Ukraine's president, Zelensky say Russian shelling dey affect evacuation for Mariupol

Live Coverage

1. 8 March 2022Dem don hold funeral prayer for over 60 pipo wey gunmen kill for Kebbi

   Funeral prayer don hold for about 68 pipo wey gunmen kill on Sunday for Zuru town wey dey Kebbi state for northwest Nigeria.

   Chief for one of di villages wey di gunmen attack tell BBC say na 63 pipo die for im town.

   Tok-tok pesin for Kebbi Police Command Nafiu Abubakar say di attack na as a result of military offensive against di gunmen so na easy target dem see although e no confam di casualty figure as dem neva finish work on di mata.

2. 8 March 2022Voter registration for 2023 elections dey happun across wards for Nigeria

   Di Independent National Electoral Commission INEC don start voter registration for wards across Nigeria to helep pipo to do di voter registration close to dem.

   Wen pipo come for di registration, di INEC official go ask wetin dem come for and direct dem well on what to do.

   For pipo wey never register before and wey dey come register for di first time, dem go give dem form to fill dia basic information, show dem di list of polling units wey dey closest to dem wey dem fit register under and den, dem go do biometric capture afta which dem go give dem print out wey dem go use come claim dia permanent voter cards wen e ready.

   For those wey don loss dia voter cards, dem go apply for new voter card, fill form, den di INEC official go verify dia information for di system so dem fit issue new voter card.

   Those wey wan transfer to new polling units go also apply for di transfer and indicate di polling units wey dem wan transfer to and dem go crosscheck am for di system to be di transfer. INEC dey encourage pipo to transfer to new polling units wey dem don create.

   Di ones wey wan update and/or make corrections for di information wey dey dia voters card go also apply for di corrections dem wan make and dem go verify and make di corrections for di system, den dey give dem print out wey dem go use come take di card wey get dia new or updated information later.

   INEC dey cut serious warning make pipo no do double/multiple registration as di system go spot such and e go cancel di registration and such pesins fit face penalty.

   INEC Resident Commissioner for Rivers State Obo Effanga tell BBC Pidgin say di ward voter registration across di kontri go dey on till di end of March and dem go start anoda phase of di registration wey go dey till end of June 2022 wen di voter registration exercise go end for dem to clean up di system and print di voter cards of di ones dem don register.

3. 8 March 2022Ukraine President Zelensky say "I no dey hide, I no dey fear'

   On Monday night, Ukraine President Volodymyr Zelensky post anoda of im daily video. But dis one, e post am from im presidential office for Kyiv - Dis wan different from im oda selfie videos daily videos e dey post from field.

   For inside di video e say, e no dey hide and e no dey fear.

   Zelensky tok exactly wia im dey and pipo dey see dis one as yab to Russian Vladmir Putin.

   Dis na even as Kyiv still get ogbonge defence against Russia wey still dey attack cities inside di kontri.

4. 8 March 2022Police for Nigeria arrest 3 OSPAC members wey allegedly shoot dead soja

   Police for Rivers state Nigeria don arrest three members of one local vigilante group, Onelga Security Planning and Advisory committee, OSPAC for Obelle community, Emohua LGA, wey allegedly shoot and kill one Nigerian Soja, Darlington Worehu.

   Acting police tok-tok pesin Grace Iringe-Koko confam di arrest to BBC Pidgin say dem don begin investigate.

   Di soja wey dey serve for Niger State bin come home on permission from di army.

   Uncle of di soja, Eze Israel Anele say Darlington Worehu bin dey go house at about 10:30pm dat Saturday night wen im see say some OSPAC boys hold some of im relatives.

   Argument burst out wen Worehu ask di OSPAC members why dem detain im relatives wey make one of di OSPAC boys to allegedly shoot am to death while two oda relatives also sustain gunshot injuries.

   Di uncle wey also be former Caretaker Chairman of di Obelle Community Development Committee say some sojas dey patrol di community in search of di pipo wey shoot Darligton and di family dey demand justice for di death of dia son.

5. 8 March 2022Russia don threaten to stop dia gas supply into Europe

   Russia don warn say dem go fit shut down dia main gas pipeline wey dey enta Germany if di West ban Russian oil.

   Deputy Prime Minister Alexander Novak say di move go lead to "serious gbege" for global supply and e fit lead to di increase in oil prices by 100% to $300 a barrel.

   Di US don dey ginger with dia allies to sama potential ban to take punish Russia for dia invasion of Ukraine. But Germany and Netherlands reject di plan on Monday.

   EU dey get 30% of dia gas and 40% of dia oil from Russia and e no dey easy to just replace dat kain supply.

   Oga Novak say Russia get every right to do dia own back afta Germany bin decide last month to block di certification of di second Nord Stream pipeline between di two kontris.

6. 8 March 2022'Dem put gun to my head inside di bus, I bin dey helpless' - BRT driver

   Di driver of di Lagos state Bus Rapid Transit, BRT wia dem allegedly kidnap and murder 22-year-old Bamise Ayanwole don give account of wetin happun dat night. Im tok afta police confam im arrest by di Department of State Services, DSS on Monday, 7 March 2022. Dis na afta police bin confam di death of 22-year-old Oluwabamise Ayanwole wey bin miss since 26, February 2022 afta she enta di Lagos goment BRT busfrom Ajah area to Oshodi area of di state. Di driver for im own account of di tori don deny say e get hand for Bamise death.

   For inside video wia one tori pesin dey ask am question for wia dem detain am, di driver of di BRT bus wey still dey in im dark and sky blue driver uniform wey dey crested wit Lagos state logo tok wetin happun dat night. "Why I run sir? Wen those guys show me di weapon as I was saying sir, I no fit be myself anymore. I become afraid, so whatever di man on gun tell me to do na im I dey do." E tok.

7. 8 March 2022Wetin be di latest wit di Russia-Ukraine war?

   As we enter day 13 of di Russian invasion of Ukraine, see some of di major developments from di past 24 hours:

   • Ukraine say di Russian attacks dey prevent civilians to safely evacuate form dia cities wey dey under attack
   • Tens of thousands of pipo across Ukraine dey without power and, for di port city of Mariupol, dem dey run low on food and water
   • Third round of Russia-Ukraine peace toks end with little agreement. A fourth round go take place on Tuesday

   • US, France, Germany and di UK vow to continue to raise di costs on Russia for im "unjustified" invasion of Ukraine
   • Russia threaten to cut dia natural gas imports to Europe as retaliation for Western sanctions
   • For im latest video address, Ukrainian President Volodymyr Zelensky say e go stay for Kyiv "as long as it take to win dis war"
   • Coca-Cola and McDonalds sey among firms wey dey face a possible consumer boycott over dia failure to withdraw from Russia
   • Ukraine say dem don kill a top Russian army commander for battle near Kharkiv - BBC never confam di claim

8. 8 March 2022Good morning!, Una wlecome

   Una welcome to our live coverage today of tori from around di world.

   We go bring una tori from Nigeria, across Africa and di rest of di world.

   On of di biggest tori from Nigeria today na di death of 22-year-old Oluwabamise Ayanwole wey police confam dead afta dem allegedly kidnap her inside Lagos BRT bus.

   And for di for di world, di hot tori na still di Russian invasion of Ukraine.

   Today na day 13 since President Vladimir Putin send troops enta Ukraine.

   We go bring una all di latest wey dey happun wit dis tori dem as we dey get dem including oda top gist from around di world.

9. 7 March 2022“We bin hear loud explosions, den electricity and water off” – Student wey dey trapped for Sumy

10. 7 March 2022Una bye bye

    Na here we go end today Live Page on di latest news wey dey happun between Ukraine and Russia and around una as dem happun.

    Scroll down to read all di tori wey you bin miss.

    Remember join us tomorrow for more latest tori.

    Na Helen, Faith, Abdulmalik and Onyinye bring una all of today tori for di page.

    Una good night!

11. 7 March 2022Sunday Igboho 'released' to go hospital

    Goment of Benin Republic don release Yoruba Nation Activist, Chief Sunday Adeyemo, alias Sunday Ighoho to allow am go hospital.

    Benin authorities release Igboho on Monday to im doctors under agreement say im no go leave di hospital or Cotonuou for any reason.

    According to one of Igboho lawyer, Yomi Aliyu, wey confam news of in release to BBC,Professor Banji Akintoye and Prof Wole Soyinka make dis medical release possible.

12. 7 March 2022EU go consider adding Ukraine, Georgia and Moldova as members

    European Commission go begin consider EU membership applications from Ukraine, Georgia and Moldova.

    EU ambassadors take di decision to consider di applications, but e go need sign off by di European Council - but dem describe di sign off as just formality.

    Member states' permanent representatives bin discuss di applications, wey dem receive last week, for one meeting today, and agree to invite di Commission to present dia opinion on each.

    However e fit take some time - opinion from di Commission fit take up to 18 months to prepare.

    And if e successful, di process to join di EU dey usually take years.

13. 7 March 20222 police officer among bullion tiffs for Ghana

    Police for Ghana don announce di arrest of some suspects wey get hand for di robbery attack on billion vans for different part of di kontri.

    Di police affairs directorate for Ghana say two police officers dey among di suspects were dem arrest.

    “Preliminary investigation establish di involvement of two policemen among a number of oda suspects,” Alexander Obeng, Director of Public Affairs of di police tok for statement e release on Monday.

    Ghana suffer series of armed robbery attack last year and early dis year wit bullion vans as dia major targets.

14. 7 March 2022Canada go impose sanctions against 10 pipo

    Canada don announce new sanctions against 10 pipo "wey get hand" for di "unjustified invasion" of Ukraine.

    Canada Prime Minister Justin Trudeau, say di 10 pipo include "former and current senior goment officials, oligarchs and supporters of Russia leadership".

    Di Prime Minister wey tok dis one for joint press conference wey im do wit UK and Dutch prime ministers, add say dis dem pick dis pipo from one list wey jailed Russia opposition leader Alexei Navalny bin compile.

15. 7 March 2022Wetin be no-fly zone?

    As we don dey report for some time now, Ukraine President Zelensky want make di West declare no-fly zone over Ukraine.

    But Nato dey resist dis request. Why?

    No-fly zone for war dey aim to stop any aircraft from entering airspace wey dem don ban, usually to prevent attacks or surveillance.

    But to enforce dis ban dem go need to do am by military means.

    No-fly zone ova Ukraine go mean say military forces - specifically Nato forces - go engage directly wit any Russia planes wey dem see for dat sky and shoot dem if necessary.

    Dat go automatically drag Western nations into military combat wit Russia - dramatic escalation to di war.

16. 7 March 2022Police tok how dem find deadi-bodi of missing girl inside Lagos BRT bus

    Di 22 year old Nigerian lady, Ayanwole Oluwabamise, wey miss afta she enter BRT for Nigeria commercial capital Lagos state, don die.

    Lagos state police command confam di death of 'Bamise' for statement on Monday.

    Police bin begin investigate on di disappearance of Oluwabamise wey miss since February for weekend.

    According to di police, di incident allegedly happun on 26 February, 2022 wen Bamise enta di BRT – Lagos transportation scheme - bus from Chevron bus stop, Lekki for Lagos, South West Nigeria.

    Di BRT bin dey go Oshodi around 7:00pm in di evening.

17. 7 March 2022West 'no act early enough' on Russia threat - Truss

    UK Foreign Secretary Liz Truss say di West "no act early enough or decisively enough" to response to Russia President Vladimir Putin build-up of troops for border wit Ukraine.

    "Di reality be say President Putin bin no take threats of deterrence seriously enough," she tell Members of Parliament.

    Wit di invasion of Ukraine, Truss say Russia don "shatter di security architecture or security structure of Europe".

    "Wetin we gatz do now be say we gatz make Nato stronger, we particularly gatz to make di eastern side stronger," she tell House of Commons Foreign Affairs Committee on Monday.

    "We don already send more troops go Estonia, but we still get more to do. We have to dey serious about defence spending, right across Nato."

18. 7 March 2022Russia billionaire call for 'peace as soon as possible'

    Russian billionaire Oleg Deripaska don enta Telegram to call for peace "as soon as possible" for Ukraine.

    Reacting to one TEDtalk wey Israeli historian Yuval Noah Harari do about Russia invasion of Ukraine, im agree wit Harari say "we need peace".

    Deripaska – wey be founder of some of Russia biggest industrial companies – add say di "whole world go dey different, and Russia go dey different" afta di conflict.

19. 7 March 2022Irpin mayor say dem don begin evacuations

    Mayor of Ukraine town of Irpin, near Kyiv, say dem don begin evacuation of civilians.

    Oleksandr Markushyn tell Ukraine media say today evacuation dey peaceful and dem don take about 1,000 people to safety.

    But Markushyn say Russia forces still continue to shell Irpin.

    Im say Ukraine forces don repel attacks by Russian forces and dem don retreat to di border of di town.

    One adviser to di Interior Minister say oda towns to di northwest including Bucha, Hostomel, and Vorzel, now dey under di control of Russian forces and di situation remain critical.