கிழமை நள்ளிரவில் சோனம் வாங்சுக் தனது உண்ணாவிரதத்தை முடித்துக் கொண்டார், அதுவும் அரசாங்கத்தின் இரண்டு அமைச்சர்கள் மூலமாக அது முடிக்கப்பட்டது. அதேவேளையில், போராட்டக்காரர்களுக்கு எதிராக காவல்துறை பெலட் குண்டுகளை (ரப்பர் குண்டுகள்) பயன்படுத்தியதாகக் குற்றச்சாட்டுகள் எழுந்து வருகின்றன.

மூத்த பத்திரிகையாளர் உர்மிலேஷ் தனது எக்ஸ் பக்கத்தில், இரண்டு படங்களைப் பதிவிட்டுள்ளார். ஒரு படத்தில் சோனம் வாங்சுக்கின் உண்ணாவிரதப் போராட்டத்தை ஜே.பி. நட்டா முடித்து வைக்கிறார். மற்றொரு புகைப்படத்தில் ஜந்தர் மந்தரில் அமர்ந்திருக்கும் இளம் போராட்டக்காரர்களின் உண்ணாவிரதத்தை நடிகை ஷபானா ஆஸ்மியும், ராஷ்டிரிய ஜனதா தளம் நாடாளுமன்ற உறுப்பினர் மனோஜ் ஜாவும் முடித்து வைப்பது போன்ற காட்சிகள் இடம்பெற்றுள்ளன.

இந்தப் படங்களுடன் உர்மிலேஷ் எழுதியுள்ள குறிப்பில், "பல சந்தர்ப்பங்களில் புகைப்படங்களே பேசி, தமது உண்மையான முகத்தை வெளிப்படுத்துகின்றன!" என்று குறிப்பிட்டுள்ளார்.

செய்தி மற்றும் பகுப்பாய்வு வலைதளமான 'தி வயர்' நிறுவனர்களில் ஒருவரான எம்.கே. வேணு தனது எக்ஸ் பக்கத்தில், "இது நல்லதொரு செய்தியை வழங்கவில்லை. சோனம் வாங்சுக் தனது உண்ணாவிரதத்தை முடித்து வைக்க ஒரு நடுநிலையான நபரை அழைத்திருக்கலாம் அல்லது சிஜேபி அமைப்பின் பிரதிநிதி யாரையாவது வைத்தே முடித்திருக்கலாம்" என்று தெரிவித்துள்ளார்.

பிரபல பாடலாசிரியர் ஸ்வானந்த் கிர்கிரே தனது எக்ஸ் பதிவில், "என்.எஸ்.ஏ சட்டத்தைப் போட்டார்கள், பிறகு அதை நீக்கினார்கள், பிறகு உட்கார வைத்தார்கள், பிறகு அப்புறப்படுத்தினார்கள், தண்ணீர் குடிக்க வைத்தார்கள். குறைந்தபட்சம் இந்த வேலையையாவது போராட்டக் களத்திலுள்ள இளைஞர்களிடையே சென்று செய்திருக்கலாம்" என்று எழுதியுள்ளார்.

சோனம் வாங்சுக் மற்றும் சிஜேபி அமைப்பின் சிந்தனைக்கு இடையே அதிகரித்து வரும் இடைவெளியையும் பலரும் சுட்டிக்காட்டி வருகின்றனர்.

அதுகுறித்து எழுதியுள்ள எம்.கே. வேணு, "பிரதமர் இல்லத்திற்கு வெளியே ராகுல் காந்தி தர்ணா போராட்டம் நடத்துவதற்குப் பதிலாக ஜந்தர் மந்தரில் வந்து அமர்ந்திருக்க வேண்டும் என்று வாங்சுக்கின் மனைவி கீதாஞ்சலி கூறியுள்ளார். இது மிகவும் சுவாரஸ்யமானது. ஏனெனில் சிஜேபி செய்தித் தொடர்பாளர் சௌரவ் தாஸ், ராகுல் காந்தியின் போராட்டத்தை வரவேற்றுப் பேசுகையில், அவர் சிஜேபி கோரிக்கைகளுக்கு ஆதரவளிப்பதாக இருந்தால், அது ஜந்தர் மந்தராக இருந்தாலும் சரி அல்லது வேறு எந்த இடமாக இருந்தாலும் சரி, எந்தவொரு எதிர்ப்புக் களமும் தமக்குச் சமமாக ஏற்றுக் கொள்ளத்தக்கதுதான் என்று கூறியிருந்தார்" எனக் குறிப்பிட்டுள்ளார்.

இரு தரப்பினரின் சிந்தனைகளிலும் அதிகரித்து வரும் வேறுபாடு

மேலும், "இந்த விவகாரத்தில் சிஜேபி அமைப்பு சோனம் வாங்சுக்கிடம் இருந்து முற்றிலும் மாறுபட்ட நிலைப்பாட்டை எடுத்தது. பாஜக அமைச்சர்களுடனான பேச்சுவார்த்தையின்போது, தர்மேந்திர பிரதானின் ராஜினாமா விவகாரம் குறித்து நாடாளுமன்ற விவாதத்தின்போது பரிசீலிக்கலாம் என்று வாங்சுக் கூறியிருந்தார். ஆனால், தர்மேந்திர பிரதான் முதலில் ராஜினாமா செய்ய வேண்டும், அதன் பிறகுதான் அடுத்தகட்ட நடவடிக்கைகள் குறித்துப் பேச வேண்டும் என்பதே சிஜேபியின் நிலைப்பாடாக உள்ளது."

ராகுல் காந்தியின் போராட்டம் குறித்து 'இந்தியா டுடே' தொலைக்காட்சி நிகழ்ச்சியில் ராஜ்தீப் சர்தேசாயிடம் பேசிய கீதாஞ்சலி, "பிரதமர் இல்லத்திற்கு வெளியே நடைபெற்ற போராட்டத்தில் தீவிரம் குறைவாக இருந்தது என்பது அனைவருக்கும் தெரியும். ஜந்தர் மந்தரில் கைகோர்த்து அந்தப் போராட்டம் நடத்தப்பட்டிருந்தால் அது இன்னும் நேர்மையாக இருந்திருக்கும். எனவே, இனி பொது மக்களையும் ஏமாற்ற முடியாது. இது விழிப்புணர்வு பெற்ற இந்தியா" என்று கூறினார்.

ஜந்தர் மந்தரில் இருந்து அகற்றப்பட்ட பிறகு மருத்துவமனையில் சோனம் வாங்சுக்கை அரசாங்கத்தின் பிரதிநிதிகள் தொடர்ந்து சந்தித்து வந்தனர். ஆனால் சிஜேபி பிரதிநிதிகளுடனான சந்திப்புகள் குறித்த எந்தப் புகைப்படமும் வெளிவரவில்லை.

சிஜேபி நிறுவனர் அபிஜித் தீப்கே உண்ணாவிரதத்தைக் கைவிடுமாறு கோரி வந்தபோதிலும், ஜே.பி. நட்டா மூலம் அது முடித்து வைக்கப்படும் என்பது அவருக்குத் தெரியுமா இல்லையா என்பது குறித்து சிஜேபி தரப்பில் இருந்து எந்தக் கருத்தும் தெரிவிக்கப்படவில்லை.

இதே வாரத்தில் திங்கட்கிழமையன்று சிஜேபி பேச்சாளர்கள் சௌரவ் தாஸ், அசுதோஷ் ரங்கா ஆகியோர் மத்திய அமைச்சரும் பாஜகவின் முன்னாள் தலைவருமான ஜே.பி. நட்டாவை சந்தித்துப் பேசினர்.

இரு பேச்சாளர்களும் நட்டாவை சந்திப்பதற்காக அவரது அலுவலகத்திற்குச் சென்றிருந்தனர். ஆனால் இந்த முறை, அமைச்சரின் அலுவலகத்திலோ அல்லது இல்லத்திலோ சந்திக்காமல், பேச்சுவார்த்தைக்காக ஏதேனும் ஒரு நடுநிலையான இடத்தில்தான் சந்திப்போம் என்று சிஜேபி நிபந்தனை விதித்தது.

இங்கு சோனம் வாங்சுக்கிற்கும் சிஜேபி அமைப்பின் சிந்தனைக்கும் இடையே உள்ள வேறுபாடு தெளிவாகத் தெரிகிறது. சோனம் வாங்சுக் பாஜக அமைச்சரின் கைகளால் தனது உண்ணாவிரதத்தை முடித்துக் கொள்கிறார், அதேநேரம் சிஜேபி அமைப்பினர் அவர்களின் அலுவலகத்திற்கோ அல்லது இல்லத்திற்கோ சென்று பேசுவதைத் தவிர்த்து வருகின்றனர்.

பல போராட்டங்களில் தீவிரமாகப் பங்கேற்று வரும் அரசியல் ஆய்வாளரான யோகேந்திர யாதவ், சோனம் வாங்சுக் உண்ணாவிரதத்தை முடித்துக் கொண்டதை வரவேற்றுள்ள போதிலும், சில கடுமையான கேள்விகளையும் எழுப்பியுள்ளார்.

சமூக ஊடகத்தில் காணொளி ஒன்றை வெளியிட்டுள்ள யோகேந்திர யாதவ், "எந்த உறுதிமொழியின் அடிப்படையில் சோனம் வாங்சுக் தனது உண்ணாவிரதத்தை முடித்துக் கொண்டாரோ, அது அமைதியான முறையில் போராடியவர்கள் மீது வழக்குப் பதிவு செய்யப்படாது என்று மட்டுமே கூறுகிறது. அமைதியான முறையில் போராடியவர்கள் மீது எந்தக் காலத்திலும் வழக்குப் பதிவு செய்யப்படவே கூடாதே!" என்று அவர் குறிப்பிட்டுள்ளார்.

"அப்படியானால், அந்தப் போராட்டக்காரர்களில் யார் அமைதியானவர்கள், யார் வன்முறையில் ஈடுபட்டவர்கள் என்பதை அரசுதான் தீர்மானிக்கப் போகிறதா? ஏற்கெனவே பதிவு செய்யப்பட்டுள்ள 11 எஃப்.ஐ.ஆர் வழக்குகளின் நிலை என்னவாகும்? எனவே, உண்ணாவிரதம் முடிவடைந்துவிட்டதால் போராட்டம் முடிந்துவிட்டதாக அர்த்தமல்ல என்பதைத் தெளிவுபடுத்திய சிஜேபி அமைப்பின் அனைத்து இளம் தலைவர்களுக்கும் சல்யூட். சோனம் வாங்சுக்கும்கூட அவ்வாறு கூறவில்லை. போராட்டம் தொடரும்."

கடந்த 2023ஆம் ஆண்டு மத்திய கல்வி அமைச்சர் தர்மேந்திர பிரதான், சோனம் வாங்சுக் மற்றும் அவரது மனைவி கீதாஞ்சலி ஆங்மோவுடன் இருக்கும் ஒரு புகைப்படம், தற்போதைய புதிய அரசியல் சூழலில் மீண்டும் பேசப்பட்டு வருகிறது.

கடந்த 2023ஆம் ஆண்டு மார்ச் மாதத்தில் வெளியிடப்பட்ட அந்தப் பதிவில், அந்தத் தம்பதியினரின் கருத்துகளையும் கல்வியில் மாற்றங்களை ஏற்படுத்துவதற்கான அவர்களின் அர்ப்பணிப்பையும் தர்மேந்திர பிரதான் பாராட்டியிருந்தார்.

தேர்வுத் துறை முறைகேடுகளுக்கு எதிர்ப்புத் தெரிவித்து வாங்சுக் மேற்கொண்டு வந்த காலவரையற்ற உண்ணாவிரதம் வியாழக் கிழமையன்று 26வது நாளை எட்டியபோது, இந்தப் பதிவு சமூக ஊடகங்களில் மீண்டும் வைரலானது.

அந்தக் காலகட்டத்தில், புதுமையான கருத்துகளுக்குத் திறந்த மனதுடன் செவிமடுத்ததால் தர்மேந்திர பிரதானுக்கு வாங்சுக்கும் மிகுந்த உற்சாகத்துடன் நன்றி தெரிவித்திருந்தார். இந்தச் சந்திப்புக்குப் பிறகு புதிய கல்விக் கொள்கையை அடிமட்டத்தில் செயல்படுத்துவதில் "முன்பைவிட அதிக அர்ப்பணிப்புடன்" இருப்பதாக அவர் கூறியிருந்தார். எனினும், அந்தக் காலகட்டத்தில்கூட தேசிய கல்விக் கொள்கை குறித்து கேள்விகள் எழுப்பப்பட்டுக் கொண்டிருந்தன.

சோனம் வாங்சுக்கின் அரசியல் என்ன?

சோனம் வாங்சுக் போன்ற ஒருவர் எப்படி உருவாகிறார்? வாங்சுக் அரசாங்கத்திடம் கேள்விகளை எழுப்புகிறார், ஆனால் அதற்கான பதவிகளைப் பெறும் வரை அவர் போராடுகிறாரா?

அரசியல் ஆய்வாளரும் 'காந்தி: தி எண்ட் ஆஃப் நான் வயலன்ஸ்' (Gandhi: The End of Non-Violence) நூலின் ஆசிரியருமான மானஸ் ஃபிராக் பட்டாச்சார்யா, 'ப்ரன்ட்லைன்' இதழில் ஜூலை 17 அன்று, "ஒரு பொறியியலாளராக அவர் அரசுப் பள்ளி கல்வி முறையில் சீர்திருத்தங்களைக் கொண்டு வர முயன்றார்" என்று எழுதியுள்ளார்.

"அவர் அரசுக்கு எதிரான கிளர்ச்சியாளரும் அல்ல, அரசுக்கு எதிரானவரும் அல்ல. மக்களை நல்வழிப்படுத்துவதற்காக அவர் பொதுவாழ்வுக்கு வரவில்லை. எந்தவொரு சித்தாந்தத்தின் கொடியையும் ஏந்தி அவர் வரவில்லை. மாறாக, ஒரு விழிப்புணர்வுள்ள குடிமகனின் பார்வையோடும் அர்ப்பணிப்புடனும்தான் அவர் களமிறங்கினார்."

மானஸ் ஃபிராக் பட்டாச்சார்யா மேலும் எழுதுகையில், "அரசுகள் வாங்சுக்கை போல சிந்திப்பதில்லை; ஏனெனில் அவற்றின் அரசியல் தற்காலச் சூழலைக் கையாள்வதிலேயே கவனம் செலுத்துகிறது. அகமதுநகர் சிறையில் இந்தியாவின் எதிர்காலத்தைப் பற்றிச் சிந்தித்து தனது எண்ணற்ற இரவுகளைத் தூக்கமின்றிக் கழித்து பல பக்கங்களை எழுதிய ஜவஹர்லால் நேருவை போல, எதிர்காலம் அவர்களுக்கு அவ்வளவு முக்கியமானது அல்ல."

"ஆனால், எதிர்காலத்தைப் பெரிதாகப் பொருட்படுத்தாத எந்தவொரு அரசாங்கமும், அதைப் பற்றிச் சிந்திப்பவர்களைக் கண்டு அஞ்சுகிறது. இந்த அம்சம்தான் வாங்சுக்கை ஓர் அரசியல் ஆளுமை ஆக்குகிறது. சுற்றுச்சூழல் பாதுகாப்புக்கான அவரது உறுதியைக் கண்டு அரசு அஞ்சுவது, உண்மையில் மனித குலத்திற்கும் சுற்றுச்சூழலுக்கும் எதிரான குற்றங்களில் ஈடுபடுபவர்களைப் பாதுகாக்கும் ஒரு செயலாகும்."

லடாக்கை சேர்ந்த செயற்பாட்டாளர் ஷ்ரிங் காஃபல் எக்ஸ் பக்கத்தில், "சோனம் வாங்சுக்கின் வாழ்க்கை வரலாறு திரைப்படமாக எடுக்கப்பட்டால், அவரது கதாபாத்திரத்தில் நடிப்பவர் யார்?" என்று எழுதியுள்ளார்.

"ஒரு காலத்தில் தேசபக்தர் என்று போற்றப்பட்டு, சர்வதேச விருதுகளால் கௌரவிக்கப்பட்ட அதே மனிதர், பின்னர் 'தேசவிரோதி', 'சீன முகவர்', 'பாகிஸ்தான் முகவர்' போன்ற குற்றச்சாட்டுகளுக்கு ஆளானார். தேசிய பாதுகாப்புச் சட்டத்தை எதிர்கொண்டு, ஆறு மாதங்கள் சிறையில் கழித்து, தற்போது இந்தியாவின் பிரதமரே அவரது உடல்நிலை குறித்துப் பொதுவெளியில் கவலை தெரிவிக்கும் அளவுக்கு வந்துள்ளார். இது உண்மையிலேயே ஓர் அசாதாரணமான கதை. இதைக் கொண்டு ஓர் அற்புதமான திரைப்படத்தையே உருவாக்க முடியும்."

அரசியல் ஆய்வாளர் சபா நக்வி எக்ஸ் பக்கத்தில் எழுதியிருப்பதாவது, "பாஜக தலைவர்கள் முன்னிலையில் சோனம் வாங்சுக் தனது உண்ணாவிரதத்தைக் கைவிட்டது குறியீட்டு ரீதியில் சில கேள்விகளை எழுப்புகிறது. இந்தப் போராட்டம் என்பது பாரம்பரிய மற்றும் அலுவல் பூர்வமான பேச்சுவார்த்தைகளைக் கடந்த மக்களின் பொது வெளிப்பாடாகவும் ஆத்திரத்தின் வெளிப்பாடாகவும் உள்ளது. இத்தகைய சூழலில், வாங்சுக்கை சந்திப்பதைத் தாண்டி அரசாங்கம் வேறு எந்த உறுதியான சலுகைகளையும் வழங்காத நிலையில், போராட்டக்காரர்கள் மீது பெலட் குண்டுகள் பயன்படுத்தப்பட்டது உள்ளிட்ட கடுமையான நடவடிக்கைகள் எடுக்கப்பட்டதாகக் குற்றச்சாட்டுகள் எழுந்துள்ள இந்த வேளையில், இதுபோன்ற ஒரு புகைப்படம் பலருக்கு சங்கடத்தை ஏற்படுத்தலாம்."

"அவர் தனது உண்ணாவிரதத்தை முடித்துக் கொண்டிருக்க வேண்டும்; ஆனால், ஒருவேளை இந்தப் போராட்டத்தைத் தொடங்கிய அபிஜித் தீப்கே அங்கு உள்ளிருந்து அவர் உண்ணாவிரதத்தை முடித்து வைத்திருந்தால், அதன் மூலம் வெளிப்பட்ட செய்தி முற்றிலும் வேறுவிதமாக இருந்திருக்கும்."

காக்கரோச் இயக்கம் எங்கு சென்று முடியும்?

இந்த இயக்கம் கடந்த காலத்தின் பல போராட்டங்களுடன் ஒப்பிடப்படுகிறது. 1974-75 காலகட்டத்தின் ஜே.பி. (ஜெய்பிரகாஷ் நாராயண்) இயக்கம், 2011-13 காலகட்டத்தின் ஊழலுக்கு எதிரான இயக்கம் ஆகிய இரண்டு பெரிய மக்கள் போராட்டங்களுடன் காக்கரோச் இயக்கம் ஒப்பிடப்பட்டு வருகிறது.

அரசியல் அறிவியலாளர் சுஹாஸ் பால்ஷிகர் எழுதியிருப்பதாவது, "இந்த இரண்டுடன் ஒப்பிடும்போது காக்கரோச் இயக்கம் மிகவும் குறைவான அமைப்பே கொண்டதாக உள்ளது; இதன் பலம் பெரும்பான்மையாகத் தன்னிச்சையான மக்களின் உணர்வுகளையும் நீண்ட காலமாக அடக்கி வைக்கப்பட்டிருந்த அதிருப்தியையும்தான் சார்ந்துள்ளது. இதன் தாக்கம் இப்போதைக்கு தேசிய அளவில் அந்த அளவுக்கு விரிவாகவில்லை என்றாலும், இதனுடைய எதிரொலி இப்போது டெல்லிக்கு வெளியேயும் கேட்கத் தொடங்கியுள்ளது."

"ஜே.பி. இயக்கத்தில், அரசியலமைப்புச் சக்திகளையும் அரசியலமைப்பையும் பலவீனப்படுத்த விரும்பும் சக்திகள் மெல்ல மெல்ல ஒன்றிணைவதைக் காண முடிந்தது. இது பழமைவாத மற்றும் வலதுசாரி சக்திகளுடன் முற்போக்கு மற்றும் இடதுசாரி சார்பு குழுக்களின் கலப்பாகவும் இருந்தது."

"கடந்த 2011ஆம் ஆண்டு ஊழலுக்கு எதிரான இயக்கம் ஒரு சர்ச்சைக்குரிய தலைமையுடன் தொடங்கப்பட்டது. ஜே.பி. இயக்கத்தைப் போலவே இதிலும் ஒன்றுக்கொன்று முரண்பட்ட சித்தாந்தங்களைக் கொண்ட சக்திகள் இணைந்தன; ஆனால் இறுதியில் இந்த இயக்கம், அரசியலமைப்பு ஜனநாயகத்தை பின்னுக்குத் தள்ளும் நோக்கத்தைக் கொண்ட சக்திகளின் செல்வாக்கின் கீழ் சென்று சேர்ந்தது."

"இதன் விளைவாக, ஜே.பி. இயக்கத்தால் அரசியலைத் தோற்கடிக்க முடிந்தது, ஆனால் அதற்குப் பிறகு புதியதாக எதையும் வழங்க முடியவில்லை. மாறாக, அரசியலமைப்புக்கு எதிரான சக்திகள் ஆட்சிக்கு வருவதற்கான பாதையை அது எளிதாக்கியது. இதற்கு நேர்மாறாக, ஊழலுக்கு எதிரான இயக்கம் அரசியல் ரீதியில் மிகவும் செல்வாக்கு மிக்கதாக நிரூபிக்கப்பட்டது; ஏனெனில் அது ஆட்சி மாற்றத்திற்கான வழியை வகுத்துக் கொடுத்தது" என்று பால்ஷிகர் எழுதியுள்ளார்.

"இப்போது எழும் கேள்வி என்னவென்றால், காக்கரோச் இயக்கம் எந்த திசையில் செல்லும்? இது எங்குமே செல்லாமல் போகக்கூடும். இது மக்களின் உள்ளிருக்கும் ஆத்திரத்தை வெளிக்கொண்டு வருவதற்கான வாய்ப்பை வழங்கும், ஆனால் காலப்போக்கில் இதன் ஆற்றல் குறைந்து போகலாம். விவசாயிகளைப் போன்றே இது சில வெற்றிகளைப் பெறக்கூடும் என்றாலும் இதன் வேகமும் மெல்ல மெல்லக் குறையலாம்."

-இது பிபிசிக்காக கலெக்டிவ் நியூஸ்ரூம் வெளியீடு