لبنان کې د تېلو پر ټانکر چاودنې ۲۰ کسان وژلي
د عکس سرچینه، Social media
د لبنان په شمال کې د تېلو د یو لېږدونکي ټانکر په چاودنه کې لږ تر لږه ۲۰ کسان وژل شوي دي.
د لبنان سره صلیب ویلي دا پېښه عکار سیمه کې شوې.
دغه سازمان همدا راز د سیمې روغتونونو ته د دې پيښې د ۷ ټپیانو او د وژل شویو د جسدونو د لېږدېدو خبر ورکړی.
خو د لبنان سره صلیب له دې سره هممهاله دا هم ویلي چې د سیمې روغتونونو کې وینې ته بېړنۍ اړتیا ده.
پر ټولنیزو شبکو خپاره شوي انځورونه د یکشنبې د سهار په لومړیو ساعتونو کې یوه لویه اورلګېدنه ښيي.
تر اوسه د دې چاودنې لامل مالوم نه دی.
لبنان په دې وروستیو کې د تېلو له کمښت سره مخامخ او په دې لړ کې وخت ناوخت د تېلو د ټانکرونو د غلا راپورونه هم ورکړ شوي دي.
د لبنان پوځ د شنبې پر ورځ ویلي و چې د تېلو د پلورونکو لخوا زرګونه لیټره احتکار شوي تېل او نور سوند توکي یې نیولي دي.
د لبنان پخواني لومړي وزیر سعد حریري د عکار چاودنه د بیروت په بندر کې د تېر کال له چاودنې سره پرتله کړې ده.
ښاغلي حریري په ټویټر ولیکل: ''د عکار وژنه د (بیروت) په بندر کې له وژنې سره توپیر نه لري. ''
هغه د لبنان د ولسمشر په ګډون له جګپوړو چارواکو غوښتي چې مسؤلیت ومني او استعفاء ورکړي.
