Ukraine's president, Zelensky say Russian shelling dey affect evacuation for Mariupol

Live Coverage

1. 3 March 2022Analysis: How dis war for Ukraine fit end? Five possible ways

   

   Wia dis foto come from, Getty Images

   Inside dis tick cloud of war, e fit dey hard to see di way forward.

   Di news from di battlefield, di diplomatic noise off, di emotion of di grieving and displaced; all of dis fit dey overwhelming.

   So make we step back small and consider how di conflict for Ukraine fit play out.

   Wetin be some of di possible ways wey politicians and military planners fit dey consider?

   Few fit predict di future wit confidence, but dis na some possible outcomes. Most no dey clear.

   Short war

   Under dis possible way out, Russia go increase im military operations.

   Dem go get more indiscriminate artillery and rocket strikes across Ukraine.

   Di Russian air force - wey dia action dey low-key role so far - go launch devastating airstrikes.

   Massive cyber-attacks go happun across Ukraine, targeting key national infrastructure.

   Energy supplies and communications networks go dey cut off.

   Thousands of civilians go die.

   Despite brave resistance, Kyiv go fall witin days.

   Dem go replace di goment wit pro-Moscow puppet regime.

   Dem go either assassinate President Zelensky or e go run comot from di kontri, to western Ukraine or even overseas, to set up goment for exile.

   President Putin go declare victory and witdraw some forces, den leave enough behind to maintain some control.

   Thousands of refugees go continue to run go west.

   Ukraine go join Belarus as one of Moscow client state.

   Dis outcome no dey impossible but e go depend on if several factors change: Russian forces perform better, Russia send in more forces, and Ukraine extraordinary fighting spirit fade.

   Mr Putin fit achieve regime change for Kyiv and di end of Ukraine mixing wit di west.

   But any pro-Russian goment go dey illegitimate and vulnerable to insurgency.

   Dis kain result go dey unstable and di possibility of conflict happuning again go dey high.

   Long war

   E dey more likely say dis git develops into very long war.

   Maybe Russian forces go slow down, sake of low morale, poor logistics and yeye leadership.

   Maybe e go take longer for Russian forces to takeover cities like Kyiv wey im defenders dey fight from street to street.

   Dem fit surround am for long. Di fighting dey remind pesin of Russia long and brutal struggle for di 1990s to seize and mostly destroy Grozny, di capital of Chechnya.Read more

2. 3 March 2022Why plenti African plus Indian students dey for Ukraine

3. 3 March 2022Breaking, UK go sanction two more oligarchs

   Di UK dey sanction two further oligarchs - Uzbekistan-born Russian billionaire Alisher Usmanov, wey commercial link to Everton football club don dey suspended, and former Russian deputy prime minister Igor Shuvalov.

   

   Wia dis foto come from, Reuters

4. 3 March 2022Putin hail Russian troops for dia bravery

   

   Wia dis foto come from, Getty Images

   Russia Presidet Vladmir Putin don hail di Russian troops for wetin e call dia bravery fo Ukraine.

   E tok dis one for speech wey im bin dey address di Russian Security Council dis afternoon wey dem bin show for di rolling news channel Rossiya 24.

   E also list examples of Russia "heroic" actions for dia fight agaist who im vall di "neo-Nazi" for Ukraine.

   Putin add say dem go compensate di families of di soldiers wey die for di fighting.

   Dis dey come afta Moscow put di number of pipo wey don die sake since di fight-fight start for Ukraine at 498 soldiers. E go be di first time dem dey put numbers on di deadibodi dem don get since di invasion start.

   Ukraine say di number dey higher.

5. 3 March 2022Russia dey face war crime investigation

   

   Wia dis foto come from, Getty Images

   Dem don start investigation into weda Russia dey commit war crimes for di dia invasion of Ukrain.

   Dis na on top accuse say Russia dey bomb civilians.

   Di International Criminal Court (ICC) chief prosecutor say dem dey gada evidence on alleged war crimes, crimes against humanity and genocide. E dey start afta 39 kontris bin ginger for di inquiry to dey opened.

   Cities for di kontri like di Kyiv, Kharkiv and Kherson don dey under heavy attack for di past few days.

   President Volodymyr Zelensky don accuse Moscow for war crimes afta dem start to dey do air strikes for di kontri second biggest city, Kharkiv and kill citizens.

   On Wednesday, di mayor of Kherson say Russian forces don seize control of di key port. Dis na di first major city wey Moscow go seize since di invasion start.

   Earlier dis week, di ICC chief prosecutor Karim Khan say e bin plan to start di investigation into wetin dey happun for Ukraine "as soon as possible" but di ginger of 39 kontris wey include UK, France and Germany push am without need for judicial approval.

   E go look past and present cases as far back as 2013 before Russia bin annex of Crimea di nex year Link

6. 3 March 2022Breaking, Tok-tok end 'without di result we hope for' - Ukraine negotiator

   Ukraine negotiator Mykhailo Podolyak tok say "wit one great regret" di latest tok-tok between Russia and Ukraine "never achieve di result wey we bin hope for".

   But e say di two sides agree to continue negotiations in "di nearest future".

   "Di only thing I fit say be say we discuss di humanitarian aspect in details, sake of say plenti cities now dey surrounded," e tok.

7. 3 March 2022Breaking, Russia's operation dey 'go according to plan' - Putin

   

   Wia dis foto come from, Getty Images

   Russian President Vladimir Putin tok say im "special military operation" - alias Russia's invasion of Ukraine - dey "go according to plan".

   Im claim dey come despite many analysts suggesting say invasion no dey according to plan.

   For one televised speech, e accuse Ukrainian forces of taking "thousands of foreign citizens hostage" and using civilians as "human shields" - e provide no evidence for dis claims.

   E add say Russians and Ukrainians bin dey "one pipo" and stok say he go "destroy dis 'anti-Russia' wey di West".

8. 3 March 2022Nigerian evacuees from Ukraine no dey land again on Thursdday

   Article Information

   • • Author, Dooshima Abu
     • Role, BBC Pidgin, Abuja

   Di Director Consular and Immigration for Ministry of Foreign Affairs, Bolaji Akinremi don give reason why di Poland Airport Authority cancel di Air Peace flight wey bin suppose bring back stranded Nigerians from Ukraine.

   Oga Akinremi say di Poland airport authority cancel di flight sake of delay during check in as dem no quick mobile and gada di evacuees togeda E explain give say dis wan make di crew to shoot dia above dia duty hour wey dem allocate to dem before dem fly.

   “By di time we dey ready afta di checking in,di crew don over shoot dia duty hour. Wey dem allocate for dem. Di crew bin don land Poland since 9 am and by di time dem stay till 2pm, dat means dem don already wait for five hours and dem get 9 hours flight and dat one don pass di standard time for dem to fly” e explain.

   E say sake of dis, di authority of di airport say dem no go allow dem to board and dem gatz come down from di plane. E say dem don make arrangement to stay togeda for di same hotel so dat dem go leave very early Friday morning.

9. 3 March 2022Breaking, Zelensky tell Nato: Send us planes

   Ukraine President Zelensky don land news conference - where e beg di West to send am warplanes.

   "If you no get di power to close di sky [sama no-fly zone over Ukraine], den give me planes," e tok.

   "If we no dey again den, God forbid, Latvia, Lithuania, Estonia go be next."

   Those kontries be part of di Nato defence alliance, wey mean say if Russia enter one e go enter war wit all members.

   We go get more lines from Zelensky soon.

10. 3 March 2022Breaking, Zelensky ask Putin for tok-tok

    

    Wia dis foto come from, EPA

    Ukraine president Zelensky say direct tok-tok wit Vladimir Putin be "di only way to stop dis war".

    "We no dey attack Russia and we no plan to attack am. Wetin you want from us? Commot for our land," e tok.

    "Siddon down wit me. Just not 30 metres away like wit [French President Emmanuel Macron]," e add, e dey tok about di long table tok-tok for last month.

11. 3 March 2022Wetin be di latest?

    Seven days afta Russia invade Ukraine, one million pipo don japa and attacks dey increase on key cities - although only one major city don fall.

    Here be di latest:

    • Russian forces don take control of key port city of Kherson, for di south of Ukraine - di first major city to dey captured by Russian troops
    • Di mayor of Mariupol one strategic southern port city say Russian troops don cut off electricity food, water, and heating.

    • Vladimir Putin tel French President Emmanuel Macron say Russia go successfully demilitarise Ukraine - and warn say if Kyiv wan try to delay negotiations, e go make Moscow add to dia list of demands
    • One second round of tok don start for Belarus between Ukraine and Russia negotiators, wit Ukraine hoping to secure safe passage for civilians wey dey run for di war
    • Russia dey face one war crime investigation afta dia military chop accuse say dem dey bomb civilians
    • Russia foreign minister Sergei Lavrovhas say third world war fit be nuclear, but e say dis no be something wey Russia dey think about
    • Di capital, Kyiv, remain for government control, although e bin get plenti large explosions. One large Russia convoy still dey some distance away

    

    Wia dis foto come from, Getty Images

12. 3 March 2022China hide tori of Russia and Belarus athletes ban from citizens

    

    Wia dis foto come from, Reuters

    Di 2022 Beijing Winter Paralympics dey start today and di International Paralympic Committee (IPC) do about turn to completely ban di Russian and Belarus athletes make dem no participate at all hours before opening ceremony.

    But if you check for China you fit no know dat tori as dem de try to maintain positive public opinion for di Games wey dey dey host as e be like say dem fdon dey hide di tori.

    Chinese media neva report am and on Weibo wey be China kain Twitter, you no go find anytin if you search for "IPC bans Ukraine and Russia".

    Na topics wey dey praise di Paralympics event like "#Beijing Paralympics is also amazing” na im dey trend now.

    And even when pipo dey tok abot di ban, dem dey accuse International Olympics Committee (IOC) and IPC of “double standards” say dem get double standard on top say dem no ban US athletes afta dia invasion of Iraq.

    Beijing neva yet agree say di kasala for Ukraine na invasion by Russia. China foreign ministry word for di mata na say e "support all diplomatic efforts" to take solve di wahala.

13. 3 March 2022Macron tell Putin say e dey make 'serious mistake'

    

    Wia dis foto come from, Reuters

    As we bin earlier report say Russian President Vladimir Putin get call with French President Emmanuel Macron today (13:49 GMT post). Hia na di French version of how di call go.

    Di Elysee Palace say Putin claim di Russian military operation dey go "according to plan" and "at di pace e wan am to".

    Macron tell Putin say e dey "commit serious mistake" and add say di Ukrainian goment no be, as Russia claim, Nazi regime - tell am im point of view no reflect di reality, di Elysee tok.

    Di French president say e dey worried about di impact on civilians including from bombings around Kyiv - sometin wey Putin don deny.

    Macron tell im counterpart Russia goend up "as a very isolated, weak country" under sanctions, di Elysee add join.

    Macron also tok to Ukraine President Volodymyr Zelensky - who tok say in kontri no go surrender but remain open to dialogue.

14. 3 March 2022Breaking, Ukraine-Russia toks dey under way

    Ukrainian presidential adviser Mykhaylo Podolyak just tweet say e and oda officials don start toks with Russian representatives for Belarus.

    E outline key issues on di agenda:

    • Immediate ceasefire
    • Armistice
    • Humanitarian corridors for di evacuation of civilians from destroyed or constantly shelled villages and cities

15. 3 March 2022'We no get any wia to run and we no wan run'

    

    Wia dis foto come from, Andrew Licholit

    Andrew Licholit, wey dey from Kharkiv, don join di city militia and e say e dey "help di regular arm and police to defend di borders of di city".

    E bin join last week afta di invasion, afta e bin serve for 2015 and 2018 for di Donbas kasala.

    E say dem dey control di situation but Russia dey commit military crimes.

    "Dem dey commit air assaults for places for our city wey no get any military targets dia".

    E say di Russians dey use pipo for di city to mark targets wey dem dey strike and di militia dey try find dis pipo and if possible catch dem.

    "Right now, I know say we dey fight big and powerful army. But dis na our home, and we no get anywia to go. We no get wia to run, And honestly, we no wan run," na wetin Andrew tok.

16. 3 March 2022'No provoke Russian soldiers' - new rules for Kherson locals

    Wit di key southern port city of Kherson now under Russian control, one resident tells us say new rules don dey implemented for di city.

    Nina (di BBC don decide not to use her full name) say: "Now for di city tins dey quiet. Yesterday e quiet also. Before, fights and explosions dey.

    "Yesterday nobody go out from dia house sake of say e dey too dangerous but today pipo dey going out, to try buy some food."

    But she say dem still dey hear fight for di outskirt of di city.

    "We get some rules to follow. Dey agree wit our goment say make we no provoke di Russian soldiers.

    "We no fit dey as groups, we no fit drive cars fast. We must dey ready to stop and show wetin we get for our car and no provoke anyone."

    Residents now get water, electricity and di internet, and we dey hear say medical supplies fit dey expected, she add.

    "I just hope say e no go take too much time and say we we go dey OK.

    "All ordinary pipo dey against all di war, against fighting, but we no fit do nothing."

    

    Wia dis foto come from, Reuters

17. 3 March 2022Putin tell Macron say Russia go achieve im am to 'demilitarise' Ukraine

    

    Wia dis foto come from, Rueters

    Russian President Vladimir Putin don tell im French counterpart Emmanuel Macron say di goals of Russia's operation for Ukraine - im demilitarisation and neutral status - go dey achieved, di Kremlin don tok.

    Di pair share one 90 minute call earlier on Thursday.

    Putin tok say any attempts by Kyiv to delay negotiations go result in Moscow adding to im list of demands.

18. 3 March 2022RT television wey Russia dey support criticise UK for broadcast ban

    

    Wia dis foto come from, Getty Images

    Russian goment supported television channel RT don criticise British goment afta e disappear from all platforms for UK sake of EU sanctions.

    Although UK no follow for EU, di bloc target satellite companies for Luxembourg and France wey dey provide di RT feed give Sky, Freesat and Freeview.

    RT deputy editor-in-chief, Anna Belkina tell tori pipo Reuters say “e don tey wey” di Russian channel "stop to expect any legitimacy or reason for Britain attempts to restrict media freedoms".

    She add say: "Now e be like say e don forget Brexit and e dey try to force influence over di rest of Europe too."

19. 3 March 2022Hungary fit host peace tok, Prime Minister Orban tell BBC

    

    Wia dis foto come from, Tim Mansel

    Hungarian Prime Minister Viktor Orban tok again say im kontri dey willing to host peace tok between Russia and Ukraine.

    For wetin e follow BBC tok for di Hungary-Ukraine border, Orban say di responsibility to end di war lie, above all, on di Russia side.

    For di past,Orban don enjoy close relation wit President Putin, wit 11 meetings for di past 12 years, di most recent be one month ago for Moscow.

    At di same time, im goment bin don get by force relations wit Ukraine, sake of one language law wey di government say dey discriminate against di large Hungarian minority for Ukraine.

    Dis morning, as e visit one refugee reception centre for Beregsurany for di Hungary-Ukranian border, I ask am wetin be im message to President Zelenszky of Ukraine and President Putin of Russia.

    "I no any message to anybody. I get message only to those refugees wey dey here," Orban bin reply.

    "Hungary be good friend of Ukraine and Ukrainian pipo, if dem need any help here, dem fit can count on us. I no think say di leaders need any message and advice from my side. Dey be big guys and dey sabi pass me for wetin dem suppose do. Wetin di Hungarian wish be, no be advice, no be message. Just wish from my heart. Peace, please, peace."

    Di Hungarian goment don offer Budapest as venue for future peace tok between Russia and Ukraine, as one alternative to one kind low-level tok wey don already happun for Belarus capital, Minsk.

    "Di war can fit dey stopped only by negotiation, and peace tok and one ceasefire," Orban tok.

20. 3 March 2022Batch of stranded Nigerians for Ukraine don begin board plane from Poland

    

    Wia dis foto come from, Raphael Oni

    Di first batch of stranded Nigerians from Poland don begin enta plane Air Peace Air bus A230 for Warsaw Chopin Airport as dem prepare to take off to Nigeria

    Di chartered flight wey fit cari close to 180 pipo leave Nigeria around 2 am on Wednesday and land Poland for 9: am local time.

    Dia evacuation dey happun hours afta Nigerian presido, Muhammadu Buhari

    approve $8.5 million for di immediate evacuation of at least 5,000 Nigerians from Ukraine.

    Zubairu Dada, minister of state for foreign affairs,say dem don contract Air Peace and Max Air airlines to provide three aircraft to facilitate di evacuation of Nigerians.

    But Air Peaceoga, Allen Onyema say dem suffer small delay to go evacuate Nigerians sake of delay for proper documentation and flight clearance.

    

    Wia dis foto come from, Raphael Oni