کورونا وېروس: عمران خان وايي، پاکستان کې حالت کابو دی

د نړۍ په لر او بر کې د کورونا وېروس خپرېدو لړۍ روانه ده او تر اوسه په ۱۸۷ هېوادونو کې د کوویډ - ۱۹ ناروغانو شمېر څلور میلیونو کسانو ته نژدې شوی دی.

تر اوسه د دغې ناروغۍ له کبله د ۲۷۵۰۰۰ کسانو مړینه تایید شوې ده. یوازې د امریکا متحدو ایالتونو کې د تایید شویو ناروغانو شمېر له ۱۲ لکه کسانو اوښتی دی، چې د بل هر هېواد پرتله پنځه برابر ډېر شمېر دی.

د پاکستان سند ایالت کې په تېرو ۲۴ ساعتونو کې پر کورونا وېروس د اخته ۱۰۸۰ نويو ناروغانو نومونه ثبت شوي دي.

د صوبې اعلی وزیر مراد علي شاه وايي، دا د پاکستان په یوه صوبه کې په څلروېشتو ساعتونو کې د نویو ثبت شویو ناروغانو تر ټولو لوی شمېر دي.

ښاغلي شاه دا یو اندېښمنونکی حالت بللی او په وینا یې 'داسې ښکاري چې موږ د اوج پر لور روان یو. '

په ټول پاکستان کې د کوويډ - ۱۹ ناروغانو شمېر له ۲۸ زرو کسانو اوښتی دی او له ۱۰۷۰۰ ناروغانو سره یې تر ټولو ډېر شمېر په سند کې دی.

بل لور ته د پاکستان لومړی وزیر عمران خان وايي، د نړۍ نورو هېوادونو پرتله پاکستان کې حالات کابو دي او له حفاظتي تدبیرونو سره وضعیت کې نور ښه والی راتلای شي.

لومړي وزیر په اسلام اباد کې د کورونا مخنیوي مبارزې کارډلې په غونډه کې وویل، له ځینې کوویډ - ۱۹ ناروغانو سره نامناسبه رویه د زغملو نه ده او دا وېره، تره خپروي.

نوموړي له پاکستانیانو وغوښتل چې که اړتیا وویني، باید سملاسي معاینات وکړي.

بریتانوي چارواکي وايي، په ټول هېواد کې د کورونا وېروس تایید شویو ناروغانو شمېر ۲۱۵۲۶۰ کسانو ته رسېدلی او تر اوسه په هېواد کې ۳۱۵۸۷ کسان د دغې ناروغۍ له کبله مړه شوي دي.

د ټرانسپورټ وزیر ګرانټ شپس وايي، تېره ورځ ۳۸۹۶ نوي ناروغان ثبت شوي او په یوه ورځ کې ۳۴۶ کسان له همدې کبله مړه شوي دي.

بل لور ته په یوه تازه څېړنه کې ویل شوي، چې د چاغښت ښکار کورونا ناروغان د نورو پرتله له زیات احتمالي خطر سره مخامخ دي.

د بریتانیا عامې روغتیا ادارې این ایچ ایس پر شمېرو تر سره شوې څېړنه ښيي چې د چاغښت ښکار کورونا ناروغانو کې د مړینې احتمال دوه برابره زیاتېږي.

د څېړونکو په وینا که له چاغښت سره د زړه رنځ یا شکرې ناروغۍ هم په څېړنه کې شاملې شی، نو دا خطر به نور هم زیات شي.

کورونا وېروس: هره ورځ به د ولسمشر ټرمپ طبي معاینه کېږي

کورونا وېروس: عمران خان د شنبې له ورځې د محدودیتونو نرمولو اعلان وکړ

د بریتانوي روغتونونو جدي پاملرنې په څانګه کې بستري ۳۴ اعشاریه پنځه سلنه ناروغانو وزن د دوی د بدن پرتله زیات ښوول شوی، ۳۱ سلنه د چاغښت ښکار وو او ۷ سلنه خورا زیات چاغ ول.

په دې توګه د سالم بي ایم ای (باډي ماس انډیکس) لرونکو کسانو شمېر ۲۶ سلنه او پرتله یې د چاغښت ښکار کسانو شمېر ۷۳ سلنې ته رسېده.

بل لور ته د بیلاروس ولسمشر الکزاندر لوکاشنکو په ټوله نړۍ کې د کورونا وېروس مخنیوي احتیاطي تدبیرونه له پامه غورځولي او د دویمې نړیوالې جګړې د بري یادګاري مراسیم یې د ولس په ګډون کې تر سره کړل.

ښاغلي لوکاشنکو د کورونا ډار لامل ذهني فشار بللی او په وینا یې دا له وېروسه ډېر خطرناک دی.

نوموړی ادعا کوي چې قرنطین به اقتصاد ته زیان واړوي. ولسمشر نه یوازې د فوټبال سیالیو د روان ساتلو اجازه ورکړې، بلکې خلکو ته یې ویلي چې ګډون پکې وکړي.

بل لور ته د بیلا روس نورو اروپايي متحدینو د دویمې نړیوالې جګړې پای ته رسېدو ۷۵ کلیزه د قرنطین په حالت کې په پټه خوله ولمانځله.

په سلواکیا کې بیا چارواکو ویلي، دوو میاشتو کې لومړی ځل پر کورونا وېروس د اخته نوي ناروغ نوم مخې ته نه دی راغلی.

دغه هېواد کې د قرنطین محدودیتونو کې نرمښت هم پیل شوی دی. د مې پر نهمه نېټه سلواکیا کې د ۱۴۵۵ تایید شویو ناروغانو یادونه او پر همدې ناروغۍ د ۲۶ کسانو مړینه تایید شوې وه.