سېنټکام: له افغانستان د امریکايي ځواکونو وتلو چاره ۹۵ سلنه بشپړه شوې
د عکس سرچینه، Getty Images
له افغانستان د امریکايي ځواکونو د وتلو په هکله د امریکايي پوځ مرکزي قومندانۍ یا سېنټکام تازه بیان کې ویلي، په ټول کې له افغانستان د ځواکونو د اېستلو چاره څه باندې ۹۵ سلنه بشپړه او ټاکل شوې د راتلونکې اګست میاشتې تر ۳۱مې بشپړه شي.
مرکزي قومندانۍ افغانستان ته د لویو درستیزانو کمیټې د مشر جنرال فرانک مېکنزي د وروستي سفر یادولو سره وايي، په دې سفر کې له افغان دولت سره د امریکا د دوامداره پوځي مرستې په اړه وروستي معلومات شریک شول.
په دې سفر کې د طالبانو د بریدونو د مخنیوي لپاره له افغان ځواکونو هوايي ملاتړ یوه مهمه موضوع وه.
د مرکزي قومندانۍ په بیان کې د ښاغلي مېکنزي له قوله ویل شوي، پر طالبانو د امریکا هوايي ځواک بریدونه په تېرو څو ورځو کې زیات شوي.
هغه ویلي، که طالبان بریدونو ته دوام ورکړي امریکا چمتو ده چې د لوړې کچې هوايي ملاتړ ته دوام ورکړي.
مرکزي قومندانۍ د جنرال مېکنزي له قوله وايي، د سفر پرمهال یې افغان حکومت ته ډاډ ورکړی چې د طالبانو د بریدونو دفع کولو لپاره به له افغان ځواکونو هوايي ملاتړ ته دوام ورکړي.
د هغه په خبره، دا ملاتړ به له کابل او له افغانستان بهر د امریکا له پوځي اډو کېږي.
دې امریکايي جنرال د ستراتیژیکې ملګرتیا په کچه له افغان ځواکونو سره د مالي، استخباراتي، سلا مشورې او لوژستیک په برخو کې د مرستو د دوام ډاډ ورکړی.
له افغان ځواکونو د ناټو ملاتړ
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
په دا مهال د ناټو سرمنشي ین ستولتنبرګ د افغانستان سیاسي وضعیت ننګونکی بولي او د خبرو له لارې د افغان کشالې پر پای ته رسېدو ټینګار کوي.
نوموړی یوه ټوېټ کې وايي، پرون یې له افغان ولسمشر سره ټلیفوني اړیکه درلوده او د دغه هېواد د کشالې د حل لپاره یې د خبرو پر دوام ټینګار وکړ.
د هغه په خبره، ناټو مالي ملاتړ او بهر کې روزنې سره د افغان ځواکونو ملاتړ ته دوام ور کوي.
دا ډاډ او هوايي بریدونه داسې مهال کیږي چې لسګونه ولسوالۍ د افغان ځواکونو او طالبانو ترمنځ لاس په لاس شوې دي.
د امریکا له خوا د افغان ځواکونو هوايي ملاتړ ته په غبرګون کې طالبانو ویلي دا د دوحې تړون خلاف عمل دی او پایلې به ولري.
خو طالبانو ته هم ګوته نیول کیږي چې د دوحې تړون له مخې یې د القاعده په ګډون له ترهګرو ډلو سره اړیکي نه دي پرې کړي، تاوتریخوالی یې نه دی کم کړی او له افغان دولت سره یې د سولې جدي خبرې نه دي کړې. خو طالبان وايي دې تړون ته ژمن دي.
