د نرېندرا مودي‌ مور د ۹۹ کلونو په عمر مړه شوه

د هند لومړي‌وزیر نرېندرا مودي مور 'هیرابېن مودي' د ۹۹ کلونو په عمر مړه شوې ده.

ښاغلي مودي د جمعې سهار پر خپل ټویټر ولیکل چې "یوه پرتمینه پېړۍ پای ته ورسېده."

د اغلې هیرابېن وروستي مراسم د هند لوېدیځ ګجرات ایالت کې چې د دوی پلرنۍ ځای دی، ترسره شوي.

هغه تېره چارشنبه د روغتیايي‌ وضعیت تر خرابېدو وروسته روغتون کې بستر شوې وه.

د هند لومړی وزیر نرېندرا مودي به اکثرآ د مهمو مناسبتونو او جشنونو  پر مهال د هغې دعا اخیستلو لپاره ورته.

هغه د جون پر ۱۸مه د خپلې مورې د ۹۹یمې کلیزې پر ورځ په ټویټر لیکلي و چې د ده فکر، شخصیت او پر ځان بارو د هغې د قربانیو پایله ده.

ښاغلی مودي په وروستي ځل د ډسمبر پر ۴مه له خپلې مور سره عام محضر کې راڅرګند شوی و.

نوموړی هغه مهال خپل پلرني ایالت ګجرات ته د ایالتي اسمبلۍ ټاکنو کې ګډون لپاره تللی و.

هیرابېن د مودي له کشري ورور او د هغه کورنۍ سره اوسېده.

بېلابېلو هندي سیاستوالو د نوموړې پر مړینه خواشینې ښودلې.

په دې لړ کې دفاع وزیر راج نات سنګ پر خپل ټویټر لیکلي چې د دغه خبر اورېدو سخت خپه کړی.

هغه زیاته کړې چې "د مور مړینه داسې تشه رامنځته کوي‌ چې ډکول یې ناممکن وي."

د هند مخکیني مرستیال ولسمشر هم د مودي سره خواشینې ښودلې.

هیرابېن د ۱۹۲۳م کال د جون پر ۱۸مه د ګجرات ایالت مېهسانه ولسوالۍ کې زېږېدلې وه.‌

د هند لومړي وزیر لیکلي‌ و چې هغې سخت ژوند تېر کړی او ګڼې ستونزې ګاللې دي.