وروستی, د فرانسې ولسمشر ته د پزشکیان ګیله؛ د امریکا چلند "له شا په چړې د وهلو غوندې دی"
د ایران ولسمشر مسعود پزشکیان د فرانسې له ولسمشر ایمانوېل مکرون سره په خبرو کې د امریکا چلند "له شا په چړې/خنجر د وهلو غوندې" بللی. هغه ویلي چې واشنګټن اوس خپله ډېپلوماسي په "ګواښونو کولو، فشار راوړلو او د بندیزونو په لګولو" باندې ورټوله کړې ده او ایران باور نه شي پرې کولی.
د ایران ولسمشرۍ ماڼۍ په دې اړه په یوه خبرپاڼه کې ویلي چې تهران دوه ځلې له امریکا سره خبرې پیل کړې خو هر ځل له مذاکراتو سره هممهاله پر ایران پوځي بریدونه شوي دي.
په اعلامیه کې د ښاغلي پزشکیان له لوري ټینګار شوی چې د اغېزمنو خبرو لپاره باید جګړه پای ته ورسېږي او دا ضمانت باید وي چې بیا به هېڅکله هم امریکا د ایران پر ضد "له دوښمنۍ ډک ګام" نه اوچتوي.
پزشکیان همداراز ویلي چې په بشپړ ډول د هرمز تنګي د پرانیستلو په اړه خبرې هم هغه وخت ممکنې دي چې امریکا خپله سمندري کلابندي پای ته ورسوي.
د ایران د ولسمشرۍ ماڼې د بیان له مخې، د فرانسې ولسمشر ایمانوېل مکرون د اوربند ملاتړ کړی او منلې یې ده چې د امریکا له لوري سمندري محاصره او پر لبنان د اسرائيل بریدونه له اوربنده په سرغړونه کې راځي. ښاغلي مکرون زیاته کړې چې فرانسه له امریکا سره د ایران په خبرو او پر تهران د بندیزونو په لرې کولو کې د اسانچاري په توګه مرسته کولی شي.
د ایران او فرانسې د ولسمشرانو ترمنځ دا څرګندونې داسې مهال تبادله کېږي چې د امریکا ولسمشر ډونلډ ټرمپ پرون ماښام د خپل اټکل له مخې ویلي چې له ایران سره جګړه به ژر پای ته ورسېږي خو په وینا یې، ایران ته د اټومي وسلو لرلو "اجازه" نه شي ورکولی.