تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پاکستاني پلاوي کابل کې له افغان چارواکو سره خبرې پیل کړې
افغانستان او پاکستان نن یکشنبه په کابل کې پر افغان سوله، سوداګرۍ او نورو دوه اړخیزه اړیکو د لوړې کچې دوه ورځنۍ خبرې پیل کړې.
دې خبروکې ګډون لپاره افغانستان لپاره د پاکستان د ځانګړي استازي محمد صادق خان په مشرۍ یو لوړ پوړی پاکستانی پلاوی یکشنبه کابل ته رسېدلی.
یاد پلاوي یکشنبه کابل کې په دریو جلا ناستو کې د افغانستان بهرنیو چارو او ملي امنیت شورا له چارواکو او د پاکستان لپاره د ولسمشر محمد اشرف غني له ځانګړي استازي عمر داودزي سره کتلي دي.
د افغانستان لپاره د پاکستان د لومړي وزیر ځانګړي استازي محمد صادق خان وړاندې لیکلي وو، د پاکستان د بهرنیو چارو وزیر شاه محمود قریشي استانبول کې د افغانستان او ترکیې د بهرنیو چارو له وزیرانو سره د افغان سولې په تړاو مهمې خبرې درلودې.
تېره ورځ د افغانستان د ملي امنیت شورا سلاکار حمد الله محب وویل، د پاکستان یو پلاوی کابل ته "راروان دی."
ښاغلي محب وویل دا پاکستانی پلاوی د دواړو هېوادونو ترمنځ څه موده وړاندې بحرین کې د لیدنو د پیل شوې لړۍ په دوام کابل ته راځي.
نوموړي دا هم ویلي وو چې په دغو خبرو کې د دوه اړخیزو اړیکو د پیاوړتیا، د افغانستان او پاکستان ترمنځ د ستونزو په حل او تخنیکي مسایلو بحثونه کېږي.
ښاغلی محب وايي: "موږ تل ویلي چې باید پاکستان سره ستونزه حل شي. لاسپوڅي یې ښايي هر ډول ادعا ولري، خو واقعیت له سترګو پناه نه دی."
کابل ته د پاکستاني پلاوي تر رسېدا وروسته د افغان ولسمشر لومړي مرستیال امرالله صالح پر ټوېټر لیکلي، "د پاکستان له لوري د امونیم نایټریټ کارول او پوځي چاودېدونکو توکو رسول طالبانو ته د لا ډېر تولید او د سړک غاړې ماینونو د جوړولو لا ډېره وړتیا ورکړې. دا وژونکې وسلې په اسانۍ ولسي وګړي وژل شي چې د بشریت پر ضد جرم دی".
ښاغلي صالح پر یوناما او ملګرو ملتونو غږ کړی چې په دې اړه دې خپل غږ اوچت کړي.
کابل ته د پاکستاني پلاوي د سفر په اړه د ولسمشر غني د ځانګړي استازي څرګندونې
د پاکستان لپاره د افغان ولسمشر ځانګړي استازي محمد عمر داووزي بي بي سي سره ځانګړې مرکه کابل ته د پاکستاني پلاوي سفر په راتلونکې کې د "لویو هوکړو " لپاره مهم وباله.
ښاغلي داوودزي وویل دا یو "مذاکراتي او تخنیکي پلاوی " دی چې د مسلو پر عمق او جزئیات بحث کوي او د " لویو تفاهمونو " لپاره لاره هواروي.
هغه وویل چې دې خبرو کې د افغان سوله یوه مهمه مسله ده او پاکستان دې برخه کې مهم رول لوبولی شي. ښاغلي داوودزي ټېنګار وکړ چې په کار ده د "همکارۍ یو چتر " رامنځته شي او د هغه په سیوري کې پاکستان "ټېنګه او لازمه " مرسته وکړي.
د پاکستان لپاره د افغان ولسمشر ځانګړي استازي وویل افغانستان له پاکستان غواړي چې طالبان قانع کړي چې اوربند وکړي او د سولې معنا لرونکې خبرې وشي.
ښاغلي داوودزي وویل : " پاکستان باید افغانستان دا ثابته کړي چې رښتیني او جدي مرسته کوي او نتیجه به یې انشاء الله ژر راووځي ".
څو ورځې وړاندې افغانستان ته د پاکستان د پارلمان یو جګپوړی پلاوی را روان و، چې د کابل حامد کرزي هوايي ډګر د تړل کېدو له امله وځنډېد.
د پاکستان د پارلمان مشر اسد قیصر په مشرۍ دغه پلاوی د دریو ورځو لپاره افغانستان ته راته. افغان چارواکو د هوايي ډګر د تړل کېدو لامل هوايي ډګر کې د پخوانیو باروتو شنډول بللي وو چې په وینا یې د یاد پلاوي الوتکې ته د نه کېناستو خبره شوې ده.
د افغانستان لپاره د پاکستان ځانګړي استازي محمد صادق ویلي وو، د دې سفر موخه د اختلافونو هوارول پر دوه اړخیزو اړیکو خبرې کول وو.
کابل ته د پاکستان دا پلاوی داسې مهال سفر کوي، چې له وسله والو طالبانو سره په قطر کې د افغان حکومت د سولې مذاکرات درېدلي دي.
په پام کې وه چې د روانې اپرېل میاشتې په وروستیو کې استانبول کې د افغان سولې په تړاو کنفرانس جوړ شي، خو دا چې طالبانو وویل، تر هغو چې بهرني ځواکونه نه وي وتلي، دوی د سولې خبرې نه کوي.