د امریکا ولسمشر ټرمپ وایي چې ایران د یوه جوړجاړي غوښتنه
کوي، خو په همدې حال کې پر ایران او لبنان د اسرائیلو بریدونه روان دي.
اسرائیل وایي، د دوی هوايي ځواک د ایران په لوېدیځ کې د
توغندیو توغولو پر ځایونو ځایونو تر اوسه شاوخوا ۲۰ بریدونه کړي دي. دا وروسته له هغه دي چې نن سهار اسرائیل اعلان وکړ چې د اصفهان ښار او
نورو سیمو کې یې پراخ بریدونه کړي دي.
د لبنان دولتي خبري اژانس راپور ورکړی، چې د جګړې له پیل
راهیسې چې امریکا او اسرائیل پر ایران بریدونه پیل کړل، د وژل شویو شمېر له ۱۱۰۰کسانو اوښتی دی. اسرائیل پوځ لا هم د لبنان په سويل کې هوايي
او ځمکني بریدونه کوي.
اسرائیلي پوځ ویلي، د ایران له لوري توغندي ورغلي دي. د
بېړنیو خدماتو ادارې ماګان ډیوډ اډوم مسوولینو ویلي، په شمالي
اسرائیل کې د توغندي په برید کې یو کس وژل شوی دی.
په نړیواله کچه هېوادونه د انرژۍ د لوړېدونکو بیو د کنټرول
لپاره ګامونه پورته کوي. پولنډ د سون توکو مالیه کموي، جرمني د پټرولو بیو د کنټرول
لپاره اقدامات تصویب کړي، او سویلي کوریا پلان لري چې د سکرو انرژي زیاته کړي او د
اتومي برېښنا کارونه پراخ کړي.
د ټرمپ د کابینې لومړۍ غونډه:
ټرمپ ویلي چې ایران د سولې جوړجاړي ته لېوال دی او تهران
ته یې خبرداری ورکړی چې د سولې پلان تعقیب کړي. خو ایران بیا بیا دا خبرې رد کړې
دي.
ټرمپ دغه راز ادعا کړې چې ایران ورته د “ډالۍ” په توګه
اجازه ورکړې چې ۱۰ د تېلو ټانکرونه د هرمز تنګي له لارې تېر شي.