BBC News, Pidgin
Waka go wetin de inside

You’re viewing a text-only version of this website that uses less data. View the main version of the website including all images and videos.

Take me to the main website

Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

  1. Africa Covid-19 infections don reach 68,000

    Di latest data from di African Union Centre for Diseases Control and Prevention show say 2,340 pipo for Africa don die with Covid-19 for Africa.

    Di continent now don get 68,102 cases and 23,184 pipo don recover.

    Lesotho na di only kontri for Africa wey neva record any case of coronavirus and South Africa get di highest number of cases for Africa - 11,350.

    Yesterday, Somalia record di highest number dem don get inside one day. Officials tok say 81 pipo test positive.

    Di total number of confamed cases for di kontri now tanda for 1,170.

  2. Twitter go allow dia staff to work from home 'forever'

    If you be Twitter employee you fit no go back to work from office forever.

    Di company, wey get headquarter for San Francisco, say make im staff of around 5,000 pipo dey work from home since early March sake of di coronavirus pandemic.

    Di arrangement work so well sotay Twitter say im go dey willing to let them continue - if their role allow for am.

    "We dey uniquely positioned to... allow our pipo to work from home. Di past few months don prove am say we fit make am work.

    "So if our employees dey for role wey fit allow dem work from home and dem wan continue to dey do am forever, we go make am happun," CEO Jack Dorsey tok for email wey im send to employee.

    For other employees wey no fit do their jobs permanently from home, di company tok say e dey likely say dem go open their office by di end of di year, but e no go be "before September".

    Twitter get 35 offices worldwide, including for New Delhi, London and Singapore.

    Companies like Facebook and Google don also tell their staff say dem fit work from home for di rest of 2020.

  3. England dey relax dia lockdown as di UK economy don suffer

    Authorities dey encourage pipo for England wey no fit work from home to return to dia workplace today as di UK goment begin dey reduce some lockdown measures.

    Under di new rules, garden centres fit also reopen and pipo fit meet one pesin from outside dia household.

    Meanwhile, pipo fit spend more time outside, meet friend for park and park from dia house.

    But dis change dem no apply for Scotland, Wales and Northern Ireland - wia di message na "stay at home".

    Dem also dey tell pipo wey dey use transport for England to avoid public transport wherever possible and wear face mask.

  4. Una good morning!

    Welcome to our live coverage ontop coronavirus and how e dey affect di world.

  5. Una Goodnight!

    Na for here we go gbab break with our today live coverage ontop coronavirus and how e dey affect di world.

    No forget to scroll down for today tori dem and no also forget to join us tomorrow.

    But before we go, make we leave you with dis NCDC foto of how dem dey grateful to Nurses wey dey help fight Covid-19.

    Remember, make you dey wash your hands.

  6. China wan use 10 days test 11 million pipo for Wuhan

  7. Wen we fit expect vaccine for COVID-19?

  8. Nigeria launch event center wey local newspaper donate as isolation center

      • Author, Ogechi Obidiebube
      • Role, BBC Pidgin, Lagos

    Nigeria Presidential Task Force ontop Covid-19 don launch di event center wey local tori pipo ThisDay donate give goment as isolation center for Abuja.

    Na Nduka Obaigbena donate di facility wey dem dey call 'ThisDay Dome' to support di fight against Covid-19.

    Sahara Foundation, wey be arm of Sahara Group do collaboration to handle di project.

    Before before, dem don use dis facility as event center for some ogbonge music concerts, wia big artistes like American rapper Jay Z bin perform.

  9. Cameroon open airport for Air France, give condition say make passengers show Covid-19 negative test

      • Author, Bongben Jisi
      • Role, BBC Pidgin, Cameroon

    Cameroon authorities don write for aviation director say make e open Douala and Yaoundé airports for Air France one taim every week from May 4 go reach June 30.

    Cameroon bi close e borders for March 17, as one measure for fight Coronavirus, afta deh confirm first case for March 6.

    Just now, kontri don confirm 2689 cases and plenti na pipo weh goment bring back for kontri afta deh lock border.

    Just now de borders still be locked and airport bi di open only for receive Cameroonians dem weh deh block dem for oda kontris and ova 500,000 enta kontri since May 10.

    Letter weh transport minister write for Airport Director show say president Biya order make deh open airport for Air-France business flight.

    Deh flights suppose start from June 4 end for June 30, but de condition na say any man get for show e Covid-19 negative test before deh enta plane.

    Also, deh get for sign agreement say deh go self-quarantine wit dia own moni wen deh enta kontri.

    Air France get for make sure say deh follow de passengers one by one for, and deh get for respect barrier measures, wear masks, authorities add.

    But kontri pipo di wanda why goment open airports only for Air France wen oda companies too dey.

    Some pipo check say France na one of de kontris for Europe weh Covid-19 hit dem badly and e no good for let pipo for dat side enta kontri now.

  10. HIV deaths fit rise by 500,000 for Africa as coronavirus dey worry

      • Author, Princess Igho Williams
      • Role, BBC Pidgin

    More than 500,000 pipo for sub-Saharan Africa fit die between now and next year from Aids-related sickness as Covid-19 pandemic dey worry unless goment move to address di issue.

    One analysis wey World Health Organization (WHO) and UNAids do show say di impact of six-month disruption of antiretroviral (ARV) therapy fit affect di way pipo dey die of HIV just as e happun for 2008, wen more than 950,000 die of HIV inside Africa.

    "Di fearful prediction of say half a million more pipo inside Africa fit die of Aids-related sickness dey like going back to wetin don happun for history," Tedros Adhanom Ghebreyesus, WHO director-general, tok.

    UNAids executive director Winnie Byanyima warn say treatment fit dey disturb as e be say HIV services don dey closed or dem no fit supply ARV therapy because of breakdown for di supply chain.

    WHO oga say kontris need to make sure say those wey dem diagnose with HIV dey stick to treatment and make dem no allow anytin disturb testing services.

  11. WHO do meeting with African traditional medicine expert

      • Author, Fiona Equere
      • Role, BBC Pidgin

    70 traditional medicine experts from African kontries do video meeting for compmputer wit World Health Organisation - WHO on how dem go use traditional melecine to fight coronavirus.

    Dem agree with di health joint bodi say dem need to do clinical trials for all di medicine for di region before dem use am.

  12. Nine-year-old boy be youngest Covid-19 patient to die for Ghana

      • Author, Favour Nunoo
      • Role, BBC Pidgin

    Nine-year-old Ghanaian boy be de youngest Covid-19 patient to die for de country.

    Out of a total 22 deaths, de 9-year-old be de youngest wey de oldest be 82 years.

    Head of Public Health for Ghana Health Service (GHS), Dr Badu Sarkodie talk journalists say so far Greater Accra get de highest regional distribution of deaths.

    De capital city Accra, record 68.2% of Covid-19 related deaths followed by Ashanti Region record 18.2% of deaths Covid-19 related deaths wey Ghana record.

    Dr Badu Sarkodie also add say those wey dey die more get underlying medical conditions like high blood pressure, diabetes, asthma and other diseases which dey expose dem more.

    Latest 427 new cases of Covid-19 wey Ghana Health Service record dey push country total go 5,127.

    Total recoveries still dey stand at 494 wey 22 patients die.

  13. Philippines don extend dia lockdown by eleven weeks

    Philippines don extend di lockdown for di kontri capital Manila to anoda eleven weeks as di kontri dey try manage di spread of coronavirus.

    Dis one mean say Manila wey get more dan half of di kontri infection plus death go dey for lockdown for 80 days.

    Tok tok pesin for di Philippines goment Harry Roque say, di goment dey continue lockdown for di kontri biggest cities of Manila and Cebu.

    “Di lockdown bin get big impact on Covid-19 case but e also affect di economy.”

    Di goment go reduce restrictions for most parts of di kontri wia dem believe say risk of infection don reduce.

  14. Three LGAs for Bauchi State dey go on total lockdown.

    Bauchi state for North East Nigeria don put three areas wey dey share border with Kano state under 10-day total lockdown

    Katagum, Giade and Zaki Local Government Areas of Bauchi state dey start di ten days total lockdown on Tuesday.

    Di Governor of di state, Senator Bala Mohammed announce on Monday say dis decision dey come as di number of coronavirus cases for di area dey increase.

    E also add am say as di total lockdown dey start, authorities go follow do extensive testing of pipo wey dey live for di area and dem go also fumigate di affected areas.

    As at Monday di number of confam Covid-19 cases for di state na 182.

  15. 11 pipo die from Covid-19 for Cameroon in one day

      • Author, Bongben Jisi
      • Role, BBC Pidgin, Cameroon

    11 pipo na im die from Coronavirus for Camreroon on May 11 according to de updates from Public Health Emergency Centre.

    Dis wan don put de number for pipo weh deh don die from dis sick for kontri to 125 .

    Also health authorities confirm 110 new cases for total 2689 Covid-19 cases since March 6 weh Cameroon register de first case.

    Just now 59 more pipo recover for put de number of pipo weh deh recover at 1524 pipo.

    As kontri enta stage two weh dis sick di circulate for community, authorities say na goment e priority for stop de spread of dis sick reduce de number of pipo weh deh di die, and increase de pipo weh deh di recover.

    Minister continue for tell kontri pipo say make deh no stigmatise pipo weh deh get dis sick and make deh go hospital for oda sick dem.

    Authorities di remind population for wash hands wit soap and running wata, use hand sanitiser, cough for inside elbow, wear masks for public, avoid contact wit pesin weh e get sign and keep distance.

  16. Five Covid-19 patients don die for Russia hospital fire

    One fire for St Petersburg hospital don kill five coronavirus patients wey dey for intensive care unit.

    Russian news agency bin report say na one short-circuit for one ventilator cause di fire.

    "Ventilators wey dey work don almost collapse. According to one preliminary data, overload bin dey and one machine come catch fire," tori pipo for Interfax report am, and dem dey quote one source for di St Petersburg emergency department.

    All of di patient wey die bin dey on ventilators.

    Dem don stop di fire and dem don comot 150 pipo from di hospital, di kontri emergency ministry tok. E no dey clear how many pipo wunjure.

    Authorities don launch criminal investigation to torchlight wetin fit cause di incident.

  17. Kano don extend dia lockdown by one week

    Kano state goment don extend dia lockdown for one more week.

    Govnor Abdullahi Ganduje extend di two weeks lockdown wey President Muhammadu Buhari bin impose for di state by anoda one week to stop di spread of di coronavirus pandemic.

    Di state goment say dem make di decision afta dem consult wit federal goment and health sabi pipo.

    So far, coronavirus don kill 32 pipo for di state.

  18. Catholic church for Nigeria donate over 400 hospitals to serve as isolation centre

    Di Catholic Bishop Conference of Nigeria (CBCN) don offer all im 435 health facilities across di kontri for goment to use as COVID-19 isolation centres.

    DiChairman of di Presidential Task Force on COVID-19, Boss Mustapha tok am for di daily presidential task force briefing on Monday.

    He tok say goment fit use all di facilities to tackle di issue of no bed space wey dem bin dey face for di isolation centres wey don dey ground for di kontri.

    Oga Mustapha wey still be di Secretary to di goment of di federation tell tori pipo for di Press briefing say space no dey again for di isolation centres wey dey di kontri and cases of coronavirus infections dey increase for di kontri.

    As at Monday, Di Nigeria Centre for Disease Control, NCDC say di kontri don record 4641 cases, only 902 pipo don recover and dem don record 150 deaths.

  19. Una good morning!

    Welcome to our live coverage ontop coronavirus and how e dey affect di world.

    But first make dis proverb from Abubakar Aliyu ginger you as you begin your day.

  20. Una Goodnight!

    Na for here we go gbab break with our today live coverage ontop coronavirus and how e dey affect di world.

    No forget to scroll down for today tori dem and no also forget to join us tomorrow.

    But before we go, make we leave you with dis NCDC foto of pipo wey dey work hard for dis coronavirus fight but we no dey see dem.

    Remember, make you dey wash your hands.