BBC News, Pidgin
Waka go wetin de inside

You’re viewing a text-only version of this website that uses less data. View the main version of the website including all images and videos.

Take me to the main website

Children fit spread coronavirus if schools reopen?

All di latest tori ontop coronavirus from all ova di world.

Live Coverage

Daniel Semeniworima

  1. Burundi 'pursue' WHO representative comot dia kontri

    Di Ministry of Foreign Affairs for Burundi don give di World Health Organization representative for di kontri 48 hours to leave dia kontri, according to one statement from di ministry wey go viral for social media.

    Dr Walter Kazadi Mulombo, di WHO representative for Burundi and experts for di join body, Pr. Tarzy Daniel, Dr Ruhana Mirindi Bisimwa and Dr Jean Pierre Murunda Nkata get until May 15th to leave according to one statement wey di ministry write.

    Di Burundi foreign affairs Minister, Ezechiel Nibigira no deny or confam di statement for inside telephone interview.

    One pesin wey dey work for di ministry confam give BBC say di statement na genuine one.

    Dem no tok di reason why dem want make dem comot for di kontri, but BBC try follow di WHO representative, Walter Kazadi Mulombo tok.

    Burundi goment dey face tok say dem do election inside coronavirus pandemic.

    Di kontri get 27 cases of coronavirus and one pesin don die wit di disease.

    Dem do plenty political campaigns before di election wey hold for Wednesday. No clear sign of arrangement on how dem fit control di spread of di virus and dis dey cause fear say di virus fit spread anyhow for di kontri.

    For one press briefing on Wednesday to give informate on wetin dey happun for Burundi, di International Crisis Group say goment for Burundi no tok di true number of pipo wey don catch di infection.

  2. Una good morning!

    Una welcome to our live coverage ontop coronavirus and how e dey affect di world.

    But first make una reason dis proverb.

  3. Una Goodnight!

    Na for here we go gbab break with our today live coverage ontop coronavirus and how e dey affect di world.

    No forget to scroll down for today tori dem and no also forget to join us tomorrow.

    But before we go, make we leave you with dis NCDC foto wey dey remind us to dey responsible.

    Make you dey remember to wash your hands.

  4. Workplaces dey turn Covid-19 hotspots as Ghana COVID-19 cases hit 5,408, recoveries now 514

      • Author, Favour Nunoo
      • Role, BBC Pidgin

    COVID-19 infections for Ghana reach 5,408 today after Ghana Health Service record 281 new cases.

    Official data wey dem put out dey show say so far 514 people recover wey 2 more people die.

    Dis dey take de death toll to 24, de Ghana covid-19 website report.

    Region wey get de highest infected rate be Greater Accra plus some 4,141 cases.

    Ashanti region also dey turn hotspot after some market infection for Obuasi. Dem record 726 infections so far.

    Ghana Health Service say workplaces dey turn Covid-19 hotspots, sake of that companies for start dey find ways of managing staff to stop infections.

  5. UN draw ear say poverty for Africa go worry after Coronavirus pandemic

    Di UN don draw ear give say economic wahala wey dis coronavirus pandemic go cause fit comot all the good gains wey Africa don achieve in four years and dem put di cost at $8.5 trillion (£6.9 trillion).

    For dia assessment, dem say more than 30 million pipo go enta into poverty wey go dey really worry dis year, and dis go happun for Africa.

    Di UN dey expect say di rich kontris dem economies go fall by 5%, but for kontris wey dey develop, e go dey tough.

    Alredi, some top politicians don tok say make dem cancel poor kontris dem gbese.

  6. Gov Wike don shift return of Rivers lockdown from tomorrow

      • Author, Karina Igonikon
      • Role, BBC Pidgin, Lagos

    Govnor Nyesom Wike don shift return of total lockdown for Obio/Akpor and Port Harcourt local goment areas inside di oil rich Rivers State for southern Nigeria state from tomorrow to anoda day.

    Di total lockdown wey di govnor put to try stop di spread of coronavirus wey suppose resume on Thursday 14 May 2020 afta di two day break wia im lift di lockdown so pipo fit go buy food and medicine go now happun on Sunday.

    Govnor Wike tok dis one for State broadcast say im observe say e hard well well for pipo to collect money from banks to take big something for di two days wey im give so dem no fit buy food, so im don shift di lockdown to resume on Sunday 17 May, 2020.

    Dis na even as di State record 10 new cases of coronavirus, according to latest informate from Nigeria Centre for Disease Control.

    For now, Govnor Wike say night time curfew go dey for Obio/Akpor and Port Harcourt from 8pm to 6am on Thursday 14 May to Saturday 16 May 2020 before di total lockdown go resume from 8pm on Sunday 17 May till further notice.

    Di Govnor say di lockdown measure na to stop community transmission of Covid-19 and e dey more important now wey dem don record 16 new casss wey be di highest record of new cases for di oil rich state wey bin get 23 cases.

    Im say make pipo endure di small discomfort dem dey suffer as na sacrifice for di commons good come remind dem to always wear dia facemask and closure of all land, sea and air borders still dey in force.

  7. Trump Former aide go serve im remaining sentence for house ontop fear of Covid-19

    US don release former Trump campaign chairman Paul Manafort from prison and im go serve di remainder of im sentence for house ontop fear of Covid-19.

    Im bin don serve over a year out of im seven and half years jail sentence.

    Dem bin convict Manafort for conspiracy and wuruwuru afta one justice department torchlight Russian election interference.

    E get over 2,800 confam Covid-19 cases among US federal prisoners and 50 deaths.

    According to latest informate from di federal Bureau of Prisons (BOP), e get 139,584 federal inmates for federal custody and anoda 11,235 for community facilities, plus around 36,000 staff.

    According to di BOP, 2,818 inmates and 262 staff don test positive for coronavirus.

    Last month, Manafort lawyers bin file for im release to continue im sentence for house for Northern Virginia, dem argue say im "age and underlying health conditions" put am for high risk of infection for prison.

  8. Man chop arrest afta im yab Liberia presido coronavirus feeding programme

    Police for Liberia don arrest one political activist sake of im Facebook post wia im use strong word to yab di goment plan to launch coronavirus feeding programme.

    Menipakei Dumoe wey dey also critic President George Weah, bin yab di idea of di feeding programme.

    Im write for Facebook on Monday: “We no need free bags of rice. I say we di poor for (di capital) Monrovia need AK-47s make our leaders fit take us serious.”

    Police say im post na security threat.

    Before im arrest, oga Dumoe bin defend imsef say im message no mean real guns.

    Im be di acting oga of di big campaign group 'The Council of Patriots' wey organise two mass protests last year against di way oga Weah dey handle di economy.

    Oga Dumoe lawyer, Findley Karnga, dey call for im release say dem dey hold am against di constitution.

    But police tok tok pesin, Moses Carter, tell BBC say authorities get 48 hours to press charges.

    Liberia don dey lockdown since 10 April, wit curfew from 15:00 to 6:00 local time. But e dey hard for authorities to monitor pipo wey dey comot to find food.

    Di goment $25m proposal to feed di poor wey di restrictions don affect for di kontri don get approval from house of parliament ontop condition say dem go specify wia di moni go from come.

  9. Claims of COVID-19 cure only dey for social media - Nafdac

  10. Freedom fighter for Eritrea, Afwerki Abraha don die of coronavirus

    Eritrean Former diplomat, Afwerki Abraha don die for UK after im catch coronavirus.

    According to im family, di respected former liberation fighter, wey be 71 years old, dey intensive care in London for one month, and im no get any underlying health issues.

    “Afwerki Abraha na man wey easily make di transition from fighter to professional and a loyal person,” im colleague and senior diplomat Haile Menkerios tell BBC.

    Before joining di war of independence from Ethiopia, oga Afwerki bin don study political science and dey qualified as a chemist for Russia.

    Im bin go front in 1975 from Germany, where im bin dey live.

    After di war e come become di first Eritrean diplomat dem go post go Ethiopia.

    E come move go London, where im dey officially based from 1996 until 2001.

    After im wife Fatina Ahmedin, an artist and former fighter, bin get car accident for London wey leave am paralysed, di couple decide to stay in di UK.

    One of im relatives tell BBC say oga Afwerki dey devoted to take care of im wife for 20 years “im no leave her alone”.

  11. Wetin you need to know about di man wey wan 'save' Africa from coronavirus

  12. Lesotho don record dia first case of Covid-19

    Lesotho don confam im first case of coronavirus, na im be di last kontri for Africa to record di virus.

    Di mountain kontri dey surrounded by South Africa wey get 11,350 cases of Covid-19.

    Di single case result na from di 81 test wey dem do for pipo wey travel come di kontri from South Africa and Saudi Arabia, di health ministry tok inside statement.

    For many weeks now, pipo bin dey ask how Lesotho dey take manage dey clear of di virus even though movement still dey between di kontri and South Africa.

    Lesotho Finance Minister Moeketsi Majoro, for inside interview wey im do wit South Africa EyeWitness News, beg those wey wan come di kontri from South Africa make dem remain for there as di healthcare system for di kontri no too strong.

  13. Latest tori from across di world

    • Passengers for London say social distancing fit no dey possible as dem resume work today.
    • One three year old baby for South Wales die aft aim mama test positive for Covid- 19.
    • Di European Commission don get guidance for EU kontris to fit resume travel and tourism for dis summer.
    • Di US embassy for Tanzania say coronavirus infection for di kontri capital Dar es Salaam go dey very risky.
    • Niger don reopen mosques and churches afta two months wey dem lockdown
    • Health officials for Sudan for di first time confam cases of coronavirus for di camps wey pipo dey live sake of conflict.
    • Police for arrest one political activist, Menipakei Dumoe sake of im post for Facebook wey im use bad language take rubbish coronavirus feeding programme wey di goment dey plan.
    • Lesotho don confam im first case of coronavirus, na im be di last kontri for Africa to record di virus.

  14. Afta police catch volunteers, deh summon CRM leader, for seek Covid-19 support

    Police arrest volunteers weh deh share free hand sanitisers and masks for Mokolo Market for initiative ‘Survival Cameroon’ weh opposition, Cameroon Renaissance Movement, CRM party leader Maurice Kamto start.

    De tori na say, Maurice Kamto bi launch project bin collect moni online for support fight for Covid-19 as kontri bi among African kontri weh deh get high number for Covid-19 cases.

    Goment through Territorial administration Minister, Paul Atanga Nji bi try for block de bank and mobile, accounts e no waka.

    Authorities say de action for political party for raise moni na illegal act.

    But, wen CRM leaders collect de moni deh first buy Covid-19 test kits and personal protection equipment go give Minister of Public Health, but e deny for take de tins, sotei some doctors vex.

    E explain say deh no follow process for give support, and say make deh go gie de tins for Territorial Administration minister.

    As deh start share de hand sanitisers and masks for kontri pipo for Mokolo market, police arrest six volunteers, charge de volunteers for ‘Rebellion’.

    No bi de first taim weh deh CRM project get problem as deh di distribute protection materials. Deh chase dem for Foumban last week.

    Just now, judicial police don summon Penda Ekoka and Alain Fogue, manager and treasurer for ‘Survival Cameroon’ for go explain for economic and financial unit, for May 15.

    De two officials go answer convocations weh director for Judicial police Dili Jacques sign about de moni weh deh collect for ‘Survival Cameroon’ initiative.

  15. See wetin dis religious leaders tok about goment ban on churches and mosques sake of coronavirus

  16. Coronavirus don enta South Sudan camps

    Health officials for South Sudan don confam cases of coronavirus for inside camps wey pipo dey live sake of fight wey destroy dia houses.

    Two pipo bin catch di virus for inside di camps wey one dey di kontri capital, Juba and di oda one for di northern part of di kontri, Bentiu.

    Health experts bin dey give warning say gbege go happun if di virus spread go camps wey dey over crowded. Di camps na wia about 200,000 pipo dey live for across di kontri.

    Plenty wahala and conflict over di years, don make South Sudan no get any beta health care system for di kontris wey dey African continent.

    South Sudan get 194 confamed cases of di virus.

  17. Over 700 Ghanaians contract coronavirus for dema workplace within one week

  18. Coronavirus spread force Cameroon for stop local football league season

      • Author, Bongben Jisi
      • Role, BBC Pidgin, Cameroon

    Cameroon Football Federation President, Seidou Mbombo Njoya announce for May 12 say, de local league season don end afta deh shine eye for de coronavirus situation for kontri.

    De season stop afta de play 28 matches and as Cameroon confirm 2800 cases for Covid-19.

    Wit de results from de matches weh deh bi don play before, PDW, team for Northwest Cameroon top de league chart for champions afta 54 years.

    Astres of Douala and Yafoot for Elite Two get promotion for Elite One but deh no push any club for lower level.

    For de women top flight league, Louve MINPROFF weh e top de women’s league table become champions for dis season.

    As e dey now, PWD of Bamenda and Cottonsport of Garoua , runner up, go represent Cameroon for Caf competitions; Champions League and Confederations cup for 2020/2021 season.

    Cameroon join oda kontris laik Kenya, Mauritius Island, Burkina Faso, Guinea, Ethiopia, weh deh bi don also stop dia local football leagues.

  19. Lagos goment dey ask pipo to vote if dem want lockown or not

    Authorities for Lagos, Nigeria commercial centre dey ask pipo wey dey live inside di state to vote if dem want anoda lockdown or not.

    For inside tweet for di goment official twitter account, dem ask Lagos residents dis question: "based on di level of compliance on di guidelines wey dey ground to reduce di spread of Covid-19 for Lagos State, make goment impose anoda lockdown or not?".

    Ova 49,000 pipo don cast dia vote already and 1300 pipo like di tweet. Na Friday May 15 voting go end.

    Dis dey come afta di Govnor of di state, Babajide Sanwo-Olu bin complain on Saturday, May 9 say, upon evritin wey authorities don advice pipo, im dey disappointed to still dey see crowd for banks, markets and buses still dey carry full number of passengers.

    Na Lagos get di highest number of Covi-19 cases for di kontri with 1990 cases, 502 pipo don recover from di disease while 33 don die.

  20. 'Oldest woman for Spain' survive coronavirus at 113

    One 113-year-old woman wey dem believe say na she be di oldest woman for Spain don recover from coronavirus, officials tok.

    Dem bin diagnose Maria Branyas with Covid-19 after di country enter lockdown for March.

    But after weeks for isolation, Ms Branyas recover, with just mild symptoms.

    Dis one mean say, she don live through di flu pandemic wey happun between 1918-19, di 1936-39 Spanish Civil War and di coronavirus.

    "Now she don well, she dey wonderful, and she wan speak to explain, to make her reflections, dis na her again, “ her daughter tok.

    Dem born Maria for Mexico for 1901, she get three pikin, one of dem don turn 86, she get 11 grandchildren and di oldest of dem na 60- she also get 13 great-grandchildren.

    She don live for two decades for one care home for di city of Olot.