د اوکراینۍ الوتکې پېښه: د ایران له اعترافه وروسته د انصاف غوښتنې
د ایراني چارواکو له هغه اعترافه وروسته چې وايي، په تهران کې یې اوکراینۍ ملکي الوتکه په تېروتنه ویشتلې، اوس د هغو ۱۷۶ کسانو لپاره د انصاف غوښتنه شوې، چې د دغې الوتکې غورځېدو له کبله ووژل شول.
د اوکراین ولسمشر او د کاناډا لومړی وزیر د دغې غوښتنې له مخکښانو دي.
بل لور ته پر خواله رسنیو داسې تصویري کلیپونه خپاره شوي، چې په ایران کې دننه هم دې لړ کې احتجاج شوی او احتجاجیانو د مذهبي مشر ایت الله خامنه يي د استعفا غوښتنه کړې.
د اوکراین هغه بوینګ ډوله الوتکه د چهارشنبې پر ورځ په عراق کې پر امریکايي اډو د ایران له توغندیز بریده څو ساعته وروسته پلازمېنه تهران کې وغورځېده.
ایران په بغداد کې د خپل یوه لوړ پوړي پوځي قومندان قاسم سلیماني له وژل کېدو وروسته هغه برید کړی و، چې په امریکايي ډرون برید کې ووژل شو.
د یوکراین ولسمشر ولودمیر زېلېنسکي په یوه فېسبوک پیغام کې له ایرانه غوښتي چې ''مسئوول کسان باید محاکمه شي، مړي اړوند ځایونو ته ورسوئ، تاوان ورکړئ، اوکرایني څېړونکو ته د پلټنو لپاره بشپړ لاسرسی ورکړئ او له دیپلوماتیکو لارو بښنه وغواړئ. ''
د عکس سرچینه، AFP
ښاغلي زېلېنسکي له دې مخکې له فرانسوي ولسمشر ایمانویل ماکرون سره خبرې کړې او هوکړه شوې چې فرانسوي کارپوهان به د غورځېدلې الوتکې 'توربکس ' پرانیزي او د الوت ریکارډ به ګوري.
ښاغلي ماکرون هم ویلي، رسماً به یوه نړیواله څېړنه پیل کړي.
د اوکراین لویه څارنوالي په احتمالي توګه په لوی لاس د خلکو وژلو او الوتکې ویجاړولو له اړخه دغه موضوع څېړي.
بل لور ته د کاناډا لومړي وزیر جستین ترودو د پېښې قربانیانو د خپل، خپلوانو لپاره د 'شفافیت او انصاف ' غوښتنه کړې.
د عکس سرچینه، IRNA
د عکس سرچینه، IRNA
د عکس سرچینه، IRNA
د برتانیا لومړي وزیر بوریس جانسن د ایران اعتراف 'یو مهم لومړی ګام ' بللی او د یوې خپلواکې پلټنې غوښتنه یې کړې ده.
نوموړی وايي، اوس مهمه دا ده چې تاوتریخوالی باید کم شي او 'ټول مشران باید له دیپلوماتیکو لارو مخکې لاړ شي. '
یو شمېر نورو اروپايي مشرانو هم په ورته توګه د تاو تریخوالي کموالي، شفافې پلټنې او له پېښې د سبق زده کولو غوښتنه کړې، خو د امریکا متحدو ایالتونو تر اوسه په دې تړاو رسماً څه نه دي ویلي.
