د اقلیمي بدلون په اړه د ملګرو ملتونو تازه رپوټ او خبرداری

د ملګرو ملتونو د یو تازه رپوټ له مخې د نړۍ په کچه د اقلیمي بدلون ځېنې اغېزې دومره جدي شوې دي چې بېرته عادي حالت ته د وضعیت ستنېدل ناشوني ښکاري.

خو رپوټ وایي، لا هم وخت شته چې د وضعیت لا خرابېدو مخه ونیولی شي او په ځینو برخو کې د ښه والي تمه هم شته.

د اقلیم د بدلون په اړه د دولتونو پلاوي (IPCC) وايي، په انسانانو او حیواناتو د دې بدلون د تطبیق وړتیا خطرناکې کچې ته رسیدلې ده.

د دې ارزونې له مخې، د نړۍ له ۴۰ سلنې ډیر نفوس د اقلیمي بدلون پر وړاندې "ډیر" زیان منونکی دی.

دا هیله هم شته که د ځمکې ګرمښت درجه له ۱.۵ درجې سانتي ګرېډ پورته نه شي، د اقلیم بدلون له کبله زیانونه به را کم شي.

د IPCC یوه مدیره، پروفیسوره ډېبرا رابرټس وايي: "زموږ راپور په ښکاره ډول ښیې هغه ځایونه چې خلک پکې اوسیږي او کار کوي کیدای شي ویجاړ شي، هغه ایکوسیستمونه چې موږ یې په لیدلو لوی شوي یو او د انسانانو د کلتور او ژبې د الهام یوه بنسټیزه برخه ده، کیدای شي له منځه لاړ شي.

"دا یوه مهمه شېبه ده. زموږ رپوټ دا په ډاګه ښيي که موږ غواړو د اقلیمي بدلون د بدو اغېزو مخه ونیسو، نو باید همدې لسیزه کې لاس په کار شو."

دا د دریو ارزونو په لړ کې دویم رپوټ دی چې د نړۍ د اقلیم څیړونکو د مخکښې ادارې لخوا خپور شوی.

د دې سازمان لومړی رپوټ، چې د اګست په میاشت کې خپور شو، د ځمکې په اقلیمي سیسټم باندې د بشري فعالیتونو اغیزې یې روښانه کولې.

نوی رپوټ د اقلیم د بدلون لاملونه، اغیزې، او حل لارې یې په ګوته کوي، او څرګند شواهد وړاندې کوي چې تودوښه څنګه په ټولو ژوندیو شیانو اغیزه کوي.