تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
قدس کې فلسطیني بریدګر اسرائیلي پولیسو ته ځان سپارلی
اسراییلي چارواکي وايي د بیت المقدس ښار دوو جلا سیمو کې د وسله وال سړيو ډزو کې لږ تر لږه اته کسان ټپي شوي دي.
چارواکو ویلي بریدګرو ځايي وخت د شپې ۱:۲۴ بجې تاریخي 'لوېدیځ دېوال' یا حائط البراق ته نږدې پر یوه بس او د موټرو تمځای کې ډزې کړې.
مشکوک بریدګر پولیسو ته ځان سپارلی دی.
د اسرائیلي پولیسو ویاند کان ایلي لیوي اسرائیلي راډیو ته ویلي، "ترهګر زموږ په لاس کې دی".
۲۶ کلن نیول شوی مشکوک بریدګر د ختیځ قدس اوسېدونکی دی، چې ویل کېږي مخکې یې هم جرمي سابقه لرله، خو له وسله والو ډلو سره کوم تړاو یې لا نه دی ثابت شوی.
د پولیسو یوه ویاند ځايي رسنیو ته ویلي دې پېښې ته د مشکوک ترهګریز برید په توګه رسېدنه کېږي.
د رپوټونو له مخې د پېښې قربانیانو کې شپږ سړي او یوه ښځه شامل دي چې د بیت المقدس بېلابېلو روغتونونو ته لېږدول شوي.
د بېړنیو روغتیايي خدماتو چارواکو ویلي د دوو ټپیانو روغتیايي وضعیت نازک دی.
که څه هم تر اوسه د بریدګرو کره شمېر مالوم نه دی خو ځايي رسنۍ وايي پولیس لږ تر لږه د دوو مشکوکو بریدګرو لټون کوي.
پر خواله رسنیو خپرو شویو ویډیوګانو کې د پېښې د ځای شاوخوا پر وسله سمبال پولیس لیدل کېږي.
رپوټونو کې راغلي چې تر ډزو وروسته یهودي عبادت کوونکي په لنډمهاله ډول د لویدېځ دیوال له احاطې له راتلو منع شوي وو.
لوېدیځ دیوال چې عربان یې حائط البراق بولي د یهودانو له سپېڅلو ځایونو ګڼل کېږي او هر کال زرګونه یهودان د زیارت او عبادت لپاره ورځي.
د اسراییلي پولیسو یوه ویاند ویلي د پېښې د ځای امنیت نیول شوی، څېړنې کېږي او د تښتېدلو مشکوکو بریدګرو لټون روان دی.
دا پېښه داسې مهال کېږي چې شاوخوا یوه اوونۍ وړاندې غزې تراړه کې پر فلسطیني وسله والو د اسراییلي ځواکونو بریدونو کې څه نا څه ۴۴ کسان ووژل شول.
فلسطیني وسله والو هم هغه مهال په متقابله توګه د اسراییل پر خاوره د توغندیو بریدونه کول.
د دوی ترمنځ درې ورځني تاوتریخوالي بلاخره د مصر په منځګړیتوب په شوي اوربند پای وموند.